.jpg)
លោកនាយករដ្ឋមន្ត្រីថ្លែងក្នុងពិធីសម្ពោធផ្លូវក្នុងខេត្តសៀមរាប។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន កាលពីម្សិលមិញបានបញ្ជាក់ថា តំបន់អភិរក្សបេតិកភណ្ឌពិភពលោក នៅក្នុងខេត្តសៀមរាបមិនអាចអនុញ្ញាតឱ្យមានការវិនិយោគលើវិស័យអចលនទ្រព្យ ដែលខុសពីលក្ខខណ្ឌដែលនឹងនាំឱ្យអង្គការបេតិកភណ្ឌពិភពលោកដកចេញពីបញ្ជីវិញនោះ។
នៅក្នុងពិធីសម្ពោធដាក់ឱ្យប្រើប្រាស់ផ្លូវ ៣៨ ខ្សែក្នុងក្រុងសៀមរាបកាលពីថ្ងៃទី៤ ខែមេសា ឆ្នាំ ២០២២ នេះ លោកនាយករដ្ឋមន្ត្រីបានមានប្រសាសន៍ថា៖ «ខ្ញុំសូមបញ្ជាក់ថា មិនអាចយកតំបន់សៀមរាបប្រៀបធៀបទៅនឹងទីផ្សារអចលនទ្រព្យដូចជាខេត្តដទៃទេ បើសិនជាធ្វើដូច្នេះកម្ពុជានឹងត្រូវគេបណ្តេញចេញ ដោយយកអង្គរវត្តរបស់យើងចេញពីបញ្ជីបេតិកភណ្ឌពិភពលោកហើយ។ អ៊ីចឹងសូមឱ្យខាងផ្នែកទីផ្សារអចលនទ្រព្យ សូមមើលព្រៃទាំងមូល កុំមើលឈើ ១ ដើមៗ អ៊ីចឹងបានជាខ្ញុំស្នើថា វាមិនខ្វះទេកន្លែងដែលត្រូវធ្វើទីផ្សារអចលនទ្រព្យច្រើនណាស់ ប៉ុន្តែកុំឱ្យមកកៀកអង្គរ»។
លោកថ្លែងថា៖ «យើងពិតជាអរគុណចំពោះបារាំង ជប៉ុន ដែលជាសហប្រធាននៃ ICC រួមជាមួយនឹងអង្គការយូណេស្កូ ដែលអាចហៅថា នៅទីនេះជានិច្ចកាលយើងប្រើយន្តការត្រីភាគី គឺកម្ពុជា ជាម្ចាស់ផ្ទះ បូកជាមួយសហប្រធានទាំង ២ គឺបារាំង និងជប៉ុនដែលបានចូលរួម ប៉ុន្តែយើងក៏មានដៃគូសំខាន់មួយទៀត គឺយូណេស្កូ។ ខ្ញុំសូមធ្វើការបញ្ជាក់ហេតុផល ដែលខ្ញុំលើកមកនិយាយត្រង់កន្លែងនេះ ដើម្បីកុំឱ្យដៃគូរបស់យើងដូចជា យូណេស្កូ បារាំង ជប៉ុន មានការព្រួយបារម្ភ អំពីអ្វីដែលកើតឡើងរាជរដ្ឋាភិបាលមិនអនុញ្ញាតទេ។ រាជរដ្ឋាភិបាលកម្ពុជាមិនអាចទុកឱ្យបេតិកភណ្ឌរងនូវផលប៉ះពាល់ណាមួយពីការសាងសង់សំណង់ផ្សេងៗឡើង»។
នៅក្នុងពិធីសម្ពោធនោះដែរ លោកនាយករដ្ឋមន្ត្រីបានថ្លែងអំណរគុណចំពោះគណៈកម្មាធិការ អន្តរជាតិ ICC- Angkor ដែលបានចូលរួមនៅក្នុងការអភិរក្សតំបន់ក្នុងក្រុងសៀមរាប ក៏ដូចជាអភិរក្សជាមួយនឹងបេតិកភណ្ឌប្រវត្តិសាស្ត្ររបស់អង្គរវត្ត ដោយប្រជាពលរដ្ឋដែលរស់នៅក្នុងខេត្តសៀមរាប បន្តរក្សានូវរបៀបរៀបរយ គោរពទៅតាមគោលការណ៍ដែលការពារបាននូវបេតិកភណ្ឌប្រវត្តិសាស្ត្រ ព្រោះទឹកដីសៀមរាបពិតជាមានប្រាង្គប្រាសាទច្រើន។
ទន្ទឹមនេះដែរលោកបានថ្លែងប្រតិកម្មចំពោះអ្នកវិនិយោគដីធ្លីផ្នែកអចលនទ្រព្យដែលចង់ឱ្យមានអគារខ្ពស់ៗនៅតំបន់សៀមរាបផងដែរ។
លោកថា៖ «ខ្ញុំគិតថា ការលើកឡើងនោះគាត់ក៏បានដឹងថា ខុស គាត់ប្រើប្រាស់ថានៅសៀមរាបមិនអាចអភិវឌ្ឍបានដោយសារតែមានការរាំងស្កាត់ដោយអាជ្ញាធរមិនឱ្យសាងសង់ខ្ពស់ៗ»។
