.jpg)
ជនសង្ស័យ និងគ្រឿងញៀន ៦៥ គីឡូក្រាមដែលសមត្ថកិច្ចចាប់បានពីថ្ងៃទី ៣ មីនា។ រូប នគរបាល
ភ្នំពេញៈ ក្នុងត្រីមាសទី ១ ឆ្នាំ ២០២២ នេះ កម្លាំងមន្ទីរប្រឆាំងគ្រឿងញៀន បានបង្ក្រាបបទល្មើសគ្រឿងញៀនបានចំនួន ១ ៦៩៤ ករណី និងឃាត់ខ្លួនជនសង្ស័យបានចំនួន ៣ ៧១០ នាក់។ ចំនួននេះមានការថយចុះប្រមាណជាង ២០ ភាគរយ បើធៀបទៅនឹងត្រីមាសទី ១ ឆ្នាំ ២០២១។ ប៉ុន្តែចំនួនគ្រឿងញៀនដែលចាប់បានមានការកើនឡើងជាង ៣ ៤០៥ គ.ក្រ ឬកើនលើស ១៩ ដង បើធៀបទៅនឹងត្រីមាសទី ១ ឆ្នាំ ២០២១។
លោក អ៊ិន សុង នាយករងមន្ទីរប្រឆាំងគ្រឿងញៀនបានថ្លែងបែបនេះនៅក្នុងកិច្ចប្រជុំបូកសរុប «សភាពការណ៍ និងលទ្ធផលកិច្ចប្រតិបត្តិការត្រីមាសទី ១ ឆ្នាំ ២០២២ និងទិសដៅការងារត្រីមាសទី ២ ឆ្នាំ ២០២២ របស់មន្ទីរប្រឆាំងគ្រឿងញៀន» ដែលត្រូវបានធ្វើឡើងកាលពីថ្ងៃទី ២៨ ខែមីនា ឆ្នាំ ២០២២។
លោកបានថ្លែងប្រាប់ថ្នាក់ដឹកនាំ និងមន្ត្រីសរុប ៨០ នាក់ ដែលចូលរួមនៅក្នុងកិច្ចប្រជុំនោះថា នៅក្នុងត្រីមាសទី ១ ឆ្នាំ ២០២២ នេះបទល្មើសគ្រឿងញៀនបានថយចុះចំនួន ៤៣៦ ករណី បើធៀបទៅនឹងត្រីមាសទី ១ ឆ្នាំ ២០២១ ដែលមានចំនួនរហូតដល់ ២១៣០ ករណី។ ចំណែកជនសង្ស័យដែលត្រូវបានចាប់ខ្លួនក្នុងបទល្មើសគ្រឿងញៀនក៏មានការថយចុះ ចំនួន ៩៦២ នាក់ផងដែរ ធៀបទីនឹងត្រីមាសទី ១ ឆ្នាំ ២០២១ ដែលមានការចាប់ឃាត់ខ្លួនបានរហូតដល់ ៤ ៦៧២ នាក់។
លោកបញ្ជាក់ថា៖ «ថ្វីបើតួលេខនៃការបង្ក្រាបបទល្មើសគ្រឿងញៀន ក៏ដូចជាតួលេខនៃជនសង្ស័យ ដែលត្រូវបានបង្ក្រាបចាប់ក្នុងបទល្មើសគ្រឿងញៀន ក្នុងត្រីមាសទី ១ ឆ្នាំ ២០២២ នេះ មានការថយចុះប្រមាណជាង ២០ ភាគរយ បើធៀបទៅនឹងរយៈពេលដូចគ្នាកាលពីឆ្នាំមុន ប៉ុន្តែវត្ថុតាងគ្រឿងញៀនដែលត្រូវបានបង្ក្រាបចាប់បាននៅក្នុងត្រីមាសទី ១ ឆ្នាំ ២០២២ នេះមានការកើនឡើងជាង ៣ ៤០៥ គ.ក្រ ឬកើនលើស ១៩ ដងបើធៀបទៅនឹងត្រីមាសទី ១ ឆ្នាំ ២០២១ ដែលមានត្រឹមតែជាង ១៧៤ គ.ក្រ ប៉ុណ្ណោះ»។
បើតាមលោក អ៊ិន សុង វត្ថុតាងគ្រឿងញៀនដែលត្រូវបានរឹបអូសពីការបង្ក្រាបបទល្មើសសរុបមានចំនួនជាង ៣,៥៨ តោន ក្នុងនោះមេតំហ្វេតាមីន ប្រភេទម្សៅក្រាម (ICE) ចំនួនជាង ៦៣០,៨០ គ.ក្រ, មេតំហ្វេតាមីនគ្រាប់ (WY) ៨៦,២១ ក្រាម, ហេរ៉ូអ៊ីន (Heroin) ៣៧០,៦៤ ក្រាម, អ៊ិចស្តាស៊ី (MDMA) ៨៤,២៨ គ.ក្រ, កេតាមីន (Ketamine) ជាង ២,៨៣ តោន, នីមេតាហ្សេប៉ាម (Nimetazepam) ជាង ១០,២៦ គ.ក្រ និង កាទីណូន (Cathinone) ១៩ គ.ក្រ។ ចំណែកសារធាតុគីមីផ្សំប្រមាណ ២៥,០៦ តោន, កញ្ឆាក្រៀមប្រមាណ ៥៥,៩ គ.ក្រ និងកញ្ឆាស្រស់ ៦៩៥២ដើម។
