ភ្នំពេញៈ នគរបាលខណ្ឌជ្រោយចង្វារកំពុងបន្តស្វែងរកចាប់ខ្លួនជនសង្ស័យមួយចំនួនទៀត ក្រោយពីបក្ខពួករបស់ក្រុមជនសង្ស័យចំនួន ៣ នាក់ត្រូវបានសមត្ថកិច្ចកសាងសំណុំរឿងបញ្ជូនទៅតុលាការ កាលពីថ្ងៃទី ៣ មេសា បន្ទាប់ពីចាប់ខ្លួនបាន ២ ថ្ងៃ ករណីធាក់ប្លន់ម៉ូតូពីអ្នកដំណើរនៅតាមដងផ្លូវ ស្ថិតក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
លោកវរសេនីយ៍ត្រី ឯក សេរីវុធ អធិការរងទទួលផែនការងារនគរបាលព្រហ្មទណ្ឌខណ្ឌជ្រោយចង្វារបានឱ្យដឹងនៅថ្ងៃទី ៤ មេសាថា សមត្ថកិច្ចរបស់លោកកំពុងបន្តស្រាវជ្រាវស្វែងរកចាប់ខ្លួនជនសង្ស័យមួយចំនួនទៀត ដែលជាបក្ខពួកជនត្រូវបានចាប់ខ្លួន។ ចំពោះជនសង្ស័យដែលត្រូវបានសមត្ថកិច្ចរបស់លោកឃាត់ខ្លួនមានឈ្មោះ និត រតនា អាយុ ១៦ ឆ្នាំ ជាសិស្សរៀននៅថ្នាក់ទី ១០ ជនសង្ស័យទី ២ ឈ្មោះ លន់ ចាន់ អាយុ ១៦ ឆ្នាំ មុខរបរមិនពិតប្រាកដ និងជនសង្ស័យទី ៣ ឈ្មោះ សៀម ចិត្រា អាយុ ១៥ ឆ្នាំ ជាសិស្សនៅថ្នាក់ទី ៩។
ក្រុមជនសង្ស័យទាំង ៣ នាក់ត្រូវបានសមត្ថកិច្ចរបស់លោកដែលពួនចាំឃ្លាំមើលនោះ ដេញចាប់បាន កាលពីថ្ងៃទី ១ មេសា ដោយសារពួកគេធាក់ប្លន់យកម៉ូតូ ១ គ្រឿងពីបុរសរងគ្រោះម្នាក់។
លោកបានថ្លែងថា៖« ករណីជនសង្ស័យ ៣ នាក់នេះ កម្លាំងសមត្ថកិច្ចខ្ញុំបញ្ជូនទៅតុលាការពីថ្ងៃម្សិលមិញ [ថ្ងៃទី ៣ មេសា]។ ជនទាំង ៣ នាក់ គឺតុលាការកំពុងបន្តនីតិវិធី»។
ពាក់ព័ន្ធការចោទប្រកាន់ពីតំណាងអយ្យការយ៉ាងណានោះ នៅថ្ងៃទី ៤ មេសា ភ្នំពេញប៉ុស្តិ៍បានព្យាយាមទាក់ទងលោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ ប៉ុន្តែលោកមិនទាន់ឆ្លើយតបនៅឡើយ។
ចំពោះអង្គហេតុនៃការចាប់ខ្លួនជនសង្ស័យ មិនត្រូវបានលោក ឯក សេរីវុធ ផ្តល់ព័ត៌មានលម្អិតបានទេ ដោយលោកគ្រាន់តែប្រាប់ថា បក្ខពួករបស់ក្រុមជនសង្ស័យនៅមានចំនួនលើសពី ៣ នាក់នេះទៀត។
ទោះយ៉ាងណា បើតាមមន្ត្រីនគរបាលខណ្ឌជ្រោយចង្វារ ១ រូបស្នើសុំមិនឱ្យបញ្ចេញឈ្មោះបានប្រាប់នៅថ្ងៃទី ៤ មេសា ថា កន្លងមកសមត្ថកិច្ចតែងតែទទួលព័ត៌មានថា នៅតាមបណ្តោយមហាវិថីឈ្នះឈ្នះក្នុងភូមិសាស្ត្រ ទឹកដីសង្កាត់ព្រែកតាសេក ខណ្ឌជ្រោយចង្វារ មានករណីធាក់ប្លន់យកម៉ូតូពីអ្នកដំណើរជាញឹកញាប់។ លុះនៅព្រឹកថ្ងៃទី ១ មេសា កម្លាំងសមត្ថកិច្ចខណ្ឌបានចុះល្បាត ហើយពួនស្ទាក់ចាប់ខ្លួនជនសង្ស័យបាន ៣ នាក់ បន្ទាប់ពីពួកគេធាក់ប្លន់យកម៉ូតូ ១ គ្រឿងពីបុរសរងគ្រោះបានសម្រេច។
មន្ត្រីរូបនោះបន្តថា ក្នុងពេលធ្វើសកម្មភាពក្រុមជនសង្ស័យមានគ្នា ៦ នាក់ និងមានម៉ូតូ ៣ គ្រឿងបានជិះអែបនឹងម៉ូតូរបស់ជនរងគ្រោះ ហើយបក្ខពួកគេបានធាក់ម៉ូតូរបស់ជនរងគ្រោះឱ្យដួល ហើយគ្នាគេចុះពីលើម៉ូតូដែលកំពុងឌុបគ្នាទៅដណ្តើមយកពីបុរសរងគ្រោះហើយជិះគេចខ្លួនបាត់៕
វីដេអូ៖