.jpg)
ជនជាប់ឃុំរង់ចាំចាក់វ៉ាក់សាំងកូវីដ ១៩ នៅពន្ធនាគារខេត្តព្រះសីហនុពីឆ្នាំ ២០២១។ រូប អគ្គនាយកដ្ឋានពន្ធនាគារ
ភ្នំពេញៈ លោក នុត សវនា អ្នកនាំពាក្យនៃអគ្គនាយកដ្ឋានពន្ធនាគារ ក្រសួងមហាផ្ទៃ បានឱ្យដឹងថា គិតត្រឹមថ្ងៃទី ៥ ខែមេសា ឆ្នាំ ២០២២ ជនជាប់ឃុំនៅតាមពន្ធនាគារនៅទូទាំងប្រទេសប្រមាណ ៣៨ ០០០ នាក់ បានទទួលការចាក់វ៉ាក់សាំងជំងឺកូវីដ ១៩ ដែលជាដូសជំរុញ (ដូសទី ៣) បានស្ទើរតែ ១០០ % ខណៈបច្ចុប្បន្ននៅតាមពន្ធនាគារនីមួយៗកំពុងតែដំណើការ និងរៀបចំត្រៀមចាក់ដូសទី ៤ បន្តទៀត។
លោក នុត សវនា ប្រាប់ភ្នំពេញប៉ុស្តិ៍នៅថ្ងៃទី ៥ ខែមេសាថា មកដល់ពេលនេះ ជនជាប់ឃុំទាំងអស់ទទួលបានការចាក់វ៉ាក់សាំងការពារជំងឺកូវីដ ១៩ ដូសជំរុញ ឬដូសទី ៣ បានគ្រប់ៗគ្នាស្ទើរ ១០០ % និងបច្ចុប្បន្ននេះជនជាប់ឃុំនៅតាមពន្ធនាគារមួយចំនួនទៀតបានចាក់ដូសទី ៤ ជាបណ្តើរៗ។ ដោយឡែកនៅតាមពន្ធនាគារមួយចំនួនកំពុងសហការជាមួយមន្ទីរសុខាភិបាលរាជធានីខេត្ត ត្រៀមសម្រាប់ចាក់ដូសទី ៤។
លោកបន្តថា បញ្ហាទាំងអស់នេះអគ្គនាយកដ្ឋានពន្ធនាគារបានបែងចែកទៅឱ្យថ្នាក់រាជធានី- ខេត្ត ជាអ្នករៀបចំសម្របសម្រួលដោយខ្លួនឯងជាមួយនឹងមន្ទីរសុខាភិបាលរាជធានីខេត្តសហការគ្នា ដើម្បីឱ្យជនជាប់ឃុំ នៅក្នុងពន្ធនាគារ នៅតាមបណ្តារាជធានីខេត្តទាំងនោះទទួលបានការចាក់វ៉ាក់សាំងដូសទី ៤ ឱ្យបានគ្រប់ៗគ្នា។
លោក នុត សវនា ថ្លែងថា៖ «អ្នកទោស យើងបានចាក់គ្រប់គ្នាហើយ ស្ទើរ ១០០ % នៅតិចបំផុត។ បច្ចុប្បន្ននេះ អត់មានការឆ្លងទេ បើមានឆ្លងមានតែអ្នកចូលថ្មី ម្នាក់ ឬ ២ នាក់ អីហ្នឹង ប៉ុន្តែយូរៗឃើញម្តង ហើយនៅពេលមាន យើងអនុវត្តតាមវិធានការរបស់ក្រសួងសុខាភិបាល។ ម្យ៉ាងទៀត កូវីដ នៅក្នុងប្រទេសយើងឥឡូវ វាដូចជាធូរស្រាយច្រើនវាលែងជាបញ្ហាអីទៀតហើយ»។ បើតាមលោក នុត សវនា តាមរយៈកិច្ចប្រជុំតាមអនឡាញក្តី និងការប្រជុំដោយផ្ទាល់ក្តី ជាមួយនឹងតំណាងអង្គការកាកបាទក្រហម និងអង្គការសហប្រជាជាតិ ដែលបានធ្វើកិច្ចការនេះបានវាយតម្លៃខ្ពស់ ចំពោះកម្ពុជា និងចាត់ទុកកម្ពុជាជាប្រទេសទី ១ នៅលើពិភពលោក ដែលផ្តល់ការចាក់វ៉ាក់សាំងការពារជំងឺកូវីដ ១៩ ជូនដល់ជនជាប់ឃុំ។
