ភ្នំពេញៈ ចៅក្រមសាលាឧទ្ធរណ៍ភ្នំពេញបានប្រកាសសាលដីកាភ្លាមៗនៅថ្ងៃទី ២៩ មីនា ចំពោះមុខមេធាវីជនជាប់ចោទ និងមេធាវីជនរងគ្រោះ បន្ទាប់ពីជំនុំជម្រះជិត ១ ម៉ោង ដោយរក្សាទោស ៥ ឆ្នាំដដែល សម្រាប់ជនជាប់ចោទម្នាក់ក្នុងបទរំលោភសេពសន្ថវៈក្មេងស្រីអាយុ ១២ ឆ្នាំ ប្រព្រឹត្តនៅឃុំឃ្លាំង ស្រុកឈូក ខេត្តកំពត កាលពីឆ្នាំ ២០២០។
លោក ប៉ុល សំអឿន ប្រធានក្រុមប្រឹក្សាជំនុំជម្រះសាលាឧទ្ធរណ៍ភ្នំពេញបានអានសាលដីកា បន្ទាប់ពីបានពិភាក្សាថា ជនសង្ស័យ ឈ្មោះ សេង សុខឃីម អាយុ ២០ ឆ្នាំ ដែលត្រូវចោទពីបទរំលោភសេពសន្ថវៈមានស្ថានទម្ងន់ទោសនោះត្រូវបើកសវនាការជំនុំជម្រះនៅថ្ងៃទី ២៩ មីនា និង ត្រូវប្រកាសសាលដីកានៅថ្ងៃដដែលនេះ។
លោកថ្លែងថា៖ «ក្រោយពីក្រុមប្រឹក្សាពិភាក្សាគ្នាមកបានរួមមតិគ្នា និងសម្រេចរក្សាទោស ៥ ឆ្នាំតាមសាលក្រមរបស់សាលាដំបូងខេត្តកំពតទុកជាបានការដដែល»។
អង្គហេតុរបស់សាលាឧទ្ធរណ៍ភ្នំពេញបង្ហាញថា រឿងក្តីនេះបានកើតឡើងកាលពី វេលាម៉ោងជាង ៨ យប់ ថ្ងៃទី ៧ ខែមករា ឆ្នាំ ២០២០ នៅផ្ទះរបស់ក្មេងរងគ្រោះ ប្រព្រឹត្តដោយជនជាប់ចោទឈ្មោះ សេង សុខឃីម អាយុ ២០ ឆ្នាំ។ ជនជាប់ចោទបានលេងប្រដាប់ភេទក្មេងរងគ្រោះឈ្មោះ អ.ស. អាយុ ១២ ឆ្នាំ ហើយបានយកប្រដាប់ភេទរបស់ខ្លួនដាក់ក្នុងប្រដាប់ភេទរបស់ក្មេងស្រីរងគ្រោះ។ នៅពេលជនសង្ស័យកំពុងធ្វើសកម្មភាពនោះ ក៏ត្រូវក្មេងស្រីរងគ្រោះប្រាប់ជនជាប់ចោទ ថា នាងទៅបត់ជើងតូចហើយក៏គេចខ្លួនបាត់។ ដោយមានការឈឺចុកចាប់ពេក ព្រឹកឡើងថ្ងៃទី ៨ ខែឆ្នាំដដែល ក្មេងរងគ្រោះបានប្រាប់ឪពុកម្តាយរបស់នាង ហើយត្រូវបានប្តឹងសមត្ថកិច្ចឱ្យចាប់ខ្លួនជនជាប់ចោទនៅថ្ងៃដដែលនោះដែរ។
សំណុំរឿងនេះត្រូវបានសាលាដំបូងខេត្តកំពត បើកសវនាការ និងប្រកាសសាលក្រមនៅថ្ងៃទី ៨ កក្កដា ឆ្នាំ ២០២០សម្រេចផ្តន្ទាទោសជនជាប់ចោទដាក់ពន្ធនាគារ ៥ ឆ្នាំ ចោទបទរំលោភសេពសន្ថវៈមានស្ថានទម្ងន់ទោស។ ប៉ុន្តែដោយមិនសុខចិត្តនឹងសាលក្រមនេះ ជនជាប់ចោទបានប្តឹងឧទ្ធរណ៍ភ្នំពេញបន្តទៀត។
