ភ្នំពេញៈ ប្រធានគណៈកម្មការនីតិកម្ម និងយុត្តិធម៌នៃរដ្ឋសភាបានជំរុញឱ្យអ្នកពាក់ព័ន្ធរួមគ្នាទប់ស្កាត់ព័ត៌មានក្លែងក្លាយ ដែលកំពុងតែរីករាលដាល នាពេលចុងក្រោយនេះ ដែលធ្វើឱ្យប៉ះពាល់ដល់ស្ថិរភាពសន្តិសុខ និងសណ្តាប់ធ្នាប់នៅក្នុងសង្គមជាតិ ខណៈរដ្ឋសភាក៏កំពុងគិតគូរក្នុងការចូលរួមទប់ស្កាត់បញ្ហានេះផងដែរ។
លោក ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភា និងជាប្រធានក្រុមសភាជាតិកម្ពុជានៃសភានិយាយភាសាបារាំង APF ថ្លែងបែបនេះ ក្នុងពេលធ្វើជាអធិបតី ពិធីបើកសិក្ខាសាលា ស្តីពីការប្រយុទ្ធប្រឆាំងព័ត៌មានក្លែងក្លាយ និងសេរីភាពសារព័ត៌មាន៖ បញ្ហាប្រឈម និងដំណោះស្រាយ។
សិក្ខាសាលានេះមានការចូលរួមពីសមាជិក សមាជិកា រដ្ឋសភា ព្រឹទ្ធសភា ថ្នាក់ដឹកនាំនៃអគ្គលេខាធិការដ្ឋានរដ្ឋសភា ព្រឹទ្ធសភា ព្រមទាំងមន្ត្រីអគ្គលេខាធិការដ្ឋានរដ្ឋសភា ព្រឹទ្ធសភា និងស្ថាប័នសារព័ត៌មានមួយចំនួន។ សិក្ខាសាលានេះ រៀបចំដោយក្រុមសភាជាតិកម្ពុជា APF និងកម្មវិធីនុយមេរិចនៃសភានិយាយភាសាបារាំងចាប់ពីថ្ងៃទី ៦ ដល់ថ្ងៃទី ៧ ខែមេសា ឆ្នាំ ២០២២ នៅវិមានព្រឹទ្ធសភា។
លោក ប៉ែន បញ្ញា ថ្លែងថា៖ «រយៈពេលប៉ុន្មានឆ្នាំចុងក្រោយនេះ ព័ត៌មានក្លែងបន្លំ និងព័ត៌មានខុស បានរីករាលដាលយ៉ាងឆាប់រហ័សនៅជុំវិញពិភពលោក ក្នុងនោះក៏មានកម្ពុជាផងដែរ ដោយសារតែការអភិវឌ្ឍនៃបច្ចេកវិទ្យាព័ត៌មាន និងការកើនឡើងនៃការប្រើប្រាស់បណ្តាញសង្គមជាដើម»។
លោកបន្តថា៖ «ព័ត៌មានក្លែងបន្លំ និងក្លែងក្លាយជាបច្ចេកទេសទំនាក់ទំនង ដែលមានគោលបំណងបំភាន់ អ្នកអាន ឬមតិសាធារណៈដើម្បីផលប្រយោជន៍អ្វីមួយ ឬជះឥទ្ធិពលលើមតិសាធារណៈលើប្រធានបទជាក់លាក់»។
ធ្ងន់ធ្ងរជាងនេះទៀតប្រភេទនៃព័ត៌មានក្លែងក្លាយមួយចំនួនក៏មាន គោលបំណងស្វែងរកផលចំណេញផ្នែកនយោបាយ ឬសេដ្ឋកិច្ច ហើយមានខ្លឹមសារជ្រុលនិយម មានចេតនាកៀរគរមតិសាធារណៈ ដឹកនាំមនុស្សឱ្យប្រកាន់យកទស្សនៈ គំនិតជ្រុលនិយម និងដណ្តើមយកស្វ័យភាពរបស់បុគ្គល ដែលផ្ទុយពីគោលការណ៍លទ្ធិប្រជាធិបតេយ្យ និងសិទ្ធិមនុស្ស។
លោកបញ្ជាក់ថា ការផ្សព្វផ្សាយព័ត៌មានក្លែងបន្លំ និងព័ត៌មានខុសនេះបានក្លាយជាអាវុធមួយដែលអាចបង្កជាឧបសគ្គដ៏ធំចំពោះ សន្តិភាព សន្តិសុខ និងសេដ្ឋកិច្ច ឬដល់សុខភាពសាធារណៈទាំងជាតិ និងតំបន់។
