.jpg)
លោករដ្ឋមន្ត្រី ម៉ម ប៊ុនហេង នៅក្នុងពិធីនៅខេត្តសៀមរាបកាលពីថ្ងៃទី ៥ មេសា។ រូបថត ហ្វេសប៊ុក
ភ្នំពេញៈ វិស័យសុខាភិបាលបានចូលរួមចំណែកយ៉ាងសំខាន់ក្នុងការអភិវឌ្ឍសង្គមកិច្ច សេដ្ឋកិច្ច និងការកាត់បន្ថយភាពក្រីក្រនៅកម្ពុជាដូចជា ការលើកកម្ពស់ស្ថានភាពសុខភាពរបស់ប្រជាពលរដ្ឋកម្ពុជាឱ្យប្រសើរឡើង ការថយចុះជាបន្តបន្ទាប់នូវអត្រាស្លាប់របស់មាតា ទារក និងកុមារ និងអត្រាឈឺ អត្រាស្លាប់ដោយជំងឺឆ្លងផ្សេងៗ។
នេះជាការលើកឡើងរបស់លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ក្នុងពិធីបើកសន្និបាតបូកសរុបការងារប្រចាំ ២០២១ និងទិសដៅបន្តឆ្នាំ ២០២២ របស់មន្ទីរសុខាភិបាលខេត្តសៀមរាបនៅថ្ងៃទី ៥ ខែមេសា ឆ្នាំ ២០២២។
នៅក្នុងឱកាសនោះលោក ម៉ម ប៊ុនហេង ក៏បានអះអាងផងដែរថា ក្រសួងសុខាភិបាលនៅតែដាក់ចេញផែនការយុទ្ធសាស្ដ្រ ដើម្បីពង្រឹង និងពង្រីកការកែលម្អគុណភាពសេវាសុខាភិបាលនៅឆ្នាំបន្ទាប់ខាងមុខទៀត។
លោករដ្ឋមន្ត្រីក្រសួងសុខាភិបាលបានបញ្ជាក់ថា៖ «នៅឆ្នាំបន្តខាងមុខក្រសួងសុខាភិបាលនៅតែដាក់ចេញនូវផែនការយុទ្ធសាស្ដ្រសុខាភិបាលឱ្យបន្ដអនុវត្ដយ៉ាងសកម្មដោយកាត់បន្ថយថែមទៀតនូវអត្រាមរណភាពរបស់មាតា ទារក និងកុមារ និងកង្វះអាហារូបត្ថម្ភ ពង្រីកកម្មវិធីបង្ការ និងព្យាបាលជំងឺឆ្លង ជំងឺមិនឆ្លងរ៉ាំរ៉ៃ ក្នុងការពង្រឹង និងពង្រីកការកែលម្អគុណភាពសេវាសុខាភិបាលជូនប្រជាជន»។
ជាមួយនេះដែរក្រសួងក៏នឹងបន្តកែលម្អឥរិយាបថរបស់អ្នកផ្ដល់សេវាសុខាភិបាល លើកកម្ពស់កម្រិតជំនាញ និងសមត្ថភាពរបស់បុគ្គលិកសុខាភិបាល កែលម្អការគ្រប់គ្រង និងផ្គត់ផ្គង់ឱសថ គ្រឿងបរិក្ខារវេជ្ជសាស្ដ្រ ការពង្រឹងប្រព័ន្ធព័ត៌មានសុខាភិបាល តាមរយ:អភិបាលកិច្ចតាមដានសុខាភិបាល។
លោក ម៉ម ប៊ុនហេង បានបញ្ជាក់ទៀតថា លើសពីនេះទៀត ក្រសួងសុខាភិបាលនៅតែបន្តការអនុវត្ដគោលការណ៍លើកលែងការបង់ថ្លៃសេវាចំពោះប្រជាជនក្រីក្រតាមរយ:គម្រោងមូលនិធិសមធម៌ និងការអនុវត្តការផ្តល់របបសន្តិសុខសង្គមផ្នែកថែទាំសុខភាពដោយឥតបង់ថ្លៃនៅគ្រប់មូលដ្ឋានសុខាភិបាលសាធារណៈដល់មន្ត្រីរាជការសាធារណ: អតីតមន្ត្រីរាជការ និងអតីតយុទ្ធជន។
