កំពង់ឆ្នាំង/បាត់ដំបងៈ អាជ្ញាធរខេត្តជុំវិញបឹងទន្លេសាបបានបន្តចុះផ្សព្វផ្សាយពីវិធានការរបស់រដ្ឋាភិបាល ក្នុងការបង្ក្រាបបទល្មើសជលផលដល់ប្រជាសហគមន៍នេសាទ និងស្រាវជ្រាវកំណត់មុខសញ្ញាជនប្រព្រឹត្តបទល្មើស ដើម្បីកសាងសំណុំរឿង បញ្ជូនទៅតុលាការ និងចាត់វិធានការតាមផ្លូវច្បាប់ដោយគ្មានការលើកលែង។
ជាក់ស្ដែងអាជ្ញាធរខេត្តកំពង់ឆ្នាំងពីថ្ងៃទី ២៨ ខែមីនា បានចុះបង្ក្រាបចាប់ជនសង្ស័យក្នុងបទល្មើសជនផលម្នាក់ទៀតដល់លំនៅឋាន បន្ទាប់ពីជនសង្ស័យលួចឆ្មក់ប្រព្រឹត្តបទល្មើសនេសាទ ដោយប្រើប្រាស់កាណូតល្បឿនលឿន និងឧបករណ៍ឆក់ត្រី រួមជាមួយអួនក្រឡាល្អិតខុសច្បាប់ ក្នុងភូមិសាស្ត្រ ភូមិចុងកោះ និង ភូមិកណ្ដាលក្នុងសង្កាត់ផ្សារឆ្នាំង ក្រុងកំពង់ឆ្នាំង ហើយបានព្យាយាមបើកគេចខ្លួន។ នេះបើតាម លោក តាត សីហាក់ មន្ត្រីរដ្ឋបាលជលផល ខេត្តកំពង់ឆ្នាំង ដែលបានចូលរួមនៅក្នុងប្រតិបត្តិការនេះ។ ក្រោមការសម្របសម្រួលផ្នែកច្បាប់ពីព្រះរាជអាជ្ញាអមសាលាដំបូងខេត្តកំពង់ឆ្នាំង ជនសង្ស័យឈ្មោះ ឈឿង រដ្ឋា ភេទប្រុស អាយុ ២២ ឆ្នាំ មានលំនៅភូមិចុងកោះ សង្កាត់ផ្សារឆ្នាំង ត្រូវបានចាប់ឃាត់ខ្លួននៅម៉ោង ១១:៣០ នាទីព្រឹក ថ្ងៃទី ២៨ ខែមីនា។
លោកថា៖ «ជនសង្ស័យរូបនេះជាមុខសញ្ញាចាស់ដែលតែងតែប្រព្រឹត្តបទល្មើសនេសាទខុសច្បាប់ ដោយប្រើឧបករណ៍ឆក់នាពេលកន្លងមក។ នៅពេលចុះបង្ក្រាបចាប់ជនសង្ស័យសមត្ថកិច្ចយើងក៏បានចាប់រឹបអូសវត្ថុតាង រួមមានម៉ាស៊ីនឆក់ត្រជាក់ ១ គ្រឿង និងកាណូតបាឡាស្មាច់ បំពាក់ដោយម៉ាស៊ីន ៦ សេះល្បឿនលឿន ១ គ្រឿងផងដែរ»។
បើតាមលោក សីហាក់ ចាប់តាំងពីមានបទបញ្ជារបស់លោក នាយករដ្ឋមន្ត្រី ហ៊ុន សែន ឱ្យបង្ក្រាបចាប់ជនប្រព្រឹត្តបទល្មើសជលផលឱ្យអស់ ដោយប្រើគ្រប់លទ្ធភាព និងមធ្យោបាយ ដើម្បីសង្គ្រោះធនធានមច្ឆជាតិនៅក្នុងតំបន់បឹងទន្លេសាបមក កម្លាំងសមត្ថកិច្ចចម្រុះនៃរដ្ឋបាលខេត្តកំពង់ឆ្នាំ បានបង្ក្រាបចាប់ជន-សង្ស័យក្នុងបទល្មើសនេសាទបានចំនួន ៣ នាក់ហើយ។ ពួកគេត្រូវបានតុលាការបង្គាប់ឱ្យនាំយកទៅឃុំខ្លួននៅពន្ធនាគារដោយចោទប្រកាន់តាមមាត្រា ៩៨ នៃច្បាប់ស្ដីពីជលផល។
