.jpg)
សហភាពសហព័ន្ធអ្នកសារព័ត៌មានកម្ពុជា (ស.ស.ស.ក) បានលើកឡើងថា គណៈកម្មាធិការសិទ្ធិមនុស្សអង្គការសហប្រជាជាតិធ្វើការវាយតម្លៃដោយលម្អៀងអំពីស្ថានភាពសិទ្ធិនៃការបញ្ចេញមតិ និងសេរីភាពសារព័ត៌មាននៅកម្ពុជា ដោយបានវាយតម្លៃដោយលម្អៀង ខ្វះភ័ស្តុតាងច្បាស់លាស់ គ្មានការពិតពេញលេញក្នុងគោលបំណងហាក់ចង់ផាត់ពណ៌កម្ពុជាឱ្យអាក្រក់។
ស.ស.ស.ក បានចេញសេចក្តីថ្លែងការណ៍ ដោយបង្ហាញពីការសោកស្ដាយចំពោះការវាយតម្លៃដែលមានលក្ខណៈមិនពេញលេញ សម្រាប់របាយការណ៍អំពីស្ថានភាពកម្ពុជារបស់គណៈកម្មាធិការសិទ្ធិមនុស្សអង្គការសហប្រជាជាតិប្រចាំកម្ពុជា ដែលបានចេញផ្សាយនៅថ្ងៃទី ៣០ ខែមីនា ឆ្នាំ ២០២២ ហើយរបាយការណ៍នេះក៏ត្រូវបានផ្សាយបន្ទរដោយ អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជាផងដែរ។
ស.ស.ស.ក បានលើកឡើងថា៖ «យើងបានរកឃើញថា របាយការណ៍នេះវាយតម្លៃដោយលម្អៀង ដោយខ្វះភ័ស្តុតាងច្បាស់លាស់ គ្មានការពិតពេញលេញ និងបានទាត់ចោលនូវអ្វីដែលជាតម្រូវការក្នុងបរិបទជាក់ស្តែងរបស់សង្គមកម្ពុជា ព្រមទាំងព្យាយាមបន្ទោសទៅភាគីផ្សេងភ្ជាប់ទៅលម្ហនយោបាយ និងការបោះឆ្នោតនាពេលខាងមុខ ក្នុងគោលបំណងហាក់ចង់ផាត់ពណ៌កម្ពុជាឱ្យអាក្រក់»។
សេរីភាពសារព័ត៌មាននៅកម្ពុជាមានលក្ខណៈកាន់តែល្អប្រសើរឡើងនៅក្នុងដំណាក់កាលនៃប្រទេសជាតិមានសន្តិភាព ពោលគឺល្អជាងនៅក្នុងកាលៈទេសៈដែលកម្ពុជាមានជម្លោះប្រដាប់អាវុធដ៏រ៉ាំរ៉ៃអូសបន្លាយ។ កម្ពុជាបានក្លាយជាប្រទេសមួយក្នុងចំណោមប្រទេសបើកចំហបំផុតនៅលើពិភពលោក ដែលបើកឱ្យមានសេរីភាពសារព័ត៌មាន និងសិទ្ធិក្នុងការបញ្ចេញមតិ។
ស.ស.ស.ក បានបញ្ជាក់ថា៖ «បច្ចុប្បន្ននេះ ប្រជាជនកម្ពុជាទទួលបានព័ត៌មានប្រចាំថ្ងៃតាមរយៈអ៊ីនធឺណិត និងប្រព័ន្ធផ្សព្វផ្សាយសង្គម ហើយពួកគេអាចសិក្សាស្វែងយល់ និងអាចចែករំលែកនូវព័ត៌មានសំខាន់ៗ សម្រាប់ការរីកចម្រើនលូតលាស់ផ្នែកប្រាជ្ញាស្មារតី ការងារ អាជីវកម្ម និងអាចធ្វើការវាយតម្លៃពីវឌ្ឍនភាពសង្គម ហើយធ្វើការសម្រេចចិត្តដោយសេរី និងដោយឯករាជ្យ»។
សេចក្តីថ្លែងការណ៍ដដែលនេះបានលើកឡើងផងដែរថា ស.ស.ស.ក សង្កេតឃើញថា ចំណុចដែលរបាយការណ៍លើកឡើងថា មានករណីការគំរាមកំហែង ការបំភិតបំភ័យ និងការរឹតត្បិត ឬការចាប់ខ្លួនតាមអំពើចិត្ត នៅក្នុងរយៈពេលនៃការធ្វើរបាយរាយការណ៍ ការពិតករណីនេះគឺមានតិចតួចបំផុត។
ស.ស.ស.ក ថា ៖ «យើងត្រូវទទួលស្គាល់ថា ឧប្បត្តិហេតុមួយចំនួនដែលប្រព្រឹត្តដោយអ្នកសារព័ត៌មាន គឺជាបទល្មើសដែលធ្ងន់ធ្ងរហួសពីក្របខ័ណ្ឌសារព័ត៌មានឬជាការបញ្ចេញមតិ ហើយសំណុំរឿងកំពុងស្ថិតនៅក្រោមយុត្តាធិការ តុលាការ ដែលចាំបាច់ត្រូវដោះស្រាយតាមផ្លូវច្បាប់ដោយផ្អែកលើលក្ខណៈនៃឧប្បត្តិហេតុជាក់ស្តែង»។
នៅកម្ពុជា អត្រាចុះបញ្ជីបើកអង្គភាពប្រព័ន្ធផ្សព្វផ្សាយព័ត៌មានរហូតជិត ២ ០០០ អង្គភាព គឺមានកម្រិតខ្ពស់ បើប្រៀបធៀបបណ្តាប្រទេសក្នុងអាស៊ាន ដែលក្នុងនោះរួមមានអង្គភាព វិទ្យុ កាសែត ទស្សនាវដ្ដី ទូរទស្សន៍ អនឡាញ និងទូរទស្សន៍ខ្សែកាបជាដើម៕
វីដេអូ៖
