ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទា និងក្រសួងស្ថាព័ន្ធពាក់ព័ន្ធនៅថ្ងៃទី ៤ ខែ មេសា បានប្រកាសដាក់ឱ្យប្រើប្រាស់ «ផែនការយុទ្ធសាស្ត្រស្តីពីកម្លាំងសេវាសង្គមនៅកម្ពុជា ២០២២-២០៣១ និងផ្សព្វផ្សាយឯកសារទឡ្ហីករណ៍ស្ដីពី ការវិនិយោគលើកម្លាំងសេវាសង្គម និងសេចក្តីណែនាំស្ដីពីតួនាទី និងភារកិច្ច សម្រាប់មន្ត្រីទទួលបន្ទុកជាបុគ្គលិកសង្គមកិច្ច ក្រុង ស្រុក ខណ្ឌ»។
លោក វង សូត រដ្ឋមន្តី្រក្រសួងសង្គមកិច្ច ថ្លែងក្នុងពិធីប្រកាសដាក់ឱ្យប្រើប្រាស់ ផែនការយុទ្ធសាស្ត្រនេះថា ផែនការយុទ្ធសាស្ដ្រនេះជាឯកសារដ៏មានសារៈសំខាន់ក្នុងការពង្រឹងសមត្ថភាព និងបង្កើនចំនួនកម្លាំងសេវាសង្គមកិច្ចយ៉ាងហោចណាស់មានអ្នកអាជីពសង្គមកិច្ច ឬអ្នកអាជីពសង្គមកិច្ចរង ២ នាក់ក្នុង ១ ឃុំ-សង្កាត់ ដើម្បីលើកកម្ពស់កម្លាំងសេវាសង្គម។ លោកថ្លែងថា ការប្រកាសឱ្យប្រើប្រាស់ផែនការយុទ្ធសាស្ដ្រនេះ គឺដើម្បីសម្រេចបាននូវគោលដៅជាយុទ្ធសាស្ត្រប្រកបដោយចក្ខុវិស័យច្បាស់លាស់ និងត្រឹមត្រូវរបស់រាជរដ្ឋាភិបាលក្នុងការគាំពារនូវសុខុមាលភាពរបស់ប្រជាជន ជាមួយនឹងអ្នកមានវិជ្ជាជីវៈដែលត្រឹមត្រូវ និងពិតប្រាកដក្នុងការផ្តល់សេវាសង្គមដល់ជនរងគ្រោះ និងងាយរងគ្រោះប្រកបដោយវិជ្ជាជីវៈ និងក្រមសីលធម៌ ដែលជាអភិក្រមប្រកបដោយប្រសិទ្ធភាពរបស់អ្នកផ្តល់សេវា។
លោកថ្លែងថា៖ «ក្នុងនាមថ្នាក់ដឹកនាំក្រសួងសង្គមកិច្ច និងក្នុងនាមខ្លួនខ្ញុំផ្ទាល់ខ្ញុំពិតជាមានសេចក្តីសោមនស្សរីករាយចូលរួមក្នុងពិធីប្រកាសដាក់ឱ្យប្រើប្រាស់ផែនការយុទ្ធសាស្ត្រ ស្តីពីកម្លាំង សេវាសង្គមនៅកម្ពុជា ២០២២-២០៣១ និងពិធីផ្សព្វផ្សាយ ឯកសារទឡ្ហីករណ៍ ស្តីពីការវិនិយោគលើកម្លាំងសេវាសង្គមនៅកម្ពុជា និងសេចក្ដីណែនាំស្តីពីតួនាទី និងភារកិច្ច សម្រាប់មន្ត្រីទទួលបន្ទុកជាបុគ្គលិកសង្គមកិច្ច ក្រុង ស្រុក ខណ្ឌ»។
លោក វង សូត បានលើកឡើងថា កត្តាវិវឌ្ឍនៃសង្គមប្រកបដោយសង្គតិភាពដូចសព្វថ្ងៃធ្វើឱ្យកម្ពុជាត្រូវបន្តដំណើរវិវឌ្ឍន៍របស់ខ្លួនលើមាគ៌ាច្បាស់លាស់ក្នុងការកំណត់ និងរក្សាបាននូវសុខុមាលភាពរបស់ប្រជាជន ជាពិសេសការធានានូវការផ្ដល់នូវសេវាសង្គមប្រកបដោយសមភាព សមធម៌ និងវិជ្ជាជីវៈពិតប្រាកដ។
លោកបន្តថា ដើម្បីសម្រេចបាននូវគោលដៅខាងលើនេះនាពេលខាងមុខរាជរដ្ឋាភិបាលដែលមានក្រសួងសង្គមកិច្ច ជាសេនាធិការបានកំណត់យកគោលដៅរបស់ខ្លួនក្នុងការរៀបចំផែនការយុទ្ធសាស្ត្រក្នុងការជំរុញកម្លាំងសេវាសង្គមកិច្ច ដើម្បីធ្វើជាកម្លាំងចលករ ពហុប៉ូល ក្នុងការចូលរួមចំណែកដល់ការផ្លាស់ប្ដូរសង្គម ការកសាងសហគមន៍ និងការអភិវឌ្ឍ ដោយធ្វើការជាមួយសហគមន៍ដែលប្រជាជនត្រូវការ ការគាំទ្រគ្រប់ប្រភេទមិនថា ផ្លូវចិត្ត សម្ភារ ការអប់រំ សេដ្ឋកិច្ច សង្គមកិច្ច វប្បធម៌ និងនយោបាយជាដើម។
