ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា មានព្រះបន្ទូលថា ក្រោមការដឹកនាំ និងគ្រប់គ្រងដោយលោកនាយករដ្ឋមន្ត្រី ហ៊ុន សែន មាតុភូមិ បានទទួលនូវជ័យជម្នះយ៉ាងត្រចះត្រចង់ក្នុងការប្រយុទ្ធប្រឆាំងការរាតត្បាតនៃជំងឺកូវីដ ១៩។
សម្តេចព្រះបរមនាថ នរោត្តម សីហមុនី មានព្រះបន្ទូលដូចនេះតាមរយៈព្រះរាជសារក្នុងឱកាសការបើកបវេសនកាលនៃរដ្ឋសភា សម័យប្រជុំរដ្ឋសភាលើកទី៧ នីតិកាលទី៦ ដែលបានបើកសម័យប្រជុំ លើកទី៧ នីតិកាលទី៦នាព្រឹកថ្ងៃទី០១ ខែមេសា នេះ។
សម័យប្រជុំរដ្ឋសភានៃព្រះរាជាណាចក្រកម្ពុជាបានប្រព្រឹត្តឡើងក្រោមអធិបតីភាពលោក ហេង សំរិន ប្រធានរដ្ឋសភា ដោយមានវត្តមានសមាជិកសមាជិការដ្ឋសភា ពេលចាប់ផ្តើមសម័យប្រជុំ ចំនួន ៩៣រូប ចូលរួមផងដែរ។
ព្រះមហាក្សត្រ សម្តេចព្រះបរមនាថ នរោត្តម សីហមុនី មានព្រះរាជបន្ទូលថា ៖ «ដោយបានឆ្លងកាត់ដំណាក់កាលនៃការរាតត្បាតជំងឺកូវីដ១៩ ដូចជនរួមជាតិទាំងអស់គ្នាដែរ រដ្ឋសភា នៅតែបន្តដំណើរការយ៉ាងស្វាហាប់លើភារកិច្ច ក្នុងនាមជាស្ថាប័ននីតិប្បញ្ញត្តិ ដើម្បីកសាងគោលនយោបាយ និងច្បាប់រដ្ឋឱ្យបានត្រឹមត្រូវ ធ្វើឱ្យមានសង្គតិភាពទៅនឹងការអភិវឌ្ឍរបស់ប្រទេសជាតិ សមាហរណកម្មតំបន់ និងនៅលើសកលលោក»។
សមិទ្ធផលទាំងអស់នេះ បានផ្តល់ជូនប្រជាពលរដ្ឋកម្ពុជាគ្រប់រូប បានរស់នៅប្រកបដោយភាពសុខក្សេមក្សាន្ត មានសន្តិសុខសណ្តាប់ធ្នាប់ល្អ ស័ក្តិសមជាព្រះរាជាណាចក្ររុងរឿង និងខ្ពស់មុខខ្ពស់មាត់លើឆាកអន្តរជាតិ។
ព្រះអង្គបានកោតសរសើរចំពោះការដឹកនាំប្រទេស ប្រកបដោយ គតិបណ្ឌិតរបស់លោកនាយករដ្ឋមន្ត្រី ហ៊ុន សែន ដែលបានធ្វើពលិកម្មកម្លាំងកាយកម្លាំងចិត្តឥតឈប់ឈរ។
សម្តេចព្រះបរមនាថ នរោត្តម សីហមុនី មានបន្ទូលថា ៖ «នាយករដ្ឋមន្ត្រីកម្ពុជា មានការសម្រេចចិត្តខាងនយោបាយដ៏ត្រឹមត្រូវ ក្នុងភារកិច្ចថែរក្សាសន្តិភាព ស្ថិរភាពសង្គម និងការអភិវឌ្ឍរីកចម្រើនលើគ្រប់វិស័យ ជាអាទិ៍ ការការពារខឿនសេដ្ឋកិច្ចជាតិបានយ៉ាងរឹងមាំ ទប់ស្កាត់អតិផរណា មានសុខដុមនីយកម្មលើគ្រប់ជាតិសាសន៍ និងការលើកកម្ពស់សុខុមាលភាពជូនប្រជាពលរដ្ឋ»។
ព្រះអង្គបន្តថា៖ «ការលើកឧត្តមប្រយោជន៍ដែលប្រជាជាតិទាំងអស់បានទទួល នាំឱ្យប្រជារាស្ត្រកម្ពុជាក៏ដូចជា ខ្ញុំព្រះករុណា ខ្ញុំមានការពេញចិត្ត ពេញព្រះទ័យណាស់ ចំពោះវឌ្ឍនភាពជាបន្តបន្ទាប់រហូតមកនេះ»។
ទន្ទឹមនឹងនេះដែរ ព្រះអង្គបានអំពាវនាវឱ្យបងប្អូន ជនរួមជាតិទាំងអស់ មេត្តាបន្តអនុវត្តនូវវិធានការសុខាភិបាលឱ្យបានខ្ជាប់ខ្ជួន និងហ្មត់ចត់ ដើម្បីទទួលបានសុខភាពល្អប្រសើរ បន្តប្រតិបត្តិការងារ និងប្រកបជីវភាពប្រចាំថ្ងៃ ទៅតាមគន្លងថ្មីជាមួយនឹងជំងឺរាតត្បាតកូវីដ១៩ ដែលមិនទាន់រលត់សាបសូន្យនៅឡើយ។
ជាមួយគ្នានេះដែរ សម្រាប់របៀបវារៈសម័យប្រជុំរដ្ឋសភាលើកទី៧ នីតិកាលទី៦ មានចំនួន ៤ ក្នុងនោះមាន ទី១គឺព្រះរាជសារ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភាលើកទី៧ នីតិកាលទី៦។
របៀបវារៈទី២គឺ របាយការណ៍សង្ខេបស្តីពី សកម្មភាពការងាររបស់រដ្ឋសភាចន្លោះសម័យប្រជុំរដ្ឋសភាលើកទី៦ និងលើកទី៧ នីតិកាលទី៦។ ចំណែកទី៣ គឺការបោះឆ្នោតជ្រើសតាំង ឯកឧត្តម អ៊ុជ គឹមអន ជាសមាជិកក្រុមប្រឹក្សាធម្មនុញ្ញអាណត្តិថ្មី សម្រាប់អាណត្តិ ៩ឆ្នាំ ជ្រើសតាំងដោយរដ្ឋសភា នីតិកាលទី៦ និងទី៤ គឺការពិភាក្សា និងអនុម័តសេចក្តីព្រាងច្បាប់ស្តីពី ការការពាររុក្ខជាតិ និងភូតគាមអនាម័យ៕