ចំណែកអភិបាលខេត្តកំពង់ឆ្នាំង លោក ស៊ុន សុវណ្ណារិទ្ធិ បានប្រាប់ភ្នំពេញប៉ុស្តិ៍ថា ក្រៅពីចុះស្រាវជ្រាវ និងបង្ក្រាបបទល្មើសនេសាទនៅតាមដងទន្លេ ស្ទឹង ព្រែក ក្នុងតំបន់បឹងទន្លេសាប ក្នុងជំហានដំបូងនេះ អាជ្ញាធរបានប្រកាសផ្សព្វផ្សាយឱ្យប្រជានេសាទទាំងអស់ត្រូវបង្ហាញខ្លួន និងប្រគល់ឧបករណ៍ឆក់បែបទំទើបទាំងអស់ទៅមន្ត្រីជំនាញ។
លោកបន្តថា៖ «រហូតមកដល់ពេលនេះ ប្រជានេសាទចំនួន ៣ ស្រុកបានសហការ និងប្រគល់ឧបករណ៍ឆក់ចំនួន ៣០៨ គ្រឿង មកដល់មន្ត្រីជំនាញ»។
នៅទី ២៩ មីនា លោក សុខ លូ អភិបាលខេត្តបាត់ដំបងបានប្រាប់ភ្នំពេញប៉ុស្តិ៍ថា នៅពេលនេះ លោកកំពុងបន្តដឹកនាំកម្លាំងបញ្ជាការឯកភាពខេត្តបាត់ដំបង ចុះពិនិត្យស្ថានភាព និងពង្រឹងការបង្រាបបទល្មើសនេសាទនៅក្នុងភូមិសាស្ត្រ ស្រុកសង្កែ និងស្រុកឯកភ្នំ ដោយមានការរុះរើ និងបំផ្លាញចោលនូវឧបករណ៍នេសាទខុសច្បាប់មួយចំនួន។ ប៉ុន្តែមិនមានការចាប់ឃាត់ខ្លួន ជនសង្ស័យណាម្នាក់នោះទេ។ លោកថ្លែងថា៖ «នៅខេត្តបាត់ដំបងមិនមានបទល្មើសនេសាទជាដុំកំភួននោះឡើយ»។
ទោះយ៉ាងណាលោក សុខ លូ បានដាក់បទបញ្ជាឱ្យកងកម្លាំង និងមន្ត្រីគ្រប់មន្ទីរ អង្គភាព ក្រោមចំណុះរដ្ឋបាលខេត្តបាត់ដំបង រួមសហការជាមួយអាជ្ញាធរមូលដ្ឋាន និងប្រជាសហគមន៍នេសាទចុះស្រាវជ្រាវកំណត់ទីតាំង មុខសញ្ញាជនប្រព្រឹត្តបទល្មើសនេសាទ ដើម្បីឈានដល់ការបង្ក្រាបចាប់ជនល្មើសឱ្យបានទាន់ពេលវេលា និងដោយគ្មានការលើកលែង។ លោកថា៖ «យើងត្រូវរួមគ្នាទប់ស្កាត់បទល្មើសនេសាទនៅតំបន់បឹងទន្លេសាប ក្នុងភូមិសាស្ដ្ររបស់យើងឱ្យបានទោះបីបទល្មើសនោះមានទ្រង់ទ្រាយធំ ឬតូចក៏ដោយ»។
