.jpg)
កិច្ចប្រជុំត្រីភាគី ដែលមានការចូលរួមពីតំណាងក្រសួង ស្ថាប័ន ពាក់ព័ន្ធ តំណាងសហជីព និងតំណាងនិយោជក ជាមួយប្រតិភូបេសកកម្មដោយផ្ទាល់នាទីស្តីការក្រសួងនាថ្ងៃទី០១ ខែមេសា ឆ្នាំ២០២២។ ក្រសួងការងារ
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង បានលើកឡើងថា ពេញមួយសប្តាហ៍របស់ប្រតិភូបេសកកម្មដោយផ្ទាល់របស់អង្គការអន្តរជាតិខាងការងារ (ILO) នឹងពិនិត្យឃើញយ៉ាងច្បាស់ពីការវិវត្តវិស័យទំនាក់ទំនងវិជ្ជាជីវៈនៅកម្ពុជា។
លោកបានថ្លែងដូចនេះ នាថ្ងៃទី០១ ខែមេសា ឆ្នាំ២០២២ នៅក្នុងកិច្ចប្រជុំត្រីភាគី ដែលមានការចូលរួមពីតំណាងក្រសួង ស្ថាប័ន ពាក់ព័ន្ធ តំណាងសហជីព និងតំណាងនិយោជក ជាមួយប្រតិភូបេសកកម្មដោយផ្ទាល់នាទីស្តីការក្រសួង។
គណៈប្រតិភូបេសកកម្មផ្ទាល់របស់អង្គការអន្តរជាតិខាងការងារ បានសម្ដែងនូវអំណរគុណ ចំពោះក្រសួងការងារ និងបណ្តុះបណ្តាលវិជ្ជាជីវៈ ដែលផ្តល់កិច្ចសហការយ៉ាងពេញលេញ ក្នុងការបំពេញបេសកកម្មនៅកម្ពុជាដំណើរទៅដោយរលូន ហើយបានសម្រេចទៅតាមគោលបំណងនៃបេសកកម្មរបស់ខ្លួន។
លោក អ៊ិត សំហេង លើកឡើងដោយលោកជឿជាក់ថា តាមរយៈកិច្ចប្រជុំដ៏មមាញឹកពេញមួយសប្តាហ៍ជាមួយភាគី និងស្ថាប័នពាក់ព័ន្ធកន្លងទៅ បេសកកម្មបានពិនិត្យឃើញយ៉ាងច្បាស់អំពីស្ថានភាពពិតនៃការវិវត្តវិស័យទំនាក់ទំនងវិជ្ជាជីវៈនៅកម្ពុជា។
លោក អ៊ិត សំហេង បានឱ្យដឹងថា៖ «ដោយសារតែកម្ពុជាបានអនុវត្តបានយ៉ាងល្អនូវ នយោបាយពាណិជ្ជកម្មអន្តរជាតិផ្សារភ្ជាប់នឹងបទដ្ឋានការងារអន្តរជាតិ និងកិច្ចសហប្រតិបត្តិការយ៉ាងល្អជាមួយអង្គការអន្តរជាតិខាងការងារ ដែលធានាបាននូវលក្ខខណ្ឌការងារល្អប្រសើរ ធានានូវការការពារសិទ្ធិការងារ សិទ្ធិសេរីភាពអង្គការវិជ្ជាជីវៈ បានជាវិស័យកាត់ដេរ ផលិតស្បែកជើង និងកាបូប បានរីកចម្រើនយ៉ាងខ្លាំង»។
លោកថា វិស័យនេះបានដើរតួជាជន្ទល់សេដ្ឋកិច្ចយ៉ាងសំខាន់ ក្នុងការចូលរួមចំណែកអភិវឌ្ឍសេដ្ឋកិច្ច សង្គមកម្ពុជា ចាប់តាំងពីទសវត្សរ៍ឆ្នាំ១៩៩០។ ជាក់ស្តែង វិស័យនេះបានចាប់ផ្តើមជាមួយនឹងរោងចក្រចំនួន ៦៤ ដែលមានកម្មករនិយោជិតចំនួនប្រមាណ ៨ ម៉ឺននាក់នៅក្នុងឆ្នាំ ១៩៩៧ ប៉ុន្តែបច្ចុប្បន្នបានកើនឡើងជាង១២០០រោងចក្រ ដែលមានកម្មករនិយោជិតប្រមាណ៨០ម៉ឺននាក់។ តម្លៃនៃការនាំចេញនៅក្នុងវិស័យនេះបានកើនឡើងពី ២២៧ លានដុល្លារអាមេរិក ដល់ ៩ ៧៦៨ លានដុល្លារអាមេរិក ក្នុងរយៈពេលដូចគ្នា។
ក្រសួងការងារនិងបណ្តុះបណ្តាលវិជ្ជាជីវៈ បានលើកឡើងថា គិតត្រឹមខែមករា ឆ្នាំ ២០២២ នេះ មានអង្គការវិជ្ជាជីវៈបានចុះបញ្ជីចំនួន ៥ ៧៧៣ ក្នុងនោះមានសហជីពមូលដ្ឋានចំនួន ៥ ៤៦៤, សហព័ន្ធសហជីពចំនួន ២៥៧, សហភាពសហជីពចំនួន ៤០, និងសមាគមនិយោជកចំនួន ១២។ ដោយឡែកនៅក្នុងឆ្នាំ ២០២១ ក្រសួងការងារ និងបណ្តុះបណ្តាលវិជ្ជាជីវៈ បានចុះបញ្ជិកាសហជីពថ្មីចំនួន ២៦២។
ជាមួយគ្នានេះដែរ លោក អ៊ិត សំហេង បានបញ្ជាក់បន្ថែមថា ការអនុវត្តសេរីភាពសមាគមនៅកម្ពុជាអាចធ្វើឡើងបានតាមរយៈច្បាប់ស្តីពីសហជីព និងច្បាប់ផ្សេងទៀតដែលមានដូចជា ច្បាប់ស្តីពីសមាគម និងអង្គការមិនមែនរដ្ឋាភិបាល (LANGO)។
លោកថា ប្រទេសកម្ពុជា មិនត្រឹមតែមានប្រព័ន្ធច្បាប់ដែលធានាយ៉ាងទូលំទូលាយនូវការអនុវត្តសេរីភាពក្នុងការបង្កើតសមាគមប៉ុណ្ណោះទេ ប៉ុន្តែថែមទាំងផ្តល់នូវជម្រើសជាក់ស្តែងសម្រាប់ការអនុវត្តសេរីភាពនៃសមាគមផងដែរ។
ប្រទេសកម្ពុជាមិនហាមឃាត់ ឬរឹតត្បិតសេរីភាពរបស់ជនណាម្នាក់ក្នុងការចូលរួមសហជីពណាមួយ ដោយផ្អែកលើឆន្ទៈរបស់ពួកគេឡើយ។ សេរីភាពជាមូលដ្ឋាន ក៏ដូចជាសេរីភាពក្នុងការចូលរួម ឬបង្កើតសហជីពដែលមានចែងក្នុងក្របខ័ណ្ឌច្បាប់អន្តរជាតិ ត្រូវបានទទួលស្គាល់ និងធានាក្រោមច្បាប់នៃព្រះរាជាណាចក្រកម្ពុជា៕
