ស្ទឹងត្រែងៈ យុទ្ធនាការអន្ទាក់សូន្យក្នុងតំបន់ការពារធម្មជាតិកម្ពុជាកំពុងអំពាវនាវឱ្យមានការចូលរួមយ៉ាងសកម្មថែមទៀតពីប្រជាពលរដ្ឋ និងសហគមន៍មូលដ្ឋានទាំងអស់ ដើម្បីបញ្ឈប់ការដាក់អន្ទាក់គ្រប់ប្រភេទក្នុងតំបន់ការពារធម្មជាតិកម្ពុជា ខណៈយុទ្ធនាការនេះចាប់ផ្ដើមអនុវត្ដមុនគេនៅក្រុងស្ទឹងត្រែងនៃខេត្តស្ទឹងត្រែង នាថ្ងៃទី ៧ ខែមេសា។
លោក នេត្រ ភក្ត្រា រដ្ឋលេខាធិការក្រសួងបរិស្ថាន ថ្លែងថា រាប់ចាប់ពីប្រជាពលរដ្ឋក្នុងភូមិដល់អ្នកផ្តល់សេវាដឹកជញ្ជូន អ្នកលក់ដូរម្ហូបអាហារនៅទីផ្សារក្នុងក្រុង និងទីប្រជុំជនរហូតដល់ម្ចាស់ភោជនីយដ្ឋាន និងអតិថិជនការចូលរួមរបស់ប្រជាពលរដ្ឋសហគមន៍ គឺដើរតួយ៉ាងសំខាន់ក្នុងការផ្តល់សុវត្ថិភាពដល់ការរស់រាននៃសត្វព្រៃគ្រប់ប្រភេទក្នុងទីជម្រកព្រៃធម្មជាតិ និងក្នុងការចូលរួមបញ្ឈប់ការប្រើប្រាស់ និងការដាក់អន្ទាក់ក្នុងដែនជម្រកធម្មជាតិសម្រាប់សត្វព្រៃ។ ក្រសួងបរិស្ថានអំពាវនាវដល់ប្រជាពលរដ្ឋទាំងអស់ឱ្យបញ្ឈប់ការទទួលទានសាច់សត្វព្រៃ ឬជាវផលិតផលពីសត្វព្រៃដទៃទៀតជាដាច់ខាត។
លោកថ្លែងថា៖ «យើងខ្ញុំសូមអំពាវនាវយ៉ាងទទូចដល់ប្រជាពលរដ្ឋទាំងអស់នៅក្នុងប្រទេសកម្ពុជាឱ្យនិយាយថា ទេចំពោះសាច់សត្វព្រៃ និងចូលរួមក្នុងសកម្មភាពអភិរក្សធនធានធម្មជាតិរបស់ព្រះរាជាណាចក្រកម្ពុជាឱ្យនៅស្ថិតស្ថេរគង់វង្ស»។
ព្រះតេជព្រះគុណ ថូ ធូរស់ ព្រះវិន័យធរ ខេត្តឧត្តរមានជ័យ និងជាប្រធានសង្ឃរុក្ខវ័ន លើកឡើងថា ប្រជាពលរដ្ឋកម្ពុជាគ្រប់រូបរាប់ទាំងព្រះសង្ឃផងដែរ មានតួនាទីយ៉ាងសំខាន់ណាស់ក្នុងការចូលរួមការពារ និងស្ដារឡើងវិញនូវចំនួនសត្វព្រៃ និងធនធានធម្មជាតិកម្ពុជា។
ព្រះតេជព្រះគុណបញ្ជាក់ថា៖ «ព្រះសង្ឃកម្ពុជាទទួលស្គាល់ពីសារៈសំខាន់នៃតួនាទីរបស់ខ្លួនក្នុងការផ្សព្វផ្សាយដើម្បីបញ្ជ្រាបពុទ្ធឱវាទដែលមានឥទ្ធិពលវិជ្ជមានក្នុងការអប់រំ និងអាចកែប្រែឥរិយាបថ និងជំនឿដែលពុំមានមូលដ្ឋាន ត្រឹមត្រូវរបស់អ្នកនិយមបរិភោគសាច់ [សត្វ] ព្រៃ ឬជាវផលិតផលពីសត្វព្រៃ»។
