ភ្នំពេញៈ មន្ត្រីជាន់ខ្ពស់នៃក្រសួងសុខាភិបាលបានអះអាងថា ដោយមើលឃើញពីសកម្មភាព និងលទ្ធផលល្អប្រសើរនៃការចាក់វ៉ាក់សាំងបង្ការជំងឺកូវីដ ១៩ នៅកម្ពុជា អង្គការហ្គាវី (GAVI) និងមជ្ឈមណ្ឌលកូវ៉ាក់ (COVAX) បានប្តេជ្ញាបន្តគាំទ្រដល់កម្ពុជា ហើយមជ្ឈមណ្ឌលកូវ៉ាក់ក៏បានយល់ព្រមបង្កើនការផ្ដល់វ៉ាក់សាំងចំនួន១០ភាគរយបន្ថែមទៀតលើចំនួន ២០ ភាគរយនៃចំនួនពលរដ្ឋសរុបដែលបាននិងកំពុងផ្តល់មកជាបន្តបន្ទាប់ផងដែរ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) បានថ្លែងប្រាប់ដូចនេះ កាលពីថ្ងៃទី ១ ខែមេសា បន្ទាប់ពីលោកស្រីបានជួបពិភាក្សាការងារវ៉ាក់សាំងជាមួយមន្ត្រីជាន់ខ្ពស់អង្គការ GAVI និងមជ្ឈមណ្ឌលកូវ៉ាក់ (COVAX),អង្គការ CHAI នៅកម្ពុជា,តំណាងអង្គការសុខភាពពិភពលោក (WHO) ប្រចាំកម្ពុជា, តំណាងអង្គការ UNICEF ប្រចាំកម្ពុជា និងមន្ត្រីពាក់ព័ន្ធជាច្រើនរូបទៀត។
លោកស្រីបានថ្លែងថា៖ «ទាំងអង្គការ GAVI,COVAX និងអង្គការ CHAI បានធ្វើការកោតសរសើរយ៉ាងខ្លាំងនូវសមិទ្ធផលដែលប្រទេសកម្ពុជាទទួលបានពីការចាក់វ៉ាក់សាំងកូវីដ ១៩ ហើយក៏ជាចំណុចមួយដែលពួកគេចង់រៀនសូត្រនិងដកស្រង់បទពិសោធពីប្រទេសយើងផងដែរ»។
ចំណុចជាវិជ្ជមានសម្រាប់កម្ពុជាដែលអង្គការទាំងនេះសប្បាយចិត្តហើយបញ្ជាក់ពីការគាំទ្រកម្ពុជាបន្តទៀតនេះ គឺមជ្ឈមណ្ឌលកូវ៉ាក់បានអនុម័តក្នុងការបង្កើននូវការគាំទ្ររបស់ខ្លួននេះដែលពីមុនកូវ៉ាក់សម្រេចនៅក្នុងផែនការតែចំនួន ២០% នៅក្នុងការផ្តល់វ៉ាក់សាំងក្នុងចំណោមប្រជាជនកម្ពុជាសរុបដែលមានប្រមាណជា ៦,៦ លានដូស។ មកទល់ពេលបច្ចុប្បន្ននេះកម្ពុជាបានទទួលវ៉ាក់សាំងជាង ១,៨ លានដូសរួចហើយ ហើយចាប់ពីពេលនេះដល់ខែកញ្ញាឆ្នាំ ២០២២ ខាងមុខ កូវ៉ាក់នឹងផ្តល់នូវវ៉ាក់សាំងប្រភេទ Pfizer ចំនួនជាង ៥,៥ លានដូសបន្ថែមទៀតមកកម្ពុជា ដើម្បីបង្គ្រប់នូវចំនួនដែលកូវ៉ាក់ត្រូវផ្តល់មកកម្ពុជា។
លោកស្រី ឱ វណ្ណឌីន បានប្រាប់ថា៖ «អ្វីដែលជាចំណុចល្អដែលយើងបានពិភាក្សាគ្នានេះគឺខាងកូវ៉ាក់នឹងបង្កើននូវការផ្តល់វ៉ាក់សាំងរបស់ខ្លួនរហូតដល់ ៣០ ភាគរយនៃចំនួនប្រជាពលរដ្ឋសរុប។ មានន័យថា កូវ៉ាក់នឹងផ្តល់វ៉ាក់សាំងមកកម្ពុជាជាបន្តបន្ទាប់ទៀតនៅឆ្នាំខាងមុខៗទៀតប្រសិនបើយើងប្រើប្រាស់រួចរាល់ហើយនូវវ៉ាក់សាំងដែលគេផ្តល់ ២០ ភាគរយនេះ»។
