.jpg)
ជនសង្ស័យក្នុងបទល្មើសនេសាទក្នុងបឹងទន្លេសាបនៅភូមិសាស្ត្រខេត្តសៀមរាប ដែលត្រូវបានឃាត់ខ្លួន កាលពីថ្ងៃទី៦ មេសា។ រូបថត ប៉ូលិសខេត្តសៀមរាប
សៀមរាបៈ តុលាការខេត្តសៀមរាប សម្រេចឃុំខ្លួនជនសង្ស័យក្នុងបទល្មើសនេសាទចំនួន ៤ នាក់ នៅពន្ធនាគារខេត្ត ជាបណ្ដោះអាសន្ន បន្ទាប់ពីត្រូវបានក្រុមអនុគណៈកម្មការបង្ក្រាបបទល្មើសជលផលចាប់ឃាត់ខ្លួនកាលពីថ្ងៃទី ៦ ខែមេសា ខណៈពួកគេកំពុងនាំគ្នាអូសអួនចាប់ត្រីក្នុងបឹងទន្លេសាប ដោយមានភ្ជាប់ប្រើឧបករណ៍ឆក់ខុសច្បាប់។ នេះបើតាមអ្នកនាំពាក្យសាលាដំបូងខេត្តសៀមរាប។
លោកយ៉ីន ស្រាង អ្នកនាំពាក្យ សាលាដំបូងខេត្តសៀមរាប ប្រាប់ភ្នំពេញប៉ុស្តិ៍ នៅរសៀលថ្ងៃទី៨ ខែមេសា ថា ជនសង្ស័យ ឈ្មោះដឹប ខា អាយុ៥៦ឆ្នាំ ទីលំនៅភូមិមាត់ខ្លា ឃុំអន្លង់សំណរ ស្រុកជីក្រែង ខេត្តសៀមរាប និងបក្ខពួក៣នាក់ទៀត មានឈ្មោះខា បូរី អាយុ២០ឆ្នាំ ឈ្មោះលិន ហុកលាង អាយុ២០ឆ្នាំ និងឈ្មោះ រ៉ាយ សុជា អាយុ២៣ឆ្នាំ។ ពួកគេ ត្រូវបានចៅក្រមស៊ើបសួរសាលាដំបូងខេត្តសៀមរាប សម្រេចចោទប្រកាន់ក្នុងបទល្មើសនេសាទត្រី ដោយប្រើឧបករណ៍ឆក់ តាមមាត្រា៩៨ នៃច្បាប់ស្ដីពីជលផល។
លោកបញ្ជាក់ថា៖«ក្រោយពីសាកសួរ និងចោទប្រកាន់រួច លោកចៅក្រមស៊ើបសួរ បានបង្គាប់ឱ្យមន្ត្រីនគរបាលយុត្តិធម៌ នាំខ្លួនពួកគេទៅឃុំនៅពន្ធនាគារខេត្តភ្លាមៗ ដើម្បីរង់ចាំការជំនុំជម្រះនៅពេលក្រោយ»។
យោងតាមមាត្រា៩៨នៃច្បាប់ជលផល ពួកគេនឹងប្រឈមការផ្ដន្ទាទោសជាប់ពន្ធនាគារ ពី៣ឆ្នាំ ទៅ៥ឆ្នាំ។
ជុំវិញការបង្ក្រាបបទល្មើសជលផលនេះ លោកទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាបប្រាប់ភ្នំពេញប៉ុស្តិ៍ថា គិតចាប់ពីថ្ងៃទី២ ខែមីនា ដល់ថ្ងៃទី៦ ខែមេសា ឆ្នាំ២០២២ ក្រុមសមត្ថកិច្ចចម្រុះ នៃរដ្ឋបាលខេត្តសៀមរាប បានបង្ក្រាបបទល្មើសឧបករណ៍អួនអូសទឹកសាប២០វង់ ម៉ាញ់៣វង់ ឈឺបយន្ត២គ្រឿង អួនហ៊ុម៨វង់ កាណូត៤៤គ្រឿង ម៉ាស៊ីន១៤គ្រឿង និងបានស្រាវជ្រាវកំណត់មុខសញ្ញាជនប្រព្រឹត្តបទល្មើស បាន១១នាក់ ដោយបានកសាងនិងបញ្ជូនសំណុំរឿងទៅតុលាការ១១ករណី។
ដោយឡែក លោកភុំ វិមល នាយខណ្ឌរដ្ឋបាលជលផល ខេត្តពោធិ៍សាត់ ប្រាប់ភ្នំពេញប៉ុស្តិ៍ថា កាលពីថ្ងៃទី៦ មេសា លោកបានដឹកនាំកម្លាំងចម្រុះចុះបង្ក្រាបបទល្មើសនេសាទលើផ្ទៃទឹកបឹងទន្លេសាប ស្ថិតក្នុងភូមិសាស្ត្រឃុំកំពុងលួង ស្រុកក្រគរ។ ជាលទ្ធផល ក្រុមការងារបានបង្ក្រាបនឹងចាប់រឹបអូសវត្ថុតាងនៃបទល្មើសបានមួយចំនួន រួមមានសាច់អួនក្រឡាល្អិត ដែលជនសង្ស័យយកទៅប្លុងចោលក្នុងទឹកប្រវែង៦៥០ម៉ែត្រ និងទូកសំប៉ាន១គ្រឿង ដែលផ្ទុកសាច់អួនទឹកសាប ទំហំ៣០ម៉ែត្រគុណ២៥ម៉ែត្រ ចំនួន២វង់ បង្គោលឈើចំនួន៨៦០ដើម។
លោកបញ្ជាក់ថា៖ «ចំពោះវត្ថុតាងទាំងអស់ ដែលបានដកហូត សមត្ថកិច្ចយើងបានយកទៅរក្សាទុក នៅស្នាក់ការរដ្ឋបាលជលផលកំពង់លួង ដើម្បីបំផ្លាញចោលតាមនីតិវិធីច្បាប់»៕
