.jpg)
អ្នកស្ម័គ្រចិត្តផ្ដល់ឈាមនាពេលកន្លងមក។ ហុង មិនា
ភ្នំពេញៈ ក្រសួងសុខាភិបាលត្រៀមឈាមប្រមាណ ១ ពាន់ប្លោក ដើម្បីជួយសង្គ្រោះបន្ទាន់ដល់អ្នកជំងឺ និងជនរងគ្រោះដោយករណីគ្រោះថ្នាក់ផ្សេងៗទៀត ក្នុងអំឡុងពេលបុណ្យចូលឆ្នាំថ្មីខាងមុខនេះ ជាពិសេសជនរងគ្រោះដោយករណីគ្រោះថ្នាក់ចរាចរណ៍។ ប៉ុន្តែបច្ចុប្បន្ន ឈាមនៅក្នុងស្តុកមានប្រមាណ ៥០០ ប្លោកប៉ុណ្ណោះ។ នេះបើតាមប្រសាសន៍លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម កាលពីថ្ងៃទី ៥ ខែមេសា។
លោកបានប្រាប់ភ្នំពេញប៉ុស្តិ៍ថា នៅឆ្នាំនេះរាជរដ្ឋាភិបាលបានបើកឱ្យមានការរៀបចំពិធីបុណ្យចូលឆ្នាំឡើងវិញ បន្ទាប់ពីបានផ្អាកអស់ ២ ឆ្នាំដោយសារការរាតត្បាតនៃជំងឺកូវីដ ១៩។ ហេតុដូច្នេះ ប្រជាពលរដ្ឋអាចនឹងធ្វើដំណើរទៅជួបជុំក្រុមគ្រួសារ សាច់ញាតិនៅឯស្រុកកំណើតតាមបណ្ដាខេត្តនានា ឬ ទៅកម្សាន្តនៅតាមទីរមណីយដ្ឋាននានាច្រើនជាងបណ្ដាឆ្នាំមុនៗ។
តាមការកត់សម្គាល់របស់លោកក្នុងអំឡុងពេលបុណ្យចូលឆ្នាំថ្មី ចរាចរណ៍នៅលើដងផ្លូវមានភាពចង្អៀតណែនតាន់តាប់ និងមានអត្រាគ្រោះថ្នាក់ខ្ពស់ជាងថ្ងៃធម្មតា ដែលតម្រូវឱ្យមានការត្រៀមបម្រុងឈាមឱ្យបានគ្រប់គ្រាន់សម្រាប់ការជួយសង្គ្រោះជីវិតជនរងគ្រោះ។
លោកបានបញ្ជាក់ថា៖ «ដើម្បីឆ្លើយតបកិច្ចការជួយសង្គ្រោះបន្ទាន់ដល់អ្នកជំងឺ និងជនរងគ្រោះដោយករណីគ្រោះថ្នាក់ចរាចរណ៍ ក្នុងអំឡុងពេលបុណ្យចូលឆ្នាំថ្មីខាងមុខនេះ យើងត្រូវការឈាមចំនួន ១ ០០០ ប្លោក សម្រាប់បែងចែកដល់មន្ទីរពេទ្យនៅទូទាំងប្រទេស។ ប៉ុន្តែបច្ចុប្បន្ន មជ្ឈមណ្ឌលជាតិផ្ដល់ឈាមរបស់យើងមានឈាមនៅក្នុងស្តុក ប្រមាណ ៥០០ ប្លោកប៉ុណ្ណោះ»។
បើតាមប្រសាសន៍លោក សុខ ប៉ូ ចំនួននេះនឹងមិនអាចឆ្លើយតបទៅតាមតម្រូវការជាក់ស្ដែង សម្រាប់ការជួយសង្គ្រោះជីវិតជនរងគ្រោះនោះទេ។ ដើម្បីទទួលបានឈាមគម្រប់ ១ ០០០ ប្លោកតាមការគ្រោងទុកនោះមជ្ឈមណ្ឌលជាតិផ្ដល់ឈាម គ្រោងនឹងរៀបចំព្រឹត្តិការណ៍ដ៏មានសារៈសំខាន់មួយនៅថ្ងៃទី ៨ ខែមេសា ខាងមុខនេះ ដើម្បីកៀរគរសាធារណជនមកចូលរួមបរិច្ចាគឈាម ជួយសង្គ្រោះជីវិតជនរងគ្រោះ។ កម្មវិធីនេះនឹងត្រូវធ្វើឡើងពេញ ១ ថ្ងៃនៅមន្ទីរពេទ្យកាល់ម៉ែត ដោយចាប់ផ្ដើមពីម៉ោង ៩ ព្រឹក ដល់ម៉ោង ៤ រសៀល និងមានឧបត្ថម្ភគាំទ្រពីក្រុមហ៊ុនទឹកបរិសុទ្ធ Vital។