ដោយឡែកមធ្យោបាយ សម្ភារ ពាក់ព័ន្ធបទល្មើស ដែលបានចាប់យករួមមានរថយន្ត ៣៧ គ្រឿង, ម៉ូតូ ៣៨៧ គ្រឿង, ទូរស័ព្ទ ១ ៣៨៨ គ្រឿង, លុយខ្មែរជាង ១៧,២០ លានរៀល, លុយអាមេរិក ៣ ២១០ ដុល្លារ, លុយថៃ ៣ ២១០ បាត, ជញ្ជីង ៧៥ គ្រឿង, អាវុធខ្លី ០៣ ដើម, ឧបករណ៍ប្រើប្រាស់វេចខ្ចប់ និងម៉ាស៊ីនសំយោគកែច្នៃគ្រឿងញៀនមួយចំនួនធំ។
ទន្ទឹមនឹងនេះ លោក ម៉ក់ ជីតូ អគ្គស្នងការរងនគរបាលជាតិទទួលបន្ទុកប្រឆាំងបទល្មើសគ្រឿងញៀនបានជំរុញឱ្យកងកម្លាំងសមត្ថកិច្ចបង្ក្រាបបទល្មើសគ្រឿងញៀនទាំងអស់ត្រូវបន្តពង្រឹងកិច្ចសហប្រតិបត្តិការគ្នាឱ្យកាន់តែប្រសើរថែមទៀត ទាំងក្នុងក្របខ័ណ្ឌជាតិ និង អន្តរជាតិ នៅក្នុងការស្រាវជ្រាវ កំណត់មុខសញ្ញាជនល្មើសទីតាំងស្នាក់នៅ រក្សាទុកជួញដូរ និងកែច្នៃគ្រឿងញៀនឱ្យបានច្បាស់លាស់ ដើម្បីឈានដល់ការបង្ក្រាបចាប់ជនល្មើសព្រមៗគ្នា ប្រកបដោយប្រសិទ្ធភាព។
លោកមានប្រសាសន៍ថា៖ «ក្នុងនាមយើងជាយុទ្ធជនប្រឆាំងជាមួយបទល្មើសគ្រឿងញៀន ក្នុងនាមយើងជាអ្នកអនុវត្តច្បាប់ យើងត្រូវស្វែងយល់អំពីសភាពការណ៍ពាក់ព័ន្ធបរទេស ពាក់ព័ន្ធអន្តរជាតិ តំបន់ ពិសេសពាក់ព័ន្ធប្រទេសកម្ពុជាយើង» ។
លោកបានបន្តថា ក្នុងស្ថានភាពដែលពិភពលោក ក៏ដូចកម្ពុជាបាននិងកំពុងជួបប្រឈមនូវវិបត្តិនៃជំងឺឆ្លង Covid-19 នោះសកម្មភាពសេដ្ឋកិច្ចមួយចំនួនធំត្រូវបានផ្អាកសកម្មភាពផលិតកម្ម និងសេវាកម្ម ប៉ុន្តែផ្ទុយទៅវិញ ក្នុងរយៈពេលដូចគ្នានេះ និន្នាការផលិត ចរាចរ និងជួញដូរគ្រឿងញៀនខុសច្បាប់នៅលើសកលលោក នៅតែបន្តកើនឡើងឥតឈប់ឈរ។ នៅក្នុងវិធានការជាបន្តបន្ទាប់ទៅមុខទៀត លោក ម៉ក់ ជីតូ បានជំរុញឱ្យកម្លាំងសមត្ថកិច្ចត្រូវបន្តពង្រឹងការគ្រប់គ្រងត្រួតពិនិត្យការឆ្លងកាត់ព្រំដែន និងការដឹកជញ្ជូនទំនិញគ្រប់ប្រភេទរួមទាំងបញ្ញើប្រៃសណីយ៍ឱ្យបានហ្មត់ចត់ និងម៉ឺងម៉ាត់ ដើម្បីបង្ការ ទប់ស្កាត់ និងបង្ក្រាបការនាំចូលគ្រឿងញៀនខុសច្បាប់។ ពង្រឹងវិធានការគ្រប់គ្រងត្រួតពិនិត្យការនាំចូល និងការប្រើប្រាស់សារធាតុគីមីផ្សំ ដោយអនុវត្តឱ្យបានម៉ឺងម៉ាត់បំផុត ទៅតាមវិធានបច្ចេកទេស និងត្រូវដកពិសោធ ធ្វើបច្ចុប្បន្នភាពជាប្រចាំសំដៅបង្ការមិនឱ្យសារធាតុគីមីផ្សំធ្លាក់ក្នុងដៃឧក្រិដ្ឋជន យកទៅកែច្នៃធ្វើជាសារធាតុញៀនជាដាច់ខាត និងត្រូវបន្តលើកកម្ពស់គុណភាពសមត្ថភាពមន្ត្រីអនុវត្តច្បាប់គ្រឿងញៀនតាមរយៈការបើកវគ្គបណ្តុះបណ្តាលជំនាញប្រតិបត្តិការស៊ើបអង្កេតបទល្មើសគ្រឿងញៀន និងសម្អាតប្រាក់ជាដើម។
លើសពីនេះ លោកក៏បានជំរុញឱ្យបង្កើនកិច្ចសហប្រតិបត្តិការជាមួយភ្នាក់ងារអនុវត្តច្បាប់គឿងញៀនអង្គការអន្តរជាតិជាពិសេសជាមួយនឹងបណ្តាប្រទេសដែលមានព្រំដែនជាប់នឹងប្រទេសកម្ពុជា មានដូចជាថៃ វៀតណាមឡាវ៕
វីដេអូ៖
