.jpg)
លោក ហ៊ុន សែន ថ្លែងក្នុងពិធីសម្ពោធផ្លូវ ៣៨ ខ្សែ នៅខេត្តសៀមរាប កាលពីថ្ងៃទី ៣ មេសា។ រូបថត SPM
ភ្នំពេញៈ លោកនាយករដ្ឋមន្ត្រី ហ៊ុន សែន កំពុងពិចារណាក្នុងការដកបម្រាមទៅលើការពាក់ម៉ាស់ក្នុងស្រុក ឬខេត្តណាមួយជាការសាកល្បង សម្រាប់ទីតាំងដែលមិនមានការឆ្លងមេរោគកូវីដ ១៩ ប៉ុន្តែលោកនៅបន្តធ្វើការតាមដានបន្ថែមទៀតមុននឹងសម្រេចឱ្យបញ្ឈប់ការពាក់ម៉ាស់នេះ។
ក្នុងអំឡុងពេលនៃពិធីបុណ្យចូលឆ្នាំថ្មីប្រពៃណីជាតិខ្មែរដែលនឹងមកដល់នាពេលខាងមុខនេះ លោកនាយករដ្ឋមន្ត្រីក៏បានអំពាវនាវដល់ប្រជាពលរដ្ឋត្រូវបន្តរក្សា វិធានការ ៣ ការពារ និង ៣ កុំដដែល ជាមួយនឹងការសប្បាយរីករាយក្នុងពេលបុណ្យចូលឆ្នាំ។ លោកថ្លែងដូចនេះក្នុងពិធីសម្ពោធដាក់ឱ្យប្រើប្រាស់ផ្លូវ ៣៨ ខ្សែក្នុងក្រុងសៀមរាប ខេត្តសៀមរាប នាព្រឹកថ្ងៃទី ៤ ខែមេសា។
លោកបញ្ជាក់ថា៖ «ខ្ញុំកំពុងគិតថា នៅពេលណាមួយនឹងអាចប្រើប្រាស់វិធីសាស្ត្របញ្ឈប់ការពាក់ម៉ាស់នៅក្នុងខេត្តណាមួយ ឬខេត្ត ២ ដើម្បីសាកល្បង។ យើង អាចយកខេត្តមួយដោយអ្នកនៅក្នុងខេត្ត អាចចល័ត ឬដើរនៅក្នុងខេត្តនោះដោយមិនចាំបាច់ពាក់ម៉ាស់។ ប៉ុន្តែប្រសិនបើអ្នកនៅក្នុងខេត្តនោះចូលមកក្នុងខេត្តផ្សេងគឺត្រូវតែពាក់ម៉ាស់»។
លោកបន្តថា ប្រសិនបើខេត្ត ២ ជាប់គ្នា ហើយលើកលែងការពាក់ម៉ាស់ដូចគ្នា នោះអ្នករស់នៅខេត្តទាំង ២ នោះ ឆ្លងចេញចូលដោយមិនបាច់ពាក់ម៉ាស់ផងដែរ។
លោក ហ៊ុន សែន មានប្រសាសន៍ថា៖ «កុំទាន់អាលដោះម៉ាស់អី ចាំដល់ពេលខ្ញុំប្រកាសចាំដោះ ខ្ញុំកំពុងតាមដាន។ រៀងរាល់ពេលល្ងាចខ្ញុំតាមដានការឆ្លងនៅតាមខេត្តនីមួយៗ។ ដូចនេះ យើងយកស្ថានភាពនោះ ដើម្បីសាកល្បង ដោយមិនតម្រូវឱ្យមានការពាក់ម៉ាស់នៅក្នុងខេត្តណាមួយ ឬអាចថា ស្រុកហ្នឹងមួយមិនបាច់ពាក់ម៉ាស់ តែបើចូលស្រុកផ្សេងគឺត្រូវតែពាក់ម៉ាស់»។
