ភ្នំពេញៈ មន្ត្រីជំនាញផ្នែកសារមន្ទីរបានថ្លែងថា រូបបដិមាព្រះគ្រឹស្នាទ្រភ្នំគោវធ៌ន ដែលមានអាយុកាលជាង ១ ៥០០ ឆ្នាំរបស់កម្ពុជាកំពុងទទួលបានការលើកតម្កើងជាអន្តរជាតិ បន្ទាប់ពីទទួលបានការគាំទ្រច្រើនពីអ្នកទស្សនាក្នុងកម្មវិធីពិព័រណ៍ 3D នៅទីក្រុង Cleveland រដ្ឋ Ohio សហរដ្ឋអាមេរិកកាលពីខែវិច្ឆិកាឆ្នាំមុន ហើយបច្ចុប្បន្ន គ្រោងយកទៅតាំងពិព័រណ៍តាមប្រព័ន្ធ 3D នេះជាថ្មីម្ដងទៀតនៅរដ្ឋធានីវ៉ាស៊ីនតោននាចុងខែមេសានេះ។
លោក សុខ សូដា អនុប្រធាននាយកដ្ឋានសារមន្ទីរនៃក្រសួងវប្បធម៌ និងវិចិត្រសិល្បៈដែលបានអញ្ជើញចូលរួមពិព័រណ៍បានប្រាប់ភ្នំពេញប៉ុស្តិ៍នៅថ្ងៃទី ៦ ខែមេសាថា កាលពីអំឡុងខែវិច្ឆិកាឆ្នាំមុន រូបលោកត្រូវបានខាងសារមន្ទីរ Cleveland អញ្ជើញចូលរួមជាកិតិ្តយសក្នុងកម្មវិធីបើកសម្ពោធការតាំងពិព័រណ៍ 3D ក្រោមប្រធានបទ «ការលាតត្រដាងពីប្រវត្តិនៃរូបបដិមាព្រះគ្រឹស្នា៖ ដំណើរទៅកាន់ដែនគិរីស័ក្តិសិទ្ធិនៃកម្ពុជា»។
ពិព័រណ៍នេះ ត្រូវបានបិទបញ្ចប់កាលពីចុងខែមករា ឆ្នាំ ២០២២ ជាមួយសំឡេងគាំទ្រ និងការប្តេជ្ញាចិត្តដ៏ក្លៀវក្លារបស់អ្នកទស្សនារាប់លាននាក់ថានឹងរៀបចំពេលវេលាដ៏សមស្របមួយ ដើម្បីធ្វើដំណើរទៅកាន់ដែនដីកំណើតនៃប្រវត្តិដ៏អស្ចារ្យរបស់រូបបដិមាព្រះគ្រឹស្នាទ្រភ្នំគោវធ៌នដ៏មហិមានេះ។
លោកបានបញ្ជាក់ថា៖ «ពិព័រណ៍នោះបានធ្វើឱ្យអារម្មណ៍របស់ខ្ញុំរំភើបគ្មានអ្វីមកផ្ទឹមបានទេ។
វាជាពិព័រណ៍លើកដំបូងដែលខ្ញុំមិនធ្លាប់ទស្សនាពីមុនមក វាពិតជាអស្ចារ្យណាស់»។
បើតាមលោក សូដា តាមរយៈប្រព័ន្ធទំនើបកម្ម 3D អ្នកចូលរួមទស្សនាពិព័រណ៍នោះត្រូវបានគេឱ្យពាក់ឧបករណ៍មួយឈ្មោះ Hololens។ វាបានផ្ដល់នូវបទពិសោធដ៏អស្ចារ្យសម្រាប់អ្នកទស្សនានូវអារម្មណ៍ និងរូបភាពនិមិ្មតកម្មដែលមើលទៅហាក់ដូចជាកំពុងធ្វើដំណើរឆ្ពោះទៅកាន់ទីតាំងពិតប្រាកដនៃប្រវត្តិរបស់រូបបដិមានេះក្នុងដែនគិរីស័ក្តិសិទ្ធិនៃកម្ពុជាយ៉ាងដូច្នោះដែរ។
លោកមានប្រសាសន៍បន្ថែមថា៖ «ក្រោយទស្សនាពិព័រណ៍នោះ អ្នកទស្សនាជាច្រើនបានសម្ដែងភាពរីករាយ ហើយពួកគេបាននិយាយថា ពួកគេនឹងរកពេលវេលាសមស្របមួយ ដើម្បីមកទស្សនាផ្ទាល់នៅទឹកដីកំណើតនៃរូបបដិមាព្រះគ្រឹស្នា ទ្រភ្នំគោវធ៌ន ក្នុងប្រទេសកម្ពុជា»។
លោកបានបន្តថា តាមរយៈការអះអាងរបស់អ្នកទស្សនាពិព័រណ៍នោះក៏ជាផ្នែកមួយជំរុញឱ្យមានការស្រូបទាញនូវលំហូរទេសចរបរទេសបន្ថែមទៀតចូលមកទស្សនាដែនដីពិសិដ្ឋនៃរូបដិមាព្រះគ្រឹស្នាទ្រភ្នំគោវធ៌នដ៏អស្ចារ្យ និងមានអាយុកាលយូរលង់រាប់សតវត្សរ៍ដែលស្ថិតក្នុងស្រុកអង្គរបុរី ខេត្តតាកែវ។
