.jpg)
អគ្គនាយកដ្ឋានអន្តោប្រវេសន៍ធ្វើសនិ្នបាតការងារឆ្នាំ ២០២១ ពីថ្ងៃទី ៦ មេសា។ រូប GDI
ភ្នំពេញៈ គិតចាប់ពីថ្ងៃបង្កើតអគ្គនាយកដ្ឋានអន្តោប្រវេសន៍នៅឆ្នាំ ២០១៤ មកដល់ដំណាច់ខែធ្នូ ឆ្នាំ ២០២១ កម្ពុជាបានបណ្ដេញចេញជនបរទេសខុសច្បាប់ចំនួន ២០ ៨២៤ នាក់ ក្នុងនោះមាន ១០២ សញ្ជាតិ ហើយក្នុងឆ្នាំ ២០២១ បានបណ្ដេញចេញចំនួន ៣ ៥៩៤ នាក់ មាន ៤៣ សញ្ជាតិ ក្នុងនោះសញ្ជាតិច្រើនជាងគេ គឺ ថៃ ចិន វៀតណាម និងនីហ្សេរីយ៉ា។ នេះបើតាមរបាយការណ៍។
ក្នុងពិធីសន្និបាតបូកសរុបលទ្ធផលការងារឆ្នាំ ២០២១ និងទិសដៅការងារឆ្នាំ ២០២២ របស់អគ្គនាយកដ្ឋានអន្តោប្រវេសន៍កាលពីថ្ងៃទី ៦ មេសា លោក ពុំ វិត្យា ប្រធាននាយកដ្ឋានរដ្ឋបាលនៃអគ្គនាយកដ្ឋានអន្តោប្រវេសន៍ថ្លែង ដោយមានឯកសារយោងថា ការងារស៊ើបអង្កេត និងអនុវត្ដនីតិវិធី ទោះបីកម្ពុជាបានពង្រឹងវិធានការលើកកម្ពស់ការត្រួតពិនិត្យផ្ដល់ទិដ្ឋាការចូល និងផ្ដល់ការអនុញ្ញាតបន្តការស្នាក់នៅ ក៏ដូចជាការត្រួតពិនិត្យការធ្វើដំណើរចូលតាមច្រកទ្វារយ៉ាងហ្មត់ចត់ក៏ដោយ ប៉ុន្ដែនៅតែលេចឡើងគួរឱ្យកត់សម្គាល់នូវការលួចជ្រៀតចូលដោយខុសច្បាប់។ ការស្នាក់នៅគ្មានលិខិតឆ្លងដែន ស្នាក់នៅហួសពេលកំណត់ ជនរត់គេចពីសំណាញ់ច្បាប់នៃប្រទេសដទៃ ព្រមទាំងធ្វើសកម្មភាពល្មើសច្បាប់ផ្សេងទៀតនៅក្នុងប្រទេសកម្ពុជា។
លោកបានថ្លែងថា ប្រឈមនឹងបញ្ហានេះ ដើម្បីធានាថាវត្ដមានរបស់ជនបរទេសមានផលវិជ្ជមានសម្រាប់ការអភិវឌ្ឍជាតិ ធានាការចូលរួមថែរក្សាសន្តិសុខ សុវត្ថិភាពសង្គម នាយកដ្ឋានបានប្រមូលផ្ដុំបង្កើនវិធានការ ប្រមូលព័ត៌មាន និងស្រាវជ្រាវ ស៊ើបអង្កេតជាប្រចាំដើម្បីស្វែងរកជនបរទេសប្រព្រឹត្តល្មើសច្បាប់។
លោកបញ្ជាក់ថា៖ «ជាលទ្ធផលការងារឆ្នាំ ២០២១ បានរៀបចំនីតិវិធីបណ្ដេញចេញជនល្មើសច្បាប់ចេញពីប្រទេសកម្ពុជាមានចំនួន ៣ ៥៩៤ នាក់ មាន ៤៣ សញ្ជាតិ ក្នុងនោះមានសញ្ជាតិច្រើនជាង គឺ សញ្ជាតិថៃ ចិន វៀតណាម និងនីហ្សេរីយ៉ា ជាដើម»។
លោកបានបន្តថា៖ «បើគិតចាប់ពីថ្ងៃបង្កើតអគ្គនាយកដ្ឋានអន្តោប្រវេសន៍នៅឆ្នាំ ២០១៤ មកដល់ដំណាច់ខែធ្នូ ឆ្នាំ ២០២១ បានបណ្ដេញចេញជនបរទេសខុសច្បាប់បានចំនួន ២០ ៨២៤ នាក់ មានចំនួន ១០២ សញ្ជាតិ»។
