ព្រះវិហារៈ ក្មេងប្រុសអាយុ ៨ ឆ្នាំម្នាក់បានស្លាប់ពេលនាំទៅដល់មន្ទីរពេទ្យដោយសារការផ្ទុះគ្រាប់បេ ១ គ្រាប់ដែលគេរើសបានក្នុងពេលទៅងូតទឹកស្រះជាមួយក្មេងប្រុសស្រី ៣ នាក់ផ្សេងទៀតកាលពីថ្ងៃទី ៣០ មីនា នៅភូមិអានសេះ ឃុំ -ស្រុកជាំក្សាន្ត ខេត្តព្រះវិហារ។ នេះបើតាមលោកអភិបាលរងស្រុកជាំក្សាន្ត។
លោក លិញ យុត អភិបាលរងស្រុកជាំក្សាន្តបានឱ្យដឹងនៅថ្ងៃទី ៣១ មីនា ថា ក្មេងរងគ្រោះស្លាប់ឈ្មោះ សុខ ដារ៉ា អាយុ ៨ ឆ្នាំ ហើយមានក្មេង ៣ នាក់ទៀត (ស្រីម្នាក់) ជាបងប្អូនបង្កើតនឹងគ្នាមានអាយុចន្លោះពី ៥ ឆ្នាំ ដល់ ១៣ ឆ្នាំក៏បានទៅងូតលេងទឹកជាមួយក្មេងរងគ្រោះដែរ។ ពួកគេរស់នៅក្នុងភូមិអានសេះ ឃុំ-ស្រុកជាំក្សាន្ត ខេត្តព្រះវិហារ។
លោកថ្លែងថា៖ «ក្មេងរងគ្រោះត្រូវរបួសដោយអំបែងគ្រាប់នៅពេលគាត់រើសគ្រាប់យកមកបោក ប៉ុន្តែវាធ្លាក់នៅក្បែរខ្លួនក៏ផ្ទុះទៅ។ ក្មេងរងគ្រោះមានរបួសធ្ងន់ពេកគាត់ដាច់ខ្យល់ស្លាប់នៅមន្ទីរពេទ្យបង្អែកស្រុកជាំក្សាន្ត»។
លោកបន្តថាភូមិដែលកុមាររងគ្រោះស្លាប់នោះគឺជាភូមិដែលទើបបង្កើតថ្មី និងជាតំបន់ស្ថិតនៅតាមបន្ទាត់ព្រំដែន ហើយក៏ប្រឈមនឹងបញ្ហាគ្រាប់យុទ្ធភណ្ឌមិនទាន់ផ្ទុះខ្លាំងជាងភូមិសាស្ត្រដទៃដែរ នៅក្នុងស្រុកជាំក្សាន្តទាំងមូល។ ចំពោះការផ្សព្វផ្សាយអប់រំស្តីពីបញ្ហាគ្រោះថ្នាក់ដោយគ្រាប់អាវុធយុទ្ធភណ្ឌនេះ គឺខាងអាជ្ញាធរស្រុកសហការជាមួយនគរបាលតែងតែឃោសនាជាប្រចាំផងដែរ។ ការងារផ្សព្វផ្សាយនេះគឺអាជ្ញាធរមានសមត្ថកិច្ចស្រុកបានធ្វើទៅតាមពិធីបុណ្យបែបសាសនា តាមវេទិកាភូមិឃុំមានសុវត្ថិភាព ចុះតាមសាលារៀននៅពេលសិស្សគោរពទង់ជាតិ និងតាមទិវាអប់រំយល់ដឹងពីមីនជាដើម។
លោក ទន់ ទិន នាយនគរបាលប៉ុស្តិ៍ជាំក្សាន្តបានរៀបរាប់ប្រាប់តាមសម្ដីសាច់ញាតិក្មេងរងគ្រោះនៅថ្ងៃទី ៣១ មីនាថា មុនកើតហេតុវេលាម៉ោងជាង ២ រសៀល ថ្ងៃទី ៣០ មីនា ក្មេងរងគ្រោះឈ្មោះ សុខ ដារ៉ា និងក្មេងប្រុសស្រី ៣ នាក់ទៀតដែលជាបងប្អូនបង្កើតបានបបួលគ្នាទៅងូតទឹកស្រះក្នុងភូមិលេង។ រីឯមនុស្សចាស់ដែលជាសាច់ញាតិក្មេងទាំងនោះក៏មិនបានហាមប្រាមអីដែរ ព្រោះថាស្រះទឹកនោះមានមនុស្សចុះងូតរាល់ថ្ងៃ ហេតុដូច្នោះក៏គ្មាននរណាចាប់អារម្មណ៍ពីបញ្ហាគ្រោះថ្នាក់នេះដែរ។
