ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» បានឱ្យដឹងថា ក្នុងត្រីមាសទី ១ ឆ្នាំ ២០២២ បានរកឃើញបទល្មើសចំនួន ៣៥៩ ករណី ដោយបានអនុវត្តនីតិវិធីពិន័យអន្តរការណ៍ទៅតាមប្រភេទ និងទំហំនៃបទល្មើសនីមួយៗ។
ក្នុងរបាយការណ៍របស់ ក.ប.ប ដែលភ្នំពេញប៉ុស្តិ៍ទទួលបានកាលពីថ្ងៃទី ៤ ខែមេសា ឆ្នាំ ២០២២ បានឱ្យដឹងថា លទ្ធផលដែលមន្ត្រីស៊ើបអង្កេតអគ្គនាយកដ្ឋាន ក.ប.ប. រកឃើញមានចំនួន ៣៥៩ ករណីនោះ គឺចុះពិនិត្យទីផ្សារបានចំនួន ២៧៣ លើក ដកហូតទំនិញមិនមានភាពអនុលោមចំនួន ១២ ៦៣២ គីឡូក្រាម។ រកឃើញករណីដាក់លក់អាល់កុលក្លែងក្លាយ ដោយរឹបអូសសារធាតុមេតាណុលចំនួន ៨០៧,៥០ លីត្រ និងចុះត្រួតពិនិត្យស្ថានីយ/ដេប៉ូលក់ប្រេងឥន្ធនៈចំនួន ១១៣០ ស្តានីយ/ដេប៉ូ ដោយរកឃើញស្ថានីយ/ដេប៉ូចំនួន ៣៨៧ មិនមានភាពអនុលោម។
របាយការណ៍ដដែលបន្តថា មន្ត្រីអនុវត្តនៅទូទាំងប្រទេសក៏បានចុះត្រួតពិនិត្យទីតាំងផលិត កែច្នៃ និងឃ្លាំងស្តុក ផលិតផលចំនួន ៥២ លើក ដោយរកឃើញផលិតផលមិនមានភាពអនុលោម ឬរំលោភសិទ្ធិនាំចូលផ្តាច់មុខចំនួន ១ ២៧២ តោន ៦៨២ គីឡូក្រាម ដើម្បីអនុវត្តនីតិវិធីបន្ត។
ដោយឡែកនៅថ្ងៃទី ១ ខែមេសានេះដែរ មន្ត្រីជំនាញ ក.ប.ប. បានរកទំនិញខូចគុណភាព ហួសកាលបរិច្ឆេទប្រើប្រាស់ និងបានដកហូត ២៣ គីឡូក្រាម ខណៈថ្ងៃដដែលនោះ បន្តរកឃើញដេប៉ូប្រេងឥន្ធនៈចំនួន ៥ ទីតាំង មិនអនុលោមតាមច្បាប់ផងដែរ។
អគ្គនាយកនៃអគ្គនាយកដ្ឋាន ក.ប.ប លោក ផាន អូន ប្រាប់ភ្នំពេញប៉ុស្តិ៍បន្ថែមថា ក្នុងចំណោមបទល្មើសទាំងនោះពុំមានបទល្មើសណាមួយត្រូវបានកសាងសំណុំរឿងបញ្ចូនទៅតុលាការនោះទេ។ លោកបន្តថា មន្ត្រី ក.ប.ប. បានអនុវត្តនីតិវិធី ពិន័យអន្តរការណ៍តាមច្បាប់ជាធរមាន ហើយម្ចាស់អាជីវកម្មទាំងនោះបានសហការបង់ប្រាក់ពិន័យ និងធ្វើកិច្ចសន្យាកែប្រែកំហុសដែលមន្ត្រី ក.ប.ប. បានរកឃើញផងដែរ។
លោកថា៖ «ចំពោះបទល្មើសដែលមន្ត្រី ក.ប.ប. បានរកឃើញកន្លងមក ភាគច្រើនជាបទល្មើសពាក់ព័ន្ធនឹងការធ្វើអាជីវកម្មមិនគោរពតាមបទដ្ឋានព័ត៌មាន និងការប្រព្រឹត្តអំពើមិនសុចរិតក្នុងអាជីវកម្ម ពិសេសអាជីវកម្មប្រេងឥន្ធនៈ»។
ជាមួយគ្នានេះដែរ លោក ផាន អូន បានអំពាវនាវដល់ធុរជន ដែលប្រកបរបរទាំងអស់នៅក្នុងព្រះរាជាណាចក្រកម្ពុជា សូមប្រកបអាជីវកម្មដោយសុចរិត ដើម្បីបង្កើនទំនុកចិត្តដល់អតិថិជនរបស់ខ្លួន ការពារផលប្រយោជន៍របស់ប្រជាពលរដ្ឋ ទាំងប្រយោជន៍សុខភាព និងផលប្រយោជន៍សេដ្ឋកិច្ច ពិសេសដើម្បីចៀសវាងការប្រឈមចំពោះមុខច្បាប់ជាធរមាន។
របាយការណ៍របស់ ក.ប.ប បានបង្ហាញថា ក្នុងឆ្នាំ ២០២១ មន្ត្រីបានអនុវត្តក្នុងក្របខ័ណ្ឌទូទាំងប្រទេសចុះត្រួតពិនិត្យ និងបានរកឃើញផលិតផលគ្មានសុវត្ថិភាពរាប់រយតោន និងអាជីវកម្មមិនមានភាពអនុលោមតាមច្បាប់រាប់រយកន្លែងត្រូវបានបង្ក្រាប។
លើសពីនេះ ក.ប.ប បានកោះអញ្ជើញ ក្រុមហ៊ុនចំនួន ១៥ ឱ្យមកបំភ្លឺ និងផ្តល់ឯកសារពាក់ព័ន្ធ ព្រមទាំងបានសហការចុះបង្ក្រាបទីតាំងផលិត កែច្នៃ និងឃ្លាំងស្តុកផលិតផលក្លែងក្លាយចំនួន ១៤ លើក ដោយបានឃាត់ទុកផលិតផលក្លែងក្លាយចំនួន ១៣ តោន និង ៣១១ គីឡូក្រាម។
ក្នុងនោះ មន្ត្រីស៊ើបអង្កេតនៃអគ្គនាយកដ្ឋាន ក.ប.ប. ដែលទទួលបាននីតិសម្បទាជានគរបាលយុត្តិធម៌បានរកឃើញបទល្មើសចំនួន ៦៨២ ករណីត្រូវបានអនុវត្តវិធានការពិន័យអន្តរការណ៍ទៅតាមប្រភេទ និងទំហំនៃបទល្មើសនីមួយៗ និងបទល្មើសចំនួន ៧ ត្រូវបានកសាងសំណុំរឿងបញ្ជូនទៅតុលាការ»។ លោក អូន ថា ក.ប.ប បានជួបប្រទះបញ្ហាប្រឈមមួយចំនួនផងដែរ ដោយសារតែកង្វះកិច្ចសហប្រតិបត្តិការរវាងស្ថាប័នពាក់ព័ន្ធមួយចំនួនក្នុងកិច្ចសម្រួលពាណិជ្ជកម្ម សុវត្ថិភាពម្ហូបអាហារ និងកិច្ចការពារផលប្រយោជន៍អ្នកប្រើប្រាស់ ដែលនាំឱ្យប្រសិទ្ធភាពនៃការអនុវត្តគោលនយោបាយ ច្បាប់ និងបទប្បញ្ញត្តិ ជាធរមាន មិនទាន់បានល្អប្រសើរ៕