.jpg)
រូបថត រដ្ឋសភា
សេចក្តីព្រាងច្បាប់ស្តីពី ការការពាររុក្ខជាតិ និងភូតគាមអនាម័យ ត្រូវបានរដ្ឋសភាជាតិនៃព្រះរាជាណាចក្រកម្ពុជាសម្រេចអនុម័តយល់ព្រមលើសេចក្តីព្រាងច្បាប់ទាំងមូល ដែលមានចំនួន៩២សំឡេងនៃចំនួនសមាជិករដ្ឋសភាទាំងមូល។
នេះបើយោងតាមសេចក្តីប្រកាសព័ត៌មាន របស់អគ្គលេខាធិការដ្ឋាននៃរដ្ឋសភាជាតិ ពីលទ្ធផលសម័យប្រជុំរដ្ឋសភាលើកទី៧ នីតិកាលទី៦ នាព្រឹកថ្ងៃទី០១ ខែមេសា ឆ្នាំ២០២២នេះ។
សេចក្តីព្រាងច្បាប់ស្តីពី ការការពាររុក្ខជាតិ និងភូតគាមអនាម័យ មាន ១៥ជំពូក និង១១៣មាត្រា។ នាសម័យប្រជុំនេះ លោក ឡូយ សុផាត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា បានធ្វើការរាយការណ៍ជូនអង្គសភាអំពី លទ្ធផលនៃការ ពិនិត្យសិក្សាសេចក្តីព្រាងច្បាប់។
ជាមួយគ្នានោះលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងសហការី ជាតំណាងរាជរដ្ឋាភិបាល បានការពារសេចក្តីព្រាងច្បាប់នេះ ហើយអង្គសភា ក៏បានអនុម័តយល់ព្រមលើសេចក្តីព្រាងច្បាប់ទាំងមូលនេះផងដែរ។
សម័យប្រជុំរដ្ឋសភាលើកទី៧ នីតិកាលទី៦ បានផ្អាកនៅវេលាម៉ោង ១២:៥៥នាទី ថ្ងៃខែឆ្នាំ ដដែលផងដែរ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៥ ខែមីនា កន្លងទៅនេះ បានលើកឡើងថា ដោយយល់ច្បាស់ពីសេចក្តីត្រូវការចាំបាច់អំពីឯកសារគតិយុត្តរបស់កម្ពុជា រាជរដ្ឋាភិបាលដែលមានក្រសួងកសិកម្ម រុក្ខាប្រមាញ់ និងនេសាទជាសេនាធិការ ចាំបាច់និងជាបន្ទាន់ត្រូវបង្កើតច្បាប់ស្តីពី «ការការពាររុក្ខជាតិ និងភូតគាមអនាម័យ» នេះឡើង។
គួរបញ្ជាក់ថា សេចក្តីព្រាងច្បាប់ស្តីពី ការការពាររុក្ខជាតិ និងភូតគាមអនាម័យ ត្រូវបានគណៈរដ្ឋមន្ត្រីអនុម័ត កាលពីដើមខែកុម្ភៈ ឆ្នាំ២០២២ ហើយសេចក្តីព្រាងច្បាប់ស្តីនេះ គឺជាសមិទ្ធផលថ្មីមួយទៀត ក្នុងការអភិវឌ្ឍបទដ្ឋានគតិយុត្តរបស់វិស័យកសិកម្ម ក្នុងក្របខ័ណ្ឌបង្កើនផលិតភាព ពិពិធកម្មកសិកម្ម និងកសិ-ធុរកិច្ច៕
