សៀមរាបៈ ក្នុងកិច្ចការពារ និងអភិរក្សបរិស្ថានបឹងទន្លេសាប រាជរដ្ឋាភិបាលតាមរយៈក្រសួងស្ថាប័នជំនាញបានធ្វើការដកហូតដីព្រៃលិចទឹកនៅតំបន់ ៣ ជុំវិញបឹងទន្លេសាបជាង ៨៧ ពាន់ហិកតា នៅក្នុងខេត្តចំនួន ៦ រួមមានខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ធំ និងខេត្តសៀមរាប ព្រមទាំងឱ្យអាជ្ញាធរមូលដ្ឋាន សហការដាំដើមឈើឡើងវិញ ដើម្បីការពារបរិស្ថានផង និងការពារជម្រកត្រីពងកូនផង។
យោងតាមរបាយការណ៍របស់រដ្ឋបាលជលផល ដែលភ្នំពេញ-ប៉ុស្តិ៍ទទួលបាន មកទល់ពេលនេះ អាជ្ញាធរខេត្តទាំង ៦ ជុំវិញបឹងទន្លេសាប មានសួនបណ្តុះកូនឈើចំនួន ៧ កន្លែង និងបានបណ្តុះកូនឈើចំនួន ១ សែនដើម និងបាននាំយកកូនឈើទាំងនោះទៅដាំនៅលើដីដែលបានដកហូតជាបណ្តើរៗហើយ។ ក្នុងនោះអាជ្ញាធរខេត្តសៀមរាបបានដាំឫស្សីបានចំនួន ២០០ ដើម កូនត្នោត ៣៥ ដើម កប់គ្រាប់ត្នោតបាន ៧៣ ៦៧៦ គ្រាប់ និងកូនឈើព្រៃលិចទឹកបាន ៥ ៣០០ ដើម លើផ្ទៃដី ដែលដកហូតមកវិញចំនួនជាង ៣ ៣០០ ហិកតា។
ក្នុងដំណើរចុះសួរសុខទុក្ខ ក្រុមការងារបង្ក្រាបបទល្មើសជលផលនៅបឹងទន្លេសាបកាលពីថ្ងៃចុងសប្ដាហ៍លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ រួមទាំងសហការីក៏បានអញ្ជើញទៅពិនិត្យស្ថានីយបណ្តុះកូនឈើព្រៃលិចទឹករបស់ខណ្ឌរដ្ឋបាលជលផលសៀនរាន ស្ថិតនៅភូមិគោករុន ឃុំសសរស្តម្ភ ស្រុកពួក ខេត្តសៀមរាប ដើម្បីលើកទឹកចិត្តដល់មន្ត្រីនៅទីនោះផងដែរ។
នៅក្នុងឱកាសនោះ លោក ពីង ឆុង ប្រធានសហគមន៍នេសាទសសរស្តម្ភ បានធ្វើសេចក្ដីរាយការណ៍ពីលទ្ធផលការងារបណ្តុះកូនឈើព្រៃលិចទឹកជូនដល់លោករដ្ឋមន្ត្រី ដោយលើកឡើងថា សហគមន៍បានបណ្តុះកូនឈើប្រភេទដើមរាំង រំដេញ ច្រកែង ផ្គោល និងដើមកន្សែង សរុបបានចំនួន ៥ ម៉ឺនកូន។ ទន្ទឹមនឹងនេះ សហគមន៍បានដាំកូនឈើព្រៃលិចទឹកទាំងនោះចាប់តាំងពីឆ្នាំ ២០២០ មកដល់ពេលនេះ សម្រេចបានចំនួន ៧០ ហិកតា។
ថ្វីបើដូច្នេះក្ដី លោក ឆុង បានត្អូញត្អែរអំពីការលំបាកមួយចំនួនរបស់សហគមន៍ដល់លោករដ្ឋមន្ត្រីផងដែរថា៖ «ទន្ទឹមនឹងភាពជោគជ័យនេះ សហគមន៍ក៏មានបញ្ហាប្រឈមមួយចំនួនផងដែរ ដូចជាខ្វះមធ្យោបាយធ្វើដំណើរទាំងក្នុងទឹក និងលើគោក សម្រាប់ធ្វើការងារល្បាតពិនិត្យមើលបទល្មើសក្នុងដែនសហគមន៍ ខ្វះប្រេងឥន្ធន: និងថវិកាសម្រាប់ធ្វើការពង្រីកការងារដាំ និងបណ្តុះកូនឈើ»។