នាឱកាសនោះ លោកនាយករដ្ឋមន្ត្រី ហ៊ុន សែន នៅតែបន្តស្នើឱ្យប្រជាពលរដ្ឋទូទាំងប្រទេសក្នុងពិធីបុណ្យចូលឆ្នាំបន្តពាក់ម៉ាស់បន្តទៀតសិន ដោយសារលោកមិនទាន់មានការប្រកាសឱ្យឈប់ប្រើម៉ាស់នៅឡើយ។ លោកបញ្ជាក់ថា សម្រាប់នៅខេត្តសៀមរាបនៅតែបន្តដាក់ឱ្យអនុវត្ត ការពាក់ម៉ាស់ដដែល ដោយសារវាជាតំបន់ទេសចរណ៍មិនត្រូវឱ្យមានការផ្ទុះឡើងវិញបានទេ។
លោកថ្លែងថា៖ «យើងបន្តចាំមើល បន្ទាប់ពីចូលឆ្នាំហើយ តើចំនួននៃការឆ្លងមានការកើនឡើង ឬចំនួននៅថេរ។ ខ្ញុំសុំធ្វើការអំពាវនាវទៅដល់ប្រជាពលរដ្ឋរបស់យើង បន្តនូវកិច្ចខិតខំប្រឹងប្រែងអនុវត្តនូវវិធានការសុខាភិបាលបន្តទៀត តាមរយៈវិធានការ ៣ ការពារ និង ៣ កុំ ហើយនិងតាមរយៈការជំរុញការចាក់វ៉ាក់សាំង»។
ក្នុងពិធីបុណ្យចូលឆ្នាំខ្មែរនេះ បើតាមការលើកឡើងរបស់លោក នាយករដ្ឋមន្ត្រី គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសអាចនឹងទៅចាក់វ៉ាក់សាំងនៅតំបន់កម្សាន្តមួយចំនួន ព្រោះអាចប្រើប្រាស់គ្រូពេទ្យដើម្បីចាក់វ៉ាក់សាំងជូនពលរដ្ឋបាន។
លោក ហ៊ុន សែន ថ្លែងថា៖ «ខ្ញុំសុំប្រកាសថា នៅក្នុងពិធីបុណ្យចូលឆ្នាំនេះ សុំឱ្យនាំគ្នាលេងសប្បាយ ហើយឱ្យរាំលេង។ ខ្ញុំមិនមែនយកប្រជាជនទៅធ្វើតេស្តទេ។ អ្វីដែលខ្ញុំចង់ដឹង តើពេលដែលយើងបើកឱកាសសម្រាប់ការធ្វើដំណើរដើរលេងពីតំបន់មួយទៅតំបន់មួយមានការរាំលេងកម្សាន្ត មានការឆ្លងទៀតឬអត់?»។
កាលពីថ្ងៃទី ១ ខែមេសា ក្រសួងសុខាភិបាលបានចេញសេចក្តីណែនាំពីការអនុវត្តក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ ឆ្នាំ ២០២២ ដែលនឹងប្រព្រឹត្តទៅរយៈពេល ៣ ថ្ងៃ ចាប់ពីថ្ងៃទី ១៤-១៦ ខែមេសានេះ។ ក្រសួងសុខាភិបាលក៏បានអំពាវនាវដោយទទូចដល់ប្រជាពលរដ្ឋទាំងអស់ត្រូវបន្តបង្កើនការប្រុងប្រយ័ត្នខ្ពស់ ដោយអនុវត្តឱ្យបានខ្ជាប់ខ្ជួន និងគ្រប់ៗគ្នានូវវិធានការសុខាភិបាល ៣ ការពារ និង ៣ កុំ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាលក៏បានក្រើនរំឭកដល់ប្រជាពលរដ្ឋឱ្យការពារខ្លួនឱ្យបានហ្មត់ចត់ពីមេរោគកូវីដ ១៩ ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខាងមុខនេះ។