ព្រះតេជព្រះគុណបន្ថែមថា៖ «ព្រះសង្ឃចាំបាច់ចូលរួមតាមរយៈការផ្តល់ធម៌ទេសនា ឬជជែកជាប្រចាំជាមួយពុទ្ធសាសនិកដោយបញ្ជ្រាបនូវសារៈសំខាន់ៗ អំពីសារៈសំខាន់នៃការអភិរក្សសត្វព្រៃកម្ពុជា និងភាពចាំបាច់ក្នុងការកាត់បន្ថយ [តម្រូវការ] នៃសាច់ និងផលិតផលសត្វព្រៃ»។
លោក សេង ទៀក នាយកអង្គការ WWF ថ្លែងថា វិធានការសម្រាប់ពង្រឹងការអនុវត្តច្បាប់យ៉ាងតឹងរ៉ឹង និងការនាំខ្លួនអ្នកដាក់អន្ទាក់ អ្នកប្រមាញ់ និងអ្នកជួញដូរសត្វព្រៃទៅតុលាការមានភាពចាំបាច់ ដើម្បីបញ្ចប់ការសម្លាប់សត្វព្រៃកុំឱ្យមានតទៅទៀត។ លោកថ្លែងថា៖ «លើសពីនេះទៀតគេត្រូវដាក់ចេញនូវវិធានការដើម្បីបិទរាល់ទីផ្សារសត្វព្រៃទាំងអស់នៅក្នុងមូលដ្ឋាន និងត្រូវអនុវត្តការចុះត្រួតពិនិត្យតាមដានជាប្រចាំដោយមន្ត្រីអនុវត្តច្បាប់ចល័ត»។
លោកបញ្ជាក់ថា៖ «វានៅទាន់ មិនយឺតពេលទេ ក្នុងការរួមគ្នា ដើម្បីធ្វើឱ្យមានការផ្លាស់ប្តូរមួយជាវិជ្ជមាន សម្រាប់ការអភិរក្ស និងស្តារចំនួនសត្វព្រៃ និងធនធានធម្មជាតិឡើងវិញ។ ប៉ុន្តែយើងត្រូវតែចាប់ផ្តើមកិច្ចការនេះចាប់ពីពេលឥឡូវនេះតទៅនៅគ្រប់លំដាប់ថ្នាក់ទាំងអស់ ដើម្បីរៀបចំវិធានការអភិរក្សរួមគ្នាបន្ទាន់ក្នុងការអភិរក្សធនធានព្រៃឈើ សត្វព្រៃ និងស្តារធនធានធម្មជាតិកម្ពុជាឱ្យប្រសើរឡើង»។
បើតាមលោក សេង ទៀក ប្រសិនបើគ្មានវិធានការបន្ទាន់ទេនោះកម្ពុជានឹងប្រឈមនឹងការបាត់បង់ធនធានសត្វព្រៃរបស់ខ្លួនដែលមានតម្លៃមិនអាចកាត់ថ្លៃបានជាសកលក្នុងពេលអនាគត។
លោក Jackson Frechette នាយកកម្មវិធីនៃមហាតំបន់មេគង្គនៃអង្គការ CI លើកឡើងថា តាមរយៈយុទ្ធនាការនេះបានជួយបង្កើនការយល់ដឹងដល់សាធារណជនអំពីកត្តាគំរាមកំហែង និងការទទួលរងគ្រោះថ្នាក់ច្រើនយ៉ាងដែលសត្វព្រៃកម្ពុជាកំពុងជួបប្រទះជារៀងរាល់ថ្ងៃ។