ក្រោយពីបានស្ដាប់នូវរបាយការណ៍របស់លោក ពីង ឆុងអំពីវឌ្ឍនភាព និងបញ្ហាប្រឈមរបស់សហគមន៍នេសាទសសរស្តម្ភរួចមក លោក វេង សាខុន បានណែនាំឱ្យសហគមន៍ និង រដ្ឋបាលជលផល រួមទាំងមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ត្រូវបង្កើនការយកចិត្តទុកដាក់លើការងារបណ្តុះកូនឈើលិចទឹកឱ្យបានច្រើនបន្ថែមទៀត ដើម្បីយកទៅដាំលើដីដែលដកហូតបានពីបទល្មើសនៃការកាប់ទន្ទ្រាន ឈូសឆាយដីព្រៃលិចទឹកខុសច្បាប់នោះឡើងវិញ។
លោករដ្ឋមន្ត្រីបានថ្លែងដោយជំរុញយ៉ាងដូច្នេះថា៖ «ទន្ទឹមនឹងនេះរដ្ឋបាលជលផលត្រូវខិតខំស្វែងរកដៃគូបន្ថែម ដើម្បីជួយដល់ការងារអភិវឌ្ឍន៍សហគមន៍នេសាទទាំងលើការងារបច្ចេកទេសការងារល្បាត សួនបណ្តុះកូនឈើ ការបង្ក្រាបបទល្មើស និងវារីវប្បកម្ម»។
បន្ទាប់ពីបានផ្ដល់ការណែនាំរួចលោករដ្ឋមន្ត្រីក៏បានឧបត្ថម្ភប្រេងឥន្ធនៈ ២០០ លីត្រ និងថវិកា ៤០ ម៉ឺនរៀលដល់សហគមន៍នេះ ដើម្បីទុកដោះស្រាយជីវភាពសម្រាប់អ្នកប្រចាំការក្នុងសួនបណ្ដុះកូនឈើ។
ដោយឡែករដ្ឋបាលខេត្តពោធិ៍សាត់កាលពីថ្ងៃទី ១ ខែមេសា បានបង្កើតអនុគណៈកម្មការ និងក្រុមការងារចុះទប់ស្កាត់ និងបង្ក្រាបបទល្មើសជលផល នៅតាមតំបន់ព្រៃលិចទឹក និងបឹងទន្លេសាបក្នុងភូមិសាស្ត្រខេត្តពោធិ៍សាត់។
លោក ជាវ តាយ អភិបាលខេត្តពោធិ៍សាត់ និងជាប្រធានអនុគណៈកម្មការនេះបញ្ជាក់ថា អនុគណៈកម្មការនេះមានតួនាទី និងភារកិច្ចដឹកនាំការងាររួមចុះពិនិត្យ និងស្រាវជ្រាវទប់ស្កាត់ បទល្មើសជលផល ដែលប្រើប្រាស់ឧបករណ៍នេសាទខុសច្បាប់គ្រប់ប្រភេទ នៅក្នុងដែនសមត្ថកិច្ចរបស់ខ្លួន។
លោកបានថ្លែងថា៖ «ក្រៅពីការងារចុះត្រួតពិនិត្យស្រាវជ្រាវស្រង់ស្ថិតិអំពីបទល្មើសនេសាទ និងការដកហូតឧបករណ៍រួមទាំងមធ្យោបាយនេសាទ នៅតាមខ្នងផ្ទះប្រជានេសាទនីមួយៗ អនុគណៈកម្មការនេះ ក៏មានតួនាទី និងភារកិច្ច ចុះផ្សព្វផ្សាយច្បាប់ដកហូតការលក់ឧបករណ៍ និងមធ្យោបាយនេសាទខុសច្បាប់ ចុះត្រួតពិនិត្យការទិញ-លក់ផលនេសាទ នៅតំបន់ព្រៃលិចទឹក និងស្រាវជ្រាវកំណត់មុខសញ្ញាជនប្រព្រឹត្តបទល្មើសជលផល និងកសាងសំណុំរឿង បញ្ជូនទៅតុលាការតាមនីតិវិធីច្បាប់»។ លោកបន្តថា ទន្ទឹមនឹងបង្កើតអនុគណៈកម្មការនេះ រដ្ឋបាលខេត្តពោធិ៍សាត់ក៏បានបង្កើតក្រុមការងារចំនួន ៣ ដើម្បីចុះស្រាវជ្រាវទប់ស្កាត់ និងបង្ក្រាបបទល្មើសជលផលក្នុងតំបន់ព្រៃលិចទឹក បឹងទន្លេសាបនៅក្នុងស្រុកក្រគរ ស្រុកកណ្ដៀង និងស្រុកបាកាន ដោយបានបង្កើតស្នាក់ការនៅក្នុងតំបន់ព្រៃលិចទឹកទាំង ៣ ស្រុក សម្រាប់ក្រុមការងារប្រចាំការឃ្លាំមើល និងបង្ក្រាបបទល្មើសបានទាន់ពេលវេលា៕