The Phnom Penh Post Search

Search form




Logo of Phnom Penh Post newspaper Phnom Penh Post - សំណុំរឿង​លោក​ កឹម សុខា ឃុបឃិត​ជាមួយ​បរទេស​ផ្តួលរំលំ​រដ្ឋាភិបាល​ត្រូវបាន​សួរ​ពី​ការបោះឆ្នោត ឆ្នាំ​ ២០១៣

សំណុំរឿង​លោក​ កឹម សុខា ឃុបឃិត​ជាមួយ​បរទេស​ផ្តួលរំលំ​រដ្ឋាភិបាល​ត្រូវបាន​សួរ​ពី​ការបោះឆ្នោត ឆ្នាំ​ ២០១៣

Content image - Phnom Penh Post
លោក​ កឹម សុខា មក​តុលាការ​រាជធានី ពីថ្ងៃ​ទី​ ១៦ មករា ឆ្នាំ​ ២០២១​។ ហេង ជីវ័ន

សំណុំរឿង​លោក​ កឹម សុខា ឃុបឃិត​ជាមួយ​បរទេស​ផ្តួលរំលំ​រដ្ឋាភិបាល​ត្រូវបាន​សួរ​ពី​ការបោះឆ្នោត ឆ្នាំ​ ២០១៣

ភ្នំពេញៈ សវនាការ​រឿងក្តី​លោក​ កឹម សុខា អតីត​ប្រធាន​នៃ​អតីត​គណបក្ស​សង្គ្រោះ​ជាតិ​ពាក់ព័ន្ធ​នឹង​សំណុំរឿង សន្ទិដ្ឋភាព​ជាមួយ​បរទេស ឬ​ឃុបឃិត​ជាមួយ​បរទេស​ ដើម្បី​ផ្តួលរំលំ​រដ្ឋាភិបាល​ត្រូវបាន​តំណាង​អយ្យការ​ចោទសួរ​ដេញដោល​លើ​ការបោះឆ្នោត​ឆ្នាំ​ ២០១៣ ហើយ​សវនាការ នេះ​ត្រូវបាន​សម្រេច​បន្ត​លើក​ពេល​ទៅធ្វើ​នៅ​ថ្ងៃទី​ ២០ ខែមេសា នៅក្រោយ​បុណ្យចូលឆ្នាំ​ខ្មែរ​។

លោក ​ផែង ហេង សហមេធាវី​របស់លោក​ កឹម សុខា ប្រាប់​ក្រុម​អ្នកសារព័ត៌មាន ក្រោយ​បញ្ចប់​សវនាការ ពីថ្ងៃ​ទី ​៦ ខែមេសា ថា សវនាការ​របស់​លោក​ កឹម សុខា ​នៅពេលនេះ​ត្រូវបាន​សួរ​ដេញដោល ដោយ​តំណាង​អយ្យការ​ពាក់ព័ន្ធ​នឹង​ការបោះឆ្នោត ដែល​សំណួរ​មួយចំនួន​ជា​សំណួរ​បច្ចេកទេស​នៃ​ការបោះឆ្នោត ឬ​ដំណោះស្រាយ​ភាពមិនប្រក្រតី​នៃ​បញ្ជីឈ្មោះ​បោះឆ្នោត ឆ្នាំ​ ២០១៣​។

លោក​បន្តថា លោក​ កឹម សុខា បាន​ឆ្លើយបំភ្លឺ​ទៅ​តំណាង​អយ្យការ​លើ​សំណួរ​ណា​ដែល​មិនមែនជា​បច្ចេកទេស​តែប៉ុណ្ណោះ ដូចជា បញ្ហា​មួយចំនួន​ពាក់ព័ន្ធ​នឹង​ការចរចា​បង្កើត​គណៈកម្មការ​ចម្រុះ​រវាង​គណបក្ស​ប្រជាជន និង គណបក្ស​សង្គ្រោះ​ជាតិ ជាដើម​។ ប៉ុន្តែ​ចំពោះ​សំណួរ​បច្ចេកទេស លោក​បាន​រុញ​សំណួរ​ទាំងអស់នោះ ទៅ​សួរ​អ្នកជំនាញ គ.ជ.ប.ឬ​សុំ​ឯកសារ​ពី​ គ.ជ.ប. មក​បញ្ជាក់​។

លោក​ថ្លែងថា​៖ «​ពាក់ព័ន្ធ​នឹង​បញ្ហា​នេះ យើង​បានកត់​សម្គាល់ ថា ដីកា​បញ្ជូនមក​ជំនុំជម្រះ​នោះ គឺ​ចោទ​ពីបទ​សន្ទិដ្ឋភាព​ជាមួយ​បរទេស ហើយ​ឃើញ​សំណួរ​ហាក់បី​ដូចជា​សួរ​ទៅលើ​បច្ចេកទេស ការបោះឆ្នោត ដែល​សំណួរ​ទាំងអស់​នេះ​គួរតែ​ហៅ​អ្នកបច្ចេកទេស មក​បំភ្លឺ​ជាជាង​ឱ្យ​ឯកឧត្តម​ កឹម សុខា ឆ្លើយ​លម្អិត​ទៅនឹង​បញ្ហា​ទាំងអស់​នេះ​ទេ​»​។

