.jpg)
បន្ទប់បំបៅដោះកូនដែលទើបបើកនៅកំពង់ធំ ពីថ្ងៃ ២៩ មីនា។ រូបថត អង្គការ Helen Keller
កំពង់ធំៈ មន្ត្រីជាន់ខ្ពស់នៃមន្ទីរសុខាភិបាលខេត្តកំពង់ធំបានអំពាវនាវឱ្យគ្រប់មន្ទីរ និងកន្លែងធ្វើការទាំងអស់គួររៀបចំបន្ទប់សម្រាប់បំបៅដោះកូន ដើម្បីសម្រួលឱ្យស្ត្រីដែលត្រឡប់មកធ្វើការវិញអាចបន្តការបំបៅដោះកូន ដើម្បីចូលរួមអនុវត្តការប្តេជ្ញាចិត្តរបស់កម្ពុជាក្នុងការបង្កើនអត្រាការបំបៅកូនដោយទឹកដោះម្តាយតែ ១ មុខគត់សម្រាប់ទារក និងកុមារអាយុពីសូន្យដល់ ៦ ខែ ឱ្យបានដល់ ៨៥% នៅឆ្នាំ ២០៣០។
នេះជាការលើកឡើងរបស់លោក កែវ ដាវីន អនុប្រធានមន្ទីរសុខាភិបាលខេត្តកំពង់ធំ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវបន្ទប់បំបៅដោះកូនជាលើកដំបូងនៅសាលាខេត្ត និងមន្ទីរកិច្ចការនារីខេត្តកំពង់ធំពីថ្ងៃទី ២៩ ខែមីនា ឆ្នាំ ២០២២ ដោយមានការសហការជាមួយក្រុមប្រឹក្សាស្តារអភិវឌ្ឍន៍វិស័យកសិកម្មនិងជនបទ អង្គការហេទ្បែន ខេលល័រ និងគម្រោង MUSEFO នៃអង្គការ GIZ។
លោក កែវ ដាវីន បានថ្លែងថា៖ «ក្នុងនាមមន្ទីរសុខាភិបាលខ្ញុំសូមអំពាវនាវដល់មន្ទីរ និងកន្លែងធ្វើការដទៃទៀត មេត្តាពិចារណាក្នុងការរៀបចំបន្ទប់បំបៅដោះកូនដើម្បីសម្រួលឱ្យស្ត្រីដែលត្រឡប់មកធ្វើការវិញអាចបន្តការបំបៅដោះកូនតទៅទៀតបានស្របតាមមាត្រា ១៨៤ និង ១៨៥ នៃច្បាប់ការងាររបស់ព្រះរាជាណាចក្រកម្ពុជាយើង»។
នៅក្នុងពិធីនោះ លោក ជូ ប៊ុនហៀង អគ្គលេខាធិការរងក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទក៏បានលើកឡើងដែរថា ការលើកកម្ពស់អាហារូបត្ថម្ភ និងការចិញ្ចឹមទារក និងកុមារគឺជាបញ្ហាអន្តរវិស័យដែលតម្រូវឱ្យមានកិច្ចសហការល្អ និងការចូលរួមដោយយកចិត្តទុកដាក់ពីគ្រប់ភាគីទៅលើកិច្ចអន្តរាគមន៍ចាំបាច់ និងការវិនិយោគជាក់ស្តែងលើវិស័យពាក់ព័ន្ធជាពិសេសវិស័យសុខាភិបាល អប់រំ យេនឌ័រ សេដ្ឋកិច្ច និងការងារគាំពារសង្គម។
លោកបានបន្តថា កន្លងមកដោយមើលឃើញពីគុណតម្លៃ និងភាពចាំបាច់ក្នុងការលើកកម្ពស់ការចិញ្ចឹមទារក និងកុមារដែលជាមូលដ្ឋានគ្រឹះក្នុងការអភិវឌ្ឍមូលធនមនុស្ស និងសេដ្ឋកិច្ចជាតិ រាជរដ្ឋាភិបាលកម្ពុជាបានជ្រើសរើសយកប្រធានបទ ការបំបៅកូនដោយទឹកដោះម្តាយ សម្រាប់ទិវាជាតិអាហារូបត្ថម្ភចំនួន ២ លើកគឺខែវិច្ឆិកាឆ្នាំ ២០១៥ និងខែវិច្ឆិកា ឆ្នាំ ២០១៩ កន្លងទៅនេះ។
នាយិកាអង្គការហេទ្បែន ខេលល័រ លោកស្រី Gwyneth Cotes បានថ្លែងក្នុងឱកាសសម្ពោធបន្ទប់សម្រាប់បំបៅដោះកូននោះដែរថា តាមការសិក្សានៅប្រទេសផ្សេងកន្លងមក បានរកឃើញថា គម្រោងលើកកម្ពស់អាហារូបត្ថម្ភ និងការចិញ្ចឹមទារក និងកុមារនៅតាមរោងចក្រសហគ្រាស និងកន្លែងធ្វើការ បានផ្តល់នូវដំណោះស្រាយសមស្របដ៏សំខាន់មួយដែលមានការចំណាយតិចហើយអនុញ្ញាតឱ្យនិយោជិតជាស្ត្រីនៅតែអាចបន្តបំបៅកូនដោយទឹកដោះម្តាយនៅពេលពួកគេត្រឡប់មកធ្វើការវិញ។