លោកបន្តថា បន្ទាប់ពីពួកក្មេងៗនាំគ្នាងូតទឹកបានមួយសន្ទុះក្រោយមក ក៏ឮស្នូរសំឡេងផ្ទុះហើយអ្នកភូមិបាននាំគ្នារត់សំដៅទៅកន្លែងផ្ទុះនោះក៏ឃើញក្មេងរងគ្រោះ សុខ ដារ៉ា ដេកស្តូកស្តឹងនៅលើដី ខណៈក្មេងប្រុសស្រី ៣ នាក់ទៀត រត់សំដៅមកភូមិ។
នៅពេលនោះ សាច់ញាតិក្មេងរងគ្រោះបានដឹកទៅមន្ទីរពេទ្យបង្អែកស្រុកជាំក្សាន្ត តែដោយសាររបួសធ្ងន់ពេកក៏ដាច់ខ្យល់ស្លាប់ ក្រោយដឹកដល់មន្ទីរពេទ្យបន្តិចតែម្ដង។
លោកប្រាប់តាមសម្តីក្មេងៗដែលទៅងូតទឹកជាមួយជនរងគ្រោះថា៖ «វានាំគ្នាចុះងូតទឹកលេងហើយក្មេងរងគ្រោះរើសបានគ្រាប់បេ ១ គ្រាប់នៅក្នុងទឹករាក់។ ពេលនោះវាកាន់គ្រាប់លេង រីឯក្មេង ៣ នាក់ទៀតរត់ចេញពីក្មេងរងគ្រោះ ស្រាប់តែឃើញក្មេងឈ្មោះ សុខ ដារ៉ា បោះគ្រាប់ទៅលើដីក៏ផ្ទុះតែម្តង»។
លោក សំ សាមឿន ស្នងការរងទទួលផែនការងារនគរបាលគ្រប់គ្រងអាវុធជាតិផ្ទះនៃស្នងការដ្ឋាននគរបាលខេត្តព្រះវិហារបានឱ្យដឹងនៅថ្ងៃទី ៣១ មីនាថា នៅក្នុងភូមិសាស្ត្រខេត្តព្រះវិហារនេះ តំបន់ដែលសម្បូរគ្រាប់យុទ្ធភណ្ឌមិនទាន់ផ្ទុះច្រើនគឺតាមព្រំដែនកម្ពុជា-ថៃ។ តំបន់នោះបានបន្សល់ទុកនូវគ្រាប់មីនជាច្រើនដែលបានដាក់កាលពីសម័យសង្គ្រាមប្រទាញប្រទង់គ្នារវាងកងកម្លាំងទាហានរដ្ឋាភិបាលកម្ពុជាជាមួយក្រុមខ្មែរក្រហម។
លោកបន្តថា ចំពោះនៅតាមតំបន់មួយចំនួនទៀត ត្រូវបានខាងស៊ីម៉ាក់បោសសម្អាតបានផ្ទៃដីច្រើនហើយ ដើម្បីទុកជូនប្រជាកសិករធ្វើស្រែចម្ការ។
ម្យ៉ាងទៀតកម្លាំងស៊ីម៉ាក់បានដោះមីននៅកន្លែងណាដែលប្រជាពលរដ្ឋបង្កបង្កើនផលស្រូវដាណាំផ្សេង។
លោកថ្លែងថា៖ «នៅតាមជាយដែនដែលនៅសល់គ្រាប់មីនមិនទាន់ដោះនោះ ដោយសារជាកន្លែងមានព្រៃក្រាស់ជាភូមិសាស្ត្រស្មុគស្មាញ។ យើងតែងតែធ្វើការផ្សព្វផ្សាយពីគ្រោះថ្នាក់ដោយគ្រាប់មីនតាមរយៈគោលនយោបាយភូមិ-ឃុំមានសុវត្ថិភាព»៕