The Phnom Penh Post Search

Search form




Logo of Phnom Penh Post newspaper Phnom Penh Post - នាយកដ្ឋាន​សុខុមាលភាព​ជនពិការ ​ស្នើ​ចាត់វិធានការ​លើ​ជន​ក្លែងបន្លំ​ជា​មន្ត្រី​អនុវត្តន៍​ច្បាប់​ដើរ​រៃអង្គាស​ប្រាក់

នាយកដ្ឋាន​សុខុមាលភាព​ជនពិការ ​ស្នើ​ចាត់វិធានការ​លើ​ជន​ក្លែងបន្លំ​ជា​មន្ត្រី​អនុវត្តន៍​ច្បាប់​ដើរ​រៃអង្គាស​ប្រាក់

Content image - Phnom Penh Post
លោក​ យៀប ម៉ាលីណូ ​ប្រធាន​នាយកដ្ឋាន​សុខុមាលភាព​ជនពិការ​នៃ​អគ្គនាយកដ្ឋាន​បច្ចេកទេស ក្រសួង​សង្គមកិច្ច អតីតយុទ្ធជន និង​យុវនីតិសម្បទា។ រូបថត WPDD

នាយកដ្ឋាន​សុខុមាលភាព​ជនពិការ ​ស្នើ​ចាត់វិធានការ​លើ​ជន​ក្លែងបន្លំ​ជា​មន្ត្រី​អនុវត្តន៍​ច្បាប់​ដើរ​រៃអង្គាស​ប្រាក់

ភ្នំពេញៈ នាយកដ្ឋាន​សុខុមាលភាព​ជនពិការ​ស្នើឱ្យ​សមត្ថកិច្ច​ចាត់វិធានការ​តាមផ្លូវ​ច្បាប់​ចំពោះ​ជន​ក្លែងបន្លំ​ជា​មន្ត្រី​អនុវត្តន៍​ច្បាប់ ដើរ​រៃអង្គាស​ថវិកា​នៅតាម​រោងចក្រ សហគ្រាស ដើម្បី​ប្រយោជន៍​ផ្ទាល់ខ្លួន​។

លោក​ យៀប ម៉ាលីណូ ​ប្រធាន​នាយកដ្ឋាន​សុខុមាលភាព​ជនពិការ​នៃ​អគ្គនាយកដ្ឋាន​បច្ចេកទេស ក្រសួង​សង្គមកិច្ច អតីតយុទ្ធជន និង​យុវនីតិសម្បទា នៅ​ថ្ងៃទី​ ២៩ មីនា បាន​ជូនដំណឹង​ដល់​ក្រុមហ៊ុន រោងចក្រ សហគ្រាស​ថា កន្លងមក​មាន​ជនខិលខូច​មួយចំនួន ជាពិសេស ឈ្មោះ​ ហ៊ុន សារ៉ាក់ និង​បក្ខពួក​បាន​ក្លែងបន្លំ​ជា​មន្ត្រី-​ក្រសួង​សង្គមកិច្ច អតីតយុទ្ធជន និង​យុវនីតិសម្បទា​។

លោក​ថា ពួកគេ​យក​សេចក្ដី​ជូនដំណឹង​របស់​ក្រសួង​ស្ដីពី​ការអនុវត្ត​កាតព្វកិច្ច​ច្បាប់​ស្ដីពី​កិច្ចការពារ និង​លើកកម្ពស់​សិទ្ធិ​ជនពិការ​សម្រាប់​វិស័យ​ឯកជន​ទៅ​ទារលុយ​ពី​រោងចក្រ និង​បោកប្រាស់​លុយ​ជន​មាន​ពិការភាព ដោយ​សន្យាថា​នឹង​ទទួលបាន​អត្ថប្រយោជន៍​ពី​រាជរដ្ឋាភិបាល ដូចជា ប្រាក់​សោធន​និវត្តន៍ ប្រាក់ឧបត្ថម្ភ​របប​នយោបាយ​ចំពោះ​ជនពិការ​ក្រីក្រ​តាម​សហគមន៍​។​ល​។

លោក​ យៀប ម៉ាលីណូ លើកឡើង​ថា កន្លងមក​ក្រុម​នេះ​ធ្លាប់​បាន​ចុះហត្ថលេខា និង​ប្រថាប់ត្រា​ក្លែងបន្លំ​ជា​ប្រធានការិយាល័យ​ក្រុង​/​ស្រុក​/​ខណ្ឌ​នៃ​មន្ទីរ​សង្គមកិច្ច អតីតយុទ្ធជន និង​យុវនីតិសម្បទា រាជធានី​ខេត្ត​ក្នុង​រូបភាព​ជា​ក្រុម​កីឡាករ​ទៅ​ប្រកួត​ប្រណាំង​រទេះ​ និង​កីឡាបាល់ទះ ដើម្បី​ប្រមែប្រមូល​ថវិកា​សប្បុរសធម៌ ដែល​ផ្ទុយ​ពី​ការពិត​។

លោក​បញ្ជាក់ថា​៖ «​នាយកដ្ឋាន​សុខុមាលភាព​ជនពិការ សូម​បដិសេធ​ចំពោះ​សកម្មភាព និង​លិខិត​សុំ​ជំនួយ​ទាំងឡាយ​ដែល​ក្រុម​ខិលខូច​ខាងលើ​បាន​ប្រព្រឹត្ត និង​សូមឱ្យ​សមត្ថកិច្ច​ពាក់ព័ន្ធ​ចាត់វិធានការ​តាមផ្លូវ​ច្បាប់​»​។