លោកបញ្ជាក់ថា៖ «កម្លាំងសេវាសង្គមកិច្ច គឺជាទស្សនៈរួមមួយដែលសំដៅទៅលើអ្នកជំនាញ និងអ្នកជំនាញរងទាំងក្នុងរដ្ឋាភិបាល និងមិនមែនរដ្ឋាភិបាលដែលធ្វើការជាមួយកុមារ យុវជន មនុស្សពេញវ័យ ក្រុមគ្រួសារ និងសហគមន៍ ដើម្បីធានានូវការអភិវឌ្ឍ និងសុខុមាលភាព»។
តាមការសិក្សារបស់សម្ព័ន្ធកម្លាំងសេវាសង្គមសកល (GSSWA) និងអង្គការយូនីសេហ្វពីកម្លាំងសេវាសង្គមកិច្ចនៅបណ្តាប្រទេសក្នុងតំបន់អាស៊ីបូព៌ា និងតំបន់ប៉ាស៊ីហ្វិកបានរកឃើញថាទិន្នន័យសំខាន់ៗ ដែលទាក់ទងនឹងកម្លាំងសេវាសង្គមកិច្ចនៅកម្ពុជាក្នុងឆ្នាំ ២០១២ ចំនួនអ្នកផ្តល់សេវាសង្គម ដោយរាប់ទាំងមន្ត្រីក្រសួងសង្គមកិច្ចមានចំនួនប្រមាណ ១ ៥៥១ នាក់ដែលក្នុងចំណោមនោះ ចំនួនប្រមាណ ១ ភាគ ៣ ធ្វើការនៅថ្នាក់ជាតិ ហើយ ១ ភាគ ៣ គឺជាស្ដ្រី។
ផ្អែកលើការសិក្សានាពេលថ្មីៗនេះមានមុខតំណែងការងារសង្គមចំនួន ៣ ៧៦៤ នៅក្នុងជួររាជរដ្ឋាភិបាល ដែលចំនួននេះបានផ្តល់នូវសមាមាត្រនៃបុគ្គលិកសេវាសង្គមចំនួន ៦៤,៤ នាក់ ក្នុងចំណោមកុមារចំនួន ១០០ ០០០ នាក់។ ក្រៅពីក្រសួងសង្គមកិច្ច ក្រសួងស្ថាប័នពាក់ព័ន្ធមួយចំនួនបាននិងកំពុងបង្កើត ឬស្វែងរកឱ្យមានការបង្កើតសេវាសង្គមកិច្ចនៅក្នុងសេវាកម្មរបស់ខ្លួន។ ឧទាហរណ៍ ក្រសួងសុខាភិបាលមានមុខតំណែងជាបុគ្គលិកសង្គមខាងវេជ្ជសាស្ត្រ។ ទោះយ៉ាងណាចំនួនមុខតំណែង និងចំនួនអ្នកកាន់តំណែងនៅក្នុងវិស័យនេះមិនត្រូវបានគេដឹងចំនួនជាក់លាក់នោះទេ។ នេះបើតាមលោក វង សូត។
អង្គការភ្លែនអន្តរជាតិកម្ពុជាបានគាំទ្រ និងចូលរួមពិធីប្រកាសដាក់ឱ្យប្រើប្រាស់ «ផែនការយុទ្ធសាស្ត្រ ស្តីពីកម្លាំងសេវាសង្គមនៅកម្ពុជា ២០២២-២០៣១ និងការវិនិយោគកម្លាំងសេវាសង្គមនៅកម្ពុជា និងសេចក្តីណែនាំស្តីពីតួនាទី ភារកិច្ចសម្រាប់មន្ត្រីទទួលបន្ទុកជាបុគ្គលិកសង្គមកិច្ច ក្រុង ស្រុក និងខណ្ឌ»។
នាយិកាប្រចាំប្រទេសនៃអង្គការភ្លែនអន្តរជាតិកម្ពុជាលោកស្រី គ្វីននេត វ៉ង បានថ្លែងអំណរគុណ ចំពោះក្រសួងសង្គមកិច្ច ដែលបានរៀបចំកម្មវិធីសម្ពោធដ៏សំខាន់នេះ ក្រោមការដឹកនាំរបស់លោក វង សូត។
លោកស្រីថ្លែងថា៖ «កម្លាំងពលកម្មផ្នែកសេវាសង្គមដើរតួនាទីយ៉ាងសំខាន់ក្នុងការគាំទ្រ និងលើកកម្ពស់សុខុមាលភាពរបស់កុមារ គ្រួសារ និងក្រុមងាយរងគ្រោះដោយកំណត់អត្តសញ្ញាណ និងគ្រប់គ្រងហានិភ័យព្រមទាំងសម្រួលដល់ការទទួលបាន និងការផ្តល់សេវាគាំទ្រសង្គម និងធានាថា គ្រួសារដែលទទួលបានការគាំទ្រទទួលបានសេវាសុខុមាលភាពដែលពួកគេត្រូវការ»៕