ទន្ទឹមនឹងនេះលោកបានប្រាប់ដល់មន្ដ្រីដែលធ្លាប់មានការពាក់ព័ន្ធទៅនឹងបទល្មើសត្រូវប្រញាប់ដកខ្លួនចេញជាបន្ទាន់ បើពុំនោះទេនឹងត្រូវប្រឈមមុខច្បាប់ដោយមិនត្រូវមានការលើកលែងជាដាច់ខាត។
ស្រដៀងគ្នានេះ លោក តេង ច័ន្ទណាត ស្នងការនគរបាលខេត្តសៀមរាបបានប្រាប់ភ្នំពេញប៉ុស្តិ៍ថា កាលពីថ្ងៃទី ២៧ ខែមីនា ក្រុមការងារច្រមុះថ្នាក់ជាតិបានចុះពិនិត្យទីតាំងជាក់ស្ដែងក្នុងតំបន់អភិរក្សចំនួន ២ កន្លែង ដើម្បីដាក់កម្លាំងថ្នាក់ជាតិប្រចាំការនៅទីនោះ និងត្រៀមរៀបចំផែនការដើម្បីបោសសម្អាតបទល្មើសជលផលនៅលើបឹងទន្លេសាបជាពិសេសនៅក្នុងខេត្តសៀមរាបទាំងអស់តែម្ដង។
លោកបានបញ្ជាក់ថា៖ «នៅថ្ងៃនោះយើងមិនបានចុះបង្ក្រាបបទល្មើសអីទេ គ្រាន់តែមើលទីតាំងក្នុងតំបន់អភិរក្សទាំងមូលនៃខេត្តសៀមរាប។ នៅថ្ងៃនេះ កម្លាំងចម្រុះថ្នាក់ខេត្តបានបន្តស្រាវជ្រាវ កំណត់មុខសញ្ញាជនប្រព្រឹត្តបទល្មើស ឬអ្នកពាក់ព័ន្ធយកលុយយកកាក់ពីបទល្មើស ដើម្បីមានចំណាត់ការតាមផ្លូវច្បាប់»។
យោងមាត្រា ៩៨ នៃច្បាប់ស្ដីពីជលផល ជនទាំងឡាយណាដែលបានប្រព្រឹត្តបទល្មើសដោយប្រើឧបករណ៍ឆក់ និងស្បៃមុងគ្រប់ប្រភេទខុសពីច្បាប់កំណត់ ត្រូវផ្ដទ្ទាទោសដាក់ពន្ធនាគារពី ៣ ឆ្នាំទៅ ៥ ឆ្នាំ ខណៈមាត្រា ១០១ នៃច្បាប់នេះបានកំណត់ថា អ្នកដែលបានប្រព្រឹត្តបទល្មើស ដោយប្រើមង ឬអួនគ្រប់ប្រភេទ ដែលមានក្រឡាតូចជាង ១ សង់ទីម៉ែត្រ ក្នុងដែនទឹកសាបត្រូវផ្ដទ្ទាទោសដាក់ពន្ធនាគារពី ១ ខែទៅ ១ ឆ្នាំ និងពិន័យជាប្រាក់ពី ១ លានរៀលទៅ ៥ លានរៀល។
ចំណែកមាត្រា ១០២ នៃច្បាប់នេះ ចែងថា ប្រសិនបើសកម្មភាពបទល្មើសនោះប្រព្រឹត្តឡើងដោយមន្ត្រីអាជ្ញាធរដែនដី មន្ត្រីនគរបាល និងមន្ត្រីអាជ្ញាធរផ្សេងទៀតដោយបានអន្តរាគមន៍ដោយផ្ទាល់ ឬប្រយោលត្រូវផ្ដន្ទាទោសដាក់ពន្ធនាគារពី ១ ឆ្នាំទៅ ៣ ឆ្នាំ និងពិន័យជាប្រាក់ពី ៥ លានរៀលទៅ ៥០ លានរៀល៕