ប៉ៃលិនៈ តំណាងអយ្យការអមសាលាដំបូងខេត្តប៉ៃលិននៅថ្ងៃទី ៥ មេសា កំពុងសាកសួរបុរសសង្ស័យម្នាក់ បន្ទាប់ពីសមត្ថកិច្ចចាប់ខ្លួនបាន ៣ ថ្ងៃពាក់ព័ន្ធនឹងករណីចាប់ក្មេងស្រីជាកូនឈ្នួល ២ នាក់ អាយុ ១៤ ឆ្នាំដូចគ្នា រំលោភសេពសន្ថវៈប្រព្រឹត្តនៅឃុំ-ស្រុក- សាលាក្រៅ ខេត្តប៉ៃលិន។
លោក ពិន សុខុម អ្នកនាំពាក្យអយ្យការអមសាលាដំបូងខេត្តប៉ៃលិនឱ្យភ្នំពេញប៉ុស្ដិ៍ដឹងនៅថ្ងៃទី ៥ មេសាថា ជនសង្ស័យឈ្មោះ ជុន ប្រុស ហៅ ញ៉ាញ់ អាយុ ២៩ ឆ្នាំ កំពុងត្រូវតំណាងអយ្យការអមសាលាដំបូងខេត្តប៉ៃលិន សាកសួរតាមនីតិវិធី។ ដូច្នេះលទ្ធផលនៃសំណុំរឿងនេះនៅមិនទាន់សម្រេចថាយ៉ាងណានៅឡើយទេ។
លោកបានថ្លែងថា៖ «នៅថ្ងៃនេះ (ថ្ងៃទី ៥ មេសា) តំណាងអយ្យការទើបចាប់ផ្តើមសាកសួរជនសង្ស័យ និងកំពុងស្តាប់ចម្លើយពីសាក្សីពាក់ព័ន្ធទាំងអស់។ តំណាងអយ្យការកំពុងតែមានចំណាត់ការនីតិវិធីលើសំណុំរឿងនេះ»។
លោក កន សារុន នាយការិយាល័យប្រឆាំងការជួញដូរមនុស្ស និងការពារអនីតិជនខេត្តប៉ៃលិនប្រាប់នៅថ្ងៃទី ៥ មេសាថា ករណីនេះលោកទទួលបានរបាយការណ៍ពីនគរបាលស្រុកសាលាក្រៅរួចហើយ ប៉ុន្តែការងារនេះ លោកបានប្រគល់ឱ្យនគរបាលស្រុកសាលាក្រៅជាអ្នកកសាងសំណុំរឿងបញ្ជូនជនសង្ស័យទៅសាលាដំបូងខេត្តប៉ៃលិនផ្ទាល់។
ពាក់ព័ន្ធទៅនឹងអង្គហេតុនៃដំណើររឿងនេះ លោក មាឃ សារ៉ន អធិការនគរបាលស្រុកសាលាក្រៅបានឱ្យដឹងនៅថ្ងៃទី ៥ មេសាថា ជនសង្ស័យឈ្មោះ ជុន ប្រុស គឺជាអ្នកលក់ផលិតផលតាមអនឡាញ។
នៅក្នុងអំឡុងឆ្នាំ ២០២១ ជនសង្ស័យរូបនេះបានយកក្មេងស្រីរងគ្រោះ ២ នាក់ ត្រូវជាបងប្អូនជីដូនមួយនឹងគ្នា ដែលម្នាក់ឈ្មោះ ម.វ អាយុ ១៤ ឆ្នាំ និងម្នាក់ទៀតឈ្មោះ ណ.ប អាយុ ១៤ ឆ្នាំដូចគ្នា ឱ្យជួយលក់ដូរទំនិញតាមអនឡាញនៅនឹងផ្ទះរបស់ជនសង្ស័យផ្ទាល់។ ចាប់តាំងពីពួកគេបម្រើការងារឱ្យជនសង្ស័យមក គឺជនសង្ស័យតែងបានចាប់នាងរំលោភជាបន្តបន្ទាប់។
លោកបន្តទៀតថា លុះនៅមុនថ្ងៃទី ១ មេសា ឆ្នាំ ២០២២ ឪពុកម្តាយរបស់ក្មេងស្រីឈ្មោះ ណ.ប សង្កេតឃើញអាការរបស់កូនស្រីប្លែកក៏ហៅកូនមកសួរ ហើយក្មេងរងគ្រោះរៀបរាប់ប្រាប់តាមដំណើររឿងក៏បែកការតែម្ដងទៅ។ បន្ទាប់ពីបែកធ្លាយរឿងក្មេងស្រីឈ្មោះ ណ.ប មកក៏ត្រូវបានឪពុករបស់នាងមកប្តឹងនគរបាលប៉ុស្តិ៍សាលាក្រៅនៅរសៀលថ្ងៃដដែល ហើយគ្រួសារក្មេងស្រីម្នាក់ទៀតក៏ប្តឹងដូចគ្នាដែរនៅថ្ងៃបន្ទាប់។
លោកបានបន្ថែមថា ក្រោយពីនគរបាលប៉ុស្តិ៍ឃុំសាលាក្រៅទទួលបានបណ្តឹងពីឪពុកក្មេងស្រីឈ្មោះ ណ.ប មកក៏រាយការណ៍មកលោកជាអធិការនគរបាលស្រុកសាលាក្រៅ ហើយលោកក៏បានចាត់កម្លាំងចុះសហការជាមួយនគរបាលប៉ុស្តិ៍កោះហៅបុរសឈ្មោះ ជុន ប្រុស មកសួរនៅថ្ងៃទី ២ មេសា ហើយក៏បានឃាត់ខ្លួនគេនៅថ្ងៃនោះតែម្ដង។
លោកថ្លែងថា៖ «ជនសង្ស័យបានសារភាពនូវអ្វីដែលគេបានប្រព្រឹត្តលើក្មេងស្រីរងគ្រោះទាំង ២ នាក់មែន ហើយយើងក៏បានឃាត់ខ្លួនគាត់ និងចាត់ការតាមនីតិវិធីច្បាប់»៕