សៀមរាបៈ បុរសបើករថយន្តដឹកដីម្នាក់ត្រូវបាននគរបាលចរាចរណ៍ខេត្តសៀមរាបកសាងសំណុំរឿងបញ្ជូនទៅសាលាដំបូងខេត្តនៅថ្ងៃទី ៣១ មីនា បន្ទាប់ពីចាប់ខ្លួនបាន ២ ថ្ងៃ ករណីបង្កគ្រោះថ្នាក់ចរាចរណ៍ បុកមនុស្សឱ្យរបួសម្នាក់ហើយបើករថយន្តរត់គេច ប្រព្រឹត្តនៅភូមិខ្នារ សង្កាត់ជ្រាវ ក្រុងសៀមរាប។
លោក ជឹម សុវណ្ណ ស្នងការរងទទួលផែននគរបាលចរាចរណ៍ផ្លូវគោកនៃស្នងការដ្ឋាននគរបាលខេត្តសៀមរាបបានឱ្យដឹងនៅថ្ងៃទី ៣១ មីនាថា សមត្ថកិច្ចបានកសាងសំណុំរឿងបញ្ជូនបុរសឈ្មោះ ទឹម ថាវ អាយុ ៣៥ ឆ្នាំទៅតុលាការ។ ជនសង្ស័យបានបើករថយន្តដឹកដីហើយបានកៀរឱ្យរងរបួសនគរបាលក្រុងសៀមរាបម្នាក់។
លោកថ្លែងថា៖ «ករណីនេះ ខ្ញុំបានបញ្ជូនគាត់ទៅសាលាដំបូងខេត្តសៀមរាបនៅថ្ងៃនេះ (ថ្ងៃទី ៣១ មីនា)។ បុរសម្នាក់នោះបើកបរបង្ករបួសស្នាមហើយបើករត់ទៀត»។
ពាក់ព័ន្ធករណីនេះដែរត្រូវបានមន្ត្រីនគរបាលម្នាក់នៃអធិការដ្ឋាននគរបាលក្រុងសៀមរាបម្នាក់បានប្រាប់ដោយស្នើសុំមិនបញ្ចេញឈ្មោះតាមសម្តីសាក្សីនៅកន្លែងកើតហេតុថា នៅពេលមុនកើតហេតុនៅវេលាម៉ោងជាង ១ រសៀលថ្ងៃទី ២៩ ខែមីនា គេបានឃើញរថយន្តបែនដឹកដី ១ គ្រឿង បើកបរដោយបុរសម្នាក់។ លុះបើកដល់ចំណុចផ្ទះម៉ាស្សាមួយ យីហោឈ្មោះ ណាវីនម៉ាស្សាកោសជប់ ស្រាប់តែរថយន្ត ១ គ្រឿងនោះ បានបើកកៀរនគរបាលក្រុងសៀមរាបម្នាក់ដែលកំពុងជិះម៉ូតូតែម្នាក់ឯងបណ្តាលឱ្យរបួសស្រាលត្រង់ជើងខាងស្តាំ។
មន្ត្រីដដែលនេះបានបន្តថា នៅពេលនោះ អ្នកបើកបររថយន្តមិនបានឈប់ដើម្បីចុះមើលជនរងគ្រោះនោះទេតែបែជាបានបន្ថែមល្បឿនរថយន្តកាន់តែលឿន ហើយសមត្ថកិច្ចនគរបាលដែលត្រូវរបួសនោះ បានទូរស័ព្ទរាយការណ៍ទៅកម្លាំងសមត្ថកិច្ចនគរបាលក្រុងសៀមរាប ហើយសមត្ថកិច្ចបានចេញដេញតាមឃាត់រថយន្តនោះ។
តែដោយសារ មិនអាចបញ្ឈប់អ្នកបើកបររថយន្តនោះបាន កម្លាំងសមត្ថកិច្ចក៏បានបាញ់បំបែកកង់ក្រោយម្ខាងរបស់រថយន្តនោះ ហើយក៏ចាប់បានជនសង្ស័យ នៅត្រង់ចំណុចស្ពានប៊ីឡាញស្ថិតក្នុងភូមិកក្រាញ់ សង្កាត់-ក្រុងសៀមរាប។
មន្ត្រីនគរបាលរូបនោះបានបញ្ជាក់ទៀតថា៖ «ជនល្មើសម្នាក់នោះ នៅពេលដែលកម្លាំងសមត្ថកិច្ចចាប់ឃាត់ខ្លួនបានឆ្លើយប្រាប់សមត្ថកិច្ចថា គាត់បើកឡានរត់ដោយសារគាត់ស្លន់ហើយភ័យខ្លាចថា ជនរងគ្រោះនោះបានស្លាប់បាត់ទៅហើយ»៕