.jpg)
វ៉ាក់សាំងជំនួយពីចិនពេលដឹកមកដល់កម្ពុជាពីថ្ងៃទី ២៩ មីនា ។ ហេង ជីវ័ន
ភ្នំពេញៈ វ៉ាក់សាំងកូវីដ ១៩ ប្រភេទស៊ីណូវ៉ាក់ចំនួនជាង ១,៥ លានដូសក្នុងចំណោម ៥ លានដូស ដែលជាជំនួយរបស់រដ្ឋាភិបាលចិនផ្តល់ជូនរាជរដ្ឋាភិបាល និងប្រជាជនកម្ពុជាបានដឹកមកដល់រាជធានីភ្នំពេញនាព្រឹកថ្ងៃទី ២៩ ខែមីនា រីឯនៅសល់ប្រមាណជា ៣,៥ លានដូសទៀត ត្រូវដឹកមកដល់នៅថ្ងៃទី ៣០ ខែមីនា ឆ្នាំ ២០២២នេះ។
វ៉ាក់សាំង ៥ លានដូសនេះជាចំណែកមួយក្នុងចំណោមវ៉ាក់សាំងចំនួន ២០ លានដូសដែលប្រធានាធិបតីចិន លោក ស៊ី ជីនភីង បានសន្យាផ្តល់មកដល់ប្រទេសកម្ពុជា។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាលបានប្រាប់ក្នុងពេលលោកស្រីចុះទៅទទួលវ៉ាក់សាំងនេះ នៅព្រលានយន្តហោះអន្តរជាតិភ្នំពេញថា កម្ពុជាទទួលបានវ៉ាក់សាំង ៥ លានដូសក្នុងជំហានទី ១ ហើយនៅសល់ ១៥ លានដូសទៀតខាងក្រសួងនឹងពិភាក្សាគ្នាថា តើនឹងអាចមានតម្រូវការនៅពេលណា។
លោកស្រីមានប្រសាសន៍ថា៖ «នៅពេលដែលកម្ពុជាមានតម្រូវការវ៉ាក់សាំងទៀត ភាគីចិននឹងចាត់ចែងរៀបចំបញ្ជូនវ៉ាក់សាំងដែលនៅសល់ ១៥ លានដូសនេះ តាមតម្រូវការរបស់យើង។ យើងអាចនឹងស្នើចិនដឹកវ៉ាក់សាំងដែលជាជំហានទី ២ នៅក្រោយខែកញ្ញា ដោយសារតែយើងនឹងទទួលវ៉ាក់សាំងបន្ថែមទៀតពីយន្តការកូវ៉ាក់ចំនួន ៧,៥ លានដូសចាប់ពីដើមខែមេសា ដល់ចុងខែកញ្ញា»។
ទាក់ទងនឹងការទទួលវ៉ាក់សាំងនេះយ៉ាងណាទៀតនោះ លោកស្រីបានបញ្ជាក់ថា ក្រុមការងារនឹងពិភាក្សាបន្ថែមទៀតជាមួយនឹងគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសទៀត។
លោកស្រី យក់ សម្បត្តិ បានថ្លែងថា រាជរដ្ឋាភិបាលនៅតែបន្តជំរុញឱ្យមានការចាក់វ៉ាក់សាំងកូវីដ ១៩ នេះឱ្យបានគ្រប់ៗគ្នា ជាពិសេសកុមារដែលមានអាយុពី ៣ ទៅ ៥ ឆ្នាំ ដើម្បីកាត់បន្ថយនូវអត្រាឆ្លង ឈឺ និងការបាត់បង់ជីវិតផងដែរពីវីរុសកូវីដ ១៩។
លោកស្រីបានបញ្ជាក់ថា៖ «វ៉ាក់សាំងជាយុទ្ធសាស្ត្រសំខាន់ណាស់ ដើម្បីជួយឱ្យប្រជាជនកម្ពុជា ជាពិសេសបងប្អូនជនជាតិបរទេសនៅកម្ពុជាបានរួចផុតពីការឆ្លង ឈឺ និងស្លាប់ដោយសារជំងឺនេះផងដែរ»។
ប្រទេសចិនជាប្រទេសមួយដែលបានផ្តល់ជំនួយជាវ៉ាក់សាំងបង្ការជំងឺកូវីដ ១៩ ដល់ប្រទេសកម្ពុជា ដោយបូករួមជាមួយនឹងវ៉ាក់សាំង ២០ លានដូសនេះទៀត ចិនបានផ្តល់ជំនួយសរុបចំនួនជាង ២៨ លានដូសហើយ ហើយកម្ពុជាក៏បានបញ្ជាទិញវ៉ាក់សាំងពីប្រទេសចិនជាង ២៨ លានដូសផ្សេងទៀតផងដែរ។
