ភ្នំពេញៈ ក្រសួងអប់រំ យុវជន និងកីឡា និងជាតំណាងជាតិសម្រាប់សហគមន៍សង្គម-វប្បធម៌អាស៊ាន បានរៀបចំកិច្ចប្រជុំចំនួន ៣ កាលថ្ងៃទី ២៨-៣០ ខែមីនា ឆ្នាំ ២០២២ ដោយអង្គប្រជុំក៏បានឯកភាពលើសំណើរបស់កម្ពុជា ក្នុងការពន្លឿនបេសកកម្មស្វែងរកការពិតក្នុងប្រទេស Timor-Leste និងបានជំរុញលើកទឹកចិត្តឱ្យស្ថាប័ននានារបស់អាស៊ានអញ្ជើញប្រទេសនេះចូលរួមក្នុងគំនិតផ្តួចផ្តើម ដែលមិនពាក់ព័ន្ធនឹងការរៀបចំគោលនយោបាយផងដែរ។
កិច្ចប្រជុំចំនួន ៣ នោះ រួមមាន កិច្ចប្រជុំលើកទី ៥ នៃក្រុមការងារអាស៊ានសម្រាប់ការអនុវត្តសេចក្តីថ្លែងការណ៍ស្តីពីវប្បធម៌នៃការបង្ការ (5thWG on CoP) កិច្ចប្រជុំឧត្តមមន្ត្រីសហគមន៍សង្គម-វប្បធម៌អាស៊ាន លើកទី ៣២ (32nd SOCAMeeting) និងកិច្ចប្រជុំក្រុមប្រឹក្សាសហគមន៍-សង្គម-វប្បធម៌អាស៊ានលើកទី ២៧ (27th ASCC Council Meeting)។ យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា កាលពីថ្ងៃទី ៣០ ខែមីនា ឆ្នាំ ២០២២ ស្តីពីលទ្ធផលនៃកិច្ចប្រជុំទាំង ៣ បានឱ្យដឹងថា អង្គប្រជុំបានកត់សម្គាល់ប្រកបដោយការពេញចិត្តជាមួយនឹងវឌ្ឍនភាពនៃការបន្តអនុវត្តផែនការមេសហគមន៍សង្គម-វប្បធម៌អាស៊ាន ឆ្នាំ ២០២៥។
លទ្ធផលបានបន្តថា អង្គប្រជុំឯកភាពចំពោះគំនិតផ្តួចផ្តើមបង្កើតសេចក្តីណែនាំតំបន់អាស៊ានស្តីពី ការបើកសាលារៀនឡើងវិញប្រកបដោយសុវត្ថិភាព ការស្តារឡើងវិញនូវការសិក្សា និងភាពធន់ក្នុងវិស័យអប់រំ ដែលជាផ្នែកមួយនៃកិច្ចខិតខំប្រឹងប្រែងក្នុងការជម្នះឱ្យបាននូវឧបសគ្គ ដែលបណ្តាលមកពីជំងឺរាតត្បាតសកលកូវីដ ១៩។
សេចក្ដីប្រកាសព័ត៌មានថា៖ «អង្គប្រជុំបានគូសបញ្ជាក់អំពីសារៈសំខាន់នៃការប្រកាសយកឆ្នាំ ២០២២ ជាឆ្នាំនៃយុវជនអាស៊ាន តាមរយៈសេចក្តីថ្លែងការណ៍របស់ថ្នាក់ដឹកនាំអាស៊ាន។ អង្គប្រជុំបានឯកភាពលើសំណើរបស់កម្ពុជា ក្នុងការពន្លឿនបេសកកម្មស្វែងរកការពិតក្នុងប្រទេស Timor-Leste ដែលនឹងដឹកនាំដោយឧត្តមមន្ត្រីសហគមន៍សង្គម-វប្បធម៌អាស៊ានសម្រាប់កម្ពុជា ឱ្យបានក្នុងត្រីមាសទី ៣ ឆ្នាំ២០២២ និងបានជំរុញលើកទឹកចិត្តឱ្យស្ថាប័ននានារបស់អាស៊ានអញ្ជើញប្រទេសនេះចូលរួមក្នុងគំនិតផ្តួចផ្តើម ដែលមិនពាក់ព័ន្ធនឹងការរៀបចំគោលនយោបាយ»។
