.jpg)
រដ្ឋមន្ត្រីសម្របសម្រួលគោលនយោបាយរដ្ឋាភិបាលនៃសាធារណរដ្ឋកូរ៉េ និងប្រតិភូ បានមកបំពេញទស្សនកិច្ចនៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ដើម្បីស្វែងយល់អំពីលទ្ធផលនៃការអនុវត្តគម្រោងអភិរក្ស និងថតចម្លងបណ្ណសារសារមន្ទីរទួលស្លែង ដែលគាំទ្រហិរញ្ញវត្ថុដោយភ្នាក់ងារសហប្រតិបត្តិការអន្តរជាតិកូរ៉េ (KOICA) ក្រោមការសម្របសម្រួលជាមួយអង្គការយូណេស្កូ។
កាលពីថ្ងៃទី ២៩ ខែ មីនា ឆ្នាំ ២០២២ លោក ហាប់ ទូច រដ្ឋលេខាធិការតំណាងលោកស្រី ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានទទួលស្វាគមន៍នូវដំណើរទស្សនកិច្ច របស់លោក KOO Yun Cheol រដ្ឋមន្ត្រីសម្របសម្រួលគោលនយោបាយរដ្ឋាភិបាលនៃសាធារណរដ្ឋកូរ៉េ និងប្រតិភូ ដែលមកបំពេញទស្សនកិច្ចនៅសារមន្ទីរឧក្រិដ្ឋកម្មប្រល័យពូជសាសន៍ទួលស្លែង។
យោងតាមក្រសួងវប្បធម៌និងវិចិត្រសិល្បៈបានឱ្យដឹងថា ក្នុងដំណើរទស្សនកិច្ចនេះ គណៈប្រតិភូក៏បានទស្សនា និងស្វែងយល់អំពីលទ្ធផលនៃការអនុវត្តគម្រោងអភិរក្សនិងថតចម្លងបណ្ណសារសារមន្ទីរទួលស្លែង។
លោក ហាប់ ទូច និងប្រតិភូអមដំណើរ បានសម្ដែងនូវការសាទរចំពោះភាពជោគជ័យនៃកិច្ចសហប្រតិបត្តិការលើគម្រោងអភិរក្សនិងថតចម្លងបណ្ណសារសារមន្ទីរទួលស្លែង ព្រមទាំងកោតសរសើរចំពោះកិច្ចខិតខំប្រឹងប្រែងរបស់ក្រសួងវប្បធម៌និងវិចិត្រសិល្បៈ និង សារមន្ទីរទួលស្លែង ក្នុងការអភិរក្សបេតិកភណ្ឌឯកសារប្រវត្តិសាស្ត្រនិងពង្រីកការអប់រំផ្សព្វផ្សាយអំពីប្រវត្តិសាស្ត្រនៃអំពើប្រល័យពូជសាសន៍ខ្មែរក្រហម៕
