បន្ទាយមានជ័យៈ នគរបាលព្រហ្មទណ្ឌខេត្តបន្ទាយមានជ័យបានកសាងសំណុំរឿងបញ្ជូនស្ត្រីម្នាក់ទៅតុលាការខេត្តនៅថ្ងៃទី ៣០ មីនា បន្ទាប់ពីចាប់ខ្លួនបាន ២ ថ្ងៃ ពាក់ព័ន្ធករណីវាយប្តីនឹងដំបងឫស្សីបណ្ដាលឱ្យស្លាប់កាលពីយប់ថ្ងៃទី ២៨ មីនា នៅភូមិគោកពន្លៃ ឃុំចំណោម ស្រុកមង្គលបុរី ខេត្តបន្ទាយមានជ័យ។
លោកឧត្តមសេនីយ៍ត្រី នូ ជីវ័ន្ត ស្នងការរងទទួលផែនការងារនគរបាលព្រហ្មទណ្ឌឱ្យដឹងនៅថ្ងៃទី ៣០ មីនាថា សមត្ថកិច្ចជំនាញព្រហ្មទណ្ឌរបស់លោកបានកសាងសំណុំរឿងបញ្ជូនស្ត្រីសង្ស័យឈ្មោះ ជា រេត អាយុ ៤០ ឆ្នាំ ទៅសាលាដំបូងខេត្តបន្ទាយមានជ័យនៅថ្ងៃទី៣០ មីនា ពាក់ព័ន្ធនឹងបទល្មើសសម្លាប់មនុស្ស។
លោកថ្លែងថា៖ «ស្ត្រីសង្ស័យម្នាក់នោះខាងកម្លាំងជំនាញខ្ញុំបានកសាងសំណុំរឿងបញ្ជូនគាត់ទៅសាលាដំបូងខេត្តបន្ទាយមានជ័យនៅថ្ងៃនេះ ហើយ (ថ្ងៃទី ៣០ មីនា)។ ខាងអយ្យការកំពុងតែចាត់ការរឿងនេះបន្តហើយ»។
ពាក់ព័ន្ធការចោទប្រកាន់ពីតំណាងអយ្យការយ៉ាងណានោះ ភ្នំពេញ ប៉ុស្តិ៍ មិនអាចសុំការបញ្ជាក់ពីលោក សំរិទ្ធ សុខុន អ្នកនាំពាក្យអយ្យការអមសាលាដំបូងខេត្តបន្ទាយមានជ័យបានទេ ដោយទូរស័ព្ទរបស់លោកមិនអាចទាក់ទងបាន កាលពីថ្ងៃទី ៣០ មីនា ។
លោក តាន់ សុគន្ធ នាយនគរបាលប៉ុស្តិ៍ឃុំចំណោម បានប្រាប់ ភ្នំពេញ ប៉ុស្តិ៍ នៅថ្ងៃទី ៣០ មីនាថា ចំពោះជនរងគ្រោះជាប្តីឈ្មោះ ឆែម ថងយូ អាយុ ៤២ ឆ្នាំ។ ទាំង ២ នាក់ប្តីប្រពន្ធរស់នៅភូមិស្រែព្រៃ ឃុំចំណោម ស្រុកមង្គលបុរី ខេត្តបន្ទាយមានជ័យ។ ប៉ុន្តែបានបង្កហេតុនៅភូមិគោកពន្លៃ ឃុំចំណោម ហើយជនរងគ្រោះគឺជាមនុស្សញៀនស្រា និងតែងប្រើអំពើហិង្សាក្នុងគ្រួសារជាប្រចាំផងដែរ។
លោកបានរៀបរាប់តាមសម្តីសាច់ញាតិរបស់ស្ត្រីសង្ស័យថា ស្ត្រីឈ្មោះ ជា រេត មានប្តីមុននិងមានកូនស្រីម្នាក់ហើយកូនស្រីរបស់គាត់មានប្តីនិងមានកូនប្រុសម្នាក់អាយុ៤ឆ្នាំ។ ក្រោយមក ស្ត្រីសង្ស័យបានយកគ្នាជាប្តីប្រពន្ធជាមួយជនរងគ្រោះនិងមានកូនប្រុសជាមួយគ្នាចំនួន៣នាក់ ប៉ុន្តែប្តីរបស់សង្ស័យតែងតែផឹកស្រានិងវាយដំប្រពន្ធស្ទើររាល់ថ្ងៃ។
លោកបន្តថា មុនពេលកើតហេតុ ស្ត្រីសង្ស័យបានមកលេងផ្ទះកូនស្រីបង្កើតនៅភូមិគោកពន្លៃ ឃុំចំណោម ស្រុក មង្គលបុរី។លុះដល់ម៉ោងជាង៩យប់ថ្ងៃទី២៨ មីនា ស្រាប់តែប្តីបានមកតាម ឃើញប្រពន្ធកំពុងយោលចៅដេកក្នុងអង្រឹង។ ពេលនោះបុរសជាប្ដីក្នុងសភាពស្រវឹងស្រាខ្លាំងផង បានយកផ្លែដូងខ្ចីគប់ត្រូវចៅប្រុសដែលកំពុងដេកក្នុងអង្រឹងនិងបានច្របាច់កប្រពន្ធ។ ដោយសារស្ត្រីសង្ស័យខឹងខ្លាំង ក៏ស្ទុះទៅយកដំបងឫស្សីមកវាយសំពងប្តីត្រូវចំគល់ថ្គាមនិងមុខបណ្ដាលដាច់ខ្យល់ស្លាប់នៅកន្លែងកើតហេតុតែម្តង។បន្ទាប់មកអ្នកភូមិបានរាយការណ៍មកនគរបាលប៉ុស្តិ៍ឃុំចំណោម ហើយលោកក៏បានសុំគោលការណ៍ពីលោកអធិការនគរបាលស្រុកមង្គលបុរីចុះឃាត់ខ្លួនស្ត្រីសង្ស័យទាំងយប់ថ្ងៃដដែលតែម្ដង។
លោកបញ្ជាក់ថា៖«នៅយប់ថ្ងៃទី២៨មីនានោះពេលគាត់វាយប្តីស្លាប់គឺគាត់អត់រត់ទៅណាទេហើយកម្លាំងសមត្ថកិច្ចរបស់ប៉ុស្តិ៍យើងចុះទៅឃាត់ និងនាំខ្លួនគាត់មកប៉ុស្តិ៍ទាំងយប់។ គាត់ថាគាត់បានវាយសម្លាប់ប្តីគាត់មែន»។
លោក ចៅ ម៉ី មេឃុំចំណោម បានប្រាប់នៅថ្ងៃទី ៣០ មីនាថា គ្រួសារប្តីប្រពន្ធ១គូនេះចេះតែមានការទាស់ទែងគ្នាស្ទើររាល់ថ្ងៃជាយូរខែឆ្នាំមកហើយ ហើយជនរងគ្រោះក៏ជាមនុស្សផឹកស្រាជាប្រចាំដែរ។ រីឯសាកសពរបស់ជនរងគ្រោះត្រូវបានសាច់ញាតិយកទៅធ្វើបុណ្យនៅភូមិស្រែព្រៃឃុំគោកពន្លៃ៕