ឧត្ដរមានជ័យៈ មន្ត្រីជំនាញនៃឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅបានឱ្យដឹងនៅថ្ងៃទី ៣១ មីនាថា សត្វខ្ទីងឈ្មោល ១ ក្បាលដែលបានចេញពីព្រៃដេញវ័ធពលរដ្ឋ ៣ នាក់ នៅខេត្តឧត្តរមានជ័យឱ្យរងរបួសត្រូវបានក្រុមមន្ត្រីជំនាញចាប់បានហើយ និងកំពុងនាំមកកាន់ឧទ្យានសួនសត្វភ្នំតាម៉ៅ ដើម្បីផ្សាំងទុកបង្កាត់ពូជ។
លោក សាន់ សុភ័ក្តិ មន្ត្រីជំនាញនៃឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅដែលបានដឹកនាំក្រុមការងារចំនួន ៥ នាក់ទៅចូលរួមជាមួយក្រុមមន្ត្រីឧទ្យានុរក្ស និងអាជ្ញាធរខេត្តឧត្តរមានជ័យក្នុងការចុះបង្ក្រាបចាប់សត្វខ្ទីងនោះបានប្រាប់ភ្នំពេញប៉ុស្តិ៍ថា សត្វខ្ទីងនោះមានវ័យជំទង់ ដែលអាចបង្កាត់ពូជបាន។
លោកបានបញ្ជាក់ថា៖ «នៅពេលនេះ វាត្រូវបានចាប់ដាក់ក្នុងទ្រុងសុវត្ថិភាព និងដាក់លើឡានរួចជាស្រេច ដើម្បីនាំទៅកាន់ឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដើម្បីថែបំប៉នទុកសម្រាប់បង្កាត់ពូជជាមួយមេខ្ទីងមួយចំនួននៅក្នុងឧទ្យានសួនសត្វនេះ»។
បើតាមលោក សុភ័ក្តិ នៅក្នុងប្រតិបត្តិការបង្ក្រាបចាប់សត្វខ្ទីង ១ ក្បាលនេះ ក្រុមការងាររបស់លោកដែលមានការជួយគាំទ្រពីកម្លាំងឧទ្យានុរក្សនៃមន្ទីរបរិស្ថានខេត្តឧត្តរមានជ័យ អាជ្ញាធរមូលដ្ឋាន និងអ្នកភូមិសរុបជាង ៥០ នាក់បាននាំគ្នាព័ទ្ធ និងកៀងវាឱ្យចូលស៊ង ដើម្បីងាយស្រួលបាញ់ថ្នាំសណ្ដំចាប់វា។
លោកបានបន្ថែមថា៖ «ក្រុមការងារយើងបានចំណាយពេលអស់ប្រមាណ ៤ ម៉ោង ទម្រាំវាហត់ហើយរត់ចូលទៅក្នុងទីតាំងដែលយើងបានពួនស្ទាក់ និងត្រៀមថ្នាំសណ្ដំសម្រាប់បាញ់វា។
ថ្វីបើការងារនេះមានការលំបាក និងហត់នឿយបន្តិចក្ដី ប៉ុន្តែយើងរីករាយនៅពេលលទ្ធផលបានជោគជ័យហើយអាចនាំវាទៅកាន់មជ្ឈមណ្ឌលរបស់យើងបានដោយសុវត្ថិភាព»។
កាលពីព្រឹកថ្ងៃទី ៣០ ខែមីនា ឆ្នាំ ២០២២ អ្នកភូមិថ្នល់បត់នៃឃុំគោកមន ស្រុកបន្ទាយអម្ពិល ខេត្តឧត្តរមានជ័យ មានការភ្ញាក់ផ្អើលយ៉ាងខ្លាំងដោយសត្វខ្ទីងឈ្មោល ១ ក្បាលបានចេញពីក្នុងព្រៃមកដេញវ័ធពួកគេដែលកំពុងនាំគ្នាដកដំឡូងមីនៅក្នុងចម្ការ។ នៅក្នុងហេតុការណ៍នោះ អ្នកភូមិ ៣ នាក់ ត្រូវបានសត្វខ្ទីងដ៏ក្រេវក្រោធនោះវ័ធឱ្យរងរបួសធ្ងន់ និងស្រាលផងដែរ។ នេះបើតាមការប្រាប់ឱ្យដឹងពីអាជ្ញាធរមូលដ្ឋាន។
លោក ហ៊ាន គីត នាយនគរបាលប៉ុស្តិ៍គោកមន បានប្រាប់ភ្នំពេញប៉ុស្តិ៍ថា លោក យន់ វឿ អាយុ ៥៤ ឆ្នាំ មានលំនៅក្នុងភូមិថ្នល់បត់ ឃុំគោកមន ត្រូវបានសត្វខ្ទីងស្ទាវនោះវ័ធត្រូវចំភ្លៅខាងស្តាំបណ្ដាលឱ្យរងរបួសធ្ងន់ ខណៈប្រពន្ធរបស់គាត់គឺអ្នកស្រី ស្នែ នៀវ អាយុ ៥៥ ឆ្នាំ រងរបួសដៃខាងស្តាំ។ ចំណែកលោក ទិ គ្រឹង អាយុ ៣១ ឆ្នាំ មានលំនៅក្នុងភូមិគូរ ឃុំគោកមន បានរងរបួសក្រោមជង្គង់ខាងស្តាំ។
ក្រោយកើតហេតុជនរងគ្រោះទាំង ៣ នាក់ត្រូវបានសាច់ញាតិ ដឹកយកទៅមន្ទីពេទ្យបង្អែកខេត្ត ដើម្បីព្យាបាលរបួស។
លោក គីត បានបញ្ជាក់ថា៖ «នៅក្នុងភូមិសាស្ត្រទឹកដីឃុំគោកមន មិនធ្លាប់មានសត្វខ្ទីងនោះទេកាលពីមុនមក»។
កាលពីរសៀលថ្ងៃទី ៣១ ខែមីនា ឆ្នាំ ២០២២ លោក ទិ គ្រឹង ដែលកំពុងសម្រាកព្យាបាលរបួសនៅក្នុងមន្ទីរពេទ្យបង្អែកខេត្តឧត្តរមានជ័យបានប្រាប់ភ្នំពេញប៉ុស្តិ៍ថា គាត់បានរងរបួសស្រាលជាង លោក វឿ ដោយសត្វខ្ទីងនោះវារត់មកបុកគាត់ហើយវ័ធគាត់ចំស្មងជើង ប៉ុន្តែមិនបាក់នោះទេ។
លោកថ្លែងថា៖ «ខ្ញុំកំពុងតែដកមើមដំឡូងមី ដើម្បីយកទៅលក់ ស្រាប់តែឃើញវារត់ស្ទុះចេញពីក្នុងព្រៃមកដេញជល់ខ្ញុំតែម្ដង។ មុនដំបូង ខ្ញុំស្មានតែក្របីគេរួចមករកស៊ីស្លឹកដំឡូងក៏មិនរត់ព្រោះចាំដេញវា ប៉ុន្តែវាមិនខ្លាចយើងទេ គឺរត់ចូលមកជល់តែម្ដង»។
លោកបន្តថា ការពិតលោកមិនស្គាល់សត្វខ្ទីងនោះទេ ព្រោះមិនធ្លាប់ជួបប្រទះទេ តាំងពីលោកដឹងក្ដីមក។ លុះដល់វាវ័ធឱ្យរងរបួស ហើយមានមន្ត្រីបរិស្ថាន ដែលគេបានឃើញវាគេស្គាល់ហើយបានប្រាប់ថាវាជាសត្វខ្ទីង៕