បើតាមប្រសាសន៍របស់អ្នកស្រី Sonya Rhie Mace គទានុរក្សប្រចាំសារមន្ទីរសិល្បៈ Cleveland នៅទីក្រុង Cleveland រដ្ឋ Ohio សហរដ្ឋអាមេរិកដែលជាអ្នកដឹកនាំ និងរៀបចំពិព័រណ៍បានឱ្យដឹងថា ពិព័រណ៍នេះលេចចេញជារូបរាងឡើងដើម្បីរៀបរាប់អំពីប្រវត្តិនៃការអភិរក្សរូបព្រះគ្រឹស្នាទ្រភ្នំគោវធ៌ន ហើយថា នៅចុងខែមេសាឆ្នាំ ២០២២ នេះ សារមន្ទីរជាតិសម្រាប់សិល្បៈអាស៊ីនៃមជ្ឈមណ្ឌលសិល្បៈ Smithsonian នៅរដ្ឋធានីវ៉ាស៊ីនតោននឹងបើកពិព័រណ៍ដដែលនេះជូនដល់សាធារណជនទស្សនា ជាថ្មីទៀតរហូតដល់ខែកញ្ញា។
អ្នកស្រី Sonya បានបញ្ជាក់ថា៖ «នេះគឺជាឱកាសដ៏កម្រ និងពិសេសមួយដែលរូបបដិមាមានអាយុកាលដ៏យូរលង់របស់កម្ពុជារួមជាមួយនឹងរឿងរ៉ាវប្រវត្តិសាស្ត្ររបស់ប្រទេសកម្ពុជាត្រូវបានយកមកធ្វើជាប្រធានបទដ៏សំខាន់នៅក្នុងពិព័រណ៍ខ្នាតធំ និងបែបច្នៃប្រឌិតប្រកបដោយបច្ចេកវិទ្យាទំនើបដោយសារមន្ទីរធំៗទាំង ២ នេះ នៅសហរដ្ឋអាមេរិក»។
យោងតាមឯកសារសិក្សាស្រាវជ្រាវមួយរបស់នាយកដ្ឋានសារមន្ទីរនៃក្រសួងវប្បធម៌ និងវិចិត្រសិល្បៈបានបង្ហាញថាកាលពីឆ្នាំ ១៩៧៣ សារមន្ទីរសិល្បៈ Cleveland បានទិញរូបបដិមាព្រះគ្រឹស្នាទ្រភ្នំគោវធ៌ន។ ក្នុងអំឡុងពេលនោះរូបបដិមានេះ មានតែដងខ្លួន និងព្រះសិរ (ក្បាល) តែប៉ុណ្ណោះ ដោយគ្មានដៃ និងជើងនោះទេ។ ក្នុងអំឡុងពេលជិត ២ ទសវត្សរ៍ចាប់តាំងពីឆ្នាំ ២០០៥ មកសារមន្ទីរសិល្បៈ Cleveland បានសហការយ៉ាងជិតស្និទ្ធជាមួយសារមន្ទីរជាតិកម្ពុជាក្នុងកិច្ចការអភិរក្សរូបបដិមានានានៅកម្ពុជា និងនៅសហរដ្ឋអាមេរិក។
ប៉ុន្តែនៅឆ្នាំ ២០១៥ សារមន្ទីរសិល្បៈ Cleveland បានរកឃើញថាបំណែកខ្លះនៃរូបបដិមានេះមានវត្តមាននៅកម្ពុជាហើយត្រូវបានយកទៅផ្គុំនឹងរូបព្រះគ្រឹស្នាមួយទៀតដែលជាកម្មសិទ្ធិរបស់សារមន្ទីរជាតិកម្ពុជា រីឯបំណែកខ្លះនៃរូបព្រះគ្រឹស្នានៅកម្ពុជាមានវត្តមាននៅសារមន្ទីរសិល្បៈ Cleveland ឯណោះវិញ។ ការរកឃើញនេះបានក្លាយទៅជាចំណុចផ្តើមនៃចំណងមិត្តភាព និងទំនាក់ទំនងដ៏សកម្មរវាងសារមន្ទីរជាតិកម្ពុជា និងសារមន្ទីរសិល្បៈ Cleveland នៅក្នុងការបង្កើតជាពិព័រណ៍ «លាតត្រដាងព្រះគ្រឹស្នា» នេះ។ ដោយសហការរួមគ្នាសារមន្ទីរទាំង ២ បានធ្វើឱ្យរូបបដិមាព្រះគ្រឹស្នាទាំង ២ ដែលរងការបែកបាក់ទទួលបានការអភិរក្សដ៏ល្អឥតខ្ចោះតាមតែអាចធ្វើបាន៕
វីដេអូ៖