.jpg)
លោកស្រី ឱ វណ្ណឌីន ជួបលោក W. Patrick Muphy ពីថ្ងៃទី ២៩ មីនា។ រូបក្រសួងសុខាភិបាល
ភ្នំពេញៈ មន្ទីរពេទ្យ និងគ្លីនិកចំនួន ២០ ចូលរួមអនុវត្តគម្រោងស្តីពីការប្រើប្រាស់បច្ចេកវិទ្យា ដើម្បីលើកកម្ពស់គុណភាពសេវាសុខាភិបាល និងមន្ទីរពេទ្យវៃឆ្លាតបៃតង ដែលបានដាក់ឈ្មោះថា «បណ្តាញ សមាជិកមន្ទីរពេទ្យវៃឆ្លាតបៃតង» ដោយបានផ្លាស់ប្តូរមន្ទីរពេទ្យរបស់ខ្លួនពីការប្រើប្រាស់ក្រដាសមកជាឌីជីថលវិញ។
សេចក្តីប្រកាសព័ត៌មានរបស់ពេទ្យយើងស្តីពីការប្រើបច្ចេកវិទ្យា ដើម្បីលើកកម្ពស់គុណភាពសេវាសុខាភិបាល និងមន្ទីរពេទ្យវៃឆ្លាតបៃតង ពីថ្ងៃទី ២៩ មីនា ឱ្យដឹងថា គម្រោងបណ្តាញមន្ទីរពេទ្យវៃឆ្លាតបៃតងបានចាប់ផ្តើមកាលពីខែតុលា ឆ្នាំ ២០២០ និងបញ្ចប់នៅដំណាច់ខែមីនា ឆ្នាំ ២០២២ នេះ។ គម្រោងនេះចូលរួមប្រើប្រាស់ពីវេជ្ជបណ្ឌិត និងបុគ្គលិកមន្ទីរពេទ្យ ៨៦៧ នាក់ ព្រមទាំងគ្រប់គ្រងទិន្នន័យប្រវត្តិអ្នកជំងឺចំនួន ១០៨ ៧៥០ នាក់ ដែលភាគច្រើនជាស្ត្រី។
បណ្តាញមន្ទីរពេទ្យវៃឆ្លាតបៃតង គឺជាបណ្តាញសមាជិកមន្ទីរពេទ្យ និងគ្លីនិកចំនួន ២០ ដែលបានចូលរួមក្នុងយុទ្ធនាការស្តីពីបរិស្ថាន ទីក្រុងស្អាត និងបៃតង ដោយបានផ្លាស់ប្តូរពីការប្រើប្រាស់ក្រដាស ការព្រីនឯកសារ និងកាត់បន្ថយការប្រើប្រាស់សម្ភារនានាក្នុងមន្ទីរពេទ្យ ងាកមកប្រើប្រាស់ប្រព័ន្ធគ្រប់គ្រងមន្ទីរពេទ្យឌីជីថល «ពេទ្យយើង» ដើម្បីលើកកម្ពស់បច្ចេកវិទ្យាក្នុងមន្ទីរពេទ្យបៃតង។
សេចក្តីប្រកាសព័ត៌មានបញ្ជាក់ថា តាមរយៈការប្រើប្រាស់ប្រព័ន្ធគ្រប់គ្រងមន្ទីរពេទ្យឌីជីថល ពេទ្យយើង មិនត្រឹមតែចូលរួមក្នុងយុទ្ធនាការបរិស្ថាន ទីក្រុងស្អាត និងបៃតងប៉ុណ្ណោះទេ ប៉ុន្តែវាបានជួយពន្លឿនរាល់ប្រតិបត្តិការទាំងអស់ ក្នុងមន្ទីរពេទ្យ ឬគ្លីនិក តាមរយៈប្រព័ន្ធឌីជីថលដើម្បីជំរុញការព្យាបាលកាន់តែលឿនរហ័ស ទំនើប ចំណេញ ពេលវេលា និងថវិកាសម្រាប់អ្នកផ្តល់សេវា និងអ្នកជំងឺ ជាពិសេសអ្នកជំងឺជាស្ត្រី និងកុមារ។
លោកស្រី ប៉ុង លីមសាន ស្ថាបនិក និងជានាយិកាប្រតិបត្តិកម្មវិធីពេទ្យយើងនៃក្រុមហ៊ុន ហ្វឺសវីម៉ិន ថេក អេស៊ា ថ្លែងក្នុងសិក្ខាសាលាផ្សព្វផ្សាយលទ្ធផលគម្រោងស្តីពី «ការប្រើប្រាស់បច្ចេកវិទ្យា ដើម្បីលើកកម្ពស់គុណភាពសេវាសុខាភិបាល និងមន្ទីរពេទ្យវៃឆ្លាតបៃតង» ថា គម្រោងបណ្តាញមន្ទីរពេទ្យវៃឆ្លាតបៃតង (Green Network Hospital) មានគោលបំណង បង្កើនគុណភាពនៃការព្យាបាល តាមរយៈប្រព័ន្ធឌីជីថល។