មន្ត្រីជាន់ខ្ពស់នៃក្រសួងសុខាភិបាលរូបនេះបានបន្ថែមថា៖ «ខ្ញុំគិតថា មិនមានប្រទេសណាដែលផ្តល់វ៉ាក់សាំងមកប្រទេសកម្ពុជាច្រើនដូចប្រទេសចិននោះទេ ប៉ុន្តែជាមួយគ្នានេះយើងក៏បានធ្វើការជាមួយប្រទេសជាដៃគូដូចជា យន្តការកូវ៉ាក់ ប្រទេសអូស្ត្រាលី ប្រទេសប៉ូឡូញ សហរដ្ឋអាមេរិក ប្រទេសហុងគ្រី និងប្រទេសអ៊ីតាលីដែលនឹងផ្តល់វ៉ាក់សាំងមកកម្ពុជាចំនួន ១ លានដូសផងដែរនៅថ្ងៃទី ៦ ខែមេសា ខាងមុខនេះ»។
មន្ត្រីនៃស្ថាតទូតចិនប្រចាំប្រទេសកម្ពុជាដែលបានចុះទៅទទួលវ៉ាក់សាំងនាព្រឹកថ្ងៃទី ២៩ ខែមីនា ដែរនោះ បានលើកឡើងថា ភាគីចិននឹងបន្តជំរុញធ្វើយ៉ាងណាផ្តល់វ៉ាក់សាំងមកប្រទេសកម្ពុជាឱ្យបានទាន់ពេលវេលាទៅតាមតម្រូវការសម្រាប់ការចាក់ជូនប្រជាពលរដ្ឋ។
លោកបានប្រាប់ថា៖ «ចិននិងកម្ពុជាគឺជាមិត្តដែកថែប និងជាមិត្តគ្រប់រដូវកាល ដូចនេះបើខាងភាគីកម្ពុជាត្រូវការជំនួយពីខាងចិន យើងនឹងខិតខំក្នុងការជួយកម្ពុជាផងដែរ»។
មន្ត្រីរូបនេះបានបន្ថែមថា ក្រោមការដឹកនាំរបស់លោកនាយករដ្ឋមន្ត្រី ហ៊ុន សែន កម្ពុជាទទួលបានលទ្ធផលល្អប្រសើរគួរឱ្យកត់សម្គាល់ពីដំណើរការនៃការចាក់វ៉ាក់សាំងប្រឆាំងនឹងមេរោគកូវីដ ១៩ ហើយអត្រាចាក់វ៉ាក់សាំងនៅកម្ពុជាមានតួលេខខ្ពស់ជាងគេមិនមែនត្រឹមក្នុងតំបន់នោះទេ តែក៏មានតួលេខខ្ពស់នៅក្នុងពិភពលោកផងដែរ។
គួរបញ្ជាក់ថា លោក ស៊ី ជីនភីង ប្រធានាធិបតីនៃសាធារណរដ្ឋប្រជាមានិតចិនបានប្រកាសផ្តល់វ៉ាក់សាំងចំនួន ២០ លានដូសមកដល់កម្ពុជាក្នុងជំនួបតាមទូរស័ព្ទជាមួយលោកនាយករដ្ឋមន្ត្រី ហ៊ុន សែន កាលពីថ្ងៃទី ១៨ ខែមីនា កន្លងទៅនេះ។
លោក ហ៊ុន សែន បានលើកឡើងតាមរយៈបណ្តាញសង្គមហ្វេសប៊ុករបស់លោក នៅថ្ងៃទី ២៩ ខែមីនា ថា ប្រទេសចិន គឺជាអ្នកដែលបានជួយវ៉ាក់សាំងបង្ការជំងឺកូវីដ ១៩ ដំបូងគេមកកាន់ប្រទេសកម្ពុជា។ ក្នុងនោះវ៉ាក់សាំងជំនួយចំនួន ៦០ ម៉ឺនដូសត្រូវបានដឹកមកដល់ប្រទេសកម្ពុជាជាលើកដំបូងនៅថ្ងៃទី ៧ ខែកុម្ភៈ ឆ្នាំ ២០២១។
លោកបានបន្តថា៖ «ដើម្បីគាំទ្រកម្ពុជាលើការប្រយុទ្ធប្រឆាំងជំងឺកូវីដ ១៩ និងការពារអាយុជីវិតពលរដ្ឋកម្ពុជាពីជំងឺរាតត្បាតសកលមួយនេះ ប្រទេសចិនបានផ្តល់ជំនួយជាបន្តបន្ទាប់ផងដែរ។ មកដល់ពេលនេះ ចិនបានផ្តល់ជំនួយវ៉ាក់សាំងមកកាន់កម្ពុជាសរុប ២៨ ៧២៤ ៨០០ ដូស ក្នុងនោះ ២០ លានដូសជាជំនួយថ្មី»។
មកទល់ពេលនេះកម្ពុជាបានចាក់វ៉ាក់សាំងជូនប្រជាពលរដ្ឋអាយុចាប់ពី ៣ ឆ្នាំឡើងបានរហូតដល់ជាង ៩២ ភាគរយនៃចំនួនប្រជាពលរដ្ឋសរុប។
លទ្ធផលដ៏ល្អប្រសើរលើការចាក់វ៉ាក់សាំងនេះ ដោយសារកម្ពុជាបានយកវ៉ាក់សាំងចិន ធ្វើជាបង្អែកនៅក្នុងប្រតិបត្តិការរបស់ខ្លួន។
លោកនាយករដ្ឋមន្ត្រី ហ៊ុន សែន បានបញ្ជាក់ថា តាមរយៈជំនួយវ៉ាក់សាំងទាំងអស់បានរួមចំណែកសំខាន់ក្នុងការទប់ស្កាត់ការឆ្លងរីករាលដាលនៃជំងឺកូវីដ ១៩ និងឈានទៅដល់ការបើកដំណើរការប្រទេសជាតិឡើងវិញក្នុងប្រក្រតីភាពថ្មី៕
