ភ្នំពេញៈ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខៅឌូ) បានសុំអន្តរាគមន៍ពីលោកនាយករដ្ឋមន្ត្រី ហ៊ុន សែន ឱ្យជួយកម្មករនិយោជិតជាង ១ ពាន់នាក់ដែលកំពុងរងគ្រោះមិនទាន់បានទទួលសំណង និងយុត្តិធម៌ ក៏ប៉ុន្តែមន្ដ្រីក្រសួងការងារថាករណីនេះភាគីទំនាស់អាចប្ដឹងបន្តទៅតុលាការបាន។
សេចក្តីថ្លែងការណ៍របស់ ស៊ីខៅឌូ ចុះថ្ងៃទី ៤ មេសា បានឱ្យដឹងថា ប៉ុន្មានឆ្នាំចុងក្រោយនេះ កម្មករនិយោជិតបានប្រើសិទ្ធិបង្កើតអង្គការវិជ្ជាជីវៈក្នុងសហគ្រាស គ្រឹះស្ថាន ដែលពួកគេបានបំពេញការងារតាមច្បាប់ ក៏ប៉ុន្តែត្រូវបាននិយោជកមួយចំនួនប្រើគ្រប់រូបភាពដោយបានបណ្ដេញសហស្ថាបនិកបង្កើតសហជីពមួយចំនួនចេញពីកន្លែងការងារពួកគេ និងមានករណីបិទទ្វាររោងចក្រដោយមិនបានទូទាត់ប្រាក់សំណងតាមកិច្ចសន្យាការងាររបស់ពួកគេតាមច្បាប់ស្តីពីការងារជាធរមាននោះឡើយ។
សេចក្តីថ្លែងការណ៍បន្តថា ករណីនេះ មានសមាជិកសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាចំនួន ២៣ រោងចក្រ ដែលពាក់ព័ន្ធស្មើនឹងកម្មករ ១ ៤០៨ នាក់បានរងគ្រោះ។
សេចក្តីថ្លែងការណ៍បន្តថា «សំណុំរឿងមួយចំនួនបានដោះស្រាយដោយក្រសួងការងារ និងបណ្តុះបណ្តាលវិជ្ជាជីវៈជាច្រើនលើកច្រើនសាមកហើយ តែមិនមានដំណោះស្រាយនោះទេ ហើយសំណុំរឿងមួយចំនួនទៀតត្រូវបានដោះស្រាយដោយក្រុមប្រឹក្សាអាជ្ញាកណ្ដាល ក៏និយោជកមិនបានអនុវត្តតាមសេចក្ដីបង្គាប់របស់ក្រុមប្រឹក្សាអាជ្ញាកណ្ដាលផងដែរ»។
ស៊ីខៅឌូ បានសម្តែងការសោកស្តាយដែលកម្មករនិយោជិតបានរងគ្រោះដោយការប្រើសិទ្ធិ និងកាតព្វកិច្ចដែលត្រូវទទួលបានតាមច្បាប់ តែបែរជាប្រើពេលជាច្រើនខែ ច្រើនឆ្នាំក្នុងការដោះស្រាយ ហើយមិនទទួលបានលទ្ធផលដែលអាចទទួលយកបាន។
ស៊ីខៅឌូ ថា «ករណីទាំងនេះជាករណីរំលោភសិទ្ធិមនុស្សយ៉ាងធ្ងន់ធ្ងរ និងការកេងប្រវ័ញ្ចពលកម្មកម្មករនិយោជិតដែលត្រូវបានហាមឃាត់ដោយច្បាប់»។
បន្ថែមពីនេះ ស៊ីខៅឌូ ក៏បង្ហាញការខកចិត្តចំពោះក្រសួងការងារផងដែរ ចំពោះភាពយឺតយ៉ាវក្នុងការដោះស្រាយ ហើយគ្មានប្រសិទ្ធភាព ព្រមទាំងគ្មានវិធានការចំពោះនិយោជកដែលមិនបានអនុវត្តច្បាប់កន្លងមក។
ស៊ីខៅឌូបានបន្តថា៖ «សូមសំណូមពរដោយទទូចដល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីជួយចាត់វិធានការ និងចាត់ចែងគណៈកម្មការពិសេស ឬស្ថាប័នពាក់ព័ន្ធ...ដោះស្រាយករណី ២៣ រោងចក្រជាបន្ទាន់ ដើម្បីបញ្ចប់វិវាទការងារដ៏រ៉ាំរ៉ៃនេះឱ្យមានប្រសិទ្ធភាព»។
រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈលោក ហេង សួរ បានប្រាប់ភ្នំពេញប៉ុស្តិ៍ថា ទាក់ទងបញ្ហានេះ ក្រសួងអាចឆ្លើយតបបាន ប្រសិនបើមានករណីដោយចំពោះនីមួយៗ។
លោកថា៖ «អ្វីដែលក្រសួងក្តាប់បានកន្លងមកគឺអាចនៅមានករណីខ្លះគឺមិនទាន់បញ្ចប់ដោយសារតែភាគីទាំង ២ មិនទាន់ឯកភាពគ្នា ឬមិនព្រមទទួលយកសំណង បើទោះបីជាមានការបកស្រាយ ឬគណនាដោយមន្ត្រីផ្សះផ្សាវិវាទក៏ដោយ ក៏មានករណីខ្លះគឺកើតឡើងដោយសារការក្ស័យធន ហើយកម្មករនិយោជិតនៅតែបន្តប្តឹងមិនទទួលយកសំណងដែលទទួលបានពីការលក់ឡាយឡុងសម្ភារ បរិក្ខារដែលបន្សល់ទុកដោយម្ចាស់រោងចក្រ»។
លោក ហេង សួរ បានបញ្ជាក់ថា យោងលើនីតិវិធីដោះស្រាយវិវាទដែលមានចែងក្នុងច្បាប់ ភាគីវិវាទអាចប្តឹងបន្តទៅតុលាការ ប្រសិនបើសេចក្តីបង្គាប់របស់អាជ្ញាកណ្តាលត្រូវបានបដិសេធដោយភាគីណាមួយ។
លោក កាំង មូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា (GMAC) បានថ្លែងថា លោកជឿជាក់ថា ករណីទាំងនេះត្រូវបានដោះស្រាយដោយត្រឹមត្រូវទៅតាមច្បាប់ការងារ។ លោកថា៖ «ប្រសិនបើមានករណីរំលោភបំពានមែននោះករណីទាំងនោះ គួរតែត្រូវដាក់បញ្ចូលក្នុងរបាយការណ៍ឯករាជ្យរបស់អង្គការអន្តរជាតិខាងការងាររោងចក្រកាន់តែប្រសើរនៅកម្ពុជា (ILO-BFC)។
តាមរយៈសេចក្តីថ្លែងការណ៍នេះ ស៊ីខៅឌូ បានបញ្ជាក់ដែរថា ល្គឹកណាមិនមានដំណោះស្រាយកម្មករនិយោជិតរងគ្រោះនឹងធ្វើសន្និសីទសារព័ត៌មាន ១ នៅថ្ងៃទី ២៧ ខែមេសា ឆ្នាំ ២០២២ និងមានការតវ៉ាដាក់ញត្តិនៅមុខក្រសួងការងារ និងបណ្តុះបណ្តាលវិជ្ជាជីវៈនៅថ្ងៃទី ១ ខែឧសភាឆ្នាំ ២០២២ ខាងមុខនេះ៕