ក្នុង​សវនាការ លោក ​ផែង ហេង បានស្នើ​ឱ្យ​តំណាង​អយ្យការ​សួរដេញដោល​លើ​ដីកា​សរសេរ​ក្នុង​ដំណោះស្រាយ​ពោលគឺ​មិនត្រូវ​សួរ​សំណួរ​បច្ចេកទេស មក​លោក​ កឹម សុខា នោះទេ​។ ជាពិសេស​តំណាង​អយ្យការ​គួរតែ​ពិនិត្យ​តាំងសំណួរ​ឱ្យបាន​ត្រឹមត្រូវ និង​តាម​បទចោទ​វិញ កុំឱ្យ​អូសបន្លាយ​។

លោក​ ប្លង់ សុផល អ្នកនាំពាក្យ​អយ្យការ​អម​សាលាដំបូង​រាជធានី​ភ្នំពេញ ប្រាប់​ភ្នំពេញ ប៉ុស្តិ៍ ក្រោយ​ចប់​សវនាការ នៅ​ថ្ងៃទី ​៦ មេសា ថា សវនាការ​នៅពេលនេះ ផ្តោតលើ​ការសាកសួរ លោក​ កឹម សុខា ដែលជា​ជនជាប់ចោទ​លើ​ការចូលរួម​ពិនិត្យ​បញ្ជី​ឈ្មោះ​បោះឆ្នោត តំណាងរាស្ត្រ ឆ្នាំ ​២០១៣​។ លោក​បញ្ជាក់ថា សវនាការ​នឹង​បន្ត នៅ​ថ្ងៃទី​ ២០ មេសា ឆ្នាំ​ ២០២២ វេលា​ម៉ាង​ ៨:៣០ ​នាទី​ព្រឹក​។

លោក​ ឯម សុវណ្ណារ៉ា អ្នក​តាមដាន​បញ្ហានយោបាយ​នៅ​កម្ពុជា ថ្លែង​នៅ​ថ្ងៃទី ​៦ មេសា ថា លោក​ហាក់​មិន​យល់​ពី​តុលាការ ដែល​បាន​សួរនាំ​លោក​ កឹម សុខា ពី​ការបោះឆ្នោត​ឆ្នាំ ​២០១៣ នោះទេ​។ ប៉ុន្តែ​បើ​គេ​ប្រើ​គោលការណ៍​ច្បាប់​ជាទូទៅ ការអនុវត្ត ឬ​ការកាត់ក្តី គឺ​គេ​មិនសូវ​ប្រើប្រាស់​យន្តការ​ថយក្រោយ​ទេ ខណៈ​ការបោះឆ្នោត​នៅពេលនោះ បានប្រកាស​លទ្ធផល​ជា​ផ្លូវការ និង​ទទួល​ស្គាល់​ទាំងអស់គ្នា​រួចហើយ​។

លោក​ថា ការលើក​អំណះអំណាង ឬ​ភ័ស្តុតាង​ក្នុង​សវនាការ ដើម្បី​ចោទ​លើ​លោក​ កឹម សុខា ដោយ​ចំណាយពេល​យូរ និង​មិនមាន​អំណះអំណាង​គ្រប់គ្រាន់ ធ្វើឱ្យ​មតិ​ជាតិ និង​អន្តរជាតិ​ដាក់​មន្ទិលសង្ស័យ​ទៅលើ​យន្តការ និង​ការប្រើប្រាស់​ច្បាប់​នៅ​កម្ពុជា​។ ដូច្នេះ​សំណុំរឿង​លោក កឹម សុខា តុលាការ​គួរតែ​ពន្លឿន​នីតិវិធី ដើម្បី​ផ្តល់​ការជឿជាក់​លើ​មតិ​ជាតិ និង អន្តរជាតិ​មកលើ​តុលាការ​កម្ពុជា​។

លោក​ថា​៖ «​ខ្ញុំ​យល់ថា ដំណើរការ និង​យន្តការ​នៃ​ការកាត់ក្តី​របស់លោក​ កឹម សុខា រហូតមកដល់​ពេលនេះ​ហើយ នៅ​ចោទ​សួររក​ភ័ស្តុតាង​ដើម្បី​ដាក់បន្ទុក​។ ខ្ញុំ​មិនដឹងថា កាត់ក្តី​កន្លងមក វា​មាន​ខ្លឹមសារ ឬ​គោលការណ៍​បែបណា​ទេ ដែល​រំលាយ​គណបក្ស​សង្គ្រោះ​ជាតិ​របស់​លោក កឹម សុខា កន្លងទៅ​។ អានេះ​ជា​កិច្ចការ​មួយ​ដែល​មតិ​ជាតិ និង​អន្តរជាតិ គេ​បាត់​ជំនឿ ហើយ​បើ​អូសបន្លាយ​កាន់តែ​យូរ​ថែមទៀត គេ​បាត់​ជំនឿ​កាន់តែ​ច្រើន​»៕

អត្ថបទគួរចាប់អារម្មណ៍