ភ្នំពេញៈ ក្រសួងកសិកម្មរុក្ខាប្រមាញ់និងនេសាទ បានដាក់ចេញវិធានការចាំបាច់មួយចំនួន ដើម្បីឲ្យអាជ្ញាធរថ្នាក់ក្រោមជាតិអនុវត្តក្នុងការស្រាវជ្រាវ និងបង្ក្រាបបទល្មើសធនធានធម្មជាតិក្នុងដែនសមត្ថកិច្ចរបស់ខ្លួនប្រកបដោយប្រសិទ្ធភាព។
យោងសេចក្ដីជូនដំណឹងស្តីពី«វិធានការពង្រឹង ទប់ស្កាត់និងបង្ក្រាបបទល្មើសព្រៃឈើ សត្វព្រៃ និងជលផល» ចុះថ្ងៃទី៥ ខែមេសា ឆ្នាំ២០២២ លោក វេង សាខុន រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទបានណែនាំ និងជំរុញឲ្យរដ្ឋបាលថ្នាក់ក្រោមជាតិបង្កើនការស្រាវជ្រាវនិងបង្ក្រាបជាបន្ទាន់នូវបទល្មើសធនធានធម្មជាតិក្នុងដែនសមត្ថកិច្ចរៀងៗខ្លួនឲ្យបានជាប់ជាប្រចាំ ដើម្បីកុំឲ្យបទល្មើសទាំងនោះរីករាលដាលកាន់តែធំ ។
ទន្ទឹមនឹងនេះលោកបានដាក់ចេញនូវវិធានការ៤ចំណុចដើម្បីជំរុញឲ្យរដ្ឋបាលថ្នាក់ក្រោមជាតិអនុវត្តឲ្យមានប្រសិទ្ធភាពដែលក្នុងនោះរដ្ឋបាលថ្នាក់ក្រោមជាតិត្រូវដឹកនាំនិងសម្របសម្រួលកម្លាំងមានសមត្ថកិច្ចពាក់ព័ន្ធដើម្បីធានាបាននូវការប្រើប្រាស់កម្លាំងសរុបនិងមធ្យោបាយចាំបាច់នានាក្នុងការថែរក្សាការពារធនធានព្រៃឈើ សត្វព្រៃនិងធនធានជលផលក្នុងដែនសមត្ថកិច្ចរបស់ខ្លួនប្រកបដោយឆន្ទៈម្ចាស់ការនិងស្មារតីទទួលខុសត្រូវ។
ជាពិសេសត្រូវទប់ស្កាត់ការកាប់រាន ដុត ឈូសឆាយនិងហ៊ុមព័ន្ធដីព្រៃឈើនិងដីព្រៃលិចទឹកដោយចាត់វិធានការគ្រប់គ្រង ត្រួតពិនិត្យនូវការធ្វើសន្និធិ ការធ្វើចរាចរណ៍និងការកែច្នៃផលអនុផលព្រៃឈើគ្រប់ប្រភេទព្រមទាំងទប់ស្កាត់និងបង្ក្រាបបទល្មើសជលផលគ្រប់ប្រភេទផងដែរ។
លោកបានបញ្ជាក់ថា៖«ក្នុងករណីប្រទះឃើញបទល្មើសជាក់ស្ដែងត្រូវចាត់វិធានការទប់ស្កាត់និងបង្ក្រាបជាបន្ទាន់តាមដែនសមត្ថកិច្ចរៀងៗខ្លួន ចៀសវាងទុកឲ្យបទល្មើសទាំងនោះរីករាលដាលកាន់តែធំនិងពិបាកក្នុងការដោះស្រាយ។ប្រសិនបើបទល្មើសមានទ្រង់ទ្រាយធំមានលក្ខណៈស្មុគស្មាញ ត្រូវរាយការណ៍និងសុំអន្ដរាគមន៍ជាបន្ទាន់មកក្រសួង-ស្ថាប័ននៅថ្នាក់ជាតិ ដើម្បីមានវិធានការនិងរួមគ្នាដោះស្រាយតាមនីតិវិធីជាធរមាន»។
លើសពីនេះលោករដ្ឋមន្ដ្រីបានលើកឡើងទៀតថា ក្នុងករណីមានបទល្មើសធ្ងន់ធ្ងរក្រសួង-ស្ថាប័នថ្នាក់ជាតិនឹងចាត់ថ្នាក់ដឹកនាំរួមជាមួយអង្គភាពជំនាញចុះសហការជាមួយរដ្ឋបាលថ្នាក់ក្រោមជាតិដើម្បីចាត់វិធានការទប់ស្កាត់ និងបង្ក្រាបឲ្យបានទាន់ពេលវេលា។