លោកស្រីបញ្ជាក់ថា៖ «សូមកុំភ្លេចថា វីរុសកូវីដ ១៩ នេះមិនទាន់ចប់នៅឡើយទេ។ ការរាតត្បាតជំងឺកូវីដ ១៩ នៅលើសកលលោក និងក្នុងប្រទេសនីមួយៗ មិនទាន់មានការបញ្ចប់នៅឡើយទេ ហើយការវិវឌ្ឍនៃការបំប្លែងខ្លួនរបស់វីរុសកូវីដ ១៩ ក៏វាអាចនឹងកើតមានផងដែរ»។
ដោយឡែក កម្ពុជាកំពុងធ្វើការជំរុញការងារថែទាំសុខភាពបឋម (PHC booster) នៅតាមមូលដ្ឋាននានា ដែលជាម៉ាស៊ីនដ៏មានឥទ្ធិពល សម្រាប់បំប្លែងការថែទាំសុខភាព ឆ្ពោះទៅរកសុខភាព សម្រាប់ទាំងអស់គ្នា។ វានឹងត្រូវបានគេមើលឃើញថា ជាដំណើរដ៏សំខាន់មួយនៅប្រទេសកម្ពុជា ដើម្បីឈានទៅដល់ការគ្របដណ្តប់សុខភាពជាសកល (UHC)។
លោកស្រី ឱ វណ្ណឌីន បានឱ្យដឹងថា ការងារថែទាំសុខភាពបឋមបង្ហាញពីការយកចិត្តទុកដាក់ដោយគិតគូរពីមនុស្សជាមជ្ឈមណ្ឌលកណ្តាលក្នុងការថែទាំសុខភាព។ ជាពិសេសការជួយបុគ្គលគ្រួសារ និងសហគមន៍ឱ្យទទួលខុសត្រូវ ចំពោះសុខភាពរបស់ពួកគេ ជាជាងការរង់ចាំ ឬភ្លេចខ្លួនរហូតដល់វាយឺតពេល។
គោលដៅរបស់មនុស្សគ្រប់រូប គឺដើម្បីរស់នៅឱ្យកាន់តែមានសុខភាពល្អ និងអាយុកាលរស់នៅបានយូរអង្វែង ជាងបច្ចុប្បន្ន។ ប៉ុន្តែតើធ្វើដូចម្តេច ដើម្បីទៅដល់ទីនោះ? គឺវាត្រូវការការវិនិយោគបន្ថែមទៀតទៅលើសុខភាព ដើម្បីអនាគតកាន់តែប្រសើរ និងភ្លឺស្វាងរបស់កម្ពុជា។ នេះបើតាមការបញ្ជាក់របស់លោកស្រី ឱ វណ្ណឌីន។
លោកស្រីថ្លែងថា៖ «ការជំរុញការថែទាំសុខភាពបឋមជាដំណើរដ៏វែងឆ្ងាយនៃអន្តរាគមន៍ផ្នែកសុខភាពសាធារណៈសម្រាប់ការកែលម្អសុខភាព និងសុខុមាលភាពរបស់ពលរដ្ឋកម្ពុជា។ ខ្ញុំសូមអំពាវនាវដល់សាធារណជន ថ្នាក់ដឹកនាំ និងអ្នកអនុវត្តទាំងអស់ នៅថ្នាក់ជាតិ និងថ្នាក់ក្រោមជាតិ ជាពិសេសសហគមន៍ឱ្យចូលរួមកាន់តែច្រើន និងសកម្មនេះ ដើម្បីផលប្រយោជន៍សុខភាពផ្ទាល់ខ្លួនរបស់លោកអ្នក»។
លោកស្រីបានបន្តថា ក្រសួងសុខាភិបាលកំពុងធ្វើការរួមគ្នា ដើម្បីឈានទៅរកការច្នៃប្រឌិតនេះ ដោយផ្តោតលើកម្មវិធីជំរុញការថែទាំសុខភាពបឋម (PHC booster)៕
វីដេអូ៖
