.jpg)
អ្នកគ្រូនៅសាលាបឋមសិក្សាបាក់ខែងពិនិត្យកម្តៅសិស្សមុនឱ្យសិស្សចូលក្នុងសាលាពីឆ្នាំ ២០២១។ ហុង មិនា
ភ្នំពេញៈ ការសិក្សាស្រាវជ្រាវថ្មីមួយ របស់ក្រសួងអប់រំ យុវជន និងកីឡា រកឃើញថា កុមារកម្ពុជាបានជួបប្រទះនឹងបាត់បង់ការរៀនសូត្រយ៉ាងច្រើន ក្នុងអំឡុងកូវីដ ១៩ រាតត្បាតដែលទាមទារឱ្យបង្កើនការវិនិយោគលើវិស័យអប់រំ។ ឆ្លើយតបទៅនឹងការរកឃើញនេះ ក្រសួងអប់រំបានប្រជុំក្រុមការងារបច្ចេកទេសរួមជាមួយនឹងដៃគូទាំងអស់ ដើម្បីរៀបចំជំហានបន្ទាប់ក្នុងការដោះស្រាយលើបញ្ហានេះ។
តាមសេចក្ដីប្រកាសព័ត៌មានរួមរបស់ក្រសួងអប់រំ និងដៃគូទាំងអស់ក្នុងវិស័យអប់រំកាលពីថ្ងៃទី ៥ ខែមេសា បានបង្ហាញថា លទ្ធផល គឺបានមកពីការវាយតម្លៃចុងក្រោយរបស់ក្រសួងអប់រំទៅលើការរៀនសូត្រនៅថ្នាក់ទី ៦ ដែលត្រូវបានធ្វើឡើងកាលពីខែវិច្ឆិកា ឆ្នាំ ២០២១ និងបានប្រកាសផ្សព្វផ្សាយនៅខែមីនា ឆ្នាំ ២០២២ បន្ទាប់ពីមានការវិភាគយ៉ាងលម្អិត។
នាយកដ្ឋានធានាគុណភាពអប់រំ (EQAD) របស់ក្រសួងបានវាយតម្លៃលើសិស្សានុសិស្សជាង ៦ ០០០ នាក់នៅក្នុងសាលារៀនចំនួន ២៣០ នៅទូទាំងប្រទេស ហើយបានរកឃើញថា ការសិក្សារបស់កុមារបានធ្លាក់ចុះនៅក្នុងអំឡុងពេលនៃជំងឺរាតត្បាត។ ដោយប្រៀបធៀបជាមួយការវាយតម្លៃដូចគ្នានៅឆ្នាំ ២០១៦ ភាគរយនៃសិស្សានុសិស្ស ដែលមិនអាចបង្ហាញអំពីជំនាញចំណេះដឹងមូលដ្ឋានផ្នែកភាសាខ្មែរបានកើនឡើងពី ៣៤% ទៅ ៤៥% និងផ្នែកគណិតវិទ្យាបានកើនឡើងពី ៤៩% ទៅ ៧៤%។
សេចក្ដីប្រកាសឱ្យដឹងថា សាលារៀននៅកម្ពុជាត្រូវបានបិទទ្វារអស់រយៈពេល ២៥០ ថ្ងៃ នៅឆ្នាំ ២០២០ និង ២០២១ ដែលចំនួននេះ ស្ទើរតែស្មើនឹង ២ ភាគ ៣ នៃឆ្នាំសិក្សាចំនួន ២ ឆ្នាំ។ លទ្ធផលនៃការវាយតម្លៃលើការរៀនសូត្រនេះបង្ហាញថា ទោះបីជាសិស្សានុសិស្សទាំងអស់បានជួបប្រទះនឹងការបាត់បង់ការរៀនសូត្រ បន្ទាប់ពីការបិទសាលារៀនទាំងនេះក្ដី ក៏ផលប៉ះពាល់មិនមានលក្ខណៈដូចៗគ្នាឡើយ។
លទ្ធផលបង្ហាញថា កុមារាបានបាត់បង់ការរៀនសូត្រច្រើនជាងមុន និងទទួលលទ្ធផលខ្សោយជាងមុន នៅក្នុងការធ្វើតេស្ត កុមារាចំនួន ៥៥% ត្រូវបានវាយតម្លៃថា មិនសម្រេចបានជំនាញចំណេះដឹងមូលដ្ឋានផ្នែកភាសាខ្មែរឡើយនៅឆ្នាំ ២០២១ ធៀបនឹងកុមារីចំនួន ៣៤%។
