ភ្នំពេញៈ គណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស (គ.វ.ក-១៩) ណែនាំដល់គ្រប់រាជធានី-ខេត្តទូទាំងប្រទេសឱ្យធ្វើការរៀបចំទីតាំងសម្រាប់ចាក់វ៉ាក់សាំងកូវីដ ១៩ នៅតាមតំបន់កម្សាន្តសំខាន់ៗ និងតាមទីវត្តអារាម ដើម្បីសម្រួលឱ្យប្រជាពលរដ្ឋអាចទទួលបានការចាក់វ៉ាក់សាំង ទាំងដូសមូលដ្ឋាន និងដូសជំរុញក្នុងអំឡុងពេលចូលរួមពិធីបុណ្យចូលឆ្នាំខ្មែរនេះ។
លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធាន គ.វ.ក-១៩ ឱ្យដឹងនាថ្ងៃទី ៤ មេសា ថា ចាប់ពីថ្ងៃទី ១៣-១៧ មេសា រដ្ឋបាលរាជធានី-ខេត្តទាំង ២៥ នឹងបន្ថែមទីតាំងចាក់វ៉ាក់សាំងកូវីដ ១៩ នៅតាមតំបន់កម្សាន្តសំខាន់ៗ និងវត្តអារាមនានាផងដែរ។
លោកស្រីបញ្ជាក់ថា៖ «ការដាក់ទីតាំងចាក់វ៉ាក់សាំងបន្ថែមនេះ គឺដើម្បីសម្រួលឱ្យបងប្អូន ក្មួយៗ កម្មករ កម្មការិនី អាចទទួលបានការចាក់វ៉ាក់សាំងកូវីដ ១៩ ទាំងដូសមូលដ្ឋាន និងដូសជំរុញបន្ថែមលើទីតាំងចាក់វ៉ាក់សាំងកូវីដ ១៩ ដែលកំពុងបើកដំណើរការស្រាប់នៅតាមមន្ទីរពេទ្យជាតិ មន្ទីរពេទ្យខេត្ត មន្ទីរពេទ្យបង្អែក និងមណ្ឌលសុខភាព»។
ប្រធាន គ.វ.ក-១៩ ប្រាប់ឱ្យអនុគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌរាជធានី-ខេត្ត ត្រូវធ្វើសេចក្តីជូនព័ត៌មាន និងផ្សព្វផ្សាយដល់សាធារណជនជ្រាបឱ្យបានទូលំទូលាយពីទីតាំងចាក់វ៉ាក់សាំង ដែលត្រូវរៀបចំបន្ថែមនៅតាមតំបន់កម្សាន្ត និងវត្តអារាមដែលនឹងត្រូវបើកចាក់វ៉ាក់សាំងក្នុងអំឡុងចូលឆ្នាំប្រពៃណីខ្មែរតាមកាលបរិច្ឆេទបានកំណត់។
លោកស្រី ឱ វណ្ណឌីន លើកឡើងថា៖ «គ.វ.ក-១៩ សូមអញ្ជើញ កុមារ យុវវ័យ ព្រមទាំងប្រជាពលរដ្ឋ ក៏ដូចជាកម្មករ កម្មការិនី ស្ម័គ្រចិត្តទទួលយកការចាក់វ៉ាក់សាំងកូវីដ ១៩ ដូសមូលដ្ឋាន ដូសទី ៣ ឬដូសជំរុញរួច ឬដូសទី ៤ ឱ្យបានគ្រប់គ្នានៅពេលដល់វេនចាក់ ដើម្បីបង្កើនភាពស៊ាំក្នុងសហគមន៍ សំដៅទប់ស្កាត់ការឆ្លងរីករាលដាល កាត់បន្ថយអត្រាឈឺធ្ងន់ និងអត្រាស្លាប់ ដែលបង្កដោយជំងឺកូវីដ ១៩ ក្នុងប្រទេសកម្ពុជា»។