បើតាមលោក ប៉ែន បញ្ញា ការទទួលខុសត្រូវយ៉ាងសំខាន់របស់រដ្ឋសភាក្នុងការប្រយុទ្ធប្រឆាំងនឹងបាតុភាពនេះ គឺអាចធ្វើទៅបានតាមរយៈការបង្កើតច្បាប់ដ៏រឹងមាំ និងមានប្រសិទ្ធភាព ស្របតាមគោលការណ៍នីតិរដ្ឋ និង លទ្ធិប្រជាធិបតេយ្យ ដើម្បីទប់ស្កាត់ការចែកចាយព័ត៌មានក្លែងបន្លំ និងព័ត៌មានខុស ការប្រើប្រាស់ទិន្នន័យផ្ទាល់ខ្លួនក្នុងលក្ខណៈខុសច្បាប់ និងធានាឱ្យបាននូវសេរីភាពសារព័ត៌មាន។
លោកថ្លែងថា សិក្ខាសាលាថ្ងៃនេះ គឺពិតជាឆ្លើយតបទៅនឹងគោលការណ៍ចំនួន ២ សំខាន់ ទី ១ ការពង្រឹងជំនាញរបស់សមាជិករដ្ឋសភា និងមន្ត្រីជាន់ខ្ពស់របស់សភា ដែលទទួលខុសត្រូវលើកការតាក់តែងច្បាប់ និងទី ២ ជំរុញកិច្ចសហប្រតិបត្តិការរវាងអ្នកសារព័ត៌មានទាំងអស់ ព្រមទាំងសង្គមស៊ីវិល ដើម្បីរួមគ្នាប្រយុទ្ធប្រឆាំងនឹងព័ត៌មានក្លែងបន្លំ និងខុស។
លោក ឡេង ប៉េងឡុង អ្នកនាំពាក្យរដ្ឋសភាថ្លែងថា ព័ត៌មានក្លែងក្លាយ គឺជាព័ត៌មានខុស ព័ត៌មានមិនពិត ដែលជនអគតិមួយចំនួនបង្កើតឡើងដើម្បីបំផ្លិចបំផ្លាញផលប្រយោជន៍សង្គមជាតិ និងបំពុលសង្គម។
លោកបញ្ជាក់ថា៖ «ប្រព័ន្ធផ្សព្វផ្សាយ គឺជារូបធាតុមួយនៃតម្លៃរបស់ប្រជាធិប្បតេយ្យ ព្រោះលទ្ធិប្រជាធិបតេយ្យបានឱ្យតម្លៃទៅលើសេរីភាពសារព័ត៌មាន និងសេរីភាពខាងការបញ្ចេញមតិ ដែលសេរីភាពទាំងនេះពាក់ព័ន្ធទៅដល់ការផ្សព្វផ្សាយ។ ដូច្នេះការផ្សព្វផ្សាយនេះ គឺសំដៅផ្ដល់ព័ត៌មានពិតទៅដល់ប្រជាជនពីសភាពការណ៍របស់ប្រទេសខ្លួន និងព័ត៌មានអន្តរជាតិជាដើម»។
លោកបន្ថែមថា ព័ត៌មានក្លែងក្លាយបានបង្កើតឡើង ដើម្បីធ្វើឱ្យច្របូកច្របល់ ដល់ភាពស្អាតស្អំរបស់ព័ត៌មានពិត។ ដូច្នេះហើយអ្នកពាក់ព័ន្ធត្រូវរួមគ្នាទប់ស្កាត់នូវរាល់ព័ត៌មានក្លែងក្លាយ ដែលកើតមានឡើង គឺត្រូវរួមគ្នាលុបបំបាត់ចោលព័ត៌មានក្លែងក្លាយតែម្ដង។ លោកថ្លែងថា៖ «នៅចំពោះមុខព័ត៌មានក្លែងក្លាយ តើរដ្ឋសភានឹងមានភារកិច្ចយ៉ាងម៉េច នេះគឺជាចំណុចដែលឯកឧត្ដម ប៉ែន បញ្ញា បានលើកលម្អិត។ អ៊ីចឹងបានសេចក្ដីថា នៅចំពោះមុខព័ត៌មានក្លែងក្លាយនេះ រដ្ឋសភាត្រូវតែចាប់អារម្មណ៍ ហើយត្រូវតែតាមដានមើលថា តើគួរតែធ្វើយ៉ាងណា សម្រាប់នីតិប្បញ្ញត្តិនេះ ដើម្បីចូលរួមក្នុងការប្រយុទ្ធប្រឆាំងនឹងព័ត៌មានក្លែងក្លាយដែលកំពុងកើតមានឡើងនេះ»៕