ជុំវិញករណីនេះ លោក ងួន រតនៈ អភិបាលខេត្តកំពង់ធំបានប្រាប់ភ្នំពេញប៉ុស្តិ៍ថា រដ្ឋបាលខេត្តបានបង្កើតអនុគណៈកម្មការត្រួតពិនិត្យ ស្រាវជ្រាវ និងបង្ក្រាបបទល្មើសព្រៃឈើ សត្វព្រៃនិងជលផល ព្រមទាំងក្រុមការងារ ចុះផ្សព្វផ្សាយពីវិធានការនេះរួចរាល់ហើយ។
លោកបានបន្តថា៖«បច្ចុប្បន្នក្រុមការងារកំពុងបន្តចុះស្រង់ស្ថិតិនិងប្រមូលទិន្នន័យប្រជាពលរដ្ឋដែលប្រើប្រាស់ឧបករណ៍នេសាទខុសច្បាប់ដើម្បីធ្វើការដកហូតនិងបន្តស្រាវជ្រាវកំណត់មុខសញ្ញាជនប្រព្រឹត្តបទល្មើសដើម្បីកសាងសំណុំរឿងបញ្ជូនទៅតុលាការ ចាត់វិធានការតាមផ្លូវច្បាប់»។
បើតាមលោក រតនៈ គិតចាប់តាំងពីមានការប្រកាសដាក់បញ្ជាពីលោកនាយករដ្ឋមន្ត្រី ហ៊ុន សែន កាលពីថ្ងៃទី២៣ ខែមីនា មកទល់ពេលនេះ រដ្ឋបាលខេត្តកំពង់ធំ បានដឹកនាំកម្លាំងបញ្ជាឯកភាពខេត្តចុះស្រាវជ្រាវនិងបង្ក្រាបបទល្មើសនេសាទបានជាច្រើនករណី ក្នុងនោះមានការរឹបអូសរបាំងសាច់អួនក្រឡាញឹកបានប្រមាណជាង៣០០០ម៉ែត្រ បង្គោលឈើនិងឫស្សី ដែលត្រូវបានគេប្រើសម្រាប់ភ្ជាប់ជាមួយរបាំងសាច់អួនក្រឡាល្អិតសរុប ៦០០០ដើម ព្រមទាំងបានដកហូតឧបករណ៍ឆក់ត្រីបានជាង២០គ្រឿង ។
ចំណែកលោក សុខ លូ អភិបាលខេត្តបាត់ដំបង បានប្រាប់ភ្នំពេញប៉ុស្តិ៍ថា ថ្វីបើនៅពេលនេះ បទល្មើសជលផល បានស្ងប់ស្ងាត់ ប៉ុន្តែក្រុមការងារនៃបញ្ជាការឯកភាពខេត្តបាត់ដំបង នៅតែបន្តចុះពិនិត្យស្ថានភាព និងពង្រឹងការបង្រាបបទល្មើសនេសាទនៅក្នុងភូមិសាស្ត្រស្រុកសង្កែនិងស្រុកឯកភ្នំ ដែលកន្លងមកមានបទល្មើសនេសាទជាច្រើនបានកើតឡើង។
លោកបានបញ្ជាក់ថា៖«ក្រោយពីមានការចុះបង្ក្រាបជាលក្ខណៈទ្រង់ទ្រាយធំមក បទល្មើសបានស្ងប់ស្ងាត់ទៅវិញ ប៉ុន្តែក្រុមការងារយើងនៅតែបន្តចុះល្បាតស្រាវជ្រាវបទល្មើសក្នុងភូមិសាស្ត្រនៃស្រុកជាប់បឹងទន្លេសាបទាំង២ ដោយមានការរុះរើ និងបំផ្លាញចោលនូវឧបករណ៍នេសាទខុសច្បាប់មួយចំនួនផងដែរ»។
លោកបានបន្ថែមថា៖«ដូចដែលខ្ញុំបានប្រាប់តាំងពីមុនហើយ ខេត្តបាត់ដំបងមិនមានបទល្មើសនេសាទធំជាដុំកំភួននោះឡើយ»។
ទោះយ៉ាងណា ដើម្បីអនុវត្តបទបញ្ជារបស់ប្រមុខរាជរដ្ឋាភិបាលក៏ដូចជា វិធានការណែនាំ៤ចំណុចរបស់ក្រសួងកសិកម្ម រុក្ខាប្រមាញ់ និងនេសាទឲ្យមានប្រសិទ្ធភាព លោក សុខ លូ បានដាក់បទបញ្ជាឲ្យកងកម្លាំង និងមន្ត្រីគ្រប់មន្ទីរ អង្គភាព ក្រោមចំណុះរដ្ឋបាលខេត្តបាត់ដំបង រួមសហការជាមួយអាជ្ញាធរមូលដ្ឋាននិងប្រជាសហគមន៍នេសាទចុះស្រាវជ្រាវកំណត់ទីតាំងមុខសញ្ញាជនប្រព្រឹត្តបទល្មើសនេសាទដើម្បីឈានដល់ការបង្ក្រាបចាប់ជនល្មើសឲ្យបានទាន់ពេលវេលា និងដោយគ្មានការលើកលែង៕
វីដេអូ៖