.jpg)
ការធ្វើតេស្តរហ័សរកមេរោគកូវីដ ១៩ នៅភ្នំពេញកាលពីឆ្នាំ ២០២១។ ហេង ជីវ័ន
ភ្នំពេញៈក្រោយពីគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសជូនដំណឹងពីការរៀបចំឱ្យមានការបន្ថែមនូវទីតាំងចាក់វ៉ាក់សាំងកូវីដ ១៩ ក្នុងពិធីបុណ្យចូលឆ្នាំថ្មីប្រពៃណីជាតិខ្មែរ បណ្តារាជធានី-ខេត្តចាប់ផ្តើមរៀបចំកន្លែង និងមន្ត្រីពេទ្យត្រៀមចាក់វ៉ាក់សាំងជូនប្រជាពលរដ្ឋដែលមកវត្តអារាម និងកន្លែងកម្សាន្តនានាដែលចង់ចាក់វ៉ាក់សាំង ឬដល់វេនត្រូវចាក់។
អភិបាលខេត្តកែប លោក សោម ពិសិដ្ឋ បានប្រកាសជូនដំណឹងពីការចាក់វ៉ាក់សាំងកូវីដ ១៩ តាមបណ្តាវត្តអារាម និងតំបន់កម្សាន្តសំខាន់ៗក្នុងអំឡុងពិធីបុណ្យចូលឆ្នាំប្រពៃណីជាតិខ្មែរ ចាប់ពីថ្ងៃទី ១៣-១៧ មេសា ខាងមុខនេះ។
លោកលើកឡើងថា រដ្ឋបាលខេត្តកែបបានធ្វើយុទ្ធនាការចាក់វ៉ាក់សាំងជូនប្រជាពលរដ្ឋក្នុងខេត្តជាបន្តបន្ទាប់ ដើម្បីកុំឱ្យមានការធ្លាក់ចុះនៃភាពស៊ាំក្នុងសហគមន៍។ ដោយមានការយកចិត្តទុកដាក់ពីប្រមុខរាជរដ្ឋាភិបាលផងនោះ រដ្ឋបាលខេត្តនឹងរៀបចំទីតាំងចាក់វ៉ាក់សាំងកូវីដ ១៩ ក្នុងពិធីបុណ្យប្រពៃណីជាតិខ្មែរខាងមុខនេះ នៅតាមបណ្តាវត្តអារាម និងតំបន់កម្សាន្តផងដែរ។
លោកឱ្យដឹងថា រដ្ឋបាលខេត្តបានរៀបចំទីតាំងចំនួន ៦ កន្លែងសម្រាប់ចាក់វ៉ាក់សាំងក្នុងអំឡុងពេលបុណ្យចូលឆ្នាំក្នុងនោះមានវត្តចរិយាវង្ស ប្រចាំការដោយក្រុមគ្រូពេទ្យរបស់មណ្ឌលសុខភាពអូរក្រសារ។ វត្តកំពង់ត្រឡាចប្រចាំការដោយក្រុមគ្រូពេទ្យរបស់មណ្ឌលសុខភាពព្រៃធំ។ មុខមន្ទីរទេសចរណ៍ខេត្តប្រចាំការដោយក្រុមគ្រូពេទ្យរបស់មន្ទីរពេទ្យខេត្ត។ ឆ្នេរអង្កោលប្រចាំការដោយក្រុមគ្រូពេទ្យរបស់មណ្ឌលសុខភាពអង្កោល។ វត្តភ្នំលាវប្រចាំការដោយក្រុមគ្រូពេទ្យរបស់មណ្ឌលសុខភាពពងទឹក និងវត្តព្រៃតាកុយ ប្រចាំការដោយក្រុមគ្រូពេទ្យរបស់មណ្ឌលសុខភាពចំការបី។
លោក សោម ពិសិដ្ឋ បញ្ជាក់ថា៖ «ដើម្បីបង្ការការឆ្លងជំងឺកូវីដ ១៩ និងរក្សាបានរបៀបរៀបរយសូមបងប្អូន ប្រជាពលរដ្ឋបន្តអនុវត្តនូវវិធានការ ៣ ការពារ និង ៣ កុំ តាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា»។
ចំណែកអភិបាលខេត្តបន្ទាយមានជ័យ លោក អ៊ុំ រាត្រី ក៏បានកំណត់រួចរាល់ដូចគ្នាដែរពីទីតាំង និងកាលបរិច្ឆេទនៃការចាក់វ៉ាក់សាំងកូវីដ ១៩ ក្នុងពេលចូលឆ្នាំដោយការចាក់វ៉ាក់សាំងនេះខេត្តនឹងធ្វើឡើងចាប់ពីថ្ងៃទី ១៤ ដល់ទី ១៦ ខែមេសា។ ការចាក់វ៉ាក់សាំងនេះនឹងធ្វើឡើង ក្នុងក្រុង-ស្រុក ចំនួន ១៧ ទូទាំងខេត្ត ដោយក្នុងនោះទីតាំងសម្រាប់ចាក់វ៉ាក់សាំងមានចំនួន ១៨ កន្លែង ដែលមានវត្តអារាម និងកន្លែងកម្សាន្តផងដែរ។
ជាមួយគ្នានេះ ខេត្តតាកែវក៏បានកំណត់រួចហើយផងដែរនូវទីតាំង សម្រាប់ចាក់វ៉ាក់សាំងកូវីដ ១៩ ក្នុងពិធីបុណ្យចូលឆ្នាំថ្មី ក្នុងក្រុង-ស្រុកចំនួន ១០ ដែលមានរហូតដល់ជិត ១០០ កន្លែង ទាំងក្នុងវត្តអារាម និងមណ្ឌលសុខភាពផងដែរ។
រដ្ឋបាលខេត្តតាកែវបានឱ្យដឹងថា មន្ទីរសុខាភិបាលខេត្តនឹងបើកយុទ្ធនាការចាក់វ៉ាក់សាំងជូនប្រជាពលរដ្ឋក្នុងពិធីបុណ្យចូលឆ្នាំខាងមុខនេះ រយៈពេល ៥ ថ្ងៃ គឺ ចាប់ពីថ្ងៃទី ១៣ ដល់ទី ១៧ ខែមេសា សម្រាប់អ្នកដែលមានអាយុចាប់ពី ៣ ឆ្នាំឡើងទៅដែលមិនទាន់បានចាក់វ៉ាក់សាំង កូវីដ ១៩ ដូសមូលដ្ឋាន ដូសទី ៣ និងដូសទី ៤ ទៅតាមការណែនាំរបស់ក្រសួងសុខាភិបាល។
បើតាមរបាយការណ៍របស់ក្រសួងសុខាភិបាលគិតត្រឹមថ្ងៃទី ៦ ខែមេសា ឆ្នាំ ២០២២ កម្ពុជាបានចាក់វ៉ាក់សាំងជូនប្រជាពលរដ្ឋបានជិត ១៥លាននាក់ ឬ ៩២.៧៥% ធៀបនឹងចំនួនប្រជាពលរដ្ឋ ១៦ លាននាក់នៅទូទាំងប្រទេស។ ក្រសួងបានបន្តថា សម្រាប់អ្នកដែលបានចាក់ដូសជំរុញ ឬដូសទី ៣ បានជាង ៨ លាននាក់ និងអ្នកដែលបានចាក់ដូសទី ៤ មានជាង ១ លាននាក់ហើយផងដែរ៕