មន្ត្រីនៃមន្ទីរសុខាភិបាលខេត្តសៀមរាបបានឱ្យដឹងថា ទោះស្ថិតក្នុងដំណាក់កាលនៃវិបត្តិជំងឺកូវីដ ១៩ ក៏ដំណើរការផ្តល់សេវាសុខភាពជូនប្រជាជននៅតាមមូលដ្ឋានសុខាភិបាលនៅតែបន្តដោយរលូន ពោលគឺការចូលរួមលះបង់ កម្លាំងកាយ កម្លាំងចិត្ត របស់មន្ត្រីរាជការសុខាភិបាលគ្រប់ឋានានុក្រម។
លោក អ៊ាប ប៊ុនលឿន អនុប្រធានមន្ទីរសុខាភិបាលខេត្តសៀមរាបបានលើកឡើងដែរថា ការចូលរួមសហការល្អ ជាពិសេសពីអាជ្ញាធរមូលដ្ឋាន អង្គការដៃគូ និងអ្នកពាក់ព័ន្ធបានធ្វើឱ្យគ្រប់មូលដ្ឋានសុខាភិបាលក្នុងខេត្តសៀមរាបបើកទ្វារផ្តល់សេវាសុខភាពជូនប្រជាពលរដ្ឋ ២៤ ម៉ោងលើ ២៤ ម៉ោងដោយមានប្រជាពលរដ្ឋមកទទួលសេវាសុខភាពជាធម្មតារៀងរាល់ថ្ងៃ។
លោក អ៊ាប ប៊ុនលឿន បានបន្ថែមថា៖ «គ្រួសារក្រីក្រត្រូវបានបង្ការហានិភ័យហិរញ្ញវត្ថុដោយបានផ្តល់ជូននូវសេវាពិនិត្យពិគ្រោះ ព្យាបាលជំងឺដូចៗគ្នា តាមរយ:ការគ្របដណ្តប់នៃមូលនិធិសមធម៌ ដែលផ្តល់ដោយរាជរដ្ឋាភិបាល និងដៃគូអភិវឌ្ឍន៍ ដោយលើកលែងការបង់ថ្លៃសេវានៅគ្រប់មូលដ្ឋានសុខាភិបាលសាធារណ:»។
យោងតាមរបាយការណ៍ជាតិនៃលទ្ធផលចុងក្រោយជំរឿនទូទៅប្រជាជននៅកម្ពុជាឆ្នាំ ២០១៩ បានបង្ហាញពីអត្រាមរណភាពទារក និងកុមារនៅកម្ពុជា បើប្រៀបធៀបនឹងបណ្តាប្រទេសកំពុងអភិវឌ្ឍន៍ផ្សេងទៀតនៅក្នុងតំបន់ អត្រាមរណភាពរបស់ទារកគឺមិនមានអត្រាខ្ពស់ប៉ុន្មានឡើយ ប៉ុន្តែមានលក្ខណៈល្អប្រសើរឡើងច្រើន បើធៀបនឹងឆ្នាំកន្លងទៅ។
ក្រោមគំនិតផ្តួចផ្តើមរបស់អង្គការសហប្រជាជាតិ ពិភពលោកបានចាប់ផ្តើមនូវរបៀបវារៈថ្មីមួយសម្រាប់អភិវឌ្ឍន៍ ដើម្បីសម្រេចគោលដៅឆ្នាំ ២០៣០។ គោលដៅថ្មីនេះបានដាក់ចេញនូវគោលដៅអភិវឌ្ឍន៍ប្រកបដោយចីរភាពក្នុងបំណងកាត់បន្ថយអត្រាមរណភាពទារកឱ្យបានយ៉ាងហោចណាស់ទាបជាង ១២ នាក់ ក្នុង ១ ០០០ កំណើតរស់ និងអត្រាមរណភាពកុមារអាយុក្រោម ៥ ឆ្នាំឱ្យបានយ៉ាងហោចណាស់ទាបជាង ២៥ នាក់ ក្នុង ១ ០០០ កំណើតរស់។
យោងតាមលទ្ធផលជំរឿន អត្រាមរណភាពទារក និងកុមារនៅកម្ពុជាបានធ្លាក់ចុះគួរកត់សម្គាល់គឺពី ២៦ នាក់មក នៅ ១៨ នាក់ (ទារក) និងកុមារពី ៤៤ នាក់ មកនៅ ២៨ នាក់ (ក្រោមអាយុ ៥ ឆ្នាំ) សម្រាប់ឆ្នាំ ២០០៨ និងឆ្នាំ ២០១៩៕
