.jpg)
លោក នេត សាវឿន អគ្គស្នងការនគរបាលជាតិ។ រូបថត Neth Savoeun's Facebook
ភ្នំពេញៈ លោក នេត សាវឿន អគ្គស្នងការនគរបាលជាតិជំរុញឱ្យមន្ដ្រីនគរបាលត្រូវពង្រឹងការអនុវត្តច្បាប់ដើម្បីកាត់បន្ថយគ្រោះថ្នាក់ចរាចរណ៍ និងក៏ត្រូវពង្រឹងបន្ថែមទៀត ក្នុងការទប់ស្កាត់បទល្មើសផ្សេងៗ ដើម្បីការពារសន្តិសុខ និងសណ្តាប់ធ្នាប់សង្គមផងដែរ។
លោក នេត សាវឿន បានថ្លែងបែបនេះ ពេលដឹកនាំកិច្ចប្រជុំបូកសរុបសភាពការណ៍ និងលទ្ធផលនៃប្រតិបត្តិការប្រចាំត្រីមាសទី ១ ឆ្នាំ ២០២២ និងផ្សព្វផ្សាយទិសដៅការងារឆ្នាំ ២០២២ របស់អគ្គស្នងការដ្ឋាននគរបាលជាតិ កាលពីថ្ងៃទី ៦ ខែមេសា។
ថ្លែងប្រាប់អ្នកសារព័ត៌មានក្រោយកិច្ចប្រជុំនេះលោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិបញ្ជាក់ថា កិច្ចប្រជុំផ្តោតទៅលើការវាយតម្លៃសភាពការណ៍ និងលទ្ធផលកិច្ចប្រតិបត្តិការសម្រាប់ត្រីមាសទី ១ ដែលសភាពការណ៍មានលក្ខណៈល្អប្រសើរ បើទោះបីជាមានបញ្ហាខ្លះៗ ពាក់ព័ន្ធនិងការបង្កចលាចលក្នុងសង្គមការបំពុលព័ត៌មានតាមបណ្តាញសង្គម ប៉ុន្តែរាល់បញ្ហាទាំងអស់ត្រូវបានដោះស្រាយ។
លោកថ្លែងថា៖ «អាជ្ញាធរក៏បានចាត់វិធានការពង្រឹងបន្ថែមតាមវិធានការសន្តិសុខជារួម និងតាមជំនាញជាពិសេសជំរុញវិធានការកាត់បន្ថយបទល្មើសជាទូទៅ ដើម្បីធានាឱ្យបាននូវបរិយាកាសសង្គម»។ លោកបញ្ជាក់ថា៖ «ឯកឧត្តមនាយឧត្តមសេនីយ៍ សន្តិបណ្ឌិត នេត សាវឿន នៅក្នុងកិច្ចប្រជុំបានផ្តាំផ្ញើនូវចំណុចមួយចំនួនដល់មន្ដ្រីនគរបាលក្នុងនោះ ទី ១ ត្រូវការពារឱ្យបានដាច់ខាតនូវព្រឹត្តិការណ៍នយោបាយ ព្រឹត្តិការណ៍បុណ្យជាតិ-អន្តរជាតិធំៗ ជាពិសេសបុណ្យចូលឆ្នាំប្រពៃណីខ្មែរ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងការការពារកិច្ចប្រជុំកំពូលអាស៊ាន»។
ទី ២ ការពារឱ្យបានដាច់ខាតនូវស្ថាប័នជាតិកំពូលៗ ការពារគោលដៅនយោបាយ ការទូត សេដ្ឋកិច្ច និងវប្បធម៌។ ទី ៣ ការពារព្រះមហាក្សត្រ និងឥស្សរជនជាន់ខ្ពស់ជាតិ និងទី ៤ ពង្រឹងវិធានការដើម្បីទប់ស្កាត់ការបំពុល ការបង្កចលាចលក្នុងសង្គមដែលធ្វើឱ្យរំខានដល់សន្តិសុខជាតិ។
លោក នេត សាវឿន ក៏បានណែនាំឱ្យមន្ដ្រីនគរបាលត្រូវកាត់បន្ថយបទល្មើសទូទៅដើម្បីធានាដល់សន្តិសុខ និងសណ្តាប់ធ្នាប់សង្គមបានល្អប្រសើរ ជាពិសេសសម្រាប់ឆ្នាំ ២០២២ នេះ គ្រប់នាយកដ្ឋានអង្គភាពជំនាញ និងស្នងការនគរបាលរាជធានី-ខេត្ត។ ត្រូវកសាងផែនការសកម្មភាពជាក់ស្តែង ដើម្បីធានាឱ្យបាននូវព្រឹត្តិការណ៍សំខាន់ៗ ជាពិសេសពិធីបុណ្យចូលឆ្នាំប្រពៃណីខ្មែរ។ ត្រូវចាត់កម្លាំងការពារ នៅតាមគោលដៅឱ្យបានច្បាស់លាស់នៅតាមទីតាំងវត្តអារាម រមណីយដ្ឋានកម្សាន្តសប្បាយរបស់ប្រជាពលរដ្ឋ ការដោះស្រាយសណ្តាប់ធ្នាប់នៅតាមដងផ្លូវ និងការការពារសហគមន៍ផ្ទះសំបែងរបស់ប្រជាពលរដ្ឋដែលធ្វើដំណើរទៅស្រុកកំណើតផងដែរ។
លោកថ្លែងថា៖ «ឯកឧត្ដមអគ្គស្នងការនគរបាលជាតិបានជំរុញជួយកាត់បន្ថយហេតុការណ៍គ្រោះថ្នាក់ចរាចរណ៍ ដោយការពង្រឹងការអនុវត្តច្បាប់ ចរាចរណ៍ផ្លូវគោកជាមួយគ្នានោះ ក៏ស្នើឱ្យមានការអប់រំកែប្រែឥរិយាបថរបស់កងកម្លាំងពិសេសកម្លាំងនគរបាលចរាចរណ៍ ដែលធ្វើប្រតិបត្តិការតាមដងផ្លូវ បើទោះបីជាមានការហត់នឿយ ប៉ុន្តែត្រូវបង្កើនការអត់ធ្មត់ថែមទៀត ទាំងឥរិយាបថបំពេញការងារ ការផាកពិន័យ និងការអប់រំណែនាំប្រជាពលរដ្ឋ»។
ក្រៅពីនេះ លោក នេត សាវឿន ក៏បានស្នើឱ្យគ្រប់នាយកដ្ឋាន-អង្គភាពជំនាញ ស្នងការនគរបាលរាជធានី-ខេត្ត ត្រូវពង្រឹងយន្តការដឹកនាំនៅក្នុងអង្គភាពនីមួយៗទាំងរបៀបរបបការងារ ទាំងការគ្រប់គ្រងកងកម្លាំង ទាំងការងារប្រចាំបញ្ជា ជាពិសេសការយកបេះដូង និងមនោសញ្ចេតនាក្នុងការដឹកនាំកងកម្លាំងក្នុងអង្គភាព៕