បើយោងតាមសេចក្តីជូនព័ត៌មានរបស់ គ.វ.ក-១៩ តាមការសិក្សាស្រាវជ្រាវរកឃើញថា ភាពស៊ាំ សម្រាប់ប្រយុទ្ធប្រឆាំងនឹងវីរុសកូវីដ ១៩ របស់បុគ្គលដែលបានចាក់វ៉ាក់សាំងរួចហើយ មានការធ្លាក់ចុះជាបន្តបន្ទាប់ ក្រោយពីបានចាក់វ៉ាក់សាំងកូវីដ ១៩ ចាប់ពី ៤ ខែឡើង។ ដូចនេះ មានតម្រូវការចាំបាច់ក្នុងការចាក់វ៉ាក់សាំងកូវីដ ១៩ ដូសជំរុញជាបន្តបន្ទាប់ ទាំងដូសទី ៣ និងដូសទី ៤ សំដៅកុំឱ្យភាពស៊ាំរបស់បុគ្គលក៏ដូចជាភាពស៊ាំក្នុងសហគមន៍មានការធ្លាក់ចុះ ដែលអាចប្រឈមនឹងភាពធ្ងន់ធ្ងរ ឬស្លាប់បណ្តាលមកពីការឆ្លងរីករាលដាលនៃជំងឺកូវីដ ១៩ ឡើងវិញ។
លោកស្រី ឱ វណ្ណឌីន នៅតែក្រើនរំឭកដល់ប្រជាពលរដ្ឋទាំងអស់ថា វីរុសកូវីដ ១៩ មិនទាន់ចប់នៅឡើយទេ ដោយចំនួននៃការរកឃើញអ្នកឆ្លងវីរុសកូវីដ ១៩ នៅតែបន្តរកឃើញជារៀងរាល់ថ្ងៃនៅឡើយ គ្រាន់តែមានសភាពថយចុះជាងមុនតែប៉ុណ្ណោះ។
របាយការណ៍របស់ក្រសួងសុខាភិបាលបានឱ្យដឹងថា គិតត្រឹមថ្ងៃទី ៤ ខែ មេសា ឆ្នាំ ២០២២ លទ្ធផលចាក់វ៉ាក់សាំងនៅទូទាំងប្រទេសបានចំនួន ៩២,៧១% ធៀបនឹងចំនួនប្រជាជនសរុប ១៦ លាននាក់។ សម្រាប់អ្នកដែលបានចាក់ដូសទី៣ ឬដូសជំរុញមកដល់ពេលនេះបានជិត ៨ លាននាក់ និងអ្នកដែលបានចាក់ដូសទី៤ បានជិត ១,២ លាននាក់ផងដែរ។
គិតត្រឹមដើមខែមេសានេះ កម្ពុជាបានទទួលវ៉ាក់សាំងកូវីដ ១៩ ទាំងជំនួយពីប្រទេសជាដៃគូ និងពីការបញ្ជាទិញរបស់រាជរដ្ឋាភិបាលកម្ពុជាទទួលបានវ៉ាក់សាំងជិត ៥០ លានដូស ហើយកម្ពុជានឹងបន្តទទួលបានវ៉ាក់សាំងពីបណ្តាប្រទេសជាដៃគូមួយចំនួនទៀតជាបន្តបន្ទាប់ផងដែរ។
លោកនាយករដ្ឋមន្ត្រី ហ៊ុន សែន ធ្លាប់បានថ្លែងកាលពីចុងខែមីនាថា ប្រសិនបើមិនមានការប្រែប្រួលទេ នៅថ្ងៃទី ៦ ខែមេសានេះ វ៉ាក់សាំងជាង ១ លានដូសទៀតនឹងដឹកមកពីប្រទេសអ៊ីតាលី ហើយវ៉ាក់សាំងជាច្រើនទៀតនឹងមកជាបន្តបន្ទាប់ទៀត។ ក្នុងនោះមកពីប្រទេសប៉ូឡូញចំនួន ១ លានដូស និងពីសហរដ្ឋអាមេរិក ៧,៥ លានដូសដែលនឹងមកជាបន្តបន្ទាប់ផងដែរនៅខែមេសា ឧសភា កក្កដា និងខែកញ្ញា ឆ្នាំនេះ។
លោក ហ៊ុន សែន បានបញ្ជាក់ថា៖«អ៊ីចឹង! យើងមានវ៉ាក់សាំងគ្រប់គ្រាន់ ដើម្បីនឹងការពារប្រជាពលរដ្ឋរបស់យើងតាមរយៈដូសជំរុញ ឬដូសទី ៣ និងដូសទី ៤។ ចំនួនឆ្លងវីរុសកូវីដ-១៩ នៅក្នុងប្រទេសរបស់យើងមានការថមថយច្រើន ប៉ុន្តែក៏ត្រូវតែបន្តធ្វើការការពារ និងអនុវត្តវិធានការសុខាភិបាលផងដែរ»៕
វីដេអូ៖