បន្ទាយមានជ័យៈ អាជ្ញាធរខេត្តបន្ទាយមានជ័យ និងខេត្តស្រះកែវនៃប្រទេសថៃ កំពុងពិភាក្សាពីលទ្ធភាពក្នុងការបើកច្រកព្រំដែន គឺច្រកទ្វាអន្តរជាតិប៉ោយប៉ែតក្នុងកម្រិតតំបន់នាឱកាសបុណ្យចូលឆ្នាំប្រពៃណីខ្មែរ និងប្រពៃណីថៃខាងមុខនេះ។
អ្នកនាំពាក្យសាលាខេត្តបន្ទាយមានជ័យលោក សេក សុខុម ប្រាប់ភ្នំពេញ-ប៉ុស្តិ៍ថា នាពេលបច្ចុប្បន្ននេះ ច្រកទ្វារអន្តរជាតិប៉ោយប៉ែតជាប់ខេត្តស្រះកែវនេះបានបើកឱ្យដំណើរការធម្មតាសម្រាប់ការចេញចូលរថយន្តដឹកទំនិញ និងអាជីវករខ្មែរដែលលក់ដូរនៅផ្សារថៃនោះប៉ុណ្ណោះ។
លោកបន្តថា ដោយសារកម្ពុជា និងថៃមានប្រពៃណីរៀបចំបុណ្យចូលឆ្នាំថ្មីស្រដៀងគ្នា ទើបភាគីទាំង ២ ពិចារណាក្នុងការបើកច្រកព្រំដែនអន្តរជាតិនេះក្នុងកម្រិតតំបន់ដែលអនុញ្ញាតឱ្យពលរដ្ឋរស់នៅជាប់ព្រំដែនអាចចេញចូលជាធម្មតា និងបានដើរលេងកម្សាន្ត។
លោកថា៖ «ប្រទេសខ្មែរ និងថៃមានរៀបចំសង្ក្រាន្តនៅថ្ងៃចូលឆ្នាំស្រដៀងគ្នា អ៊ីចឹងថ្ងៃនោះអាចចេញចូលបាន...ខ្ញុំទៅជាមួយអាជ្ញាធរខេត្តកាលពីប៉ុន្មានថ្ងៃមុននេះ គឺខាងខេត្តបន្ទាយមានជ័យ និងខេត្តស្រះកែវបានព្រមព្រៀងគ្នាគឺអនុញ្ញាតឱ្យចេញចូលត្រឹមកម្រិតព្រំដែន ប៉ុន្តែមិនមែនទៅលេងនៅបាងកកទេ»។
លោកបានបន្តទៀតថា ជារឿយៗមុនមានការរីករាលដាលនៃជំងឺកូវីដ-១៩ ប្រជាជនដែលរស់នៅជាប់ព្រំដែននៃប្រទេសទាំង ២ តែងតែចេញដំណើរកម្សាន្តឆ្លងដែនទៅវិញទៅមកនៅពេលឱកាសបុណ្យចូលឆ្នាំថ្មីម្តងៗ។
លោកថា៖ «ឧទាហរណ៍នៅច្រកអូរ៣ជាន់ដែលមានប្រាសាទរបស់ជ័យវរ្ម័នទី ៧ គាត់កសាង ហើយនៅពេលយើងក្រោមអាណានិគមរបស់ថៃគឺប្រាសាទយើងនៅទឹកដីថៃ អ៊ីចឹងចូលឆ្នាំជាទូទៅយើងទៅលេងនៅតាមប្រាសាទនានានៅថៃ ហើយជនជាតិថៃមកលេងប្រាសាទនៅខេត្តបន្ទាយមានជ័យ»។
ទោះជាយ៉ាងណា លោកបញ្ជាក់ថា គម្រោងបើកច្រកនេះត្រឹមកម្រិតតំបន់ប៉ុណ្ណោះ ពោលអនុញ្ញាតឱ្យចេញចូលដើរលេងត្រឹមខេត្តព្រំដែនខេត្តស្រះកែវមិនអនុញ្ញាតធ្វើដំណើរទៅកាន់ទីក្រុងបាងកកនោះទេ។