គម្រោងដូចនេះក៏បានផ្តល់ជាវេទិកាមួយដល់ស្ត្រីដើម្បីពួកគេមានឱកាសចូលរួមក្នុងកម្មវិធីសំខាន់ផ្សេងៗដូចជាការអប់រំអាហារូបត្ថម្ភ និងអនាម័យ ការអប់រំការចិញ្ចឹមទារក និងកុមារ ការប្រឹក្សាលើរបបអាហារ និងសុខភាពរបស់ស្ត្រី និងច្បាប់ការងារ។
លោកស្រីបានមានប្រសាសន៍ថា៖ «ចំពោះគម្រោងសាកល្បងនៅកម្ពុជា ខ្ញុំសង្ឃឹមថា មេរៀនល្អៗនឹងត្រូវបានប្រើប្រាស់ក្នុងការពិចារណាការសម្រួលខ្លឹមសារខ្លះៗលើរយៈពេលលម្ហែមាតុភាព និងតម្រូវការរៀបចំបន្ទប់បំបៅដោះកូននៅកន្លែងធ្វើការក្នុងការផ្តល់ឱកាសដល់ស្ត្រីជាម្តាយអាចបន្តការបំបៅកូនដោយទឹកដោះម្តាយតែមួយមុខគត់រយ:ពេល ៦ ខែ ស្របតាមគោលនយោបាយរបស់ក្រសួងសុខាភិបាលផង និងស្របតាមការប្តេជ្ញាចិត្ដរបស់រាជរដ្ឋាភិបាលកម្ពុជាផង»។
រីឯលោកស្រី Sanne Sigh តំណាងគម្រោង MUSEFO នៃអង្គការ GIZ បានថ្លែងដែរថា៖ «ឧបសគ្គមួយសម្រាប់ម្តាយគឺពួកគេមានពេលសម្រាកលម្ហែមាតុភាពតែ ៣ ខែប៉ុណ្ណោះជាមួយនឹងការទូទាត់ត្រឹមតែ ៥០ ភាគរយនៃប្រាក់បៀវត្សរ៍របស់ពួកគេដែលធ្វើឱ្យមានបញ្ហាសេដ្ឋកិច្ចក្នុងពេល និងក្រោយសម្រាលកូនរួច»។
លោកស្រីថា បន្ទប់បំបៅដោះកូននៅកន្លែងធ្វើការអាចជួយឱ្យស្ត្រីបន្តការបំបៅកូនដោយទឹកដោះតែ ១ មុខគត់រយ:ពេល ៦ ខែ និងបន្តដល់អាយុ ២ ឆ្នាំ និងលើសពីនេះ។ ការបំបៅកូនដោយទឹកដោះម្តាយ និងចំណងរវាងម្តាយ និងកុមារមានសារៈសំខាន់សម្រាប់ការអភិវឌ្ឍ និងការលូតលាស់នៅដំណាក់កាលដំបូងនៃជីវិតរបស់កុមារ។
ចំណែកលោកស្រី ស៊ិន ស៊ីផាន ប្រធានមន្ទីរកិច្ចការនារីខេត្តកំពង់ធំក៏បានលើកឡើងផងដែរថា ការលើកកម្ពស់អាហារូបត្ថម្ភ និងការចិញ្ចឹមទារកនិងកុមារនៅកន្លែងធ្វើការរួមទាំងការរៀបចំបង្កើតបន្ទប់បំបៅដោះកូននឹងចូលរួមចំណែកក្នុងការអនុវត្តផែនការយុទ្ធសាស្ត្រនារីរតនៈ ទី ៥ លើមុំទី ២ ស្តីពីការលើកកម្ពស់ការអប់រំរបស់ស្ត្រី និងក្មេងស្រី និងមុំទី ៣ ស្តីពីការលើកកម្ពស់សុខភាពស្ត្រី និងក្មេងស្រី បង្ការ និងទប់ស្កាត់ការឆ្លងមេរោគអេដស៍ និងបញ្ហាអាហារូបត្ថម្ភ។
លោកស្រីបានថ្លែងថា៖ «ដើម្បីចូលរួមអនុវត្តការប្តេជ្ញាចិត្តរបស់កម្ពុជាក្នុងការបង្កើនអត្រាការបំបៅកូនដោយទឹកដោះម្តាយតែមួយមុខគត់សម្រាប់ទារក និងកុមារអាយុពីសូន្យដល់ ៦ ខែឱ្យបានដល់ ៨៥ ភាគរយ នៅឆ្នាំ ២០៣០ មន្ទីរកិច្ចការនារីខេត្តកំពង់ធំបានផ្តួចផ្តើមគំនិតក្នុងការបង្កើតបន្ទប់បំបៅដោះកូននេះ ដើម្បីសម្រួលដល់ម្តាយដែលបម្រើការងារអាចមានកន្លែងសមរម្យក្នុងការបន្តបំបៅដោះកូនប្រកបដោយអារម្មណ៍កក់ក្តៅ»។
គួរបញ្ជាក់ថា កាលពីថ្ងៃទី ៤ ខែមីនាកន្លងទៅនេះ មជ្ឈមណ្ឌលជាតិគាំពារមាតា និងទារកនៃក្រសួងសុខាភិបាលក៏បានដាក់ឱ្យដំណើរការនូវបន្ទប់បំបៅដោះកូនផងដែរ ដើម្បីសម្រួលដល់ម្តាយដែលបម្រើការងារនៅមជ្ឈមណ្ឌលនេះផ្ទាល់ និងម្តាយដែលមកពិនិត្យសុខភាពដែលមានកូនតូចមកជាមួយ៕
