ភ្នំពេញៈ លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជំរុញឱ្យ អាជ្ញាធរថ្នាក់ក្រោមជាតិត្រូវបន្តពង្រឹងយន្តការត្រួតពិនិត្យគ្រឿងញៀន ដែលមានស្រាប់នៅតាមមូលដ្ឋាន រាជធានី-ខេត្ត ស្រុក ក្រុង ឃុំ សង្កាត់ ភូមិ និងត្រូវម្ចាស់ការក្នុងការទទួលខុសត្រូវដោះស្រាយបញ្ហាគ្រឿងញៀននៅតាមមូលដ្ឋានរបស់ខ្លួនស្របតាមខ្លឹមសារនៃបទបញ្ជាស្តីពីការពង្រឹងវិធានការប្រយុទ្ធប្រឆាំងគ្រឿងញៀន និងយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាល។
ក្នុងសន្និបាត បូកសរុបលទ្ធផលការងារត្រួតពិនិត្យគ្រឿងញៀនឆ្នាំ ២០២១ និងលើកទិសដៅការងារសម្រាប់ឆ្នាំ ២០២២ របស់អាជ្ញាធរជាតិប្រយុទ្ធប្រឆាំងគ្រឿងញៀន នៅថ្ងៃទី ៣០ ខែមីនា លោក កែ គឹមយ៉ាន ថ្លែងថា អាជ្ញាធរថ្នាក់ក្រោមជាតិ ក៏ត្រូវបន្តលើកកម្ពស់ការយល់ដឹងជាសាធារណៈពីបញ្ហាគ្រោះថ្នាក់ដែលបណ្តាលមកពីគ្រឿងញៀនឱ្យកាន់តែមានប្រសិទ្ធភាពបន្ថែមទៀតតាមគ្រប់រូបភាព គ្រប់ទីកន្លែង និងបន្តយកចិត្តទុកដាក់ធ្វើការផ្សព្វផ្សាយអប់រំអំពីច្បាប់ស្តីពីការត្រួតពិនិត្យគ្រឿងញៀន រួមទាំងការអំពាវនាវដល់តួអង្គពាក់ព័ន្ធទាំងអស់ឱ្យចូលរួមសកម្មភាពក្នុងយុទ្ធនាការប្រយុទ្ធប្រឆាំងគ្រឿងញៀនខុសច្បាប់ សំដៅកាត់បន្ថយបទល្មើសគ្រឿងញៀន ការពារសុខុមាលភាព និងសុវត្ថិភាពសង្គម ឱ្យបានជ្រួតជ្រាបគ្រប់ទីកន្លែង ដោយប្រើប្រាស់គ្រប់មធ្យោបាយ គ្រប់រូបភាព ចំគោលដៅ និងមុខសញ្ញា ព្រមទាំង មានវិធីសាស្ត្រសមស្របក្នុងការផ្សព្វផ្សាយអប់រំ ងាយស្តាប់ ងាយយល់ និងងាយទទួលយកបាន។
លោក កែ គឹមយ៉ាន ថា អាជ្ញាធរថ្នាក់ក្រោមជាតិត្រូវបន្តពង្រឹងសមត្ថភាពការងាររបស់ខ្លួន ក្នុងការប្រយុទ្ធប្រឆាំងគ្រឿងញៀន ជាពិសេសការងារត្រួតពិនិត្យសារធាតុគីមីផ្សំគ្រឿងញៀន ការងារបង្ក្រាបបទល្មើសគ្រឿងញៀនឆ្លងដែន ការដាំដុះ ការផលិត និងការប្រើប្រាស់គ្រឿងញៀន។ ការពង្រឹងនូវការអនុវត្តវិធានការរដ្ឋបាល ចំពោះសណ្ឋាគារ ផ្ទះសំណាក់ កន្លែងសប្បាយដ្ឋាន និងការពន្លឿននីតិវិធីនៃការរឹបអូសទ្រព្យសម្បត្តិ ដែលបានមកពីបទល្មើសគ្រឿងញៀន។
លោកស្នើអាជ្ញាធរថ្នាក់ក្រោមជាតិត្រូវបន្តពង្រឹងកិច្ចសហប្រតិបត្តិការអន្តរជាតិ ទ្វេភាគី ត្រីភាគី ជាមួយប្រទេសជាប់ព្រំដែន ជាពិសេសព្រំដែនកម្ពុជា-ឡាវ តាមរយៈការអនុវត្តស្មារតីដែលបានព្រមព្រៀងគ្នា ស្តីពីការត្រួតពិនិត្យគ្រឿងញៀន និងការអនុវត្តយន្តការភូមិ ឃុំ សង្កាត់ ស គ្មានគ្រឿងញៀននៅតំបន់ជាប់ព្រំដែន។
លោក មាស វីរិទ្ធ អគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀនប្រាប់ ភ្នំពេញ ប៉ុស្តិ៍ថា នៅក្នុងផែនការលេខ ០១ របស់រាជរដ្ឋាភិបាលតម្រូវឱ្យគណៈកម្មការត្រួតពិនិត្យគ្រឿងញៀនរាជធានី-ខេត្ត រៀបចំផែនការសកម្មភាព ក្នុងការត្រួតពិនិត្យគ្រឿងញៀនក្នុងដែនសមត្ថកិច្ចរបស់ខ្លួនឱ្យបានត្រឹមត្រូវ និងមានប្រសិទ្ធភាព ជាពិសេសរៀបចំឱ្យមានយន្តការដោះស្រាយបញ្ហាគ្រឿងញៀននៅក្នុងមូលដ្ឋានស្រុក ខណ្ឌ ក្រុង។
ក្រៅពីនោះ អាជ្ញាធរថ្នាក់ក្រោមជាតិត្រូវរៀបចំយន្តការត្រួតពិនិត្យគ្រឿងញៀននៅតាមឃុំសង្កាត់ជាពិសេស គឺការបង្កើតគណៈកម្មការត្រួតពិនិត្យគ្រឿងញៀន ក្រុង ស្រុក ខណ្ឌ និងឃុំ ឱ្យបានច្បាស់លាស់ ដើម្បីធានាថា យន្តការទាំងអស់នឹងអាចដោះស្រាយបញ្ហាបាននូវគ្រឿងញៀននៅថ្នាក់មូលដ្ឋាន។ រៀបចំឱ្យមានភូមិឃុំសង្កាត់ ស នៅតាមបន្ទាត់ព្រំដែន៕