ក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ ឆ្នាំ ២០២២ ដែលនឹងប្រព្រឹត្តទៅរយៈពេល ៣ ថ្ងៃចាប់ពីថ្ងៃទី ១៤-១៦ ខែមេសានេះ ក្រសួងសុខាភិបាលបានធ្វើការអំពាវនាវដោយទទូចដល់ប្រជាពលរដ្ឋទាំងអស់ត្រូវបន្តបង្កើនការប្រុងប្រយ័ត្នខ្ពស់ ដោយអនុវត្តឱ្យបានខ្ជាប់ខ្ជួននូវវិធានការសុខាភិបាល ៣ ការពារ និង ៣ កុំ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាល នៅថ្ងៃទី ០១ ខែមេសា នេះបានចេញសេចក្តីណែនាំពីការការពារសុខភាព រួមទាំងការការពារការចម្លងវីរុសកូវីដ ១៩ ក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ ឆ្នាំ ២០២២ បន្ទាប់ពីប្រមុខរាជរដ្ឋាភិបាលបានប្រកាសអនុញ្ញាតឱ្យប្រារព្ធពិធីបុណ្យចូលឆ្នាំថ្មីប្រពៃណីជាតិខ្មែរក្នុងឆ្នាំនេះជាធម្មតា បន្ទាប់ពីមានការខកខានអស់រយៈពេល ២ ឆ្នាំកន្លងមកហើយ។
លោក ម៉ម ប៊ុនហេង ថា៖ «សូមបុគ្គលគ្រប់រូប ក្រុមគ្រួសារ និងអ្នកគ្រប់គ្រង ព្រមទាំងម្ចាស់ទីតាំងទាំងអស់ បន្តអនុវត្តការការពារការចម្លងជំងឺ ដោយលើកទឹកចិត្តអនុវត្តការធ្វើតេស្តរហ័សក្នុងករណីសង្ស័យវិជ្ជមានកូវីដ ១៩ និងត្រូវអនុវត្តធ្វើតេស្តរហ័សដោយខ្លួនឯងក្នុងករណីដែលមានរោគសញ្ញាណាមួយដែលសង្ស័យ ដើម្បីចៀសវាងការចម្លងទៅកាន់បុគ្គលដទៃទៀត ដែលអាចបង្កឱ្យមានការចម្លងទ្រង់ទ្រាយធំនៅក្នុងសហគមន៍»។
លោក ម៉ម ប៊ុនហេង ក៏បានណែនាំឱ្យរដ្ឋបាលថ្នាក់ក្រោមជាតិ មន្ទីរសុខាភិបាលរាជធានី-ខេត្ត និងអាជ្ញាធរមូលដ្ឋានរៀបចំទីតាំងផ្តល់សេវាធ្វើតេស្តរហ័សរកវីរុសកូវីដ ១៩ ដល់ប្រជាពលរដ្ឋដែលមិនមានលទ្ធភាពក្នុងការធ្វើតេស្តដោយខ្លួនឯងផងដែរ។
គួរបញ្ជាក់ផងដែរថា វិធានការ ៣ ការពាររួមមាន ពាក់ម៉ាស់, លាងដៃឱ្យញឹកញាប់ជាមួយសាប៊ូក្នុងរយៈពេល ៤០ វិនាទី ឬជាមួយអាល់កុលដែលក្នុងរយៈពេល ២០ វិនាទី និងរក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង។
ចំណែក វិធានការ ៣ កុំគឺ កុំទៅកន្លែងមានមនុស្សច្រើន, កុំទៅកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើន និងកុំប៉ះពាល់គ្នា កុំចាប់ដៃគ្នា កុំកៀកស្មាគ្នា ពេលជួបភ្ញៀវ សូម្បីតែសមាជិកគ្រួសារ សាច់ញាតិ ដែលមានការស្នាក់នៅក្នុងគេហដ្ឋានផ្សេងពីលោកអ្នក ឬមិត្តភក្តិជិតស្និទ្ធ ជាដើម។
ទន្ទឹមនឹងនេះដែរ រដ្ឋមន្ត្រីក្រសួងសុខាភិបាលក៏បានណែនាំពីការអនុវត្តវិធានការសុខាភិបាលនៅតាមទីវត្តអារ៉ាមផងដែរដោយត្រូវពាក់ម៉ាស់ រក្សាអនាម័យដៃ និងរក្សាគម្លាតសុវត្ថិភាពបុគ្គល, ការជួបជុំគ្រួសារឬដំណើរកម្សាន្តដោយត្រូវជ្រើសរើសការធ្វើដំណើរដាច់ដោយឡែក ជាលក្ខណៈគ្រួសារតូចៗដែលមិនមានការជួបជុំគ្នាច្រើន៕
វីដេអូ៖