លោកស្រី ថូ ណាវី ជាមេធាវីការពារសិទ្ធិឱ្យដើមបណ្តឹងរដ្ឋប្បវេណី ដែលមានឪពុករបស់ក្មេងរងគ្រោះជាតំណាងឱ្យក្មេងស្រីរងគ្រោះបានសន្និដ្ឋានចំពោះមុខចៅក្រមក្នុងបន្ទប់សវនាការនាថ្ងៃទី ២៩ មីនាថា ផ្អែកតាមចម្លើយរបស់ក្មេងស្រីរងគ្រោះក្នុងអង្គហេតុបានរៀបរាប់ថា នាងពិតជាត្រូវបានឈ្មោះ សេង សុខឃីម ប្រព្រឹត្តមកលើខ្លួនពិតប្រាកដមែន។ រីឯលិខិតកោសល្យវិច័យដែលបានពីគ្រូពេទ្យបញ្ជាក់ថា នៅប្រដាប់ភេទរបស់ក្មេងរងគ្រោះមានស្នាមដាច់រហែក។
លោកស្រីមេធាវីបញ្ជាក់ថា៖ «តុលាការខេត្តកំពត ផ្តន្ទាទោស ៥ ឆ្នាំ ដល់ជនជាប់ចោទនេះមានលក្ខណៈត្រឹមត្រូវតាមច្បាប់ហើយ។ ហេតុដូច្នេះខ្ញុំស្នើសុំតម្កល់ទោស ៥ ឆ្នាំដដែល»។
លោកមេធាវី ១ រូបសុំមិនបញ្ចេញឈ្មោះ ដែលការពារសិទ្ធិឱ្យជនជាប់ចោទបានសន្និដ្ឋានក្នុងបន្ទប់សវនាការនៅថ្ងៃទី ២៩ មីនាថា តាមពិតក្មេងរងគ្រោះក៏ស្រឡាញ់កូនក្តីរបស់លោកដែរ ហើយកូនក្តីលោកក៏ធ្លាប់ប្រាប់ជនរងគ្រោះថា គាត់នឹងចូលស្តីដណ្តឹងយកជនរងគ្រោះធ្វើប្រពន្ធទៀតផង។ កូនក្តីលោកបានសារភាពថាគាត់ពិតជាបានប្រព្រឹត្តមែន។
លោកថ្លែងថា៖ «ក្នុងពេលកូនក្តីខ្ញុំធ្វើសកម្មភាពរំលោភលើជនរងគ្រោះហេតុអ្វីក៏មិនស្រែក ព្រោះនៅក្នុងផ្ទះមានមនុស្សច្រើននាក់ដែរ។ តែយ៉ាងណា ខ្ញុំសូមក្រុមប្រឹក្សាជំនុំជម្រះមេត្តាបន្ថយទោសដល់កូនក្តីខ្ញុំផង»។
នៅពេលជំនុំជម្រះនៅថ្ងៃទី ២៩ មីនា លោកស្រី យិន សុគន្ធារី តំណាងមហាអយ្យការបានសន្និដ្ឋានថា តាមការសិក្សាលើអង្គហេតុ លោកស្រីថា ជនជាប់ចោទបានសារភាព រីឯលិខិតពេទ្យក៏បញ្ជាក់ថា ប្រដាប់ភេទក្មេងក៏មានរបួសដែរ។ ហេតុដូច្នេះលោកស្រីស្នើសុំតម្កល់ទោស ៥ ឆ្នាំនេះនៅដដែល៕