.jpg)
សកម្មភាពគ្រូតឿនៅការិយាល័យនគរបាល និងពេលសម្ដែង។ រូបថត នគរបាល
កណ្ដាលៈ នគរបាលស្រុកខ្សាច់កណ្តាលនៅថ្ងៃទី ៥ មេសាបាន កោះហៅ បុរសតឿម្នាក់មកធ្វើកិច្ចសន្យាជាមួយសមត្ថកិច្ចបញ្ឈប់សកម្មភាពថតបង្ហាញ ការប្រើប្រាស់មន្តអាគមបង្ហោះនៅលើហ្វេសប៊ុក ដោយសមត្ថកិច្ចអះអាងថា ជាសកម្មភាពបោកប្រាស់សាធារណជន និងត្រូវសុំទោសជាសាធារណៈ។
បុរសម្នាក់នេះបានបង្ហាញសកម្មភាពអួតអាងចេះប្រើកម្លាំងធាតុ ចេះជប់ដើមត្រប់ឱ្យចេញមកជាពងទា និងប្រើវេទមន្តស៊ីអាចម៍គោ ស៊ីដែកម៉ូតូ និងរឿងប្លែកៗមួយចំនួនទៀតបង្ហោះតាមបណ្តាញទំនាក់ទំនងសង្គមហ្វេសប៊ុកជាភាគបន្តបន្ទាប់។
លោក មែន សុឃឿន អធិការនគរបាលស្រុកខ្សាច់កណ្តាលប្រាប់ភ្នំពេញប៉ុស្តិ៍នៅថ្ងៃទី ៥ មេសាថា បុរសឈ្មោះ ជឹម ភ័ក្រ អាយុ ២៧ ឆ្នាំ នៅថ្ងៃទី ៥ មេសាត្រូវបានសមត្ថកិច្ចរបស់លោកកោះហៅសាកសួរ និងឱ្យធ្វើកិច្ចសន្យាឈប់ដើរបោកប្រាស់ប្រជាពលរដ្ឋតទៅទៀត។
លោកថ្លែងថា៖ «យើងមិនបានឃាត់ខ្លួនគាត់ទេតែគ្រាន់អប់រំណែនាំឱ្យគាត់ឈប់ធ្វើសកម្មភាពនេះតទៅទៀត។ យើងឱ្យគាត់ផ្តិតមេដៃធ្វើកិច្ចសន្យា និងធ្វើការសុំទោសប្រជាពលរដ្ឋជាសាធាណៈទៅ»។
លោក ម៉េង ឆៀងហេង មេឃុំវិហារសួគ៌ ថ្លែងថា បុរសឈ្មោះ ជឹម ភ័ក្រ អាយុ ២៧ ឆ្នាំ ជាជាងបិទស្កុតម៉ូតូ រស់នៅភូមិសេដា ឃុំ វិហារសួគ៌ ស្រុក ខ្សាច់កណ្តាល ខេត្តកណ្តាល។ គាត់មានប្រពន្ធ ២ នាក់ តែប្រពន្ធទី ១ មានកូនតូចម្នាក់បានលែងលះគ្នាហើយ បន្ទាប់មកគាត់ដណ្តឹងស្ត្រីម្នាក់ទៀតធ្វើប្រពន្ធតែមិនទាន់មានកូនទេ។
លោកបានបន្តថា នៅថ្ងៃទី ៥ មេសា គាត់ត្រូវបានសមត្ថកិច្ចស្រុកខ្សាច់កណ្តាល កោះហៅទៅណែនាំ និងធ្វើការអប់រំកុំឱ្យឃោសនាតាមបណ្តាញទំនាក់ទំនងសង្គមតទៅទៀត។ ព្រោះថា សកម្មភាពរបស់គាត់ថត និងនាំគ្នីគ្នាគាត់ស៊ីអាចម៍គោហើយបង្ហោះតាមបណ្តាញសង្គមបែបនេះវាធ្វើឱ្យប៉ះពាល់ដល់សណ្ដាប់ធ្នាប់សន្ដិសុខសង្គម។
តាមលោក ឆៀងហេង ការពិតទៅរូបភាពវីដេអូរបស់គាត់ជាមួយយុវជន ៣ នាក់ទៀតថតស៊ីអាចម៍គោនោះមិនមែនជាអាចម៍គោពិតប្រាកដក្តី ក៏ប៉ុន្តែតាមរយៈសកម្មភាពនោះអាចធ្វើឱ្យអ្នកចូលមើលក្នុងឃ្លីបវីដេអូរបស់គាត់មានការភាន់ច្រឡំ។ ម្យ៉ាងវិញទៀតធ្វើឱ្យប៉ះពាល់សណ្តាប់ធ្នាប់សង្គមផង។
លោកបញ្ជាក់ថា៖ «បើតាមមន្ត្រីខ្ញុំបើកឃ្លីបវីដេអូគាត់ឱ្យខ្ញុំមើល ខ្ញុំឃើញគេខមម៉ិនសួរថាគ្រូតឿរស់នៅភូមិណាគេចង់មកជួបមុខគាត់ផ្ទាល់។ រឿងនេះគាត់ធ្វើឱ្យប៉ះពាល់ដល់កិត្តិយសប្រជាពលរដ្ឋក្នុងភូមិទាំងមូល»។
លោក ឃុយ ពង់ មេភូមិសេដា និយាយនៅថ្ងៃទី ៥ មេសា ថា បើតាមការសាកសួរព័ត៌មានពីប្រជាពលរដ្ឋ និងតាមរយៈការឆែកមើលនៅក្នុងខមម៉ិនក្នុងផេចរបស់បុរសឈ្មោះ ជឹម ភ័ក្រ ម្នាក់នេះ គឺទាំងប្រជាពលរដ្ឋរស់នៅក្នុងភូមិសេដា និងទាំងអ្នកចូលខមមិនពួកគេសុទ្ធតែមិនសប្បាយចិត្តនឹងការសម្តែងភូតកុហករបស់គាត់។
លោកបញ្ជាក់ថា៖ «គាត់កុហកមហាជនដែលមានសកម្មភាពខ្លះរហូតជបឱ្យក្លាយជាអ្វីផ្សេងៗដែលវេទមន្តរបស់ខ្មែរយើងមិនដល់ថ្នាក់ហ្នឹងទេ គាត់ចេះតែធ្វើតាមអំពើចិត្ត។ អ្នកស្រុកអ្នកភូមិគេចេះតែប្តឹងខ្ញុំដែរហ្នឹង ដោយសារអ្វីដែលគាត់រួមនឹងគ្នីគ្នាគាត់សម្តែងគឺគ្មានការពិតនោះទេ»៕
