ភ្នំពេញៈ ក្រសួងសុខាភិបាលបានប្រកាសរកឃើញអ្នកឆ្លងវីរុសកូវីដ ១៩ ចំនួនជិត ៣០ នាក់ បន្ថែមទៀតដែលសុទ្ធតែជាប្រភេទវីរុសបំប្លែងថ្មីអូមីក្រុងទាំងអស់ និងមានអ្នកជាសះស្បើយបន្ថែមចំនួនជិត ៧០ នាក់ផងដែរ ប៉ុន្តែមិនមានអ្នកស្លាប់ថ្មីដោយសារមេរោគកូវីដ ១៩ ឡើយ។
យោងតាមសេចក្តីប្រកាសរបស់ក្រសួងសុខាភិបាលនៅថ្ងៃទី ៧ ខែ មេសា ឆ្នាំ ២០២២ បានបញ្ជាក់ថា មនុស្សចំនួន ២៧ នាក់ទៀត មានឆ្លងវីរុសកូវីដ ១៩ និងមានអ្នកជាសះស្បើយចំនួន ៦៨ នាក់។ ការរកឃើញនេះមានករណីឆ្លងសហគមន៍ចំនួន ២៧ នាក់ និងមិនមានការរកឃើញឆ្លងលើអ្នកដំណើរពីបរទេសទេ។
គិតត្រឹមព្រឹកថ្ងៃទី ៧ ខែ មេសា ឆ្នាំ ២០២២ កម្ពុជាមានអ្នកឆ្លងវីរុសកូវីដ ១៩ សរុបទូទាំងប្រទេសចំនួន ១៣៥ ៨៦១ នាក់ អ្នកជាសះស្បើយ សរុបចំនួន ១៣២ ៥១៧ នាក់ និងអ្នកស្លាប់មានចំនួន ៣ ០៥៥ នាក់៕