.jpg)
ជនជាប់ចោទ ២ នាក់ក្នុងចំណោម ៥ នាក់នៅសាលាដំបូងរាជធានីពីឆ្នាំ ២០១៦។ ហុង មិនា
ភ្នំពេញៈ តុលាការកំពូលនៅថ្ងៃទី ៣០ មីនា បានប្រកាសសាលដីកាបង្វិលសំណុំរឿងគ្រឿងញៀនជិត ៥៥ គីឡូក្រាមទៅសាលាឧទ្ធរណ៍ភ្នំពេញជម្រះឡើងវិញ បន្ទាប់ពីជំនុំជម្រះកាលពីថ្ងៃទី ២៣ មីនា ពាក់ព័ន្ធជនចាប់ចោទ ៥ នាក់ដែល ក្នុងម្នាក់ៗត្រូវបានតុលាការថ្នាក់ក្រោមផ្តន្ទាទោសដាក់ពន្ធនាគារ ១ ជីវិត។
លោកចៅក្រម សឹង បញ្ញាវុឌ្ឍ នៅថ្ងៃទី ៣០ មីនា បានប្រកាសសាលដីកាកំបាំងមុខ ជនជាប់ចោទ និងមេធាវីការពារសិទ្ធិឱ្យជនជាប់ចោទថា សំណុំរឿងនេះមានជនជាប់ចោទទី ១- លី យ៉ុន ភេទ ប្រុស អាយុ ៤២ ឆ្នាំជាជនជាតិចិន,ទី ២- តឹង យ៉ានភីង ភេទប្រុស អាយុ ៥៤ ឆ្នាំ,ទី ៣- លី ស៊ឺ ភេទប្រុស អាយុ ៤៣ ឆ្នាំជាជនជាតិខ្មែរ ទី ៤- ឈ្មោះ ដាំ ញ៉ា ភេទ ប្រុស អាយុ ៥៥ ឆ្នាំជាជនជាតិខ្មែរ រស់នៅខេត្តស្ទឹងត្រែង និងឈ្មោះ ផល រ៉ានី ភេទ ស្រី អាយុ ២៨ ឆ្នាំជាជនជាតិខ្មែរ (អវត្តមានពេលសវនាការ)។ លោកថា ក្រោយពីបានស្តាប់ការឆ្លើយបំភ្លឺពីជនជាប់ចោទកាលពីថ្ងៃជំនុំជម្រះ និងក្រោយពីបានស្តាប់សេចក្តីសន្និដ្ឋានរបស់មេធាវីកា និងស្តាប់សេចក្តីសន្និដ្ឋានរបស់តំណាងមហាអយ្យការមកក្រុមប្រឹក្សាជំនុំជម្រះយល់ឃើញថា៖ «សាលដីការបស់សាលាឧទ្ធរណ៍ភ្នំពេញបានសម្រេចមកនេះ មិនត្រឹមត្រូវតាមច្បាប់នៅឡើយទេ។ ដូច្នេះបដិសេធសាលដីកាចុះថ្ងៃទី ២៣ កញ្ញា ឆ្នាំ ២០២១ ចោល និងបង្វិលសំណុំរឿងនេះទៅសាលាឧទ្ធរណ៍ភ្នំពេញជំនុំជម្រះឡើងវិញ»។
ពាក់ព័ន្ធការប្រកាសសាលដីការបស់តុលាការកំពូលនេះត្រូវបានលោក ឡោ គីមហ្គិច ដែលការពារសិទ្ធិឱ្យជនជាប់ចោទឈ្មោះ តឹង យ៉ានភីង និងឈ្មោះ លី ស៊ឺ ប្រាប់តាមទូរស័ព្ទនៅថ្ងៃទី ៣០ មីនា ថា កូនក្តីលោកឈ្មោះ តឹង យ៉ានភីង គឺគាត់មានលិខិតពេទ្យបញ្ជាក់ថា គាត់មានជំងឺមហារីកខួរក្បាលដែលធ្វើឱ្យគាត់ឈឺចាប់ខ្លាំង។ ហេតុដូច្នេះហើយ ទើបគាត់ទិញគ្រឿងញៀនយកមកជក់ ដើម្បីកាត់បន្ថយការឈឺចាប់ ដោយមានដាក់គ្រឿងញៀននៅជាប់នឹងខ្លួនរបស់គាត់ចំនួន ១០២ ក្រាម។
