.jpg)
កុមារ និងស្ត្រីដើរនៅក្នុងព្រៃសហគមន៍ជនជាតិដើមភាគតិច។ រូបថត Oxfam
ភ្នំពេញៈ អង្គការសង្គមស៊ីវិលចំនួន ៧ និងក្រុមប្រឹក្សាជាតិគាំពារសង្គម (NSPC) បានសហការគ្នារៀបចំនូវយុទ្ធនាការផ្សព្វផ្សាយនៅទូទាំងប្រទេសស្តីពីកិច្ចគាំពារសង្គម ដែលផ្តោតជាចម្បងពីសារៈសំខាន់នៃបណ្ណសមធម៌ កម្មវិធីឧបត្ថម្ភសាច់ប្រាក់ដល់ស្ត្រីមានផ្ទៃពោះ និងកុមារអាយុក្រោម ២ ឆ្នាំ និងមូលនិធិសមធម៌សុខាភិបាលផងដែរ។
យោងតាមសេចក្តីប្រកាសព័ត៌មានរួមគ្នាពីដៃគូអង្គការសង្គមស៊ីវិលផ្សព្វផ្សាយអំពីកិច្ចគាំពារសង្គម ដែលភ្នំពេញប៉ុស្តិ៍ទទួលបាននៅថ្ងៃទី ៦ ខែមេសា បានឱ្យដឹងថា អង្គការអុកស្វាម (Oxfam) រួមជាមួយអង្គការសង្គមស៊ីវិលចំនួន ៦ និងក្រុមប្រឹក្សាជាតិគាំពារ សង្គម (NSPC) បានសហការគ្នារៀបចំ យុទ្ធនាការផ្សព្វផ្សាយទូទាំងប្រទេសមួយស្តីពីកិច្ចគាំពារសង្គម ដោយមានជំនួយហិរញ្ញវត្ថុពីក្រសួងសហប្រតិបត្តិការ និងអភិវឌ្ឍន៍សេដ្ឋកិច្ចនៃសហព័ន្ធអាល្លឺម៉ង់ (BMZ) តាមរយៈអង្គការ GIZ។
ដៃគូសង្គមស៊ីវិលក្នុងគម្រោងនេះរួមមាន អង្គការជនជាតិដើមភាគតិចកម្ពុជា (CIPO) គណៈកម្មាធិការសហប្រតិបត្តិការដើម្បីកម្ពុជា (CCC) បណ្តាញកសិករ និងធម្មជាតិ (FNN) អង្គការសម្ព័ន្ធភាពដើម្បីអភិរក្សធនធានជលផល
(FACT) គណៈកម្មាធិការសម្របសម្រួលសកម្មភាពសុខភាព (HACC) និងវេទិកាអង្គការមិនមែនរដ្ឋាភិបាលស្ដីពីកម្ពុជា (NGOF)។
សេចក្តីប្រកាសព័ត៌មាននេះបានលើកឡើងថា យុទ្ធនាការនេះផ្តោតជាចម្បងលើសារៈសំខាន់នៃបណ្ណសមធម៌ កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ និងមូលនិធិសមធម៌សុខាភិបាល ដែលកំពុងត្រូវបានផ្សព្វផ្សាយតាមគ្រប់មធ្យោបាយដែលអាចធ្វើទៅបានដូចជា វិទ្យុក្នុងស្រុក ដំណឹងតាមប្រព័ន្ធអនឡាញ បណ្តាញសង្គម ក្រុមតេឡេក្រាម ការប្រជុំដោយផ្ទាល់នៅតាមសហគមន៍។
ប្រភពដដែលបានបន្តថា ការផ្សព្វផ្សាយតាមគ្រប់មធ្យោបាយទាំងនេះ ជាការផ្តល់ព័ត៌មានដល់ប្រជាពលរដ្ឋដែលស្ថិតនៅក្នុងតំបន់ដាច់ស្រយាលបំផុត ហើយដើម្បីធានាបរិយាប័ន្នក្រុមជនជាតិដើមភាគតិច កម្មវិធីសម្ភាសន៍តាមវិទ្យុក៏មានផ្តល់ជូនជាភាសាក្នុងស្រុក ដូចជា ព្នង គ្រឹង កួយ ទំពួន និងចារ៉ាយផងដែរ។
យោងតាមការវាយតម្លៃមួយដែលធ្វើឡើងដោយអង្គការអុកស្វាមពីកម្រិតនៃការយល់ដឹង និងការទទួលបានព័ត៌មានស្តីពីគម្រោងគាំពារសង្គមក្នុងចំណោមប្រជាពលរដ្ឋកម្ពុជាដែលបានចេញផ្សាយកាលពីខែតុលា ឆ្នាំ ២០២១ កន្លងទៅ បានបង្ហាញថា កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ និងមូលនិធិសមធម៌សុខាភិបាលមិនត្រូវបានប្រជាពលរដ្ឋកម្ពុជាស្គាល់ជាទូទៅនៅឡើយ។
តាមការសិក្សានេះ ៥៤% នៃអ្នកឆ្លើយតបនឹងបទសម្ភាសបានដឹងពីកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ ហើយចំនួន ៤១% បានដឹងអំពីមូលនិធិសមធម៌សុខាភិបាល។
