.jpg)
ស្ត្រីម្នាក់បីកូនតូចដើរចេញពីមន្ទីរពេទ្យបង្អែក ខេត្តព្រះសីហនុកាលពីពេលថ្មីៗនេះ។ ហុង មិនា
ព្រះសីហនុៈ មន្ទីរពេទ្យបង្អែក ខេត្តព្រះសីហនុសហការជាមួយក្រុមគ្រូពេទ្យស្ម័គ្រចិត្តឯកទេសវះកាត់ចម្រុះជាតិសាសន៍មកពីបណ្ដាប្រទេសជាមិត្ដនានានឹងផ្ដល់ជូននូវការវះកាត់ដោយឥតគិតថ្លៃ ចំពោះជំងឺមួយចំនួនដូចជា ឆែបមាត់ក្រអូមមាត់ ពកក ក្លនលូន ដុំគីស និងជំងឺផ្សេងៗមួយចំនួនទៀត ចាប់ពីថ្ងៃទី ១៥ ដល់ថ្ងៃទី ២០ ខែឧសភា ខាងមុខ។
យោងតាមសេចក្ដីជូនដំណឹងបានឱ្យដឹងថា មន្ទីរពេទ្យបង្អែកខេត្តព្រះសីហនុបានសហការជាមួយក្រុមគ្រូពេទ្យស្ម័គ្រចិត្តឯកទេសវះកាត់ចម្រុះជាតិសាសន៍ (Medical Mission International) ដែលមកពីសហរដ្ឋអាមេរិក បារាំង កាណាដា អូស្ត្រាលី ឥណ្ឌា ហ្វីលីពីន នឹងរៀបចំកម្មវិធីវះកាត់ប្រចាំឆ្នាំ ដែលនឹងប្រព្រឹត្តទៅចាប់ពីថ្ងៃទី ១៥ ដល់ថ្ងៃទី ២០ ខែឧសភា ឆ្នាំ ២០២២ ខាងមុខ។
ជំងឺដែលក្រុមគ្រូពេទ្យទទួលពិនិត្យ និងវះកាត់ រួមមានជំងឺ ឆែបមាត់ក្រអូមមាត់ និង ពកក។ កែលម្អក្រោយការរលាក ខ្លួនប្រាណ ដៃជើង និងមុខមាត់ និងក្លនលូន។ ម្រាមដៃជើងលើស ឬជាប់គ្នា។ បូសអន្ទង់ និងអាប់សែគូទ។ ក្រួសថង់ទឹកប្រមាត់ និងផ្លូវទឹកប្រមាត់។ ដុះសាច់ច្រមុះ បំពង់ក និងដុំគីស។ គីសដៃស្បូន ដុំសាច់ស្បូន និងស្បូនស្រុត។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុ ថ្លែងថា កម្មវិធីវះកាត់ប្រចាំឆ្នាំជូនដល់ប្រជាពលរដ្ឋនេះ គឺធ្វើឡើងតាមរយៈកិច្ចសហការជាមួយក្រុមគ្រូពេទ្យស្ម័គ្រចិត្តឯកទេសវះកាត់ចម្រុះជាតិសាសន៍ ដោយការវះកាត់នេះ គឺធ្វើឡើងក្នុងក្របខណ្ឌខេត្តព្រះសីហនុ។
លោកថ្លែងថា៖ «ការវះកាត់នេះ ធ្វើឡើងដោយមិនគិតថ្លៃសម្រាប់ប្រជាពលរដ្ឋក្រីក្រ។ ដោយឡែកសម្រាប់ប្រជាពលរដ្ឋដែលមានលទ្ធភាព ក៏មានការគិតកម្រៃខ្លះដែរ ប៉ុន្ដែយកក្នុងតម្លៃសមរម្យប្រមាណ ៦៥ ម៉ឺនរៀល»។
លោក សេង ណុង ប្រធានមន្ទីរពេទ្យបង្អែកខេត្ដព្រះសីហនុថ្លែងថា ជាទូទៅ កម្មវិធីវះកាត់ប្រចាំឆ្នាំនេះ មន្ទីរពេទ្យបង្អែកខេត្ដព្រះសីហនុសហការជាមួយក្រុមគ្រូពេទ្យស្ម័គ្រចិត្តឯកទេសវះកាត់ចម្រុះជាតិសាសន៍ធ្វើឡើង ១ ឆ្នាំម្ដង។ ប៉ុន្ដែដោយសារបញ្ហានៃការរីករាលដាលនៃជំងឺកូវីដ ១៩ នៅឆ្នាំ ២០២០ និង ២០២១ ក៏បានផ្អាកការវះកាត់បណ្ដោះអាសន្ន ទើបឆ្នាំ ២០២២ នេះ ចាប់ផ្ដើមការវះកាត់ឡើងវិញ។
លោកបានឱ្យដឹងថា តាមបទពិសោធកាលពីការវះកាត់នាឆ្នាំកន្លងទៅ កម្មវិធីវះកាត់រាល់ឆ្នាំ ក្រុមគ្រូពេទ្យបានវះកាត់ដល់ប្រជាពលរដ្ឋដែលមានជំងឺប្រចាំកាយបានប្រមាណពី ៣០ ទៅ ៤០ នាក់នៅក្នុង ១ លើកៗ ដែលក្នុងនោះភាគច្រើន គឺជាប្រជាជនដែលរស់នៅក្នុងខេត្ដព្រះសីហនុ។
លោកថ្លែងថា៖ «ទោះបីមានជំងឺតិចតួចក៏គ្រូពេទ្យចម្រុះជាតិសាសន៍នេះវះកាត់ឱ្យដែរ ដូចជាករណីជំងឺដុះសាច់ ជាដើម»។
លោក សេង ណុង បានបញ្ជាក់ទៀតថា ក្រោយការជូនដំណឹងនេះ ក្រុមគ្រូពេទ្យនៃមន្ទីរពេទ្យបង្អែកខេត្តព្រះសីហនុនឹងទទួលកត់ឈ្មោះប្រជាពលរដ្ឋដែលបានទាក់ទងមកស្នើសុំវះកាត់ហើយគ្រូពេទ្យនឹងណាត់ប្រជាពលរដ្ឋទាំងនោះ មកពិនិត្យសុខភាព ពិនិត្យឈាម ដើម្បីត្រៀមសម្រាប់ការវះកាត់ និងព្យាបាល៕