ការវាយតម្លៃលើការរៀនសូត្រនេះត្រូវធ្វើឡើងនៅខែវិច្ឆិកា ឆ្នាំ ២០២១ និងបន្ទាប់មក ត្រូវបានវិភាគនិងបោះពុម្ពនៅខែមីនា ឆ្នាំ ២០២២។ ការវាយតម្លៃនេះត្រូវបានធ្វើឡើងដោយក្រសួងអប់រំ និងគាំទ្រដោយយូនីសេហ្វ និងដៃគូនៃមូលនិធិភាពជាដៃគូដើម្បីអភិ-វឌ្ឍន៍សមត្ថភាពវិស័យអប់រំ (CDPF)រួមមានសហភាពអឺរ៉ុប (EU) ទីភ្នាក់ងារស៊ុយអែត សម្រាប់អភិវឌ្ឍន៍អន្តរជាតិ (SIDA) និងទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ (USAID) និងភាពជាដៃគូសាកលសម្រាប់ការអប់រំ (GPE)។
លទ្ធផលដទៃទៀតបង្ហាញថា បើទោះជាសាលារៀននៅទីក្រុងបានសម្រេចលទ្ធផលល្អជាងសាលារៀននៅជនបទទាំងក្នុងឆ្នាំ ២០១៦ និង ២០២១ យ៉ាងណាក្ដី ក៏លទ្ធផលបានបង្ហាញនូវការបាត់បង់ការរៀនសូត្រក្នុងកម្រិតកាន់តែធ្ងន់ធ្ងរផងដែរ។ លទ្ធផលក៏មានភាពខុសគ្នាយ៉ាងច្បាស់មួយ ចំពោះភាពធ្ងន់ធ្ងរនៃការបាត់បង់ការរៀនសូត្រនៅក្នុងមុខវិជ្ជាស្នូលទាំង ២ ពោលគឺគណិតវិទ្យា និងភាសាខ្មែរ។ លទ្ធផល គណិតវិទ្យាមានលក្ខណៈអន់ជាងលទ្ធផលភាសាខ្មែរគួរឱ្យកត់សម្គាល់ ដែលឆ្លុះបញ្ចាំងពីការពិតថាមុខវិជ្ជាគណិតវិទ្យាតែងតែទាមទារនូវការផ្តោតអារម្មណ៍ និងការយកចិត្តទុកដាក់ ក្នុងការរៀនសូត្រក្នុងថ្នាក់ដោយផ្ទាល់ (មិនមែនពីចម្ងាយ) ជាជាងភាសាខ្មែរ ដែលជាកត្តាលំបាកអាចធ្វើបាននៅពេលសាលាបិទទ្វារ។ នេះបើតាមសេចក្ដីប្រកាសព័ត៌មានរួម។
លោក ហង់ជួន ណារ៉ុន រដ្ឋមន្ត្រីក្រសួងអប់រំ ថ្លែងថា៖ «លទ្ធផលទាំងនេះជាលទ្ធផលគួរឱ្យបារម្ភ។ យើងបានខិតខំប្រឹងប្រែងធ្វើការងារជាមួយដៃគូទាំងអស់របស់យើង ដើម្បីដាក់ចេញនូវវិធានការរៀនសូត្រពីចម្ងាយ នៅពេលសាលារៀនបិទទ្វារក្នុងអំឡុងពេលនៃជំងឺរាតត្បាត»។ លោកលើកឡើងថា ការសិក្សានានាក៏បានបង្ហាញថា វិធានការទាំងនេះ ពិតជាបានជួយរក្សាការរៀនសូត្រសម្រាប់កុមារជាច្រើន ប៉ុន្តែលទ្ធផលនៃការវាយតម្លៃលើការរៀនសូត្របានបញ្ជាក់ថា សកម្មភាពទាំងនេះមិនទាន់គ្រប់គ្រាន់ ដើម្បីមកបង្គ្រប់មកវិញចំពោះសកម្មភាពទាំងអស់ ដែលកុមារបានបាត់បង់នៅពេលពួកគេ មិនបានរៀនសូត្រនៅក្នុងថ្នាក់។ លោកបញ្ជាក់ថា៖ «ឥឡូវនេះគឺជាពេលដែលយើងទាំងអស់គ្នាត្រូវព្យាយាម និងជួយកុមារកម្ពុជាតាមឱ្យទាន់ការរៀនសូត្រដែលពួកគេបានបាត់បង់ ដែលនេះជាដំណើរការមួយ ដែលបានចាប់ផ្ដើមរួចហើយ ប៉ុន្តែនៅពេលនេះ វាត្រូវតែពន្លឿនបន្ថែមជាមួយនឹងការគាំទ្រពីដៃគូទាំងអស់នៅក្នុងវិស័យអប់រំ»។