លោក ពុំ វិត្យា លើកឡើងថា ដើម្បីការពារជោគវាសនាប្រជាពលរដ្ឋខ្មែរពីការបោកប្រាស់យកទៅជួញដូរ ធ្វើបាបនៅក្រៅប្រទេសក្នុងឆ្នាំ ២០២១ តាមសំណើរបស់ក្រុមការងារច្រកចេញចូលតែមួយក្រសួងមហាផ្ទៃ អគ្គនាយកដ្ឋានបានពិនិត្យបញ្ជាក់សមាសភាពជនបរទេស ដែលបានស្នើសុំរៀបអាពាហ៍ពិពាហ៍ ជាមួយពលរដ្ឋខ្មែរចំនួន ៥៨១ នាក់ មាន ២៣ សញ្ជាតិ បានឆ្លើយតបទាន់ពេលវេលាតាមការស្នើសុំផងដែរ។
លោកថា ក្រៅពីនេះ អគ្គនាយកដ្ឋានបានយកចិត្ដទុកដាក់សហការជាមួយអគ្គស្នងការដ្ឋាននគរបាលជាតិ និងស្ថាប័នពាក់ព័ន្ធក្ដាប់ព័ត៌មានទាក់ទិននឹងសកម្មភាពជនបរទេស ដើម្បីចូលរួមដោះស្រាយ និងមានវិធានការទប់ស្កាត់ទាន់ពេលវេលា។ ក្នុងនោះក្រុមការងារក្ដាប់បទល្មើសជនបរទេស ដោយបានរកឃើញ និងបង្ក្រាបជនបរទេសល្មើសច្បាប់ចំនួន ៨៩៦ លើក ជនសង្ស័យមាន ៤ ៣១១ នាក់ មាន ២២ សញ្ជាតិ។ ក្នុងនោះមានករណីឃាតកម្ម ៣ លើក ជនសង្ស័យ ៥ នាក់ និង ២- សញ្ជាតិ។សញ្ជាតិចិន ៤ នាក់ និងកូរ៉េ ១ នាក់ កើតឡើងនៅខេត្ដព្រះសីហនុ និងខេត្ដបន្ទាយមានជ័យ រួមនឹងករណីកើតឡើងមួយចំនួនទៀត គឺពាក់ព័ន្ធភាគច្រើនជាករណីគ្រឿងញៀន។
ទាក់ទងនឹងការគ្រប់គ្រងការស្នាក់នៅរបស់ជនបរទេស លោកឱ្យដឹងថា អគ្គនាយកដ្ឋានអន្តោប្រវេសន៍បានខិតខំបង្កើនការគ្រប់គ្រងវត្ដមានស្នាក់អាស្រ័យនៅកម្ពុជារបស់ជនបរទេសគ្រប់ប្រភេទក្នុងគោលដៅថែរក្សាសន្តិសុខ សណ្ដាប់ធ្នាប់សាធារណៈ សុវត្ថិភាពសង្គម និងការអភិវឌ្ឍជាតិ។
ការគ្រប់គ្រងជនបរទេសអន្តោប្រវេសន៍ ជនបរទេសអន្តោប្រវេសន៍ ដែលបានដាក់ពាក្យស្នើសុំទទួលស្គាល់ និងបណ្ណស្នាក់នៅអចិន្រៃ្តយ៍គិតត្រឹមថ្ងៃបិទឱសានវាទ ថ្ងៃទី ៣០ ខែមិថុនា ឆ្នាំ ២០១៩ យុទ្ធនាការជំរឿនស្ថិតិ និងដកហូតឯកសាររដ្ឋបាលមិនប្រក្រតីមានចំនួន ២៨ ៩៤៥ គ្រួសារ ក្នុងនោះមានមនុស្សចំនួន ៨៩ ៧៨៦ នាក់។
លោកបន្តថា ដើម្បីគ្រប់គ្រង ក្រសួងមហាផ្ទៃបានផ្ដល់បណ្ណស្នាក់នៅអចិន្រៃ្តយ៍ជូនអ្នកដែលមានអាយុ ១៨ ឆ្នាំឡើងទៅចំនួន ៦៥ ១៦៨ នាក់។ ជាមួយគ្នានោះបានផ្ដល់បណ្ណបន្តសុពលភាពដែលមានរយៈពេល ២ ឆ្នាំម្ដងសរុបចំនួន ១៩ ៥៦១បណ្ណក្នុងនោះបានបន្តសុពលភាពលើកទី ១ ចំនួន ១៥ ៩៣៣ នាក់ លើកទី ២ ចំនួន ៣ ៥៦៧ នាក់ លើកទី ៣ ចំនួន ៥២ នាក់ និងលើកទី ៤ ចំនួន ៩ នាក់។