លោកស្រីថ្លែងថា៖ «មានន័យថា មន្ទីរពេទ្យទាំងអស់ធ្វើប្រតិបត្តិការចាប់ពីអ្នកជំងឺចូលរហូតដល់អ្នកជំងឺចេញ រួមទាំងប្រតិបត្តិការផ្នែកផ្សេងទៀតនៅក្នុងមន្ទីរពេទ្យ តាមប្រព័ន្ធឌីជីថល។ យើងក៏មានគោលបំណងមួយទៀត គឺចូលរួមជួយដល់បរិស្ថាន ព្រោះយើងដឹងហើយថា កន្លងមកតាមមន្ទីរពេទ្យប្រើប្រាស់ក្រដាសក្នុងការបំពេញឯកសារអ្នកជំងឺ និងប្រតិបត្តិការនានា ប៉ុន្តែនៅពេលនេះ យើងជំនួសប្រតិបត្តិការទាំងអស់នោះតាមប្រព័ន្ធឌីជីថល»។
រដ្ឋលេខាធិការក្រសួងសុខាភិបាលលោកស្រី ឱ វណ្ណឌីន ដែលបានចូលរួមក្នុងអង្គសិក្ខាសាលា លើកឡើងដែរថា គម្រោង «ការប្រើប្រាស់បច្ចេកវិទ្យាសម្រាប់ ដំណើរការមន្ទីរពេទ្យវៃឆ្លាតបៃតង» សំដៅចូលរួមចំណែកក្នុងការធ្វើទំនើបកម្មបច្ចេកវិទ្យាឌីជីថល ក្នុងវិស័យសុខាភិបាលកម្ពុជា។
លោកស្រីបន្តថា វាក៏ជាការបោះជំហានជាវិជ្ជមានមួយទៀតក្នុងការរួមចំណែកអនុវត្តផែនការយុទ្ធសាស្ត្រសុខាភិបាលជាតិ ដែលបាននិងកំពុងតែផ្តោតការយកចិត្តទុកដាក់ខ្ពស់លើការធ្វើទំនើបកម្មបច្ចេកវិទ្យាឌីជីថល នៅតាមមន្ទីរពេទ្យរដ្ឋ និងឯកជន។
លោកស្រី ឱ វណ្ណឌីន ថ្លែងថា៖ «ដំណើរការគម្រោងការប្រើប្រាស់បច្ចេកវិទ្យា សម្រាប់ដំណើរការមន្ទីរពេទ្យវៃឆ្លាតបៃតងក្នុងផ្នែកឯកជននៅកម្ពុជា ជាចំណែកមួយក្នុងការបង្កើនសក្តានុពលដ៏វិសេសវិសាលទៅលើការផ្តល់សេវាពិគ្រោះ និងព្យាបាលជំងឺតាមបែបឌីជីថលជូនដល់ប្រជាពលរដ្ឋ ដែលប្រើប្រាស់សេវាមន្ទីរពេទ្យឯកជន និងជាការចូលរួមចំណែកមួយផងដែរ នៅក្នុងការអភិវឌ្ឍវិស័យសុខាភិបាលកម្ពុជា តាមបែបឌីជីថល»។
គម្រោងនេះបានជួយដល់មន្ទីរពេទ្យឯកជននៅរាជធានីភ្នំពេញ ខេត្តបាត់ដំបង និងខេត្តសៀមរាបឱ្យដំណើរការគ្រប់គ្រងសេវាព្យាបាលជំងឺបែបឌីជីថល និងនាំឱ្យមន្ទីរពេទ្យ និងគ្លីនិកឯកជនទាំងអស់នោះ មានតួនាទីមិនត្រឹមតែជាអ្នកផ្តល់សេវាប្រកបដោយការទទួលខុសត្រូវទេ ប៉ុន្តែបានក្លាយជាមន្ទីរពេទ្យ និងគ្លីនិកមានការទទួលខុសត្រូវចូលរួមកសាងទីក្រុងបៃតង និងបរិស្ថានស្អាតទៀតផង។