លោកបន្តថា ក្នុងចំនួនគ្រឿងញៀននេះ តុលាការមិនបានផ្តន្ទាទោសកូនក្តីរបស់លោកទៅតាមចំនួនគ្រឿងញៀនជាក់ស្តែងនោះទេ តែបែរជាចោទថា កូនក្តីលោកផលិតគ្រឿងញៀនទៅវិញ ដែលផ្ទុយអំពីច្បាប់។ ដោយប្រហែលជាត្រង់ចំណុចនេះហើយ ទើបបានជាតុលាការកំពូល បង្វិលសំណុំរឿងនេះទៅសាលាឧទ្ធរណ៍ភ្នំពេញជម្រះឡើងវិញ ព្រោះបើតាមច្បាប់គ្រឿងញៀន ដែលកូនក្តីរបស់លោកមាន ១០២ ក្រាមនេះ គឺត្រូវជាប់ទោសតែពី ៥ ទៅ ១០ ឆ្នាំទេ។ ចំពោះកូនក្តីលោកឈ្មោះ លី ស៊ឺ គឺគាត់ជាប់ពន្ធនាគារពីខែមេសាឆ្នាំ ២០១៥ ហើយរឿងដែលកើតឡើងនេះ គឺនៅថ្ងៃទី ១៥ មិថុនា ឆ្នាំ ២០១៥។ ដូចនេះកូនក្តីរបស់លោកជាប់ពន្ធនាគារ ២ ខែទើបបានមានរឿងនេះកើតឡើង ដែលត្រូវស្ត្រីឈ្មោះ ផល រ៉ានី ដែលសមត្ថកិច្ចចាប់បានឆ្លើយទម្លាក់កំហុសដាក់ឈ្មោះ លី ស៊ឺ។
លោកថា៖ «តុលាការកំពូល មានភាពសុក្រឹត និងផ្តល់យុត្តិធម៌ត្រឹមត្រូវតាមផ្លូវច្បាប់ ដែលបង្វិលសំណុំរឿងរបស់កូនក្តីលោកទៅសាលាឧទ្ធរណ៍ភ្នំពេញជំនុំជម្រះឡើងវិញ ដើម្បីស៊ើបអំពីបទល្មើសដែលបានចោទប្រកាន់លើកូនក្តីរបស់ខ្ញុំ»។
តាមអង្គហេតុរបស់តុលាការកំពូលបង្ហាញថា កាលពីថ្ងៃទី ១៦ មិថុនាឆ្នាំ ២០១៥ នគរបាលមន្ទីរប្រឆាំងគ្រឿងញៀនបានបង្ក្រាបករណីផលិតកែច្នៃ និងជួញដូរគ្រឿងញៀនលើជនជាប់ចោទទាំង ៥ នាក់។ សមត្ថកិច្ចរឹបអូសបានគ្រឿងញៀនប្រភេទមេតំហ្វេតាមីន និងហេរ៉ូអ៊ីនជិត ៥៥ គីឡូក្រាម។
សំណុំរឿងនេះត្រូវសាលាដំបូងរាជធានីភ្នំពេញបើកសវនាការជំនុំជម្រះ និងប្រកាសសាលក្រមនៅថ្ងៃទី ២០ កញ្ញា ឆ្នាំ ២០១៦ ផ្តន្ទាទោសជនទាំង ៥ នាក់ ដាក់ពន្ធនាគារក្នុងម្នាក់ៗអស់ ១ ជីវិត និងពិន័យជាប្រាក់ចូលថវិការដ្ឋម្នាក់ ៦០ លានរៀល។ ដោយមិនសុខចិត្តនឹងសាលក្រមនេះ ជនជាប់ចោទទាំង ៥ នាក់បានប្តឹងមកសាលាឧទ្ធរណ៍ភ្នំពេញ ហើយត្រូវបានសាលាឧទ្ធរណ៍ភ្នំពេញ បើកសវនាការជំនុំជម្រះ និងប្រកាសសាលដីកានៅថ្ងៃទី ២៣ កញ្ញា ឆ្នាំ ២០២១ សម្រេចតម្កល់សាលក្រមរបស់សាលាដំបូងរាជធានី-ភ្នំពេញនៅដដែល៕