សេចក្ដីប្រកាសព័ត៌មានបញ្ជាក់ថា ជាលទ្ធផលពីរបកគំហើញមិនគួរឱ្យពេញចិត្ត ក្រសួងអប់រំបានរៀបចំកិច្ចប្រជុំរបស់ក្រុមការងារបច្ចេកទេសរួមជាមួយនឹងដៃគូវិស័យអប់រំទាំងអស់របស់ខ្លួន ដើម្បីរៀបចំជំហានបន្ទាប់។ ក្រសួងក៏បានចាត់វិធានការចាំបាច់មួយចំនួនដូចជា ការកំណត់ការបង្រៀនមេរៀនបំប៉ននៅពេលសាលារៀនបើកឡើងវិញភ្លាម ប៉ុន្តែក្រុមការងារបច្ចេកទេសបានព្រមព្រៀងថាវិធានការទាំងនេះចាំបាច់ត្រូវបានពង្រីក និងពង្រឹង ដើម្បីជួយសិស្សានុសិស្សឱ្យតាមទាន់ការរៀនសូត្រជាមួយការបង្កើនការផ្ដោតគោលដៅទៅលើសិស្សានុសិស្សនៅក្នុងស្ថានភាពលំបាកបំផុត ដែលបានបាត់បង់ការរៀនសូត្រច្រើនបំផុត។
យូនីសេហ្វបានធ្វើការជាមួយដៃគូនានារួមមាន ក្រសួងអប់រំ អង្គការសកម្មភាពសម្រាប់ការអប់រំនៅកម្ពុជា (KAP) អង្គការ VVOB និងភាពជាដៃគូសកលសម្រាប់ការអប់រំ (GPE) ដើម្បីផលិតកម្រងធនធានបោះពុម្ព និងក្រៅអនទ្បាញ (Offline) ដើម្បីគាំទ្រដល់ការរៀនសូត្របំប៉ននេះ។ «គ្រូបង្រៀនចំនួន ២ ពាន់នាក់បានទទួលការបណ្ដុះបណ្ដាលអំពីការប្រើប្រាស់ធនធានទាំងនេះ ប៉ុន្តែជាការចាំបាច់ វាត្រូវមានការណែនាំដល់គ្រូបណ្ដុះបណ្ដាលជាច្រើននាក់បន្ថែមទៀត»។ នេះបើតាមសេចក្ដីប្រកាសព័ត៌មាន។
លោកស្រី ហ្វ័រូហ្គ ហ្វយូហ្សិថ តំណាងយូនីសេហ្វប្រចាំកម្ពុជាបានថ្លែងថា នៅក្នុងសកលលោកការបាត់បង់ការរៀនសូត្រត្រូវបានគេយល់ឃើញថា ជាផលវិបាកដ៏អាក្រក់បំផុតមួយ ក្នុងចំណោមផលវិបាកដ៏អាក្រក់បំផុត នានាដែលបង្កដោយជំងឺរាតត្បាត (កូវីដ ១៩)។ ប៉ុន្តែប្រទេសកម្ពុជា គឺជាប្រទេសមួយក្នុងចំណោមប្រទេសតិចតួច ដែលបានបង្ហាញទំហំនៃការបាត់បង់នេះជាមួយនឹងទិន្នន័យដែលអាចជឿទុកចិត្តបាន។ លោកស្រីថ្លែងថា៖ «ខ្ញុំសូមទទួលស្គាល់នូវជំហានដ៏សំខាន់ៗដែលក្រសួងអប់រំបានដាក់ចេញ ដើម្បីបង្កើតភ័ស្តុតាងយ៉ាងសំខាន់នេះសម្រាប់ផ្ដល់ជាភ័ស្តុតាង និងជាមគ្គុទ្ទេសក៍ដល់គោលនយោបាយ និងវិធានការចាំបាច់ដើម្បីផ្លាស់ប្ដូរទិសដៅនៃនិន្នាការនេះ»។
លោកស្រីបន្តថា កិច្ចការនេះរួមមានការបង្កើនការផ្ដល់រយៈពេល និងប្រសិទ្ធភាព នៃការរៀនសូត្របំប៉ននេះ។ សិស្សានុសិស្សគប្បីទទួលបានការគាំទ្រដែលចាំបាច់ ដើម្បីជួយឱ្យពួកគេតាមទាន់ការអប់រំរបស់ខ្លួន។ យើងក៏ត្រូវតែវិនិយោគច្រើនទៀតលើគណិតវិទ្យា និងចំណេះដឹងភាសាខ្មែរនៅថ្នាក់ដំបូងផងដែរ។ សិស្សានុសិស្សក្មេងៗត្រូវការមូលដ្ឋានរឹងមាំលើមុខវិជ្ជាស្នូលទាំងនេះ ដើម្បីទទួលបានលទ្ធផលកាន់តែល្អនៅថ្នាក់ក្រោយៗទៀត។ លោកស្រីបញ្ជាក់ថា៖ «សម្រាប់យូនីសេហ្វ យើងប្តេជ្ញាចិត្តផ្ដល់កិច្ចខិតខំប្រឹងប្រែងអតិបរមាជាមួយដៃគូទាំងអស់ដើម្បីជួយធ្វើឱ្យកិច្ចខិតខំប្រឹងប្រែងទាំងនេះសម្រេចបាន»៕
វីដេអូ៖