ប្រធាន គ.វ.ក-១៩រូបនេះ បានបញ្ជាក់ថា៖ «អ៊ីចឹង! វ៉ាក់សាំង ១០% ដែលគេនឹងបង្កើនឱ្យយើងបន្តទៀតនេះ យើងនឹងគិតគូរចាត់ចែងរៀបចំនៅពេលដំណាក់កាលជាបន្តបន្ទាប់ទៀត។
មូលហេតុដែលខាងកូវ៉ាក់បន្ថែមវ៉ាក់សាំងឱ្យយើងគឺដោយសារតែការអនុវត្ត ការគ្រប់គ្រង ការយកចិត្តទុកដាក់ និងជំនឿទុកចិត្ត ព្រមទាំងលទ្ធផលដែលគេមើលឃើញនេះតែម្តង»។
បើតាមលោកស្រី ឱ វណ្ណឌីន មកទល់ពេលនេះ កម្ពុជាទទួលបានវ៉ាក់សាំងកូវីដ ១៩ សរុបជាង ៤៩ លានដូសដែលវ៉ាក់សាំងទាំងនោះទទួលបានពីការបញ្ជាទិញដោយប្រើថវិកាជាតិ និងជាជំនួយពីប្រទេសជាដៃគូផងដែរ។
លោកស្រី ណាឌីយ៉ា ឡាស្រ៊ី (Nadia Lasri) ប្រធានគ្រប់គ្រងជាន់ខ្ពស់របស់អង្គការ GAVI និងមជ្ឈមណ្ឌលកូវ៉ាក់ (COVAX) ប្រចាំប្រទេសកម្ពុជា និងប្រទេសឡាវ បានសាទរ និងកោតសរសើរនូវការខិតខំជាបន្តបន្ទាប់របស់រាជរដ្ឋាភិបាល និងក្រសួងសុខាភិបាលកម្ពុជាក្នុងការពង្រឹងប្រព័ន្ធសុខាភិបាល ការលើកកម្ពស់គុណភាពសេវាសុខាភិបាល ជាពិសេសការគ្រប់គ្រងការរាតត្បាតនៃជំងឺកូវីដ ១៩ បានយ៉ាងល្អប្រសើរ។
លោកស្រីបានបញ្ជាក់នូវគោលជំហររបស់អង្គការ GAVI និងមជ្ឈមណ្ឌលកូវ៉ាក់ (COVAX) ក្នុងការបន្តគាំទ្រពង្រឹងកម្មវិធីចាក់ថ្នាំបង្ការនៅកម្ពុជា ជាពិសេសពិនិត្យលទ្ធភាពផ្តល់ជំនួយវ៉ាក់សាំងបង្ការជំងឺកូវីដ ១៩ បន្ថែមទៀត និងសម្របសម្រួលការផ្តល់ជំនួយវ៉ាក់សាំងបង្ការជំងឺកូវីដ-១៩ពីដៃគូអភិវឌ្ឍន៍ដល់កម្ពុជា។
លោកនាយករដ្ឋមន្ត្រី ហ៊ុន សែន ធ្លាប់បានថ្លែងកាលពីថ្ងៃទី ១ ខែមេសា ដែរថា វិធានការដែលកម្ពុជាសម្រេចបាននេះ លោកក៏សុំអរគុណដល់ប្រជាពលរដ្ឋ ពីព្រោះបើទោះបីជាមានវ៉ាក់សាំងក៏ដោយ បើប្រជាពលរដ្ឋមិនព្រមចាក់គឺនៅតែមិនជោគជ័យ។
លោកបានបញ្ជាក់ថា៖ «ប្រជាពលរដ្ឋរបស់យើង ទទួលយកនូវការចាក់វ៉ាក់សាំងនេះ ទោះបីមានការបំភ័យពីមនុស្សមួយចំនួនពីក្រុមមួយចំនួនថា វ៉ាក់សាំងចាក់ទៅធ្វើឱ្យស្លាប់ ឬមានញ្ហាអីមួយ ប៉ុន្តែចុងបំផុតវ៉ាក់សាំងបានជួយជីវិតប្រជាជនកម្ពុជា។
យើងបាត់បង់ប្រជាជនយើងជាង ៣ ពាន់នាក់ ដែលស្លាប់នៅក្នុងពេលដែលកូវីដកើតឡើងនៅពេលយើងអត់មានវ៉ាក់សាំងចាក់»៕