លទ្ធផលដដែលនេះបានបន្ថែមថា អង្គប្រជុំកត់សម្គាល់ដោយការពេញចិត្តនូវឯកសារលទ្ធផលចំនួន ៣៥ ដែលត្រូវបានបង្កើតឡើងក្នុងអំឡុងពេលនៃភាពជាប្រធានសហគមន៍សង្គម-វប្បធម៌អាស៊ានរបស់កម្ពុជា។ សម្រាប់កិច្ចប្រជុំលើកទី ៥ នៃក្រុមការងារអាស៊ានសម្រាប់ការអនុវត្តសេចក្តីថ្លែងការណ៍ស្តីពីវប្បធម៌នៃការបង្ការ (5thWG on CoP) និងកិច្ចប្រជុំឧត្តមមន្ត្រីសហគមន៍សង្គម-វប្បធម៌អាស៊ាន លើកទី ៣២ (32nd SOCAMeeting) ត្រូវបានដឹកនាំការប្រជុំដោយ លោក ឌី ខាំបូលី ប្រធានឧត្តមមន្ត្រីសហគមន៍-សង្គម-វប្បធម៌អាស៊ាន (SOCA Chair)។ ចំណែកកិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ានលើកទី ២៧ (27th ASCC Council Meeting) ត្រូវបានដឹកនាំដោយរដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន។ ទាក់ទងនឹងកិច្ចប្រជុំក្រុមការងារអាស៊ាន សម្រាប់ការអនុវត្តសេចក្តីថ្លែងការណ៍ស្តីពីវប្បធម៌នៃការបង្ការ លើកទី ៥ គឺអង្គប្រជុំបានគាំទ្រទៅលើការផ្សព្វផ្សាយឯកសារព័ត៌មានស្តីពីវប្បធម៌នៃការបង្ការលើគេហទំព័រអាស៊ាន ដើម្បីផ្តល់ជាព័ត៌មានដល់មន្ត្រីរាជការសាធារណៈ សាធារណជន និងអ្នកស្រាវជ្រាវ អំពីវឌ្ឍនភាពនៃការអនុវត្ត វប្បធម៌នៃការបង្ការ។ អង្គប្រជុំបានគាំទ្រការបង្កើតសៀវភៅណែនាំស្តីពីវប្បធម៌នៃការបង្ការសម្រាប់អាស៊ាន ដោយផ្តោតលើចំណុចអាទិភាព រួមមាន ការផ្លាស់ប្តូររវាងមនុស្ស និងមនុស្ស ការប្រាស្រ័យទាក់ទងបែបយុទ្ធសាស្ត្រ ការធ្វើឌីជីថលូបនីយកម្ម ការលើកកម្ពស់អត្តសញ្ញាណ ការជំរុញការចូលរួមពីយុវជន ការបញ្ជ្រាប យេនឌ័រ និងការអភិវឌ្ឍបុគ្គល។ អង្គប្រជុំបានគាំទ្រឱ្យមានការរៀបចំកិច្ចសន្ទនាស្តីពីវប្បធម៌នៃការបង្ការសម្រាប់អាស៊ានផងដែរ។ កិច្ចប្រជុំឧត្តមមន្ត្រីសហគមន៍សង្គម-វប្បធម៌អាស៊ាន លើកទី ៣២ អង្គប្រជុំបានពិភាក្សាលើចំណុចសំខាន់ចំនួន ៣ ហើយអង្គប្រជុំបានកត់សម្គាល់លើការធ្វើបច្ចុប្បន្នភាពនៃការអនុវត្តផែនការសកម្មភាពស្តីពីវប្បធម៌នៃការបង្ការសម្រាប់អាស៊ាន និងបានអនុម័តការបន្ថែមចំណុចអាទិភាពថ្មីស្តីពី «ការលើកកម្ពស់ការអនុវត្តហេដ្ឋារចនាសម្ព័ន្ធដែលមានភាពធន់» ទៅក្នុងផែនការសកម្មភាពស្តីពីវប្បធម៌នៃការបង្ការ៕