លោកបានថ្លែងថា៖ «អ្នកពាក់ព័ន្ធទាំងអស់ត្រូវចូលរួមផ្តល់នូវធនធាន និងលទ្ធភាពគ្រប់គ្រាន់ដល់អាជ្ញាធរ និងភ្នាក់ងារមានសមត្ថកិច្ចការពារសត្វព្រៃដើម្បីពួកគាត់អាចរៀបចំនូវវិធានការសមស្រប និងប្រកប [ដោយ] ភាពច្នៃប្រឌិតសម្រាប់ជាដំណោះស្រាយឆ្លើយតបឱ្យដល់ឫសគល់នៃបញ្ហាពាក់ព័ន្ធនឹងការជួញដូរសត្វព្រៃ ដើម្បីឈានទៅស្តារធនធានធម្មជាតិកម្ពុជាឡើងវិញ»។
លោក ស្វាយ សំអ៊ាង អភិបាលខេត្ដស្ទឹងត្រែងបានឱ្យដឹងថា ក្នុងភូមិសាស្ត្រខេត្តស្ទឹងត្រែង មានតំបន់ការពារធម្មជាតិ និងបរិស្ថានដែលក្នុងនោះរួមមាន តំបន់ឧទ្យានជាតិវីរជ័យ ផ្ទៃដី ៩៩ ១៥០ ហិកតា ឧទ្យានជាតិវ៉ឺនសៃ សៀមប៉ាង មានផ្ទៃដី ទំហំ ៤៤ ៨១៧ ហិកតា ដែនជម្រកសត្វព្រៃព្រៃឡង់មានផ្ទៃដី ១២១ ៩០៣ ហិកតា ដែនជម្រកសត្វព្រៃសៀមប៉ាង មានផ្ទៃដី ១៣៣ ៧០៧,៧៣ ហិកតា និងតំបន់រ៉ាមសារ មានផ្ទៃដី ១៤ ៦០០ ហិកតា។
លោកថា ក្នុងស្ថានភាពនៃតំបន់ការពារដែលមានផ្ទៃដីធំទូលាយនេះ មន្ត្រី និងកម្លាំងមានសមត្ថកិច្ចគ្រប់ផ្នែកបានខិតខំប្រឹងប្រែងអស់កម្លាំងកាយចិត្តក្នុងការអនុវត្តវិធានការ ទប់ស្កាត់ការប្រព្រឹត្តបទល្មើសនានាក្នុងដែននៃតំបន់ការពារធម្មជាតិទាំងនោះ ប៉ុន្តែបញ្ហាបទល្មើសមួយចំនួននៅតែកើតមានឡើងជាបន្តបន្ទាប់។
លោកថ្លែងថា៖ «តាមរយៈប្រធានបទនៃយុទ្ធនាការនៅថ្ងៃនេះ ខ្ញុំសូមធ្វើការវាយតម្លៃខ្ពស់ និងសូមថ្លែងអំណរគុណដ៏ជ្រាលជ្រៅ និងថ្លៃថ្លាបំផុតចំពោះឯកឧត្តមរដ្ឋមន្ត្រី និងថ្នាក់ដឹកនាំគ្រប់លំដាប់ថ្នាក់នៃក្រសួងបរិស្ថាន និងអង្គការដៃគូអភិវឌ្ឍន៍ ដែលបានគាំទ្រ និងផ្តួចផ្តើមរៀបចំប្រារព្ធឡើងនូវយុទ្ធនាការ អន្ទាក់សូន្យក្នុងតំបន់ការពារធម្មជាតិ»។
លោកបន្ថែមថា យុទ្ធនាការនេះ គឺជាប្រធានបទមួយឆ្លុះបញ្ចាំងទៅនឹងការអប់រំ ផ្សព្វផ្សាយជំរុញការចូលរួមថែរក្សា ស្រឡាញ់រាល់ធនធានធម្មជាតិ ដែលជាសម្បត្តិដ៏មានសក្តានុពលក៏ដូចជាការបំផុសចលនានៃការចូលរួមគោរពច្បាប់ និងអនុវត្តវិធានការច្បាប់ ដើម្បីធានាការគ្រប់គ្រង ថែរក្សាការពារធនធានទាំងនោះឱ្យបានគង់វង្ស ស្ថិតស្ថេរចីរកាលតរៀងទៅ៕
វីដេអូ៖