លោកស្រី ឱ វណ្ណឌីន បន្តថា ការប្រើប្រាស់បច្ចេកវិទ្យាឌីជីថលទំនើបសម្រាប់លើកកម្ពស់គុណភាពសេវាសុខាភិបាលក៏ជាចំណុច សំខាន់មួយដែលត្រូវបានរាប់បញ្ចូល គិតគូរ និងផ្តួចផ្តើមក្នុងគោលនយោបាយយុទ្ធសាស្ត្ររបស់ក្រសួងសុខាភិបាល ហើយក៏កំពុងតែគាំទ្រ និងជំរុញលើកទឹកចិត្តឱ្យមានការចូលរួមឱ្យបានពេញលេញពីគ្រប់ភាគីពាក់ព័ន្ធទាំងស្ថាប័នរដ្ឋ វិស័យឯកជន និងអង្គការដៃគូនានាផងដែរ។
លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជា ក៏បានប្រកាសចូលរួម អបអរសាទរដល់មន្ទីរពេទ្យ និងគ្លីនិកទាំង ២០ ដែលបានអនុវត្តគម្រោងបណ្តាញមន្ទីរពេទ្យវៃឆ្លាតបៃតង ដោយជោគជ័យនាពេលនេះ។ លោករំពឹងថា គម្រោងនេះនឹងចូលរួមចំណែកយ៉ាងខ្លាំងជួយជ្រោមជ្រែងដល់ការផ្តល់សេវាជូនអតិថិជនព្រមទាំងចូលរួមចំណែកក្នុងការកាត់បន្ថយផលប៉ះពាល់បរិស្ថាន និងការប្រែប្រួលអាកាសធាតុផងដែរ។
លោកឯកអគ្គរដ្ឋទូតថ្លែងថា៖ «គម្រោងដើមរបស់យើង គឺយើងចង់ឱ្យមានកំណត់ត្រាអ្នកជំងឺត្រឹមតែ ៣៥ ០០០ នាក់ប៉ុណ្ណោះ ប៉ុន្តែក្នុងពេលអនុវត្តគម្រោងនេះសម្រេចបានដល់ទៅជាង ១០ ម៉ឺននាក់»។
ឯកអគ្គរដ្ឋទូតសហរដ្ឋអាមេរិកបញ្ជាក់ថា គម្រោងនេះមិនត្រឹមតែជាគំនិតផ្តួចផ្តើមគម្រោងទាក់ទងនឹងសុខភាពក្នុងវិស័យសុខាភិបាលនោះទេ តែក៏គិតដល់វិស័យផ្សេងៗទៀតក្នុងវិស័យនេះទាក់ទងនឹងគម្រោងទីក្រុងឆ្លាតវៃ ទាក់ទងនឹងគម្រោងសេដ្ឋកិច្ចឌីជីថល និងពង្រឹងភាពអង់អាចរបស់ស្ត្រី រួមទាំងការប្រយុទ្ធប្រឆាំងនឹងការប្រែប្រួលអាកាសធាតុ។
លោក ប៊ិន សុជាតិ ទីប្រឹក្សាស្ថាបនិក និងគ្រប់គ្រងអាជីវកម្ម «ពេទ្យយើង» របស់ក្រុមហ៊ុន ហ្វឺស វីម៉ិន ថេក អេស៊ា បានឱ្យដឹងថា មន្ទីរពេទ្យ និងគ្លីនិកទាំង ២០ នេះជាមន្ទីរពេទ្យ និងគ្លីនិកឯកជនទាំងអស់ ដោយសារគម្រោងនេះផ្តោតទៅលើវិស័យឯកជន។ ក្នុងនោះមាន ១២ នៅភ្នំពេញ ៤ នៅខេត្តសៀមរាប និង ៤ ផ្សេងទៀតនៅខេត្តបាត់ដំបង។
លោកបញ្ជាក់ថា៖ «យើងកំពុងតែរៀបចំគម្រោងស្នើសុំការគាំទ្រជំហានទី ២ ប៉ុន្តែយើងនៅមិនទាន់ដឹងថា តើខាងម្ចាស់គម្រោងសម្រេចបែបណានៅឡើយទេ។ បើជោគជ័យ យើងនឹងគាំទ្រ ២៦ មន្ទីរពេទ្យ និងគ្លីនិកឯកជនថ្មីផ្សេងទៀត ហើយបន្ថែមក្រុងគោលដៅវៃឆ្លាតថ្មីនៅខេត្តកណ្តាល កំពត និងខេត្តកែប»៕