នាយិកាអង្គការអុកស្វាមលោកស្រី ភាណ សោភ័ណ បានឱ្យដឹងថា កិច្ចគាំពារសង្គម ជាឧបករណ៍ដ៏សំខាន់មួយសម្រាប់កាត់បន្ថយភាពងាយរងគ្រោះរបស់ប្រជាជនពីផលប៉ះពាល់សេដ្ឋកិច្ច បរិស្ថាន និងសង្គមនៅទូទាំងវដ្តជីវិតរបស់ពួកគេ។
លោកស្រីមានប្រសាសន៍ថា៖ «កិច្ចគាំពារសង្គមបានបង្ហាញពីសក្តានុពលក្នុងការគាំទ្របុគ្គលដែលរស់នៅក្នុងភាពក្រីក្រ ឬបុគ្គលដែលប្រឈមមុខនឹងការធ្លាក់ចូលទៅក្នុងភាពក្រីក្រវិញ។ ដូច្នេះ នេះជាការចាំបាច់ និងបន្ទាន់ដែលត្រូវធ្វើការសម្របសម្រួលកិច្ចសហការពហុភាគី ដើម្បីដោះស្រាយបញ្ហាកង្វះខាតចំណេះដឹង និងការយល់ដឹងនេះ»។
ជាមួយគ្នានេះដែរ លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គមបានថ្លែងឱ្យដឹងដែរថាជាការសំខាន់ណាស់ដែលត្រូវធ្វើការលើកកម្ពស់ការយល់ដឹងរបស់សាធារណជនអំពីប្រព័ន្ធគាំពារសង្គមកម្ពុជា និងអភិវឌ្ឍវប្បធម៌នៃការយល់ដឹងអំពីកិច្ចគាំពារសង្គមឈានទៅពង្រីកការអភិវឌ្ឍ ប្រព័ន្ធគាំពារសង្គមនៅក្នុងប្រទេសកម្ពុជាបន្ថែមទៀត។
លោកបន្ថែមថា៖ «យើងមានការទទួលខុសត្រូវក្នុងការអប់រំសាធារណជនអំពីអត្ថប្រយោជន៍ដែលប្រព័ន្ធជំនួយសង្គម និងសន្តិសុខសង្គមផ្តល់ជូនប្រជាពលរដ្ឋ និងប្រទេសជាតិ។ បុគ្គលដែលទទួលបានព័ត៌មានច្បាស់អំពីអត្ថប្រយោជន៍នៃកិច្ចគាំពារសង្គម នឹងកាន់តែសកម្មក្នុងការប្រើប្រាស់កម្មវិធីនេះ»។
បើតាមសេចក្តីប្រកាសព័ត៌មាននេះគំនិតផ្តួចផ្តើមនេះគាំទ្រដល់ការបង្កើតយន្តការផ្សព្វផ្សាយជាតិគាំពារសង្គម ដែលជាកិច្ចសហការរវាងក្រុមប្រឹក្សាជាតិគាំពារសង្គម ដែលរួមមានក្រសួង-ស្ថាប័នចំនួន ១១ អង្គការអុកស្វាម និងអង្គការសង្គមស៊ីវិលចំនួន ៦ ដែលតំណាងឱ្យអង្គការសង្គមស៊ីវិល និងអង្គការនៅថ្នាក់សហគមន៍ ចំនួនជាង ៧០០។
យោងតាមក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ចាប់ពីថ្ងៃទី ២៥ ខែមិថុនា ឆ្នាំ ២០២០ មកដល់បច្ចុប្បន្ននេះ បានចំនួន ៨ ជុំ មាន ២១ លើករួចមកហើយ។
ក្រសួងបានឱ្យដឹងថា គិតត្រឹមថ្ងៃទី ២៤ ខែមីនា រាជរដ្ឋាភិបាលបានផ្តល់ប្រាក់ឧបត្ថម្ភចំនួន ៦២២,៩២ លានដុល្លារអាមេរិក ទៅដល់គ្រួសារក្រីក្រ និងងាយរងគ្រោះ ចំនួន ៦៩ ម៉ឺនគ្រួសារ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាជាតិគាំពារសង្គម បានថ្លែងក្នុងពិធីបើកកម្មវិធីសប្តាហ៍គាំពារសង្គមកាលពីពេលថ្មីៗកន្លងទៅនេះថា ឥទ្ធិពលនៃវិបត្តិជំងឺកូវីដ ១៩ មិនត្រឹមតែមិនបានបន្ទច់បង្អាក់ការខិតខំរបស់រាជរដ្ឋាភិបាលក្នុងការជំរុញការអភិវឌ្ឍប្រព័ន្ធគាំពារសង្គមប៉ុណ្ណោះទេ វិបត្តិនេះ ថែមទាំងបានជំរុញឱ្យរាជរដ្ឋាភិបាលបង្កើនការយកចិត្តទុកដាក់កាន់តែខ្លាំងឡើងក្នុងការកសាងប្រព័ន្ធគាំពារសង្គមមួយឱ្យកាន់តែរឹងមាំថែមទៀត។
លោកថា រាជរដ្ឋាភិបាលក៏បានយកចិត្តទុកដាក់ជាពិសេស ដោយផ្តោតសំខាន់លើការកសាង «ភាពធន់-Resilience»ដើម្បីឆ្លើយតបនឹងវិបត្តិនានាផងដែរ៕
