ព្រះសីហនុៈ អាជ្ញាធរខេត្ដព្រះសីហនុកំពុងបន្តអនុវត្ដការចុះបញ្ជីដីធ្លីមានលក្ខណៈជាប្រព័ន្ធឱ្យស្របតាមគោលនយោបាយដីធ្លីរបស់រាជរដ្ឋាភិបាល ដើម្បីកាត់បន្ថយភាពក្រីក្រ ទំនាស់ដីធ្លីនៅក្នុងសង្គម និងការអភិវឌ្ឍប្រទេសជាតិប្រកបដោយចីរភាព ខណៈចាប់ពីឆ្នាំ ២០០៣ មកដល់បច្ចុប្បន្ន ការចុះបញ្ជីដីធ្លីមានលក្ខណៈជាប្រព័ន្ធជូនប្រជាពលរដ្ឋធ្វើបាន ១០៨ ៨៩៧ ក្បាលដី។
កាលពីថ្ងៃទី ២៨ ខែមីនា ឆ្នាំ ២០២២ លោក គួច ចំរើន អភិបាលនៃគណៈអភិបាលខេត្តព្រះសីហនុបានអញ្ជើញចូលរួមក្នុងពិធីប្រកាសកំណត់តំបន់ធ្វើការវិនិច្ឆ័យ (ការចុះបញ្ជីដីធ្លីមានលក្ខណៈជាប្រព័ន្ធ) នៅភូមិ ១ ភូមិ ២ និងភូមិ ៣ សង្កាត់លេខ ១ ក្រុងព្រះសីហនុ។ ពិធីនេះមានការចូលរួមពីអភិបាលរងខេត្ត អភិបាលស្តីទីក្រុងព្រះសីហនុ នាយក-នាយករងរដ្ឋបាលសាលាខេត្ត ប្រធានមន្ទីរអង្គភាពពាក់ព័ន្ធ និងប្រជាពលរដ្ឋរស់នៅក្នុងសង្កាត់លេខ ១។
លោក ឃាង ភារម្យ អ្នកនាំពាក្យរដ្ឋបាលខេត្តថ្លែងប្រាប់ភ្នំពេញប៉ុស្ដិ៍នៅថ្ងៃទី ២៩ មីនាថា ការចុះបញ្ជីដីធ្លីមានលក្ខណៈជាប្រព័ន្ធនៅភូមិ ១ ភូមិ ២ និងភូមិ ៣ សង្កាត់លេខ ១ ក្រុងព្រះសីហនុនេះ សរុបមានប្រមាណជាង ១០ ០០០ ក្បាលដី។ លោកថ្លែងថា៖ «ការចុះបញ្ជីដីធ្លីមានលក្ខណៈជាប្រព័ន្ធបែបនេះនៅទូទាំងភូមិសាស្ដ្រខេត្ដ គឺធ្វើតាមផែនការ និងដំណាក់កាលមិនអាចធ្វើម្តងទូទាំងខេត្តនោះទេ»។
លោកបញ្ជាក់ថា៖ «ចាប់ពីថ្ងៃទី ១៣ ខែតុលា ឆ្នាំ ២០០៣ រហូតមកដល់បច្ចុប្បន្ន រដ្ឋបាលខេត្ដបានចុះបញ្ជីដីមានលក្ខណៈជាប្រព័ន្ធជូនប្រជាពលរដ្ឋ ជាលទ្ធផលប្រមូលទិន្នន័យបាន ១០៨ ៨៩៧ ក្បាលដីសម្រេចចេញបណ្ណបានចំនួន ៨៧ ៣២៧ បណ្ណ និងចែកដល់ដៃប្រជាពលរដ្ឋបានចំនួន ៧៨ ៤៨៩ បណ្ណ»។
លោក ចេង ស្រុង ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី បានលើកឡើងថា ការចុះបញ្ជីដីធ្លីនេះ គឺត្រូវចុះបញ្ជីទាំងដីឯកជន និងដីរដ្ឋ ដែលអនុវត្តតាមនីតិវិធី និងបច្ចេកវិទ្យាទំនើប តម្លាភាព និងការទទួលខុសត្រូវខ្ពស់ ដែលប្រទេសជឿនលឿន លើពិភពលោកគេកំពុងអនុវត្ត ហើយមានប្រសិទ្ធភាពលើការគ្រប់គ្រងដីធ្លី ដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាល ដើម្បីកាត់បន្ថយភាពក្រីក្រ ទំនាស់ដីធ្លីនៅក្នុងសង្គម និងការអភិវឌ្ឍប្រទេសជាតិ។