លោកបានបន្តថា ឈាមដែលទទួលបានពីការបរិច្ចាគរបស់សប្បុរសជននៅក្នុងព្រឹត្តិការណ៍នេះ នឹងយកទៅបែងចែកទៅតាមមន្ទីរពេទ្យនានានៅទូទាំងប្រទេស ក្នុងនោះនៅរាជធានី-ភ្នំពេញត្រៀមផ្ដល់ជូនប្រមាណ ៥០០ ប្លោកខេត្តបាត់ដំបង ខេត្តសៀមរាប ខេត្តតាកែវ និងខេត្តកំពង់ចាម ដែលមានធនាគារឈាមត្រៀមផ្ដល់ជូនក្នុងមួយខេត្តៗចំនួន ១០០ ប្លោក។ ចំណែកខេត្តផ្សេងៗទៀតក៏បានត្រៀមឈាមនៅតាមមន្ទីរពេទ្យខេត្តរបស់ខ្លួនប្រមាណ ២០ ប្លោកផងដែរ។ ក្នុងករណីមានតម្រូវការឈាមច្រើនខេត្តទាំងអស់អាចស្នើសុំមកខេត្តទាំង៤ខាងលើឬមកមជ្ឈមណ្ឌលជាតិផ្តល់ឈាម ដើម្បីឱ្យមន្ទីរពេទ្យមានលទ្ធភាពគ្រប់គ្រាន់ក្នុងការជួយសង្គ្រោះដល់អ្នកជំងឺ និងជនរងគ្រោះឱ្យបានទាន់ពេលវេលា។
ទន្ទឹមជាមួយគ្នានេះ លោកបានអំពាវនាវដល់សប្បុរសជន ដែលមានសុខភាពល្អ ចូលរួមបរិច្ចាគឈាមឱ្យបានគ្រប់គ្នានៅថ្ងៃទី ៨ ខែមេសា ខាងមុខនេះ ដោយឈរលើស្មារតីរួបរួមសាមគ្គីភាព និង មនុស្សធម៌ ព្រោះការបរិច្ចាគឈាមគឺជាសកម្មភាពមនុស្សធម៌មួយប្រភេទក្នុងការជួយសង្គ្រោះអាយុជីវិតមនុស្ស។ សម្រាប់ជនរងគ្រោះដែលត្រូវការឈាមការបរិច្ចាគឈាមគឺពិតជាសំខាន់ណាស់ ព្រោះវាអាចជួយសង្គ្រោះជីវិតពួកគេបាន។
លោក សុខ ប៉ូ បានបញ្ជាក់ទៀតថា៖ «ឈាមមិនអាចផលិតនៅតាមរោងចក្រ សហគ្រាសផលិតឱសថ ឬគ្រឹះស្ថានបច្ចេកទេសវិទ្យាសាស្ត្រណាមួយបានឡើយ។ ការទទួលបានឈាមសុវត្ថិភាពសម្រាប់ជួយសង្គ្រោះជីវិតជនរងគ្រោះ គឺបានមកអាស្រ័យដោយមានការបរិច្ចាគពីមនុស្សដែលមានសុខភាពល្អតែប៉ុណ្ណោះ»។
ព្រមជាមួយគ្នានេះ លោកបានក្រើនរំឭកដល់ពលរដ្ឋទាំងអស់ឱ្យបង្កើនការប្រុងប្រយ័ត្នអំពីសុវត្ថិភាពនៃការធ្វើដំណើរ តាមគ្រប់មធ្យោបាយទាំងអស់ ដោយត្រូវគោរពអនុវត្តច្បាប់ចរាចរណ៍ទាំងអស់គ្នា ធ្វើយ៉ាងណាកាត់បន្ថយនូវអត្រាគ្រោះថ្នាក់ចរាចរណ៍ឱ្យបានជាអប្បបរមា និងត្រូវអនុវត្តឱ្យបានជាប់ជាប្រចាំនូវវិធានការ ៣ កុំ ៣ ការពារ ដើម្បីបង្ការទប់ស្កាត់ការឆ្លងរីករាលដាលនៃជំងឺកូវីដ ១៩។
យោងតាមរបាយការណ៍ អគ្គស្នងការនគរបាលជាតិ គ្រោះថ្នាក់ ចរាចរណ៍នៅទូទាំងប្រទេស កាលថ្ងៃទី ៤ ខែមេសា បានបណ្ដាលឱ្យមានជនរងគ្រោះ ១៥ នាក់ស្លាប់ និង ១១ នាក់ទៀតរងរបួសធ្ងន់ និងស្រាល ព្រមទាំងខូចខាតយានយន្ត និងទ្រព្យសម្បត្តិជាច្រើនទៀត។ នេះជាអត្រាស្លាប់ និងរងរបួសដ៏ខ្ពស់បំផុតចាប់តាំងពីរាជរដ្ឋាភិបាលបានប្រកាសបើកប្រទេសឡើងវិញ ក្រោយពីស្ថានភាពជំងឺកូវីដ-១៩ មានភាពធូរស្រាល។
បច្ចុប្បន្ន កម្ពុជា មានតម្រូវការឈាមនៅទូទាំងព្រះរាជាណាចក្រកម្ពុជា សម្រាប់ជួយសង្គ្រោះជនរងគ្រោះមានការកើនឡើងពី ២៥០ ទៅ ៣០០ ប្លោកក្នុង ១ ថ្ងៃខណៈការបរិច្ចាគឈាមដោយស្ម័គ្រចិត្តមានត្រឹម ១០ ភាគរយប៉ុណ្ណោះ។ នេះយោងតាមរបាយការណ៍របស់មជ្ឈមណ្ឌលជាតិផ្ដល់ឈាម៕
