.jpg)
បុរសដែលសង្ស័យសម្លាប់កូនស្រីបង្កើតអាយុ២ឆ្នាំត្រូវបានតុលាការចេញដីកាឃុំខ្លួន កាលពីថ្ងៃទី២៧ មីនា នៅខេត្តពោធិ៍សាត់។ រូបថត សហការី
ពោធិ៍សាត់ៈ បុរសចំណាស់ម្នាក់ដែលសង្ស័យថាច្របាច់កកូនស្រីអាយុ ២ ឆ្នាំស្លាប់ ត្រូវបានចៅក្រមសាលាដំបូងខេត្តពោធិ៍សាត់ ចេញដីកាឃុំបណ្តោះអាសន្នក្នុងពន្ធនាគារខេត្ត កាលពីថ្ងៃទី ២៧ មីនា បន្ទាប់ពីសមត្ថកិច្ចចាប់ខ្លួនបាន ១ ថ្ងៃ ដែលករណីនេះកើតហេតុនៅភូមិព្រែក ឃុំរាំងទិល ស្រុកកណ្តៀង ខេត្តពោធិ៍សាត់។
ដីកាបង្គាប់ឱ្យឃុំខ្លួនបណ្តោះអាសន្ន កាលពីថ្ងៃទី ២៧ មីនា ឆ្នាំ ២០២២ របស់លោកចៅក្រមស៊ើបសួរ សែង លីណា ដែល ភ្នំពេញ ប៉ុស្តិ៍ ទទួលបាននៅថ្ងៃទី ២៩ មីនា បានបង្ហាញថា ជនត្រូវចោទក្នុងសំណុំរឿងនេះ ឈ្មោះ ម៉ូវ ទួក ហៅ ម៉ឺយ ទក អាយុ ៥៦ ឆ្នាំ។ ជននេះត្រូវដាក់ឱ្យនៅក្រោមការពិនិត្យពីបទហិង្សាដោយចេតនាមានស្ថានទម្ងន់ទោសដោយសារមរណភាពជនរងគ្រោះ។
ដីការបស់តុលាការបញ្ជាក់ថា៖ «បញ្ជាឱ្យភ្នាក់ងារមានសមត្ថកិច្ច នៃកម្លាំងសាធារណៈនាំជនត្រូវចោទដែលមានដូចខាងលើទៅពន្ធនាគារ ឬមណ្ឌលឃុំខ្លួន ខេត្តពោធិ៍សាត់»។
លោក ម៉ូ លីដា ស្នងការរងទទួលផែនការងារនគរបាលព្រហ្មទណ្ឌ នៃស្នងការដ្ឋាននគរបាលខេត្តពោធិ៍សាត់ប្រាប់ ភ្នំពេញ ប៉ុស្តិ៍ នៅថ្ងៃទី ២៩ មីនា ថា ជនត្រូវចោទឈ្មោះម៉ូវ ទួក ជាឪពុកបង្កើត របស់ក្មេងស្រីរងគ្រោះឈ្មោះ ទួក ទូច អាយុ ២ ខួប។ ជនត្រូវចោទ ត្រូវបានស្ត្រីជាម្តាយក្មេងរងគ្រោះដាក់ពាក្យប្តឹង កាលពីថ្ងៃទី ២៥ មីនា ហើយ ១ ថ្ងៃបន្ទាប់ ត្រូវបានសមត្ថកិច្ចរបស់លោកចាប់ខ្លួននៅភូមិព្រែក ឃុំរាំងទិល ស្រុកកណ្តៀង។
បើតាមលោក ម៉ូ លីដា ជនត្រូវចោទជាមនុស្សផឹកស្រាស្រវឹងខួបរាល់ថ្ងៃ ហើយនៅថ្ងៃកើតហេតុ គាត់បានប្រើហិង្សា របៀបចាប់កមួល តែនៅថ្ងៃទី ២៤ មីនា ដែលជាថ្ងៃប្រើអំពើហិង្សានោះ ក្មេងរងគ្រោះមិនទាន់ស្លាប់ទេ។ បន្ទាប់ពីទទួលរងអំពើហិង្សាមក ម្តាយរបស់ក្មេងបានយកនាងទៅសម្រាកព្យាបាលនៅមណ្ឌលសុខភាពឃុំរាំងទិល ហើយក្មេងក៏មានសុខភាពគ្រាន់បើអាចញ៉ាំបបរបាន។ តែរហូតដល់ថ្ងៃទី ២៦ មីនា ឆ្នាំ ២០២២ ក្មេងរងគ្រោះមានអាការធ្ងន់ធ្ងរ ហើយក៏ដាច់ខ្យល់ស្លាប់នៅមណ្ឌលសុខភាពឃុំរាំងទិល។
លោកថ្លែងថា៖«ករណីនេះមានខាងអង្គភាពការពារកុមារ CPU របស់ប្រទេសអូស្ត្រាលី និងនាយកដ្ឋានបច្ចេកទេសក្រសួងមហាផ្ទៃសហការជាមួយនគរបាលព្រហ្មទណ្ឌខេត្តពោធិ៍សាត់[ពិនិត្យមើលមូលហេតុនៃការស្លាប់របស់ក្មេង]។ ក្មេងរងគ្រោះត្រូវបានមន្ត្រីជំនាញពិនិត្យឃើញថា ស្ទះសរសៃឈាមបេះដូង»។
លោក ចាន់ សុខា នាយនគរបាលប៉ុស្តិ៍ឃុំរាំងទិល ឱ្យដឹងនៅថ្ងៃទី ២៩ មីនា តាមស្ត្រីជាម្តាយរបស់ក្មេងរងគ្រោះ ថា គ្រួសាររបស់គាត់មានកូនជាមួយគ្នាចំនួន៥នាក់ ប្រុស២នាក់ ស្រី២នាក់ ហើយក្មេងស្រីរងគ្រោះជាកូនទី៤ និងកូនម្នាក់ទៀតកំពុងនៅក្នុងផ្ទៃគាត់។ ចំពោះឈ្មោះម៉ូវ ទួក ម្នាក់នេះមានប្រពន្ធ៣នាក់មកហើយ រីឯស្ត្រីម្តាយក្មេងរងគ្រោះជាប្រពន្ធទី៤។
លោកបន្តថា នៅមុនពេលកើតហេតុថ្ងៃទី ២៤ មីនា ប្រពន្ធរបស់ជនត្រូវចោទបាននាំកូនៗចំនួន៣នាក់ជិះទូកទៅរកត្រីដោយទុកក្មេងរងគ្រោះនៅជាមួយឪពុក។ លុះពេលល្ងាចត្រឡប់មកពីរកត្រីវិញ ក្មេងរងគ្រោះមានអាការមិនស្រួលខ្លួន ហើយស្ត្រីជាម្តាយបានសួរកូន ទើបដឹងថា ឪពុកវាយកូន។ នៅថ្ងៃដដែលនោះម្តាយក្មេងបានយកកូនទៅមណ្ឌលសុខភាពឃុំ។
លោកបញ្ជាក់ថា៖ «នៅថ្ងៃទី ២៥ មីនា ម្តាយក្មេងដាក់ពាក្យប្តឹងមកខ្ញុំដោយសារកូនគាត់ស្លាប់។ បន្ទាប់ពីខ្ញុំទទួលបណ្តឹងបាន ១ ថ្ងៃ ទើបកម្លាំងសមត្ថកិច្ចរបស់ខ្ញុំចាប់ឪពុកក្មេង»៕