លោកថ្លែងថា៖ «ឯកសារដែលភ្ជាប់មកជាមួយសម្រាប់ចុះបញ្ជីដីធ្លីនេះ រួមមានដូចជា សំបុត្រកំណើត សំបុត្របញ្ជាក់កំណើត សំបុត្រអាពាហ៍ពិពាហ៍ អត្តសញ្ញាណប័ណ្ណសញ្ជាតិខ្មែរ សៀវភៅគ្រួសារ សៀវភៅស្នាក់នៅ សំបុត្របញ្ជាក់មរណភាព និងឯកសារដែលពាក់ព័ន្ធនឹងការកាន់កាប់ដីធ្លីរបស់ខ្លួន និងសូមឱ្យម្ចាស់ដីទាំងអស់ មេត្តាចូលរួមដោយផ្ទាល់ក្នុងការចង្អុលបង្ហាញ និងកំណត់ព្រំនៃក្បាលដីរបស់ខ្លួនឱ្យបានត្រឹមត្រូវច្បាស់លាស់»។
លោក គួច ចំរើន បានថ្លែងក្នុងពិធីនេះថា ការកំណត់ប្រកាសតំបន់វិនិច្ឆ័យចុះបញ្ជីដីធ្លីជូនប្រជាពលរដ្ឋភូមិ ១ ភូមិ ២ និងភូមិ ៣ សង្កាត់លេខ ១ ក្រុងព្រះសីហនុ ដែលប្រជាពលរដ្ឋទន្ទឹងរង់ចាំជាយូរមកហើយ និងតបតាមការសំណូមពររបស់លោកចៅសង្កាត់លេខ ១ ដែលបានធ្វើកិច្ចអន្តរាគមន៍ជាច្រើនលើកច្រើនសា នៅពេលចូលរួមប្រជុំ និងបានលើកបញ្ហាសំណូមពរទាក់ទងការចុះបញ្ជីដីធ្លីនៅសង្កាត់លេខ ១ ជូនប្រជាពលរដ្ឋ។
លោកថ្លែងថា៖ «ចំណែកខ្ញុំក៏ធ្លាប់បានដឹកនាំកិច្ចប្រជុំនានាជាបច្ចេកទេស ក្របខ័ណ្ឌកិច្ចការពាក់ព័ន្ធនឹងដំណើរការ និងការវិវឌ្ឍនៃស្ថានភាពដីធ្លីក្នុងសង្កាត់លេខ ១ នេះ និងបានចំណាយពេលមិនក្រោម ២០ ដងនោះទេ ដើម្បីរិះរកវិធីជំរុញការចុះបញ្ជីដីធ្លីឱ្យបងប្អូនប្រជាពលរដ្ឋឱ្យបានលឿនឆាប់ដើម្បីបងប្អូនទទួលបានកម្មសិទ្ធិស្របច្បាប់»។
លោក គួច ចំរើន បញ្ជាក់ថា៖ «នៅពេលខាងមុខទីក្រុងរបស់យើងកាន់តែរីកចម្រើន មនុស្សស្នាក់នៅកាន់តែច្រើន យើងខិតខំធ្វើការអភិវឌ្ឍក្រុងរបស់យើងបន្តទៀត»។
លោកលើកឡើងថា រាជរដ្ឋាភិបាលបានដាក់ចេញគោលនយោបាយច្បាស់លាស់ ប្រែក្លាយខេត្តព្រះសីហនុ ជាតំបន់សេដ្ឋកិច្ចពិសេសគំរូពហុបំណង និងជាតារារះនាទិសនិរតី ហើយរាជរដ្ឋាភិបាល បានបង្កើតគណៈកម្មការបច្ចេកទេសជាច្រើន ដើម្បីជួយដឹកនាំអភិវឌ្ឍខេត្តព្រះសីហនុឱ្យមានការរីកចម្រើន។ គោលដៅរបស់រាជរដ្ឋាភិបាល ក៏ដូចជាខេត្ដ គឺចង់ពង្រីកក្រុងព្រះសីហនុឱ្យកាន់តែធំ ដើម្បីបម្រើផលប្រយោជន៍ប្រជាពលរដ្ឋ និងការអភិវឌ្ឍសេដ្ឋកិច្ចសង្គមឱ្យកាន់តែល្អប្រសើរ៕