បើតាមលោក សេក សុខុម ទោះបីរដ្ឋាភិបាលនៃប្រទេសទាំង ២ មិនទាន់ប្រកាសឱ្យបើកច្រកព្រំដែនជាផ្លូវការក្តី ប៉ុន្តែការរឹតបន្តឹងសម្រាប់អាជីវករមានភាពប្រសើរជាងមុនដោយមិនតម្រូវឱ្យធ្វើចត្តាឡីស័កទៀតឡើយ។
លោកបានបញ្ជាក់ថា៖ «ចំពោះពលរដ្ឋខ្មែរដែលលក់ដូរនៅព្រំដែនពីមុនមានការធ្វើចត្តាឡីស័កទាំងនៅថៃ និងខ្មែរ ប៉ុន្តែឥឡូវគ្រាន់តែមានកាតវ៉ាក់សាំងបញ្ជាក់ថា អត់មានវិជ្ជមានកូវីដយើងចូលទៅបានហើយ ប៉ុន្តែចូលរកស៊ីត្រឹមព្រំដែនទេ គេមិនឱ្យចូលបាងកកទេ»។
លោកបានបន្តថា សម្រាប់ខេត្តបន្ទាយមានជ័យបានកំណត់ជាផ្លូវការអនុញ្ញាតឱ្យពលករចូលតាមច្រកចំនួន ៣ គឺច្រកអូរ ៣ ជាន់ ច្រកបឹងត្រកួន និងច្រកម៉ាឡៃ។
លោក ង៉ោ ម៉េងជ្រួន អភិបាលរងខេត្តបន្ទាយមានជ័យបានថ្លែងថា សម្រាប់រាជរដ្ឋាភិបាលកម្ពុជានាពេលបច្ចុប្បន្នមិនបានបិទព្រំដែនទេគឺរង់ចាំតែភាគីថៃប៉ុណ្ណោះ។ លោកបន្តថា៖ «រាជរដ្ឋាភិបាលកម្ពុជារបស់យើងអត់បិទព្រំដែនទេ គឺភាគីថៃដែលគាត់អត់ទាន់មានគោលការណ៍ណាមួយជាក់លាក់ទេ ហើយអាជ្ញាធរខេត្តអត់ទាន់បានទទួលព័ត៌មានណាមួយពីភាគីថៃជាលាយលក្ខណ៍អក្សរជាផ្លូវការថាបើកនៅឡើយ»។
លោកបានបន្តថា ស្របពេលដែលរាជរដ្ឋាភិបាលកម្ពុជាប្រកាសអនុញ្ញាតឱ្យមានការរៀបចំបុណ្យចូលឆ្នាំថ្មីនោះ ពលករបានវិលត្រឡប់ចូលស្រុកមានការកើនឡើងគួរឱ្យកត់សម្គាល់។
លោកថ្លែងថា៖ «ពលករចូលតាមច្រកនានាក្នុងខេត្តបន្ទាយមានជ័យមានច្រើនជាងសព្វដង ដោយគាត់មកចូលរួមបុណ្យចូលឆ្នាំប្រពៃណីខ្មែរដែលរាជរដ្ឋាភិបាលបានបើកប្រទេសឱ្យមានការរៀបចំចូលឆ្នាំខ្មែរឡើងវិញ»។
លោក ង៉ោ ម៉េងជ្រួន បានឱ្យដឹងថា ជាមធ្យមក្នុង ១ ថ្ងៃ ពលករវិលចូលស្រុកចន្លោះពី ១៥០ ទៅ ២៥០ នាក់ ក៏ប៉ុន្តែខណៈពិធីបុណ្យឆ្នាំថ្មីកាន់តែខិតជិតមកដល់មានពលករវិលចូលស្រុកតាមខេត្តនេះ ចន្លោះពីជាង ៣០០ ឬ ៤០០ នាក់ក្នុង ១ ថ្ងៃ៕