ជាមួយ​គ្នា​នេះ ដើម្បី​ចៀសវាង​ការចាញ់បោក​បញ្ឆោត លោក យៀប ម៉ាលីណូ បាន​ជម្រាបជូន​ក្រុមហ៊ុន រោងចក្រ សហគ្រាស ត្រូវ​ពិនិត្យ​ចំណុច​មួយចំនួន មុនពេល​មន្ត្រី​ចុះ​ត្រួតពិនិត្យ ឬ​ទំនាក់ទំនង​ការងារ ពោល​ត្រូវមាន​លិខិតផ្លូវការ​ជម្រាបជូន​នាយក​ក្រុមហ៊ុន រោងចក្រ សហគ្រាស ជាមុនសិន​។ គ្រប់​មន្ត្រី​ទាំងអស់​ត្រូវមាន​កាត​សម្គាល់​មន្ត្រីរាជការ ឬ​មាន​លិខិត​ឧទ្ទេសនាម​ដែល​ចេញ ដោយ​ក្រសួង ឬ​មន្ទីរ​សង្គមកិច្ច អតីតយុទ្ធជន និង​យុវនីតិសម្បទា ហើយ​រាល់​ការចុះ​ត្រួតពិនិត្យ និង​ចុះ​បញ្ជិកា​ដោយ​ឥតគិតថ្លៃ​។

នាយកដ្ឋាន​សុខុមាលភាព​ជនពិការ​បាន​ណែនាំ​ដល់​ក្រុមហ៊ុន រោងចក្រ សហគ្រាស​ត្រូវ​ទាក់ទង​លេខ​ទូរស័ព្ទ 012 911 616 / 011 506 767 / 012 848 124 ឬ​តាមរយៈ Hotline 1270 ដោយ ឥតគិតថ្លៃ ដើម្បី​សហការ​ជាមួយ​អាជ្ញាធរ​មាន​សមត្ថកិច្ច​ចាត់​វិធានការ​តាមផ្លូវ​ច្បាប់ ក្នុង​ករណី​ដែលមាន​ជនសង្ស័យ​។

នាយកដ្ឋាន​ក៏បាន​បញ្ជាក់​អំពី​ទោស​ដែល​បញ្ញត្តិ ក្នុង​ច្បាប់​ស្ដីពី​កិច្ចការពារ និង​លើកកម្ពស់​សិទ្ធិ​ជនពិការ ត្រង់​មាត្រា​ ៥៣ អំពើ​ទាញយក​ប្រយោជន៍​ដោយ​ចេតនា ដោយ​រំលោភ​លើ​ភាពល្ងង់ខ្លៅ ឬ​ភាពទន់ខ្សោយ​នៃ​បុគ្គល​នេះ បណ្តាលមកពី​ស្ថានភាព​ពិការភាព ដោយ​បង្ខំ​បុគ្គល​នេះ​ឱ្យ​ប្រព្រឹត្ត​អំពើ ឬ​មិន​ប្រព្រឹត្ត​អំពើ​ដែល​ធ្វើឱ្យ​ខូចប្រយោជន៍​យ៉ាងធ្ងន់ធ្ងរ​របស់​បុគ្គល​នេះ ត្រូវ​ផ្តន្ទាទោស​ដាក់​ពន្ធនាគារ​ពី ១ ​ឆ្នាំ ទៅ ៣ ​ឆ្នាំ និង​ពិន័យ​ជា​ប្រាក់​ពី​ ២ ​លាន​រៀល ទៅ​ ៦ ​លាន​រៀល​។ មាត្រា​ ៥៦ ត្រូវ​ផ្តន្ទាទោស​ដាក់ពន្ធនាគារ​ពី ១ ​ឆ្នាំ​- ៣ ​ឆ្នាំ និង​ពិន័យ​ជា​ប្រាក់​ពី​ ២ ទៅ​ ៦ ​លាន​រៀល អំពើ​ជ្រៀតជ្រែក​ដោយ​ខុសច្បាប់ ទៅក្នុង​ការអនុវត្ត​មុខងារសាធារណៈ​ណាមួយ ដោយ​បំពេញ​កិច្ច​ណាមួយ​ក្នុងចំណោម​កិច្ច​ទាំងឡាយ ដែល​សម្រាប់តែ​អ្នកមាន​សិទ្ធិ​ក្នុង​មុខងារ​នេះ​។

លោក​ សេម សុវុន្ថា នាយក​សមាគម​ជនពិការ​អង្គរ​គាំទ្រ​ចំណាត់ការ​របស់​ក្រសួង និង​ស្នើ​សមត្ថកិច្ច​ចាត់វិធានការ​ជន​ក្លែងបន្លំ​យកមក​ផ្តន្ទាទោស​តាមច្បាប់​។

លោក​ថា​៖ «​អ្វីដែល​សំខាន់​មួយទៀត សូមឱ្យ​ជនពិការ​ខ្លួនឯង​ឈប់​ចាញ់បោក​អ្នកដើរ​យកលុយ​ទាំងនោះ ហើយ​បើ​ដឹងខ្លួន​ឯង​មាន​ពិការភាព ត្រូវ​ទៅ​ចុះឈ្មោះ​នៅតាម​សាលាឃុំ​សង្កាត់​ ដើម្បី​ទទួលបាន​បណ្ណ​សម្គាល់​ខ្លួន​ដែល​អាចនឹងទទួល​បាន​អត្ថប្រយោជន៍​ប្រកប​ដោយ​សមធម៌​។ ​ព្រោះ​សម័យ​កូវីដ គ្រួសារ​ជនពិការ​ក្រីក្រ​បំផុត គាត់​បាន​ទទួល​ពី​រាជរដ្ឋាភិបាល​រហូត​ដល់​ ៣០​ ម៉ឺន​ទៅ​ ៤០ ​រៀល​»៕

វីដេអូ៖

អត្ថបទគួរចាប់អារម្មណ៍