លោកបានឱ្យដឹងថា សូម្បីប្រទេសជឿនលឿន ដែលកសាងបំពានទៅលើលក្ខខណ្ឌបច្ចេកទេសនៃអង្គការយូណេស្កូ គេបានដកចេញពីបញ្ជីនៃបេតិកភណ្ឌពិភពលោកតែម្តង ហើយកម្ពុជាក៏ដូចគ្នា បើសិនជាបានបំពានលក្ខខណ្ឌទាំងឡាយដែលកំណត់ដោយអង្គការយូណេស្កូនឹងបាត់បង់លក្ខណសម្បត្តិជាបេតិកភណ្ឌពិភពលោកទាំងនៅអង្គរវត្ត សំបូរព្រៃគុក និងប្រាសាទព្រះវិហារ។
សាស្ត្រាចារ្យប្រវត្តិសាស្ត្រ លោក សំបូរ ម៉ាណារ៉ា មើលឃើញថា ប្រមុខរាជរដ្ឋាភិបាលកម្ពុជាបានប្រឹងប្រែង និងបានយកចិត្តដាក់ចំពោះការអភិរក្សបេតិកភណ្ឌទាំងមុន និងក្រោយចូលបេតិកភណ្ឌពិភពលោកម្ល៉េះ។
លោកថា៖ «ប្រមុខរាជរដ្ឋាភិបាលមានប្រសាសន៍បែបនេះ ព្រោះលោកចង់ឱ្យអន្តរជាតិទាំងអស់យកចិត្តទុកដាក់គិតឱ្យបានច្បាស់ថា យើងក៏មានផ្នែកមួយនៅក្នុងការទទួលខុសត្រូវក្នុងការអភិរក្សនេះ ហើយមិនមែនទើបតែពេលនេះទេ គឺមានតាំងពីយូរណាស់មកហើយដែរ»។
លោកថ្លែងដោយបង្ហាញក្ដីសង្ឃឹមថា មិនថា រាជរដ្ឋាភិបាលក៏ដូចជាប្រជាជនគួរតែចូលរួមអភិរក្សបេតិកភណ្ឌទាំងនេះដើម្បីប្រទេសជាតិទៅអនាគតមានភាពផូរផង់នៃដំណាក់កាលនៃការអភិរក្សវប្បធម៌។
លោកថា៖ «បេតិកភណ្ឌរបស់ជាតិនេះគឺជាដំណើរនៃប្រវត្តិសាស្ត្រមិនមែនគ្រាន់តែសេដ្ឋកិច្ច និងទេសចរណ៍ទេ ប៉ុន្តែជាប្រវត្តិសាស្ត្រ កាលណាយើងភ្លេចខ្លួនតែបន្តិចយើងបាត់ដាននៃបុព្វបុរសយើង»។
លោក សំបូរ ម៉ាណារ៉ា ថ្លែងថា អ្នកវិនិយោគដែលមានបំណងចង់អភិវឌ្ឍផ្នែកអចលនទ្រព្យអាចរកទីតាំងឆ្ងាយៗពីតំបន់អង្គរបាន ដោយមិនចាំបាច់ប្រមូលផ្តុំនៅជុំវិញអង្គរនោះទេ។
លោកបានថ្លែងថា៖ «ខ្ញុំចង់បន្ថែមថា អភិវឌ្ឍប្រទេសយើង មិនមែនតែអភិវឌ្ឍនៅកន្លែងមួយទេ យើងមើលព្រះបាទជ័យវរ្ម័នទី ២ រហូតដល់សម័យអង្គរគឺអភិវឌ្ឍប្រទេសជាតិគឺប្តូរទីតាំងអភិវឌ្ឍន៍ទីក្រុងឆ្ងាយៗ ដើម្បីបណ្តុំប្រជាជន និងបង្កើនវិសាលភាពនៃការអភិវឌ្ឍជាតិ»។
នៅក្នុងពិធីសម្ពោធដាក់ឱ្យប្រើប្រាស់ផ្លូវនោះដែរ លោកនាយករដ្ឋមន្ត្រី ហ៊ុន សែន បានគូសបញ្ជាក់ថា៖ «យើងមិនអាចទុកឱ្យបេតិកភណ្ឌរបស់យើង គឺប្រាសាទអង្គរនៅទីនេះរងនូវផលប៉ះពាល់ណាមួយ ដែលបាត់បង់លក្ខណសម្បត្តិជាបេតិកភណ្ឌពិភពលោក ហើយខ្ញុំសូមឱ្យអង្គការអន្តរជាតិ ICC-Angkor ដែលត្រៀមចុះហត្ថលេខា ១០ ឆ្នាំបន្ថែមទៀត គឺកុំមានការស្ទាក់ស្ទើរ។ នេះជាការអះអាងរបស់នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីធានាថា សម្បត្តិដូនតារបស់យើងដែលបានខិតខំទុកពីពេលមុនត្រូវបានគោរព យើងមិនត្រឹមតែគោរពដល់ប្រាសាទអង្គរទេ យើងគោរពតាំងពី ហេដ្ឋារចនាសម្ព័ន្ធដែលមាននៅតាមផ្លូវ»៕
វីដេអូ៖