លោកថ្លែងថា៖ «វាពិសេសណាស់ ដែលអន្តរជាតិបានវាយតម្លៃមកលើយើង។ សូម្បីតែអត្រាស្លាប់ និងអត្រាឆ្លងនៅក្នុងពន្ធនាគារ ក៏យើងមានកម្រិតតិចតួច បើធៀបជាមួយនឹងប្រទេសជិតខាង និងប្រទេសដទៃទៀតនៅលើពិភពលោក។ ម្យ៉ាងយើងអាចគ្រប់គ្រងជំងឺកូវីដ ១៩ បានល្អ។ បើទោះបីកម្ពុជាជាប្រទេសតូចតាចមែនកិច្ចការផ្សេងៗយើងធ្វើបានល្អ»។
លោក អំ សំអាត នាយករងអង្គការសិទ្ធិមនុស្សលីកាដូបានទទួលស្គាល់ចំពោះការយកចិត្តទុកដាក់ខ្ពស់របស់រាជរដ្ឋាភិបាលក្នុងការចាក់វ៉ាក់សាំងការពារការឆ្លងជំងឺកូវីដ ១៩ សម្រាប់ជនជាប់ឃុំ ដែលនេះ វាជាវិធានការចាំបាច់បំផុតដែលត្រូវធ្វើ ព្រោះនៅក្នុងពន្ធនាគារនៅក្នុងប្រទេសកម្ពុជាបច្ចុប្បន្ននេះ មានភាពចង្អៀតណែនច្រើន ដែលធ្វើឱ្យប៉ះពាល់ទៅនឹងសុខភាពអនាម័យ ជំងឺឆ្លង និងជាពិសេសគឺជំងឺកូវីដ ១៩ នេះ ដែលអាចឆ្លងនៅក្នុងពន្ធនាគារ។
លោកបន្តថា បើមិនមានវិធានការទប់ស្កាត់ ឬចាក់វ៉ាក់សាំងបានទាន់ពេលវេលាទេ វានឹងអាចឆ្លងលឿន និងមិនអាចគ្រប់គ្រងបាន។ ដូច្នេះការទទួលបានការចាក់វ៉ាក់សាំងដោយស្ម័គ្រចិត្តពីជនជាប់ឃុំ គឺជារឿងចាំបាច់បំផុត ប៉ុន្តែការធ្វើនិងទប់ស្កាត់ប៉ុណ្ណេះ វាមិនទាន់អាចឆ្លើយតបបានទាំងស្រុងនោះទេ អ្វីដែលជាវិធានការចាំបាច់ដែលត្រូវធ្វើបំផុត គឺការកាត់បន្ថយការចង្អៀតណែននៅក្នុងពន្ធនាគារ ដើម្បីកុំឱ្យមានការឆ្លងនូវជំងឺផ្សេងៗ រក្សាបាននូវសន្តិសុខ អនាម័យ និងសុខភាព។
លោកថ្លែងថា៖ «បើទោះបីកន្លងមក រាជរដ្ឋាភិបាលបានគិតគូររួចហើយ ដូចជាក្រសួងយុត្តិធម៌ ពន្លឿននីតិវិធីនៅតុលាការហើយចេញជាគោលការណ៍ណែនាំដោះលែងអ្នកទោស ដែលជិតផុតទោសដោយមិនមានលក្ខខណ្ឌ ហើយចេញជាគណៈកម្មការតាមដាន និងដោះលែងអ្នកទោសក៏ដោយ ប៉ុន្តែដំណើរការមិនទាន់អនុវត្តនៅឡើយ»៕