លោក ពុំ វិត្យា លើកឡើងតាមការស្រាវជ្រាវទិន្នន័យនៃការផ្ដល់បណ្ណស្នាក់នៅអចិន្រៃ្តយ៍ ពិនិត្យឃើញថា មានជនបរទេសអន្តោប្រវេសន៍ចំនួន ៦ ៦១៤ នាក់ ដែល មិនមកបន្តសុពលភាព អគ្គនាយកដ្ឋានអន្តោប្រវេសន៍កំពុងមានវិធានការដើម្បីជំរុញឱ្យពួកគេគោរពត្រឹមត្រូវតាមច្បាប់កំណត់។
លោកឱ្យដឹងថា អគ្គនាយកដ្ឋានបានទទួលពាក្យបណ្តឹងតវ៉ាទាមទារសញ្ជាតិខ្មែរពីជនបរទេស ដែលត្រូវបានដកហូតឯកសាររដ្ឋបាលកម្ពុជា មិនប្រក្រតីចំនួន ១២៥ បណ្តឹង មានមនុស្សរួមចំនួន ៥៥៣ នាក់។ ក្នុងនោះឈប់ ប្ដឹងតវ៉ាជាខ្មែរ និងវាយតម្លៃជាជនជាតិវៀតណាម ចំនួន ៦៤ បណ្តឹង មនុស្សរួម ២៧៧ នាក់ បានសម្រេច ជាខ្មែរពីថ្នាក់ដឹកនាំក្រសួងមហាផ្ទៃ ៥៣ បណ្តឹងមនុស្សរួមចំនួន ២៤១ នាក់ផងដែរ។
អគ្គនាយកនៃអគ្គនាយកដ្ឋានអន្តោប្រវេសន៍ លោក គៀត ច័ន្ទថារិទ្ធ ថ្លែងក្នុងពិធីនោះថា ដោយសារឥទ្ធិពលនៃការឆ្លងរីករាលដាលនៃជំងឺកូវីដ ១៩ បានធ្វើឱ្យប៉ះពាល់ដល់សុខុមាលភាព អាយុជីវិត ព្រមទាំងបានធ្វើឱ្យសេដ្ឋកិច្ចពិភពលោកទាំងមូលមានការធ្លាក់ចុះគួរឱ្យកត់សម្គាល់។ ចំណែកប្រទេសកម្ពុជា ក៏បានប្រឈមខ្លាំងចំពោះបញ្ហាកូវីដ ១៩ ដែលបានឆ្លងចូលក្នុងសហគមន៍ចាប់ពីថ្ងៃទី ២០ ខែកុម្ភៈ ឆ្នាំ ២០២១។ ប៉ុន្ដែរាជរដ្ឋាភិបាលបានចាត់វិធានការទប់ស្កាត់ទាន់ពេលវេលា ជាបន្តបន្ទាប់ ពិសេសការចាក់វ៉ាក់សាំងដល់ប្រជាពលរដ្ឋនៅទូទាំងប្រទេសឈានដល់កាត់បន្ថយការស្លាប់ ការឆ្លងថ្មី រហូតអាចបិទបញ្ចប់ព្រឹត្តិការណ៍សហគមន៍ថែមទៀត។
លោកឱ្យដឹងថា ទន្ទឹមនឹងនេះ អគ្គនាយកដ្ឋានអន្តោប្រវេសន៍នៅបានបំពេញភារកិច្ចផ្សេងៗទៀតដែលជាកិច្ចការស្នូលរបស់ខ្លួន តាមតួនាទីភារកិច្ចដែលក្រសួងបានប្រគល់ជូន ដោយសម្រេចបានលទ្ធផលធំធេង គួរជាទីមោទនៈ ទាំងលើការងារគ្រប់គ្រងការចេញចូលប្រទេស។ ការផ្ដល់ទិដ្ឋាការ បន្តទិដ្ឋាការស្នាក់នៅបណ្ដោះអាសន្ន ការគ្រប់គ្រងវត្ដមានស្នាក់នៅជាក់ស្ដែងរបស់ជនបរទេសនៅក្នុងព្រះរាជាណាចក្រកម្ពុជា។ ការគ្រប់គ្រងជនបរទេសអន្តោប្រវេសន៍ ការធ្វើអធិការកិច្ចហត្ថពលករបរទេស ការអនុវត្ដការងារនីតិវិធីចំពោះអ្នកសុំសិទ្ធិជ្រោកកោន និងជនភៀសខ្លួន ព្រមទាំងការងារស្រាវជ្រាវស៊ើបអង្កេតអនុវត្ដនីតិវិធីការបណ្ដេញចេញជាដើម។
លោក គៀត ច័ន្ទថារិទ្ធ បានថ្លែងថា៖ «ប៉ុន្ដែទោះបីជាយ៉ាងនេះក្ដី យើងក៏នៅជួបប្រទះបញ្ហាប្រឈមនានាជាច្រើនក្នុងក្របខ័ណ្ឌនៃតួនាទីភារកិច្ច និងការទទួលខុសត្រូវរបស់អគ្គនាយកដ្ឋានអន្តោប្រវេសន៍»៕
វីដេអូ៖
